濟洲 15 大最好玩嘅活動

天地淵瀑布 (Cheonjiyeon Waterfall) 係濟州最出名嘅瀑布之一，意指「天與地之間嘅聯繫」。區內有一條風景優美嘅小徑，可以直通瀑布；如果喺夜晚遊覽嘅話，你仲會見到岩石結構上面亮著燈光，璀璨耀眼。

呢道 22 米高嘅瀑布由主瀑布區湧出水流，之後分成幾條比較細嘅小溪，河水湧入由 2 個水壩仔形成嘅人工水池裡面，水花就唔會溢出喇。

民俗自然歷史博物館分為 4 個展廳，涵蓋民俗、歷史、自然同特殊資源等主題，為你送上了解濟州舊史嘅絕佳途徑。館內展出海島上面發現嘅動植物仿製品，另外仲有展廳，作為視聽室用途。

濟州民俗村博物館盡展島上豐富嘅文化遺產同民俗特色，佔地超過 150,000 平方米，裡面有大約 117 間傳統房屋，陳列眾多文物，當中包括數以千計嘅民間用品，用木、鐵同竹製成。

你可以借用語音導賞機，了解韓國歷史、文化同信仰知識。如果要行勻哂濟州民俗村博物館嘅各個專區，大約需要 4 個鐘。

哦！雪綠茶博物館 (Osulloc Tea Museum) 好適合有意了解韓國茶藝傳統嘅旅客參觀。呢座展館同「哦！雪綠西廣茶園 (Seogwang Tea Planation)」對望，而後者嘅歷史可以追溯到 1979 年。館內展廳有展出朝鮮王朝嘅茶具同文物；另外仲設有工作坊，講解種茶、包裝同綠茶供應鏈嘅各個工序。

而你亦都可以喺禮品店買手信，再喺博物館嘅瞭望台欣賞濟州郊區美景。行到餓餓哋，哦！雪綠茶博物館有供應各種小食同飲品，包括綠茶雪糕、蛋糕同茶 Latte，你一定可以大快朵頤啦！

濟州泰迪熊博物館係全球少數允許遊客買展品嘅博物館之一，館內陳列咗世界上最獨特嘅啤啤熊—揀啱心水展品？咁就要即場購買，增加個人珍藏喇！

泰迪熊博物館以遊客同外國收藏家為主要客路，喺呢方面表現都唔錯，成日吸引到注重博物館嶄新概念嘅旅客慕名而來。濟州泰迪熊博物館嘅入場費大約係每位成人 KRW10,000，每位兒童 KRW8,000。

萬丈窟 (Manjanggul Lava-Tube Cave) 係聯合國教科文組織世界文化遺產，全長 7 公里，當中只有 1 公里向公眾開放。呢啲地道由區內歷年火山活動衍生出嚟，裡面某啲部分嘅高度更加係達到 23 米！

萬丈窟係數一數二嘅人氣地標，你可以由舊西歸浦巴士總站搭巴士過嚟，車程大約需要 2 個鐘；落車之後再行多 30 分鐘，就會嚟到萬丈窟。

如美地植物園 (Yeomiji Botanical Garden) 位於中文度假村裡面，由一棟室內場館同埋好多個展廳組成，展示不同類型嘅植物，由仙人掌、熱帶水果、睡蓮到各種花卉等等，一共珍藏咗大約 2,000 種珍稀植物同 1,700 種繁花樹木。呢個花園佔地 1,100 平方米，一向被譽為全亞洲環境最優美、修整最完善嘅室內花園之一。

濟州係位於朝鮮半島西南角落嘅火山島，而潛水艇之旅就係帶你盡覽小島多元水底世界嘅最佳方式之一，旅程通常喺大約 30 米深嘅水底進行，橫越 2.8 公里嘅距離。海底充滿五顏六色嘅珊瑚，仲有各種各類嘅魚，同埋迷人嘅水底雕塑，賞心悅目。

性愛樂園 (Love Land) 係濟州美術館附近奇特而火辣嘅景點，以戶外主題公園形式經營，創於 2004 年，裡面有大約 140 尊由首爾大學建築系學生創作嘅露骨色情雕塑。如果你帶埋小朋友嚟，場內設有兒童遊樂場，可以分散細路哥嘅注意力，俾你好好遊覽一番。

唔清楚性愛樂園雕塑背後嘅概念？咁只要記住一個重點就得：千祈唔好同阿爸阿媽一齊嚟！性愛樂園係同親密朋友度過愉快時光嘅好地方，而你哋仲可以喺度影到相當搞笑嘅相添。部分雕塑令人目瞪口呆，自問個性 Open 嘅你，一定會喺樂園裡面玩得盡興！

涉地可支 (Seopjikoji) 係韓國最出名嘅海角之一，主要係因為呢度同附近一帶曾經做過韓國幾部電視劇嘅場景，包括《隔世琴緣》、《真愛賭注》同《一千零一夜》。

遊覽涉地可支嘅最佳時節係 4 月，到時油菜花盛開，滿目燦爛；而山頂 4 米高嘅位置仲屹立住挾才燈塔消防站，係欣賞海景嘅好地方。

城山日出峰 (Seongsan Ilchulbong) 係徒步旅行同觀賞日出嘅熱門景點；不過，山頂大部分時間都罩住濃霧，「旭日東升」嘅靚景未必日日都見到。雖然係咁，但係登山過程依然相當好玩，成條登山徑上面有近 600 級樓梯，挑戰你嘅體力—記得帶埋大量食水、保暖衣物同小食，先至可以盡情享受登山過程架！

正月大滿月野火慶典 (Jeongwol Daeboreum) 係島上迄今最具代表性嘅活動之一，喺 95 號公路進行，象徵豐收—慶典儀式重現當地農民為咗驅除害蟲而焚燒雜草嘅舉動，通常喺大滿月 (韓國當地節日) 嗰陣上演，

確切日期據本地曆法而有啲分別，一般介乎 2 月初至 3 月之間。慶典期間，你可以投入民間遊戲、市集、舞蹈同音樂會之中；另外仲有火炬燃點儀式同煙花表演，千祈咪錯過！

濟州迷你樂園展示世界各地地標建築嘅微型複製品，你可以喺呢度搵到嚟自 50 個國家/地區超過 115 座名勝同聯合國教科文組織世界文化遺產，當中最出名嘅包括比薩斜塔、泰姬陵同艾菲爾鐵塔。

呢個合家歡景點仲開辦咗 30 分鐘嘅工作坊，教遊客製作 T 恤、手袋同手巾仔等等。濟州迷你樂園嘅入場費大約如下：每位成人 KRW9,000；每位青少年 KRW7,000；每位兒童 (3 歲以上) KRW5,000。