多哈 10 大玩樂活動
多哈邊方面最出名？
多哈嘅好玩活動揉合現代奇觀同古老傳統，充滿趣味，等你探索。初嚟甫到，卡塔爾即刻以閃閃發光嘅天際線展現國家富庶一面，亦正因為呢份雄厚財力，先令多哈由樸素嘅捕漁採珠小鎮，蛻變成國際大都會。
呢座沙漠城市幾乎日日都天晴炎熱，咁就令到冷氣充足嘅博物館、購物中心同娛樂場所成為日間逃離煩囂嘅好去處。如果鍾意戶外探險，市內同周邊地區嘅海灘優美，沙丘綿延不絕，同樣值得遊覽。
多哈邊啲活動最好玩？
1. Imam Muhammad Ibn Abd Al Wahhab 清真寺
景點不但引人注目，更可欣賞到城市美景
推介： 拍照
Imam Muhammad Ibn Abd Al Wahhab 清真寺嘅裡外，同樣令人目不暇給，呢棟建築非常壯觀，值得擁有卡塔爾國家清真寺呢個稱號。佢係為咗陪襯卡塔爾比較古老同傳統嘅住宅而建，四周圍都係經典嘅伊斯蘭建築同設計元素，包括光猛嘅白色牆身同腳下嘅地氈。
西灣 (West Bay) 嘅天際線景色極其壯觀，令人著迷，所以記得要帶埋部相機，去影低遠處有眾多摩天大廈嘅迷人美景。不過要留意，呢度係一個當地人用緊嘅禮拜地方，所以衣著要得體。
位置： Al Muhandiseen St, Doha, Qatar
電話： +974 4470 0000
Imam Muhammad Ibn Abd Al Wahhab 清真寺
2. La Corniche
環境優美嘅海濱步道
推介： 伴侶, 家庭, 拍照, 經濟實惠
La Corniche 係一條好靚嘅海濱長廊，一路沿住多哈灣 7 公里長。呢條好闊嘅行人專用海濱長廊，帶俾你海邊同城市天際線嘅靚景，係當地家庭同遊客嘅熱門聚腳地。
黎明時分嚟呢度散步，可以見到日出嘅金色光芒照射喺商業區嘅高樓大廈之上，或者喺熱鬧嘅夜晚嚟呢度睇吓，欣賞喺海邊搖吓搖吓嘅傳統木製單桅帆船。四周圍有好多咖啡室同餐廳，你可以一邊放鬆身心、一邊欣賞靚景。
位置： Al Corniche St, Doha, Qatar
La Corniche
3. 瓦基夫市集
熱鬧嘅大型購物集中地
推介： 購物, 拍照, 美食
瓦基夫市集遍佈成個 Corniche 附近 4 個街區，係一個好熱鬧，有幾百年歷史嘅市集，曾經係貝都因人 (Bedouin) 嘅貿易中心，佢哋喺呢度買賣駱駝等貨品。就算唔係黎買駱駝，你都可以搵到好多其他引人嘅貨品，包括金飾同五顏六色嘅布料，甚至係阿拉丁同款嘅青銅燈。
空肚黎呢度就啱喇，你可以喺附近嘅當地美食檔口睇下有咩啱食，或者停低飲杯咖啡或者飲杯茶，感受下繁忙市場嘅氣氛。
位置： Al Souq Street, Doha, Qatar
開放時間： 星期六至星期四 07:30 至 12:30 同 15:30 至 22:00；星期五 12:30 至 22:00
瓦基夫市集
4. 伊斯蘭藝術博物館
由備受尊敬嘅建築師 I.M. Pei 設計
推介： 家庭, 歷史文化
伊斯蘭藝術博物館裡面有好多精彩建築同海量嘅藝術品同文物收藏，係多哈最值得參加嘅活動之一，亦係呢個城市其中一個最出名嘅景點。呢個博物館位於多哈灣嘅 Corniche 海濱長廊，收藏咗由 14 個世紀前到現代嘅伊斯蘭陶瓷、手稿、金屬製品、紡織品同其他精緻藝術收藏。
館內不但開設餐廳，每個月更會喺中庭舉行一次免費室內音樂會，遊客可以輕輕鬆鬆咁喺呢度玩幾個鐘。博物館仲提供免費嘅英文同阿拉伯文導賞團，同埋好多適合所有年齡層人士參加嘅工作坊同講座。
位置： South of Doha Corniche, Doha, Qatar
開放時間： 星期六至星期四 09:00 至 19:00；星期五 13:30 至 19:00
電話： +974 4422 4444
伊斯蘭藝術博物館
5. 火炬塔
於 2006 年為亞運而建造
推介： 伴侶, 拍照, 美食, 晚間娛樂, 豪華住宿
多哈最高嘅建築物，又叫做志向塔 (Aspire Tower) ，而家係一間叫做多哈火炬塔 (The Torch Doha) 嘅豪華酒店同會議空間。喺呢座 300 米高嘅摩天大廈，要欣賞五光十色嘅城市美景，最好嘅方法就係喺酒店嘅 360 度旋轉餐廳用餐。
