愛丁堡 10 大最好玩活動

愛丁堡最出名嘅係乜嘢?

    蘇格蘭首府愛丁堡嘅吸引之處在於壯麗建築,舊城區嘅宏偉哥德式地標同鵝卵石街道相映成趣,自然令愛丁堡入選「英國最靚城市」名單!不過,愛丁堡都有黑暗嘅一面:喺歷史長河之中,佢滿載女巫傳說,亦經歷過重大戰役,不妨參加導賞團,聽吓導遊介紹愛丁堡嘅神話同故事!

    愛丁堡市中心相當細,但係啲路就好斜,行上舊城區皇家大道 (Royal Mile),都夠你消耗唔少卡路里喇 (笑~)。夏天係遊覽愛丁堡嘅最佳時機,因為市內各地都會舉辦節慶,花園同自然空間遍佈每個角落,處處溫暖明媚!

    愛丁堡最好玩嘅活動係乜嘢?

    1

    暢遊皇家一英里

    遨遊愛丁堡舊城區名勝

    愛丁堡舊城區 (Edinburgh Old Town) 嘅路彎彎曲曲,同時散發出城市個性,可以話係蘇格蘭首都嘅歷史相薄,亦都係旅遊同貿易心臟地帶,古蹟名勝隨處可見,當中包括聖吉爾斯大教堂 (St. Giles’ Cathedral)、荷里路德宮 (Holyroodhouse Palace),仲有梗係唔少得坐落高山嘅愛丁堡城堡 (Edinburgh Castle) 啦!除此之外,喺你身邊亦都唔難搵到手信店、古樸酒吧,同埋各式各樣嘅特色活動。

    以前,要出入呢個小城區,係要俾過路費架—換句話講,窮人根本冇可能走出社區!想探索呢段有趣歷史,不妨靠雙腳踏遍歷史嘅每一步。嫌行程唔夠「地道」?只要 Book 定皇家一英里 (Royal Mile) 大道附近嘅酒店,你肯定會有最「貼地」嘅體驗!

    地點: Royal Mile, Edinburgh, UK

    • 伴侶
    • 家庭
    • 歷史文化`
    • 拍照
    • 經濟實惠
    2

    必睇景點:愛丁堡城堡

    遊歷皇座宮,一睹蘇格蘭皇冠珠寶

    愛丁堡城堡 (Edinburgh Castle) 坐落喺城堡岩 (Castle Rock) 頂巔,傲視市內每個角落。十幾個世紀以嚟,呢座城堡一直屹立不倒,悠久歷史冠絕英國,喺漫長歲月之中,細訴同愛丁堡唔少地方一樣咁輝煌悲壯嘅故事。

    不妨去城堡行番轉,了解英國曾經遭逢嘅深夜圍城激戰!幾百年嚟,堡內嘅皇室大宴會廳 (The Great Hall) 舉辦過大大小小嘅皇室慶典;行過華麗嘅會客室,每啖空氣都好似洋溢住莊嚴氣息。

    地點: Castlehill, Edinburgh EH1 2NG, UK

    開放時間: 每日 09:30 至 17:00

    電話: +44 (0)131 225 9846

    地圖
    • 歷史文化`
    • 拍照
    3

    觀賞藝穗節表演

    睇下棟篤笑,開心笑返餐

    愛丁堡國際藝穗節 (Edinburgh Festival Fringe) 係全世界最 top 嘅藝術兼喜劇節慶之一,每年 8 年舉行,成個月內日日都有豐富節目,由新晉藝術家領銜,同個別知名大師一齊傾力演出,絕對係藝術新星展現天賦嘅殿堂!藝穗節表演活動多姿多彩,有棟篤笑,又有芭蕾舞—你諗得出嘅節目,幾乎樣樣俱全。

    縱觀愛丁堡各,由舊城區、Pop-up 快閃帳篷,以至大街小巷上,各式演出同現場節目琳瑯滿目,不妨嚟到皇家一英里 (Royal Mile) 大道,見證一眾藝術家施展渾身解數,爭取下一場商演機會。

