烏布 31 種最佳玩樂方式
烏布乜嘢最出名？
烏布 (Ubud) 必遊名勝包括古老嘅寺廟、雄偉嘅歷史皇宮，綠坡同埋梯田。烏布係一座充滿文化地標嘅峇里小鎮，位於吉安亞爾縣 (Gianyar) 郊區地帶，世界上唔少知名工匠同收藏家都嚟過呢度，尋覓工作靈感。
烏布市嘅烏布大馬路 (Jalan Raya Ubud) 兩邊有好多博物館同畫廊；揸一陣車駛出鎮中心，你仲可以欣賞到截然不同嘅自然景觀同景點，著名地標有登格萊根瀑布 (Tegenungan Waterfall)、烏布猴子森林，同埋風光秀麗嘅德哥拉朗梯田 (Tegallalang)，通通都係必遊勝地！
1. 烏布猴子森林
推介： 家庭, 歷史文化, 拍照, 經濟實惠
烏布猴子森林位於烏布 (Ubud) 市中心嘅邊陲，有 700 幾隻長尾獼猴喺入面棲息。呢個自然保護區喺峇里非常出名，位置同交通都好方便，並且實行社區為本管理方式，日常管理由巴東泰格爾村 (Padangtegal) 負責。區內森林唔單止係科研基地，仲係當地嘅精神文化聖地，林內有好多神廟，吸引唔少當地村民嚟拜神祈福。烏布猴子森林又叫做巴東泰格爾聖猴森林 (Sacred Monkey Forest of Padangtegal)，官方名稱係 Mandala Wisata Wenara Wana。
位置： Jalan Monkey Forest, Ubud, Gianyar, Bali 80571, Indonesia
開放時間： 每日 08:30 至 17:30
電話： +62 (0)361 971 304
烏布猴子森林
2. 德哥拉朗梯田
推介： 拍照, 經濟實惠, 遊歷
德哥拉朗 (Tegallang) 梯田係好出名嘅觀光中途站，遊客去烏布途中，都會特登停低，喺呢片仙境打卡 Selfie。峇里保留咗歷史長達幾百年嘅傳統合作社灌溉系統 (當地稱為「蘇巴克 (subak)」)，孕育出東南亞最優美嘅梯田景觀。
德哥拉朗梯田附近，就係散發古樸優雅氣氛嘅帕庫對 (Pakudui) 村莊，你可以喺呢度搵到各式各樣嘅木製裝飾品，同埋好多神話人物嘅雕刻。德哥拉朗周圍有唔少賣手信嘅攤檔，上車繼續向烏布市中心進發之前，不妨喺度買返啲紀念品！
位置： Jalan Raya Tegallalang, Tegallalang, Gianyar, Bali 80561, Indonesia
德哥拉朗梯田
3. 象洞
推介： 歷史文化
象洞 (Goa Gajah) 係峇里上最令人讚嘆嘅考古遺址之一，全個建築群位於貝杜魯村 (Bedulu) 以西 300 米，距離烏布 (Ubud) 市中心東南大約 5 公里，憑藉一系列歷史遺跡而聞名。
行入象洞之後，沿住樓梯拾級而下，你就會參觀到滿佈文物嘅庭院，同埋源於 11 世紀嘅主洞穴。洞穴入口有一尊瞪大雙眼嘅卡拉神雕像，裡面就有好多岩壁雕刻，仲有打坐冥想嘅地方添！另一方面，象洞內有一座印度教寺廟同一個公共水池，水池喺 1954 年發掘出土，池邊綴以石雕同噴泉，令人大開眼界。
位置： Bedulu Village, Jalan Raya Goa Gajah, Ubud, Bali, Indonesia
象洞
4. 烏布皇宮
推介： 歷史文化
烏布皇宮 (Puri Saren Agung) 唔單止係烏布皇室嘅宮殿，更加係烏布最著名嘅地標之一。皇宮由國王 Tjokorda Putu Kandel (1800-1823) 下令修建，佢嘅繼承人細心保護宮內一景一物，成功保存咗呢座峇里式建築，同埋人見人愛嘅花園。
而呢度亦都係島上欣賞傳統舞蹈表演嘅主要場地之一，所以峇里嘅藝術發燒友都對皇宮相當熟悉。烏布皇宮嘅表演舞台背景搭建咗華麗嘅傳統大門同守護神雕像，當地人叫呢個獨特建築設計做「安庫─安庫 (angkul-angkul)」。每晚，敲擊樂隊都會演奏印尼甘美朗 (gamelan) 音樂，觀眾都聽到如痴如醉架！
位置： Jalan Raya Ubud No.8, Ubud, Gianyar, Bali 80571, Indonesia