另一個方法，就係去養生會所做個極舒適嘅水療療程，然後仲可以用健身室設備同懸臂式泳池，喺呢個 19 層樓高嘅地方欣賞好靚嘅城市景色。The Torch 位於市內嘅 Aspire Zone，隔離就係多哈嘅頂尖體育設施同商場。
位置： Aspire Park Rd, Doha, Qatar
電話： +974 4446 5600
火炬塔
6. 維拉吉奧購物中心
呢度仲有一個奧運規模嘅溜冰場
推介： 伴侶, 家庭, 購物, 豪華住宿
當你入到去維拉吉奧購物中心，可能會以為自己坐咗張魔法地氈去意大利，因為周圍都係威尼斯風格嘅運河同貢多拉船。購物中心一應俱全，仲有冷氣㖭，所以唔使驚炎熱嘅沙漠天氣，可以舒服咁周圍購物、睇下最新嘅時裝、享用美味嘅午餐，又或者去貢多拉尼亞主題公園 (Gondolania Theme Park) 暢玩遊樂設施。
購物中心有 Louis Vuitton、Christian Dior 同 Gucci 等奢侈品牌，但如果你想搵其他較相宜嘅牌子，呢度都有其他價位嘅舖頭。
位置： Al Waab St, Doha, Qatar
開放時間： 星期四至星期六 09:00 至 00:00；星期日至星期三 09:00 至 23:00
電話： +974 4422 7400
維拉吉奧購物中心
7. 獵鷹市集
古代貝都因人嘅狩獵技術
推介： 家庭, 歷史文化, 非一般行程
雖然現代化嘅卡塔爾對獵鷹已經冇乜實際需要，但係仍然保留咗養育同訓練呢種特別雀鳥嘅傳統文化，並且獲聯合國教科文組織認可為重要嘅當地文化。喺你係城市街道同市集街頭散步嗰陣，如果見到啲人好自豪咁展示企喺手臂上嘅珍貴獵鷹，其實喺當地好常見。
獵鷹市集位於瓦基夫市集附近，可以一睹獵鷹嘅世界。你可以睇下賣各種養獵鷹用品嘅舖頭，又或者參加佢啲每個月嘅拍賣會；喺嗰度比較受人追捧嘅獵鷹種類，可以賣到成幾萬蚊。
位置： Al Souq Street, Doha, Qatar
開放時間： 星期一至星期四 09:00 至 13:00 和 16:00 至 20:00，星期五 16:00 至 20:00
電話： +974 4414 5960
獵鷹市集
8. 香蕉島
離多哈市中心只需要 25 分鐘船程
推介： 伴侶, 家庭, 豪華住宿
想去海灘享受悠閒時光嘅人，可以喺伊斯蘭藝術博物館附近嘅碼頭乘搭豪華雙人船，然後出發去香蕉島。你可以喺泳池邊好悠閒咁休息全日、坐吓皮艇、坐香蕉船、滑水梯，呢度仲有更多水上運動同適合全家大細參加嘅有趣活動。
香蕉島由多哈 Banana Island Resort 負責營運，島上全日通行證包括渡船接送、泳池與沙灘使用權，仲有度假村餐廳同休閒活動嘅代用金。
位置： Banana Island Resort Doha by Anantara, Doha, Qatar
電話： +974 4040 5050
香蕉島
9. 卡塔拉文化村
卡塔爾嘅文化同創意中心
推介： 家庭, 購物, 歷史文化, 拍照, 美食
多哈嘅卡塔拉文化村有宏偉嘅希臘羅馬圓形劇場，全年都有眾多表演同節日，係體驗藝術同文化嘅一站式目的地。卡塔拉建於珍珠港附近嘅填海土地之上，設計加入迷宮式嘅小巷同白鴿塔，令人諗返起當地傳統生活。
遊客可以喺呢度過一日，行吓商店同畫廊、喺咖啡館同餐廳品嚐美食，又或者喺海灘放鬆一下。嚟呢度最合適嘅時間，就係涼爽嘅夜晚，入夜之後沿住海濱長廊走，你會見到為數不少嘅食物攤檔同市集小販。
電話： +974 4470 0000
卡塔拉文化村
10. 珍珠島
建於前珍珠島潛水地點
推介： 伴侶, 家庭, 購物, 豪華住宿
珍珠島位於佔地面積 1.5 平方里嘅人造島之上，係一個非常現代化嘅地方，呢度有眾多運動、娛樂同購物場所可以任你探索。好多人嚟呢度，只係想參觀下碼頭嘅豪華遊艇，又或者喺其中一個沙灘享受水上運動。
對於小朋友同想要刺激活動嘅大人，呢度有 Megapolis，呢度係一個熱鬧嘅室內樂園，有保齡球場、密室逃脫遊戲同街機遊戲。呢度嘅餐飲場所供應各種美味嘅食物，由手工甜品到 Alison Nelson 嘅朱古力酒吧，你都可以盡情享用各式甜品，仲可以去雅斯曼宮 (Yasmine Palace) 品嚐以往專俾皇室享用嘅安達盧西亞風格餐點。
位置： Pearl Blvd, Doha, Qatar
珍珠島
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。