愛丁堡 12 大必試活動

位於愛丁堡舊城嘅皇家一英里大道陡峭蜿蜒，完美展現呢座城市嘅獨特魅力。呢度唔單止係蘇格蘭首都歷史嘅核心，亦都係旅遊熱點。呢度歷史古蹟隨處可見，包括聖吉爾斯大教堂 (St. Giles’ Cathedral)、荷里路德宮 (Holyroodhouse Palace)，同埋山頂嘅愛丁堡城堡。喺中間，你仲會發現唔少紀念品店、古色古香嘅酒吧，同埋熱鬧嘅環境。

呢個城市有部分區域收過入城費，咁樣令到最窮嘅人實際上被困喺入面。參加步行導賞團係了解呢個地方迷人歷史嘅最好方法。

愛丁堡城堡係呢個城市高處，位於城堡岩上，佔據住一個充滿戰略意義嘅位置。呢度已經有座城堡屹立咗超過一千年。呢座城堡係英國最古老嘅城堡之一，就好似愛丁堡嘅歷史，迷人又震撼。

參加城堡導賞團，了解呢度驚險嘅夜襲同埋同英軍激烈戰鬥歷史。大禮堂 (The Great Hall) 幾個世紀以嚟舉行過無數次皇室儀式，當你行過呢啲壯觀嘅會客室時，一定可以感受到尊貴感。

蘇格蘭國家博物館收藏咗大約 1,200 萬件展品，當中包括大自然、藝術、設計同科技等各個領域。博物館定期舉辦各種活動，可能係時裝展，又或者係訪問太空人嘅活動。博物館大廳 (The Grand Gallery) 係個令人印象深刻嘅空間。中庭玻璃樓底極高，令室內充滿自然光，而大型展品就懸掛喺天花板上。

為咗充分善用參觀時間，你可以參加蘇格蘭展廳嘅精華導賞團，又或者探索館內嘅三條預設參觀路線。如果你有小朋友同行，不妨留意下以家庭為主題嘅互動展廳。

亞瑟王座高超過 250 米 (820 呎)，雖然唔算係一條好有挑戰性嘅行山路線，但呢度可以俯瞰成個愛丁堡嘅全景，行上山頂大約需要 1 個鐘。你可以由荷里路德宮開始行程。

相傳：呢座山以亞瑟王 (King Arthur) 命名，曾經建立卡美洛 (Camelot) 王國，至今一切依然係個謎，唯獨佢嘅獨特魅力勢不可擋。縱觀區內，史前遺跡比比皆是，令人眼界大開！如果出發當日預測會落雨，咁步行期間就要特別小心，因為山區好可能會刮大風。

愛丁堡皇家植物園喺 1670 年開放，夏天時份園內有好多好靚嘅花盛開。王太后紀念花園分咗四個唔同嘅區域，展示嚟自亞洲、歐洲、北美同南半球嘅植物。不妨留意下夏天嘅特別活動，例如專業園藝師帶領嘅導賞行程同植物藝術課程。

成班鴨仔喺大型鴨塘入面暢泳，等住你嚟餵飽，絕對係小朋友嚟到呢片田園花園嘅最愛景點！行到去空間寬敞嘅維多利亞式溫室，小朋友仲可以試吓搵樹叢入面嘅檸檬，又或者熱帶雨林小屋 (Rainforest House) 嘅紅色絨球花。

荷里路德宮係一座宏偉嘅皇室住所，歷史可追溯到 17 世紀，喺度你可以欣賞佢壯觀嘅外圍，同埋裡面精緻嘅皇室公寓。喺入面，你會見到巴洛克風格嘅天花板同意大利畫作掛喺牆上，其中一幅嘅歷史可以追溯到 1550 年。

喺荷里路德宮範圍裡面仲有其他值得探索嘅景點，例如愛德華七世嘅雕像。呢座宮殿其中一個最經典嘅特色，就係設計精美嘅前庭噴泉。你可以喺愛丁堡城堡嘅對面，即皇家一英里大道嘅一邊欣賞到呢一切。

卡爾頓山係欣賞浪漫日落嘅好地方，橙紫色嘅霞光照耀住整個城市景觀。喺呢座 103 米 (340 呎) 高嘅山上面，你可以遠望到好多個地標，例如利斯河、愛丁堡城堡同國家紀念碑。卡爾頓山上仲有其他紀念碑，例如納爾遜紀念碑 (Nelson Monument)，以及杜加爾史超活紀念碑 (Dugald Stewart Monument)。

