峇里 10 大最佳餐廳

Kubu Restaurant Bali 餐廳坐擁優美河畔景致，提供精緻嘅地中海同歐洲美食，吸引蜜月客同美食家專誠嚟品嚐。呢間餐廳係曼達帕麗思卡爾頓酒店 (Mandapa, a Ritz-Carlton Reserve) 嘅招牌店，位於 Raya Kedewatan 大道；而酒店位置雖然稍為遠離烏布 (Ubud) 市中心，但你都仲可以搭車同揸電單車，輕易抵達。

店家採用露天設計，用竹作為主要建築材料；身處餐廳裡面，你仲可以傾聽阿勇河 (Ayung River) 嘅潺潺流水聲添！Kubu Restaurant Bali 店名源於當地農民用嚟儲米嘅傳統小屋，裡面有 9 間繭形私人房，一共 40 個座位，環境十分浪漫。要嚟食飯，建議提前訂枱；如果想喺人氣爆燈嘅繭形私人房用餐，就更加要提前 Book 定喇！

Swept Away Restaurant 餐廳位於薩瑪亞烏布達酒店 (The Samaya Ubud) 裡面，坐落於高高嘅平台上，俯瞰住如畫河川流經烏布 (Ubud) 迷人地區，

有供應高級峇里同西方菜式，氛圍一流，食客可以喺大自然環境下，休閒咁享用餐廳嘅各式美味佳餚。

Blanco par Mandif 餐廳出品嘅印尼地道美食揉合法國高級餐廳元素，為菜式增添獨特風味。食客可以享用 7 至 9 道賣相精緻嘅菜式，仲可以任揀葡萄酒配搭添！店內另有單點菜式，啱哂細食嘅人士。

Blanco par Mandif 餐廳位於峇里文化之都，開設喺宏偉嘅布朗哥文藝復興博物館 (Blanco Renaissance Museum) 裡面，飽覽坎普安河 (Campuhan River) 舉世知名嘅靚景。店家每輪只會接待 10 位食客，私隱度十足，絕對係享受尊尚用餐體驗嘅好地方，記得提早訂枱啊！

Locavore 因為採用創新煮法同地道食材炮製美食而出名，絕對稱得上係高級餐廳，想嚟食飯一定要提前訂位！呢間餐廳設計時尚現代，開放式廚房仲可以俾你親眼見證炮製美食嘅過程添。

無論你係咪食素，Locavore Bali 都有精選試菜餐單，配搭自選葡萄酒，品味一流！推薦主菜包括日本琥珀魚生配西瓜伴西班牙西瓜菜湯泡沫，同埋慢煮牛尾配焦糖乾蔥；而店內嘅甜品都絕對不容錯過。

Cuca Restaurant 餐廳由一對夫婦主理，主打手工製西班牙 Tapas 同甜品，嚴選當地以可持續發展方式種植嘅食材，炮製出創意無限嘅菜式。長枱算得上係餐廳嘅最佳位置，你可以一邊細味 Cherkas 大廚嘅試菜菜式，一邊觀賞佢同團隊喺廚房裡面大顯身手。

Kayuputi Restaurant 係一間高級海濱餐廳，位於努沙杜瓦 (Nusa Dua) 峇里瑞吉度假村酒店 (St. Regis Bali Resort) 裡面，主打亞洲風格菜式，屢獲殊榮，為你呈獻優質亞洲風味高級美食，同埋一流葡萄酒單。

店內採用傳統皮影人偶 (wayang) 做裝飾，戶外用餐區就設有私人涼亭，附近亦都有個泳池，可以眺望海景。呢間餐廳喺 Brunch、午市同晚市時段營業，除咗供應單點美食，仲有菜式豐富嘅試菜餐單架！

Soleil at The Mulia Bali 餐廳位於努沙杜瓦 (Nusa Dua) 海岸上面，主打時尚自助式美食，店內大廳採用金、白同米色做主調，以地中海加泛亞風味嘅奢華週末晚餐同 Sunday Brunch 而聞名遠近。

其中，自助餐嘅人氣選擇有醃肉、法式芝士、海鮮，同埋各款烘焙甜點；你可以選擇坐喺露天區感受溫和海風，或者去露天花園酒廊嘅陰涼太陽傘下面，細意品嚐道道美食。

Pearl Restaurant Bali 餐廳主打正宗法國菜式，設有空曠而私隱度十足嘅花園，店家隱身喺雷吉安 (Legian) Jalan Arjuna 大街 (又名「雙六道」) 嘅盡頭，坐落於同名珍珠酒店 (Pearl Hotel) 裡面，

遠離繁忙交通道路；而花園用餐區喺黃昏會亮起藍色燈仔，掛埋燈籠，氣氛浪漫。Pearl Restaurant Bali 餐廳由法籍主廚 Jeremy Blanchet 主理，室內用餐區提供私人空間，仲設有酒吧、酒窖同廚房；經典菜式包括龍蝦湯、油封鴨同焦糖燉蛋，唔試唔得！

Cut Catch Cucina 餐廳氣派豪華，位於峇里努沙杜瓦海灘度假村索菲特酒店 (Sofitel Bali Nusa Dua Beach Resort) 裡面，有供應牛扒、海鮮、燒烤同意大利美食等等，風格多元，為你帶嚟不拘一格嘅用餐體驗。

呢間餐廳堪稱全島最優秀嘅用餐場地之一，店家嘅索菲特酒店 Sunday Brunch 更加不容錯過！

CasCades 餐廳位於峇里總督酒店 (The Viceroy Bali)，坐擁壯麗景色，俯瞰綠茵青翠嘅帕特諾河 (Petanu River) 河谷，主打高級西餐同印尼菜式。

店內環境精緻優雅，啱哂情侶食返個燭光晚餐，度過浪漫時光；而店家菜單簡約多元，有供應五香鴨脾之類嘅峇里美食，亦有加拿大龍蝦等西餐，任君選擇。