開放時間： 每日 08:00 至 19:00
烏布皇宮
5. 坎普安山脊步道
推介： 家庭, 拍照, 經濟實惠, 遊歷
厭倦咗熱鬧煩囂嘅烏布公路 (Jalan Raya Ubud)，想遠離通街都係嘅時尚精品店、旅館同餐廳？不妨去坎普安山脊步道 (Campuhan Ridge Walk) 行山，做下運動丫！呢條步道全長 9 公里，起點係風景秀麗嘅根隆利巴廟 (Gunung Lebah Temple)，經過沃斯河 (Sungai Wos River) 嘅茂密山谷，再轉向帕優甘 (Payogan) 山丘。平時，步道人流唔算多，你大部分時間都可以霸哂成條路 (笑)，沿途只會偶然遇到其他登山友同緩跑客。坎普安山脊步道都算易行，而且費用全免，難怪吸引唔少人一嚟再嚟，徒步向中央高地嘅烏布小鎮進發。
位置： Jalan Raya Campuhan, Sayan, Ubud, Gianyar, Bali 80571, Indonesia
坎普安山脊步道
6. 烏布藝術市集
推介： 購物, 拍照, 經濟實惠
烏布藝術市集絕對係買手信嘅好地方，貨色包羅萬有，靚靚絲巾、薄身恤衫、雕像、風箏、手織手袋、竹籃同帽都應有盡有，仲有好多其他手工製品添！烏布藝術市集位於烏布皇宮對面，當地人叫呢個市集做 Pasar Seni Ubud，
裡面賣嘅貨品喺島上其他地方都隨處可見，當中包括印咗「峇里」字樣嘅沙灘裝同恤衫、絣織裙 (ikat)、峇里風格油畫、木雕同織籃。烏布藝術市集嘅大部分貨品都嚟自附近村落，包括彭格賽坎 (Pengosekan)、德哥拉朗 (Tegallalang)、帕揚甘 (Payangan) 同埔里亞坦 (Peliatan)。
位置： Jalan Raya Ubud, Ubud, Gianyar, Bali 80571, Indonesia
開放時間： 每日 08:00 至 17:00
烏布藝術市集
7. 布蘭科文藝復興博物館
推介： 歷史文化, 拍照
布蘭科文藝復興博物館 (Blanco Renaissance Museum) 係菲律賓藝術大師唐安東尼奧布蘭科 (Don Antonio Blanco) 嘅屋企兼工作室，起喺山頂上面，俯瞰坎普安 (Campuhan) 嘅茂密山谷；而館內收藏咗大量油畫、拼貼畫、插圖詩，仲有布蘭科嘅光刻藝術品，主題係…佢情有獨鍾嘅峇里裸女。
布蘭科文藝復興博物館全日都有導賞團；好彩嘅話，你仲會撞到 Blanco 屋企人親自帶團講解添！呢座博物館係唔錯嘅中途站，展品極具創意，充滿啟發性，館外仲有綠油油嘅花園同 Cafe，方便你喺「烏布之旅」途中坐低 hea 下。
位置： Jalan Raya Campuhan, Sayan, Ubud, Gianyar, Bali 80571, Indonesia
開放時間： 每日 09:00 至 17:00
電話： +62 (0)361 975 502
布蘭科文藝復興博物館
8. 妙音天女神廟
推介： 歷史文化, 拍照, 經濟實惠
妙音天女神廟 (Pura Taman Saraswati) 除咗係一座壯麗嘅水上寺廟，仲係烏布鎮嘅重要景點，遊覽烏布果陣，記得 Mark 低呢度啊！呢間神廟採用峇里寺廟嘅傳統建築風格，擁有優美嘅門廊同蓮花池。成個池塘嘅粉紅色蓮花盛開嗰陣，真係靚到暈架，難怪呢間廟會成為打卡熱點啦！妙音天女神廟免費參觀，但就同峇里其他寺廟一樣，要求訪客入鄉隨俗，入廟之前要喺腰間綁腰帶同戴沙龍。每晚，神廟嘅圓形劇場都會舉辦傳統舞蹈表演，千祈咪錯過！遊客可以由烏布公路主幹道側邊嘅卡姜街 (Jalan Kajeng) 入去妙音天女神廟。
位置： Jalan Kajeng, Ubud, Gianyar, Bali 80571, Indonesia
妙音天女神廟
9. 登格萊根瀑布
推介： 伴侶, 家庭, 拍照, 經濟實惠
登格萊根瀑布 (Tegenungan Waterfall) 位於烏布 (Ubud) 同峇里首府登巴薩 (Denpasar) 中間，由烏布去瀑布嘅車程 30 分鐘，沿途風景怡人，車窗兩邊都望到鄉村裡面一大片綠油油嘅稻田，令人心曠神怡。