建議喺日落前至少一個鐘上到卡爾頓山，確保可以揾到靚位慢慢欣賞美景。欣賞完靚景後，仲可以去山腳嘅街區行下。喺山腳會見到荷里路德宮等景點，同埋幾間好熱鬧嘅酒吧。

蘇格蘭國立現代美術館係一間收藏現代同當代藝術品嘅博物館，裡面嘅藝術品歷史可以追溯到 1900 年。博物館係兩座相鄰嘅建築，內藏超過 6,000 件畫作、雕塑、藝術裝置、影片、素描同印刷品。

第一座建築「現代一號」展示咗 20 世紀初嘅歐洲藝術，同埋像馬蒂斯同畢卡索等藝術家嘅精選作品，仲有不定期嘅特別展覽。第二座建築「現代二號」收藏咗世界知名嘅超現實主義展覽，包括達利同馬格里特嘅作品、達達主義作品，同埋 20 世紀初嘅藝術家同蘇格蘭藝術家嘅作品。

呢個充滿標誌性嘅哥德式司各特紀念碑，係為向知名小說家華特司各特致敬而設嘅，佢寫過《艾凡赫》、《羅賓漢》等經典小說同詩篇。呢座維多利亞時期建築位於市中心嘅王子街花園。

呢座紀念碑高達 61米 (200 呎)，中央塔樓有螺旋樓梯，可以上到幾個觀景台，俾你係高處欣賞市內嘅風景。留意下司各特紀念碑上面嘅 64 座雕像，全部都係嚟自司各特小說入面嘅角色。你又搵唔搵得晒佢哋出嚟呢？

利斯距離愛丁堡市中心大約 5 公里 (3 英里)，係一個海邊嘅街區，充滿驚喜等緊你發掘。皇家遊艇「不列顛尼亞號 (Royal Yacht Britannia)」就係停泊喺度，你可以參觀呢艘曾經係英女王伊莉莎白二世流動住所嘅遊艇，仲可以用語音導覽陪你參觀。

利斯碼頭區以前佈滿歲月痕跡，翻新之後已經煥然一新，全新岸濱發展區為當地引入唔少一流餐廳同時裝店，就連愛丁堡最大型嘅購物商場 Ocean Terminal 都係呢度，打造出市內最正嘅 Shopping 勝地。每逢星期六，碼頭廣場 (Dock Place) 亦會架設起利斯市場 (Leith Market)，場內手工美食同時尚飾物令人目不暇給！

愛丁堡國際藝穗節 (Edinburgh Festival Fringe) 係全世界最 top 嘅藝術兼喜劇節慶之一，每年 8 年舉行，成個月內日日都有豐富節目，由新晉藝術家領銜，同個別知名大師一齊傾力演出，絕對係藝術新星展現天賦嘅殿堂！藝穗節表演活動多姿多彩，有棟篤笑，又有芭蕾舞。所有你諗得出嘅節目，幾乎樣樣俱全。

縱觀愛丁堡各，由舊城區、Pop-up 快閃帳篷，以至大街小巷上，各式演出同現場節目琳瑯滿目，不妨嚟到皇家一英里大道，見證一眾藝術家施展渾身解數，爭取下一場商演機會。

對於初嚐世界級威士忌嘅旅客嚟講，皇家一英里大道嘅導賞團就係最佳「入門」之旅，可以帶你一次過睇盡全個生產流程，感受威士忌嘅撲鼻芳香，仲有機會試吓製成品添 (18 歲以下人士會試飲無酒精嘅 Irn-Bru 飲品)！自問係威士忌鑑酒專家？咁「Masterclass」套餐就正正係為你而設！完成導賞團之後，仲會有個品酒環節，介紹蘇格蘭 4 大威士忌產地嘅經典酒品。

場內仲有一間餐廳，主打用本地食材嘅菜式，當然仲有經典嘅哈吉斯。不妨試下「Taste of Scotland」菜單，匯聚蘇格蘭時令食材嘅精華。你可以唔參加導賞團，直接去 Amber 餐廳，Amber 酒吧同埋鋪頭參觀。