    地點: 橫跨 8 月,全市各地上演幾百場活動

    • 伴侶
    • 晚間娛樂
    • 非一般行程
    • 單人旅客
    • 團體
    4

    必睇景點:蘇格蘭國立博物館

    認識蘇格蘭多彩遺跡

    蘇格蘭國立博物館 (National Museum of Scotland) 遠近知名,珍藏咗 1,200 萬件自然、藝術、設計同科技展品,亦會定期舉辦活動,當中包括時裝展同太空人專訪。館內嘅展覽大廳 (Grand Gallery) 令人一去難忘,中庭玻璃樓底極高,吸納充足光線,照亮大廳每個角落;而天花板仲掛咗啲大型展品添!

    蘇格蘭國立博物館入場費全免,旅客可以隨心酌量捐獻。為咗令博物館之行更加流暢,不妨預先 Download 定館方推出嘅「Highlights」app,一覽各種展品嘅詳盡介紹—呢個 app 仲有 4 種語言版本任你揀,相當貼心!

    地點: Chambers St, Edinburgh EH1 1JF, UK

    開放時間: 每日 10:00 至 17:00

    電話: +44 300 123 6789

    地圖
    • 歷史文化`
    • 經濟實惠

    相片由 Maccoinnich 提供 (CC BY-SA 3.0) 經修改

    5

    登上亞瑟王座

    俯瞰愛丁堡嘅最佳觀景點

    亞瑟王座 (Arthur’s Seat) 位於海拔 251 米高嘅地方,雖然俾唔到你寫意嘅行山體驗,但就可以飽覽愛丁堡市內嘅每個角落。想登頂嘅話,路程大約 1 個鐘,喺荷里路德宮 (Holyrood Palace) 出發就得。

    相傳:呢座山以亞瑟王 (King Arthur) 命名,曾經建立卡美洛 (Camelot) 王國,至今一切依然係個謎,唯獨佢嘅獨特魅力勢不可擋。縱觀區內,史前遺跡比比皆是,令人眼界大開!如果出發當日預測會落雨,咁步行期間就要特別小心,因為山區好可能會刮大風。

    地圖
    • 拍照
    • 經濟實惠
    • 遊歷
    6

    蘇格蘭威士忌體驗館

    品嚐蘇格蘭單一麥芽威士忌,學習製作方法

    未飲過蘇格蘭威士忌,又點算係嚟過蘇格蘭?對於初嚐世界級威士忌嘅旅客嚟講,皇家一英里 (Royal Mile) 大道嘅導賞團就係最佳「入門」之旅,可以帶你一次過睇盡全個生產流程,感受威士忌嘅撲鼻芳香,仲有機會試吓製成品添 (18 歲以下人士會試飲無酒精嘅 Irn-Bru 飲品)!觀光團有提供語音導賞服務,場內嘅 Amber 餐廳主打羊雜布甸 (haggis) 等地道美食,有提供「嚐味蘇格蘭 (Taste of Scotland)」餐單,上面嘅菜式全部都係以蘇格蘭時令農產品入饌。

    自問係威士忌鑑酒專家?咁「Masterclass」套餐就正正係為你而設!完成導賞團之後,仲會有個品酒環節,介紹蘇格蘭 4 大威士忌產地嘅經典酒品,肯定會將你「調教」成對名酒認識深厚嘅專家。

    地點: The Royal Mile, 354 Castlehill, Edinburgh EH1 2NE, UK

    開放時間: 每日 10:00 至 18:00

    電話: +44 (0)131 220 0441

    地圖
    • 伴侶
    • 歷史文化`
    • 品嚐美食
    7

    司各特紀念塔

    攀上華麗嘅維多利亞地標之巔

    呢座哥德式紀念塔係為咗向《撒克遜英雄傳 (Ivanhoe)》《羅布·羅伊 (Rob Roy)》等著名小說嘅作者華特·司各特爵士 (Sir Walter Scott) 致敬而建,亦都係市中心王子街花園 (Princes St Gardens) 嘅焦點名勝。司各特紀念塔 (Scott Monument) 高 61 米,設有幾個觀景台,你可以由中央尖塔上嘅迴形樓梯行上去,飽覽美景;而塔內嘅 64 尊雕像全部都係司各特小說入面嘅角色,千祈咪眨眼!