瀑布入口除咗售票亭，仲有舖頭賣藝術品同手信，亦有當地人俗稱「warungs」嘅小食攤檔，售賣小食同凍飲；由入口處行大約 5 分鐘，就可以直達瀑布。登格萊根瀑布全年幾乎任何時間都水量澎湃，茂密樹葉映襯瀑布水流，美不勝收。
位置： Jalan Ir.Sutami, Kemenuh, Sukawati, Sukawati, Gianyar, Bali 80581, Indonesia
登格萊根瀑布
10. 峇里阿貢 Show
推介： 伴侶, 家庭, 晚間娛樂
峇里阿貢 Show (Bali Agung Show) 係糅合峇里傳奇故事嘅戲劇表演，輕快舞蹈加上鮮艷舞台服裝，配合扣人心弦嘅音樂編曲同現代燈光音響效果，就打造出一場精彩絕倫嘅藝術表演喇！呢個節目喺峇里野生動物園 (Bali Safari Park) 嘅峇里劇院 (Bali Theatre) 公演，劇院為戲劇藝術表演注入現代元素，上演傳統同現代舞蹈，仲邀請到 150 位峇里表演者，演出現代木偶戲添！
位置： Jalan By Pass Ngurah Rai, Jalan Prof. Dr. Ida Bagus Mantra No.Km.19,8, Serongga, Gianyar, Bali 80551, Indonesia
開放時間： 星期二至日 14:30 至 15:30 (星期一休息)
電話： +62 (0)361 950 000
峇里阿貢 Show
11. 峇里動物園
推介： 家庭
峇里動物園 (Bali Zoo) 佔地超過 80,000 平方米，係一片茂密嘅熱帶花園，位於西亞巴杜村 (Singapadu)，除咗種滿各式各樣嘅熱帶植物之外，仲飼養咗好多種哺乳類動物、鳥類同爬行類動物，環境舒適，氣氛輕鬆活潑，周圍行吓，人都開心哂！另一方面，園內仲有提供一系列體驗活動，小朋友可以試吓騎馬仔、同動物一齊影吓靚相、參加戶外探險活動等等。峇里動物園絕對係一家大細由峇里南端去烏布途中嘅歇腳點，方便又順路！
位置： Jalan Raya Singapadu, Sukawati, Gianyar, Bali 80582, Indonesia
開放時間： 每日 09:00 至 17:00
電話： +62 (0)361 294 357
峇里動物園
12. 巴圖安村
推介： 歷史文化
巴圖安村 (Batuan Village) 完美結合咗傳統峇里建築同自然環境，村內居民喺日常生活中堅守傳統習俗同儀式。只要親眼見證，你都會俾佢哋呢份熱情同執著感動到！巴圖安村大部分村民都係傳統工匠或者藝術家，叫呢度做「藝術村」名副其實。
巴圖安 (batuan) 或者巴圖蘭 (baturan ) 嘅意思分別係「好似石頭咁堅硬」同埋「用餐石」，其實都係講緊一個古老巨石傳統。好耐之前，村民會將豎起嘅石頭劃成聚會同祭禮場所，而成條村裡面到處都見到呢啲立石。如果你想了解昔日峇里嘅面貌，好多峇里人都會建議你參觀巴圖安村。
位置： Batuan, Sukawati, Gianyar, Bali, Indonesia
巴圖安村
13. 卡維山
推介： 歷史文化, 拍照
卡維山 (Gunung Kawi) 係 11 世紀峇里吉安雅 (Gianyar) 攝政時期興建嘅印度教寺廟建築群，要行 300 級石階落到風景秀麗嘅峽谷，先可以嚟到！呢度別有洞天，岩壁上刻咗 10 座紀念碑，每座高 7 米，其中 4 座建於西側，5 座位於河邊以東，而第 10 座就喺正峽谷南面對岸。
事實上，呢啲紀念碑係國王妃 嬪同皇親國戚嘅紀念壇。卡維山聖所會舉辦宗教儀式，當地人亦定期嚟呢度向神明、古代君王同皇族家眷拜祭致敬。
位置： Banjar Penaka, Tampaksiring, Gianyar, Bali 80552, Indonesia
卡維山
14. 卡維山神廟
推介： 歷史文化, 拍照, 經濟實惠
