庫塔

努沙杜瓦 (Nusa Dua) 係峇里嘅全包海灘度假村，澄淨海濱上面設有一系列世界級國際連鎖酒店。由酒店出發，行幾步路就會嚟到努沙杜瓦娛樂中心，裡面嘅設計一流，有高級購物商場、頂尖設施、悉心佈置嘅花園，同埋一個 18 洞高爾夫球場。 努沙杜瓦係峇里最發達嘅度假區，而區內嘅文化景點都好值得參觀，除咗寺廟之外，仲有收藏咗印尼同太平洋藝術手工藝品嘅博物館，以及位於優美半島各處嘅獨特自然地標添！努沙杜瓦水清沙幼，氣氛夢幻，難怪會成為新婚夫妻度蜜月嘅首選勝地；有啲度假村另設兒童專用俱樂部，吸引一家大細嚟到努沙杜瓦共聚天倫，享受海灘帶嚟嘅樂趣。

無論由邊個角度睇，烏布 (Ubud) 都絕對係峇里嘅文化中心！烏布係一座傳統鄉村小鎮，設有皇家宮殿同古老寺廟，當地其中一個王室家族更加住正喺烏布！世界各地唔少出名工匠同收藏家都曾經親臨烏布，潛心創作；大街上面嘅藝術工作室同畫廊林立，當地工藝品市場仲有賣古董、木雕、工藝品、紡織品、畫作同珠寶，款式多多，令人目不暇給。 揸一陣車離開烏布，就可以直達登格萊根瀑布 (Tegenungan Waterfall)、烏布猴子森林，同埋風光秀麗嘅德哥拉朗梯田 (Tegallalang)。如果有時間，不妨參加一日遊，行吓坎普安 (Campuhan)、貝內斯 (Penestanan)、派李阿潭 (Peliatan) 同巴圖安 (Batuan) 等當地村莊，睇吓當地人點樣製作峇里工藝品，見到啱心水嘅仲可以買走添！

庫塔海灘 (Kuta Beach) 係峇里最熱鬧嘅海灘度假勝地之一，距離伍拉·賴國際機場 (Ngurah Rai International Airport) 以北大約 6 公里，而圖班 (Tuban)、雷吉安 (Legian) 同水明漾 (Seminyak) 嘅海灘都係行幾步路就到，非常方便。庫塔海灘嘅酒店喺 7 月至 8 月、年尾聖誕同新年嘅旺季期間，成日都爆滿，記住及早訂房！ 太陽落山之後，庫塔嘅夜生活變得五光十色，庫塔海灘大街 (Jalan Pantai Kuta) 同卡爾迪卡廣場大街 (Jalan Kartika Plaza) 林立住峇里最出名嘅餐廳、酒吧同夜店，精彩熱鬧。大家都鍾意喺庫塔海灘衝浪同曬日光浴，所以一定要早啲去到，霸返個靚位！庫塔中部地帶仲有純樸嘅印度教神廟，同埋地位關鍵嘅佛教寺廟，統統不容錯過。