    地點: E. Princes St Gardens, Edinburgh EH2 2EJ, UK

    開放時間: 每日 10:00 至 16:00 (夏季開放時間直至 19:00)

    電話: +44 (0)131 529 4068

    地圖
    • 歷史文化`
    • 拍照
    • 經濟實惠
    8

    盡情享用羊雜布甸、薯蓉同蕪菁甘藍蓉

    一試愛上乾草市場酒吧嘅蘇格蘭名菜

    羊雜布甸係一味經典菜式,主要材料有免治羊內臟、燕麥同地道香草,入口啖啖肉,配搭蘿蔔同薯仔 (喺蘇格蘭就叫做薯蓉 (neeps)蕪菁甘藍蓉 (tatties)) 一齊食,味道頂呱呱!每年 1 月,蘇格蘭都會舉辦紀念民族詩人彭斯 (Burns) 嘅節日,稱為「彭斯之夜 (Burns’ Night)」,而大家喺呢一日會照習俗食羊雜布甸,同埋朗誦著名詩作《Address to a Haggis》—除咗羊雜布甸之外,睇怕都冇乜邊幾道菜式「架勢」到有人作詩歌頌佢喇啩?

    由 Cafe 以至高檔餐廳,愛丁堡每個角落都有得賣羊雜布甸;去到舊城區嘅乾草市場,專賣呢道名菜嘅傳統酒吧更加係數之不盡。我哋首推 The Last Drop,皆因嗰度嘅前菜同主食都出名至極!

    地點: 74-78 Grassmarket, Edinburgh, EH1 2JR, UK

    開放時間: 每日 12:00 至 00:00

    電話: +44 (0)131 225 4851

    地圖
    • 品嚐美食
    9

    暢遊利斯

    愛丁堡碼頭區—Chill 爆嘅新興社區

    利斯 (Leith) 係沿海城市,距離愛丁堡市中心只有 3 英里,充滿旅遊特色,亦係英國皇家遊艇不列顛尼亞號 (Royal Yacht Britannia) 停泊嘅地方,可以俾你參觀英女王伊利沙伯二世 (Queen Elizabeth II) 住過嘅流動居所,而全程仲有提供語音導覽服務添!

    利斯碼頭區以前佈滿歲月痕跡,翻新之後已經煥然一新,全新岸濱發展區為當地引入唔少一流餐廳同時裝店,就連愛丁堡最大型嘅購物商場 Ocean Terminal 都係呢度,打造出市內最正嘅 Shopping 勝地。每逢星期六,碼頭廣場 (Dock Place) 亦會架設起利斯市場 (Leith Market),場內手工美食同時尚飾物令人目不暇給!

    地圖
    • 購物
    • 拍照
    • 品嚐美食
    • 遊歷
    10

    跳番 Part 凱利舞,為圓滿旅程更添色彩

    舞池覓伴

    凱利舞 (Ceilidh;讀音係「Kay-ley」) 喺蘇格蘭同愛爾蘭 Hit 到爆,正式嚟講會由 Live band 奏樂,現場 MC 負責指揮,帶領大家一齊喺音樂襯托下跳舞作樂。除此之外,高地福靈舞 (Highland Fling) 同土風舞 (Flying Scotsman) 亦都大受歡迎,

    通常分成 8 人一組,全程不斷轉 Partner,超級好玩,老少皆宜!喺婚禮同慶祝活動上,凱利舞都係常見嘅助興節目;不過,要數最多人跳凱利舞嘅地方,一定非 Roxy 嘅愛丁堡凱利舞俱樂部 (Edinburgh Ceilidh Club) 莫屬。想玩返夠本,可以揀喺以下舊城區嘅酒店落腳。

    地點: 2 Roxburgh Pl, Edinburgh EH8 9SU, UK

    電話: +44 (0)131 621 4709

    • 伴侶
    • 晚間娛樂
    • 單人旅客
    Paul Smith | 旅遊常客

    開始計劃行程

    Maps