卡維山神廟 (Gunung Kawi Sebatu Temple) 係峇里最靚嘅寺廟之一，但亦都數一數二冷門，實在匪夷所思！呢間寺廟別名係 Pura Tirta Dawa Gunung Kawi Sebatu，青翠花園裡面開闢咗一個蓮花池，池塘養咗唔少鯉魚；而水池環繞住古老神廟，池水仲係天然溫泉水嚟架！卡維山神廟建築群坐落於德哥拉朗 (Tegallalang) 嘅西巴圖 (Sebatu) 高地村莊，距離烏布市中心東北大約 12 公里。
位置： Sebatu, Tegallalang, Gianyar, Bali 80511, Indonesia
卡維山神廟
15. 魯 基桑美術館
推介： 歷史文化
魯基桑美術館 (Museum Puri Lukisan) 嘅字面意思係「繪畫宮殿」，而佢係峇里歷史最悠久嘅藝術博物館嚟架！呢間博物館成立於 1956 年，由 6 幢建築物組成，展示傳統峇里繪畫同木雕，著名展品包括 Leo Haks 收藏系列嘅戰前峇里油畫、藝術家 I Gusti Nyoman Lempad 嘅大師級作品，同埋皮影人偶繪畫系列。魯基桑美術館嘅第四幢建築物名為「創始人畫廊 (Founders Gallery)」，專門介紹博物館嘅歷史，仲會舉辧臨時展覽，展出本地藝術家作品添！
位置： Jalan Raya Ubud, Ubud, Gianyar, Bali 80571, Indonesia
開放時間： 每日 09:00 至 18:00
電話： +62 (0)361 971 159
魯基桑美術館
16. 盧丹那博物館
推介： 歷史文化
盧丹那博物館 (Museum Rudana) 展出千挑萬選嘅傳統同當代峇里繪畫佳作，引人入勝！呢間 2 層高嘅博物館由峇里藝術收藏家 Nyoman Rudana 於 1995 年創辦，館內展出現代印尼藝術珍品，包括著名藝術家 Affandi、Gunarsa 同 Wianta 嘅心血結晶，仲有才華橫溢嘅年輕藝術家 Boyke Aditya、Nyoman Erawan 同 Made Budhiana 嘅作品。另一方面，盧丹那博物館亦保存咗已故畫家 Antonio Blanco 嘅幾件藝術品，不容錯過！
位置： Jalan Cok Rai Pudak 44, Ubud, Peliatan, Gianyar, Bali 80571, Indonesia
開放時間： 每日 09:00 至 17:00
電話： +62 (0)361 975 779
盧丹那博物館
17. 內卡美術館
內卡美術館 (Neka Art Museum) 係藝術畫廊兼博物館，由峇里藝術發燒友 Wayan Suteja Neka 一手創辦，建於 1976 年，至 1982 年由文化教育部主持揭幕儀式。呢間博物館由 6 幢建築物組成，展出一系列繪畫同雕塑作品。參觀畫廊之後，不妨去充滿峇里風情嘅花園行一轉！內卡美術館位於凱德瓦當村 (Kedewatan) 嘅坎普安大街 (Jalan Raya Campuhan)，距離烏布市中心西北大約 2.5 公里。
位置： Jalan Raya Campuhan, Kedewatan Village, Ubud, Gianyar, Bali 80571, Indonesia
開放時間： 星期一至六 09:00 至 17:00；星期日 12:00 至 17:00
電話： +62 (0)361 975 074
內卡美術館
18. 烏布根隆利巴廟
推介： 伴侶, 家庭, 歷史文化, 拍照, 經濟實惠
根隆利巴廟 (Pura Gunung Lebah Temple) 係烏布 (Ubud) 市中心地標之一，位於烏布主街嘅西端，寺名喺古老峇里方言嘅字面意思係「山谷寺廟」，歷史可以追溯到 8 世紀，同巴杜爾神廟 (Batur Temple) 有密切嘅靈性關係。無他，皆因根隆利巴廟正正係供奉巴杜爾女神！成個寺廟群裡面有 3 個庭院，另加好多個休息亭，俾信眾坐下抖下，非常貼心；而甘美朗館 (gamelan pavilion) 仲會公演傳統舞蹈添！
