釜山 6 大購物好去處

釜山鎮市場 (Busanjin Market) 位處室內，設有幾百間小店，用合理價格出售時裝、紡織品同紀念品，亦係搜羅現成韓服 (hanbok；即韓國傳統服飾) 嘅最好去處之一。好多當地人都會嚟呢座購物中心買整衫嘅材料，舉凡各種印花絲綢、人造絲、棉布同緞布等等，統統都可以喺呢度搵到！要去釜山鎮市場，最方便嘅方法係搭地鐵 1 號線到凡一洞 (Bumil-dong) 站，由 1 號出口出站，就可以直達。

BIFF 廣場係一條 428 米長嘅街道，兩旁林立戲院、時裝店同韓國化妝品店，入夜之後更加朝氣勃勃，有五彩繽紛嘅燈光裝飾周圍嘅樹木同攤檔，璀璨奪目。場內商品價格相對實惠，但係如果要喺比較時尚嘅商舖買嘢，消費就可能會高少少。好多當地後生仔都鍾意去 BIFF 廣場 Gathering 同行街，尤其是大時大節嗰陣，呢度更加熱鬧！

國際市場 (Gukje Market) 係釜山數一數二嘅大型市場，位處室外，裡面有幾百個商販營業，售賣時裝、食品、手工藝品，甚或工業用品都搵得到！貴為釜山市內最優秀嘅購物場所之一，國際市場仲同區內幾個規模比較細嘅市場相連，當中包括富平市場 (Bupyeong Market) 同罐頭市場 (Kkangtong Market)。要嚟國際市場，路程相對輕鬆容易，只要搭地鐵 1 號線到札嘎其 (Jagalchi) 站，然後由 7 號出口出站，就可以直達。

札嘎其市場 (Jagalchi Market) 係位於釜山中區 (Jung-gu) 嘅海鮮市集，你可以喺場內搜羅 (同品嚐) 新鮮海產！市場一樓林立售賣鮮魚、鰻魚、鮑魚同蟹嘅攤位，而二樓就有賣海味；

較高樓層仲開設咗唔少餐廳，大多數供應當地菜式，尤其是魚生更加係必試之選！你可以乘搭地鐵 1 號線到南浦洞 (Nampo-dong) 站，再行 5 分鐘左右，就會嚟到市場。

樂天免稅店係韓國主要嘅連鎖店之一，位於釜山市中心，佔據樂天百貨其中兩層。嚟到呢度，你可以用比較低嘅價格買到入口品牌商品，由香煙、酒類、手袋到化妝品等等，都應有盡有。

樂天免稅店亦鄰近同名嘅五星級酒店、幾間餐廳同一間戲院，非常方便。