釜山 11 大最好玩活動

梵魚寺 (Beomeo-sa) 係韓國最重要嘅神社之一，位於金井山東緣，遠離城市喧囂。寺內嘅大雄殿 (Daeungjeon Hall) 由朝鮮王朝留存到而家，算係完好無缺嘅建築典範；

而你仲可以參觀一柱門 (Iljoomoon Gate)—呢座 3 層高嘅寶塔源於 9 世紀，歷史悠久！雖然梵魚寺距離城市唔多遠，但係就有種隱居氣氛，吸引想暫離都會、放鬆一下嘅遊客。

釜山市立美術館係當代藝術發燒友嘅必遊之地，全館分為 5 層，由展覽廳、教育室同檔案館組成；而雕塑公園就位於建築物外面。

如果你想仔細欣賞同感受韓國現代藝術氣息，不妨預留大約 2 至 3 個鐘，專心漫遊！

太宗台 (Taejongdae) 係市內最受歡迎嘅休閒區之一！呢片自然公園以太宗武烈王命名，昔日係帝王練習射箭嘅休憩區，除咗具有文化意義之外，亦係欣賞韓國偏遠島嶼景色嘅最佳去處。

太宗台喺岩石峭壁上面設有步道，可以俾旅客俯瞰釜山市同大馬島嘅靚景；而太宗台燈塔底部嘅石面平地配備枱凳，你可以一邊盡覽海景，一邊品嚐新鮮海產。

龍頭山公園 (Yongdusan Park) 位於釜山市中心，坐擁市內幾個最重要嘅地標，你可以由 120 米高嘅釜山塔頂飽覽壯觀景色；而公園裡面設有 2 座博物館：世界民間樂器博物館珍藏咗唔少傳統樂器，世界模型船展覽館就囊括 80 幾艘韓國帆船，任你細賞。

另一方面，龍頭山公園亦係當地人享受戶外活動嘅好去處，慢跑、踩單車、野餐，以至欣賞青蔥綠樹、亭台樓閣同韓國名人雕像等等，全部都係賞心樂事。由 3 月到 11 月，逢星期六下晝都有傳統節目喺公園上演。

海東龍宮寺 (Haedong Yonggungsa Temple) 係位於釜山東北端嘅佛教寺廟，建於 1376 年，屬於韓國少數起喺海邊嘅佛寺之一，一側飽覽東海靚景，另一側就盡攬壯麗山脈風光。

寺內珍藏咗幾十座雕塑、雕像同畫作，其中又以「學業成就佛」同「得男佛」最出名。適逢農曆新年同佛誕節 (農曆 4 月) 慶祝活動期間，海東龍宮寺建築群嘅各個角落都會點起幾百個紙燈籠，明亮璀璨。

松亭海灘 (Songjeong Beach) 喺釜山市內算係面積比較細，但係就因為水淺沙幼而大受家庭客歡迎。呢片全長 1.2 公里嘅海灘設有一個碼頭，有電動船出租，而夏天亦都有開辦遊輪之旅。

「松亭」正正係松亭海灘嘅熱門觀景點，黃昏時份可以飽覽日落靚景；另一方面，呢片海灘仲係韓國國內少數允許飲酒嘅公共場所之一，引嚟眾多商販擺檔賣啤酒同小食，全日無休。

釜山以坐擁眾多遠足徑而聞名，當中最大優點在於—市內犯罪率偏低，就算小徑相對偏僻，亦都唔使擔心安全問題。你可以喺城市附近嘅山脈一帶，搵到數一數二嘅出色遠足徑；

而釜山最受歡迎嘅遠足徑就由南門 (搭纜車就去到) 經過北門，以梵魚寺 (Beomeosa Temple) 為終點。

海雲台海灘 (Haeundae Beach) 係釜山水族館同好多個休閒區嘅所在地，每年 6 月至 7 月都會相當擠迫，所以要及早 Plan 定行程！

海灘沿岸林立商舖、餐廳同住宿，由豪華酒店到賓館都有。皆因海雲台海灘擁有韓國數一數二嘅遊艇碼頭，致令「揚帆出海」成為當地熱門活動之一。

札嘎其市場 (Jagalchi Market) 係韓國最大型嘅海鮮市場之一，場外路邊往往堆放住一個又一個木箱，展出各種各樣嘅新鮮魚類同乾貨，當中包括鯖魚、海鞘同蟹等。

另一方面，釜山魚市場亦係體驗繁華港口小鎮生活嘅好地方，不妨喺呢度同當地人交流下，了解地道文化，再喺留步期間品嚐得意又好味嘅海鮮菜式！

40 階梯文化觀光主題街嘅宗旨係紀念朝鮮戰爭之後嘅釜山文化，成條街長 450 米，飾有數之不盡嘅燈柱、雕塑同銅像，突顯昔日農民嘅艱辛生活。

呢處名勝又簡稱為「40 階梯」，緊密連接市內其他地方，記得順道去中央洞貿易中心附近，遊覽和平之門—嗰度點咗一盞燈仔，投射光線喺 40 階梯文化觀光主題街上面，象徵和平。