參觀根隆利巴廟嘅最佳時間，就係俗稱「神明奉獻 (Piodalan)」嘅寺廟成立週年紀念日。根據峇里 Pakuwon 曆法，一年有 210 日，所以「神明奉獻」慶典每 210 日舉行一次，每次都喺名為「辛塔周 (Wuku Sinta)」嘅星期三上演；而呢一日亦適逢峇里慶祝巴格威西節 (Pagerwesi Day)，場面熱鬧！
位置： Jalan Raya Ubud No.23, Sayan, Ubud, Gianyar, Bali 80571, Indonesia
烏布根隆利巴廟
19. 培拿它蘭薩希廟
推介： 歷史文化, 拍照, 經濟實惠
培拿它蘭薩希廟 (Pura Penataran Sasih) 又叫做「月亮神廟」，因為寺內收藏咗古代青銅定音鼓「培京之月 (Moon of Pejeng)」。「培京之月」大約 2 米長，歷史可以追溯至公元前 300 年，係東南亞最大嘅青銅定音鼓。而培拿它蘭薩希廟係印度教寺廟，源於 1266 年，仲曾經係培京皇朝 嘅國家寺廟嚟架！
廟內嘅主庭院正中央放咗一尊象頭神 (Ganesh) 石雕坐像，入口前面有一個現代計時碼表，同埋幾尊印度教雕塑。培拿它蘭薩希廟位於烏布 (Ubud) 以東大約 6.5 公里。
位置： Jalan Raya Tampaksiring, Pejeng, Tampaksiring, Gianyar, Bali 80571, Indonesia
培拿它蘭薩希廟
20. 莎海安提加廟
推介： 伴侶, 家庭, 歷史文化, 拍照, 經濟實惠
莎海安提加廟 (Pura Samuan Tiga) 係烏達亞那‧瓦爾瑪德瓦 (Udayana Warmadewa) 皇朝嘅皇家寺廟，被視為天神、神靈同聖人會面嘅重要場所。每年四月左右，適逢名為 Purnama Kadasa 嘅第十個滿月，呢度會舉辦峇里著名嘅印度教儀式 Siat Sampian，場面非常熱鬧。
莎海安提加廟依水而建，旁邊就係潘得河 (Pande River) 同特珍丁河 (Tegending River)，周圍種滿神聖嘅榕樹同牛奶樹。神廟裡面有 7 個庭院，由牆壁同大閘分隔開，相互之間有樓梯連接最入面嘅庭院，而呢度被視為 3 位聖靈嘅會堂，地位神聖，高人一等！
位置： Jalan Raya Bedulu, Blahbatuh, Gianyar, Bali 80581, Indonesia
莎海安提加廟
21. 桑格猴子森林
桑格猴子森林 (Sangeh Monkey Forest) 係灰色長尾食蟹獼猴嘅天然庇護所，佔地 6 萬平方米，位於同名村莊嘅肥沃林地上，森林裡面嘅巨型原始肉荳蔻樹足足有 40 米高架！
猴子森林一直被視為聖地，獼猴棲息喺樹林深處或者修建神廟 (Pura Bukit Sari) 裡面。呢座荒廢咗嘅神廟建於 17 世紀，遺址隱藏喺森林深處。桑格猴子森林位於峇里首都登巴薩 (Denpasar) 以北大約 20 公里。
位置： Jalan Brahmana, Sangeh, Badung, Bali 80353, Indonesia
開放時間： 每日 08:00 至 17:00
桑格猴子森林
22. 面具及布偶塞提雅達瑪大屋
推介： 家庭, 歷史文化, 拍照, 經濟實惠
面具及布偶塞提雅達瑪大屋 (Setia Darma House of Mask & Puppets) 係一間別具特色嘅博物館，旨在保護印尼最多姿多彩嘅文化遺產。所以，好多峇里中部觀光團都會將呢度放入文化教育行程之中。美術館收藏咗嚟自印尼群島、非洲、中國、拉丁美洲同歐洲大約 1,300 個面具，同埋超過 5,000 個木偶，展品分別喺 4 個傳統爪哇風格古董展館內展出。
位置： Jalan Tegal Bingin, Mas, Ubud, Kemenuh, Gianyar, Bali 80582, Indonesia
開放時間： 每日 08:00 至 16:00
電話： +62 (0)361 898 7493
面具及布偶塞提雅達瑪大屋
23. 塔曼努沙文化公園
推介： 伴侶, 家庭, 歷史文化, 拍照
塔曼努沙文化公園 (Taman Nusa Cultural Park) 係吉安雅 (Gianyar) 嘅露天博物館，佔地 10 萬平方米，擁有超過 60 間重新打造嘅正宗傳統房屋，館內矗立咗前領導人嘅雕像，仲有婆羅浮屠寺 (Borobudur Temple) 等印尼地標建築物嘅複製品。
喺博物館走一轉，了解下印尼眾多少數族裔嘅生活方式同文化，包你大開眼界！塔曼努沙文化公園位於吉安雅嘅斯丹 (Sidan) 村，距離烏布 (Ubud) 市中心以東大約 45 分鐘車程。
位置： Jalan Taman Bali, Banjar Blahpane Kelod, Sidan, Gianyar, Bali 80582, Indonesia
開放時間： 每日 09:00 至 17:00
電話： +62 (0)361 952 952
塔曼努沙文化公園
24. 聖泉廟
推介： 歷史文化, 拍照
聖泉廟 (Pura Tirta Empul) 係峇里舉足輕重嘅寺廟群，出名在擁有聖水湧流嘅山泉。寺廟外圍嘅淨化浴池、水池同魚塘全靠呢個山泉供水，水流最終會匯入圖卡德‧帕克努薩河 (Tukad Pakerisan River)。寺內中央庭院設有一個淨化浴池，池內有 13 個精雕細琢嘅噴水口。好多遊客都會想試下淨化沐浴儀式；不過，呢啲儀式唔單止有好多繁文縟節，而且只限朝聖者同信眾參加架咋！
同峇里所有寺廟一樣，訪客入廟要著裝整齊，先可以入廟參觀，以示尊重。溫馨提示：女士 M 到嗰幾日，係唔准入任何寺廟或聖地架！姊妹們又唔使灰，你哋都可以照樣參觀寺外嘅景點。
位置： Jalan Tirta, Manukaya, Tampaksiring, Gianyar, Bali 80552, Indonesia
開放時間： 每日 09:00 至 17:00
聖泉廟
25. 耶普魯浮雕
推介： 伴侶, 家庭, 歷史文化, 拍照, 經濟實惠
建於 14 世紀嘅耶普魯浮雕 (Yeh Pulu) 歷史遺址位於帕特諾河 (Petanu River) 同帕克努薩河 (Pakerisan River) 之間，全個古老建築群嘅岩石雕刻都描繪住「wayang」 (皮影人偶) 故事角色同平民百姓，重現峇里早期鄉村生活嘅面貌。耶普魯浮雕以北大約 200 米有一個神聖浴池，雕刻咗唔少自然主義浮雕，其中最矚目嘅就係象頭神 (Ganesh) 浮雕，而騎兵、苦行僧同一尊女性坐像浮雕亦都同樣吸睛。
位置： Jalan Yeh Pulu Blahbatuh, Bedulu, Gianyar, Bali 80581, Indonesia
耶普魯浮雕
26. 阿爾瑪美術館
推介： 歷史文化, 拍照, 經濟實惠
烏布阿爾瑪美術館 (Agung Rai Museum of Art) 集畫廊、文化中心同住宿於一身，由峇里企業家兼藝術收藏家 Anak Agung Gde Rai 創立，兩座主要大樓裡面有展覽廳、書店同圖書館，舉辦各類話劇表演、藝術班同文化工作坊；
常設展覽就有展出峇里、印尼同外國藝術家嘅繪畫珍品，最具代表性嘅珍藏包括歷史追溯到 1930 至 1940 年代巴圖安 (Batuan) 藝術家嘅大師級作品、19 世紀爪哇藝術家 Raden Saleh 同 Syarif Bustaman 嘅大作，以及卡瑪桑派 (Kamasan) 嘅一系列樹皮畫。
位置： Jalan Raya Pengosekan Ubud, Ubud, Gianyar, Bali 80571, Indonesia
開放時間： 每日 09:00 至 18:00
電話： +62(0)361 976 659
阿爾瑪美術館
27. 雕塑宮博物館
推介： 歷史文化
雕塑宮博物館 (Gedong Arca) 展出超過 3,000 件考古出土文物，當中包括工藝品、石器工具，仲有舊石器時代同前印度教青銅時代嘅刀峰，最矚目嘅展品非「培京之月 (Moon of Pejeng)」莫屬。呢個青銅定音鼓係全球體積最大嘅青銅時代文物之一，據聞早喺公元前 300 年左右製造，歷史悠久！雕塑宮博物館位於烏布市中心以東大約 6 公里，免費入場。
位置： Jalan Raya Tampaksiring, Bedulu, Blahbatuh, Gianyar, Bali 80581, Indonesia
開放時間： 星期一至五 07:30 至 16:00 (週末休息)
電話： +62 (0)361 942 354
雕塑宮博物館
28. 巴亞德峇里生態探險
推介： 遊歷
峇里生態探險 (Bali Eco Adventure) 係一個村莊生態旅遊計劃，由德哥拉朗村 (Tegallalang) 嘅巴亞德 (Bayad) 社區倡導創立，場地距離烏布主要樞紐以北大約 13 公里。登山團沿途可以欣賞稻田美景，同埋峇里中部嘅山谷景觀，難怪大受自然發燒友同遊客歡迎啦！你仲可以跟住導遊穿越茂密森林同本地種植園，行入山腳下面建於 11 世紀嘅迷宮山洞。鍾意觀光探險嘅話，就唔好錯過喇！
位置： Jalan Sentanu No. 9.Bayad, Tegallalang, Gianyar, Bali 80561, Indonesia
電話： +62 (0)851 0087 3603
巴亞德峇里生態探險
29. 烏布 Lempad House
推介： 歷史文化, 拍照
Lempad House (Lempad of Bali House) 係烏布嘅歷史遺跡，古色古香，本來係屬於已故峇里藝術家兼建築師 I Gusti Nyoman Lempad 嘅峇里民房。呢位建築師好出名，烏布好多皇宮同寺廟都係佢設計㗎。Lempad 仲係畫家添！當地民間傳說啟發咗佢創出別樹一格嘅線條畫，而佢嘅作品至今仍然對峇里藝術發展有深遠影響。Lempad House 免費入場。
位置： Jalan Dewisita, Ubud, Gianyar, Bali 80571, Indonesia
電話： +62 (0)361 973 302
烏布 Lempad House
30. 峇里梅森叢林越野車
推介： 遊歷
想玩刺激活動？不妨租用梅森叢林越野車 (Mason Jungle Buggies)，坐住重型全地形車，喺德哥拉朗 (Tegallang) 嘅茂密高地沿住叢林路線驅車飛馳，享受極速快感！你可以任揀單座或者雙座越野車，而全部車款都配備 570cc 引擎，兼具四驅車性能。越野路線全長大約 4.5 公里，起點同終點都係附近嘅 Koko Bambu 餐廳。溫馨提示：司機必須持有有效駕駛執照，而乘客必須年滿 12 歲。
位置： Jalan Raya Taro Tegallalang, Taro, Tegallalang, Gianyar, Bali 80561, Indonesia
開放時間： 每日 09:00 至 17:00
電話： +62 (0)361 721 480
峇里梅森叢林越野車
31. 坦帕克西林總統府
推介： 歷史文化, 拍照
坦帕克西林總統府 (Tampaksiring Presidential Palace) 建於山頂之上，佔地 700 米，俯瞰山下嘅坦帕克西林村 (Tampaksiring)。1957 年，總統蘇卡諾 (Ir. Soekarno) 倡議興建印尼獨立後嘅第一座總統府，而呢座總統府至今依然辦公運作，成個建築群由 5 幢主要建築組成，其中 2 幢由於地勢所限而俾山溝隔開，所以當局搭建咗長 40 公里嘅橋樑連接大樓，同埋叫做「pendopo」嘅會議室。有興趣參觀坦帕克西林總統府？訪客必須提交正式申請，先可以入去裡面架！當然，你亦都可以喺正門外面，欣賞下大樓外觀。
位置： Jalan Dr. Ir.Soekarno, Manukaya, Tampaksiring, Gianyar, Bali 80552, Indonesia
開放時間： 星期一至五 07:30 至 16:00 (週末休息)
電話： +62 (0)361 901 400
坦帕克西林總統府
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。