聖托里尼島 10 大海灘

佩里薩海灘 (Perissa Beach) 喺聖托里尼島 (Santorini) 上最受 Backpacker 同 Party Animal 歡迎，不過尚算悠閒，皆因聖托里尼島本來就唔似得伊奧斯島 (Ios) 或者米科諾斯島 (Mykonos) 咁熱情高漲。相反，呢個黑色卵石海灘有好多超正嘅 Club，當地餐廳、平價酒店同別墅比比皆是，再加上碧藍澄麗嘅海景，每年旺季都吸引唔少幾多遊客架，相對擁擠，勝在氣氛依然一流。聖托里尼島上大部分海灘都係黑色嘅；之但係，如果你聽到人哋講起聖托里尼島嘅「黑沙灘」，咁應該都係指海島東南沿海嘅佩里薩海灘架喇！

卡馬里海灘 (Kamari Beach) 係距離聖托里尼機場 (Santorini Airport) 最近嘅沙灘，氣氛溫馨，活動種類繁多，簡直係一家大細嘅度假天堂！呢片黑色沙灘後面嘅小鎮算得上係聖托里尼島最發達嘅城鎮；換句話講，佢嘅「旅遊味」亦都最重，度度開滿餐廳食肆，亦有好多舒適酒店，任得你揀。另外，區內仲有迷你高爾夫中心、遊樂場，而古錫拉島 (Ancient Thera) 都喺冇幾遠嘅地方啫。

卡馬里海灘鋪咗唔少石頭架，如果你想散步嘅話，一定要著返對好行嘅涼鞋。海灘喺正機場南邊，有時會見到飛機降落前對住海岸平飛嘅畫面，雖則有少少嘈，但都未至於係令人不安嘅噪音嚟嘅！

佩里沃洛斯海灘 (Perivolos Beach) 唔算係 Party Animal 嘅首選，但就啱哂尋求寧靜悠閒氣氛嘅旅客。呢片海灘其實屬於人氣爆燈嘅佩里薩海灘 (Perissa Beach) 一部分，但係兩者之間嘅分界線非常模糊，所以成日都被視為係同一片海灘。

佩里沃洛斯海灘嘅特色，在於佢嘅水上運動比較多，當中包括水上電單車同香蕉船。貴為聖托里尼島 (Santorini) 最長嘅海灘，呢度後邊嘅酒店少過佩里薩海灘，自然可以俾你更易搵到隱世秘境啦！

喺紅海灘 (Red Beach) 上面，高高聳立嘅鏽紅色岩石峭壁被碧藍色嘅清澈海水包圍，景色獨一無二，難怪成為聖托里尼島 (Santorini) 最受歡迎嘅海灘之一！紅海灘位於南岸，岩壁顏色別樹一幟，全島只此一家；單係因為咁，就足以吸引好多遊客嚟呢度同陽光玩遊戲，再影相上 Instagram 打卡。

岸上有好多岩石同石春，記得著定對舒服啲嘅涼鞋或者密頭鞋，行去海灘嗰陣就可以健步如飛啦！呢條路雖然唔係好長，但都有好多岩石架，小心啲好~

維查德海灘 (Vlychada Beach) 位於聖托里尼島 (Santorini) 南岸，型格又幽靜，附近城鎮有個碼頭仔，仲有白色懸崖，同海岸上嘅黑沙融為一體，令 750 米長嘅海岸線形成黑白交融嘅效果。

海灘南端嘅維查德鎮擁有各式各樣嘅景點，包括地道餐廳、美術館，同埋介紹島上蕃茄產業嘅博物館；而海灘本身遠離費拉 (Fira) 嘅遊客群，附近又冇公共交通工具，得幾間旅館仔，所以氣氛相對寧靜，兼散發微微嘅地道魅力。

厄洛斯海灘 (Eros Beach) 以希臘神話嘅「愛慾之神」命名，梗係聖托里尼島 (Santorini) 最浪漫嘅地方啦！呢片海灘位於南岸，距離維查德海灘 (Vlychada Beach) 超近，近到大家成日都將兩者視為同一片海岸。海灘鋪滿聖托里尼島最典型嘅黑色卵石沙粒，後面就有白色懸崖陡峭聳立，

坐落喺塵土飛揚嘅小路盡頭，距離費拉 (Fira) 大約 10 公里，又冇公共交通駛經，所以僻靜到極。講起上嚟，查德海灘都有間高檔沙灘 Club 吖，但厄洛斯海灘就乜都冇，淨係得一片空曠沙地，最啱你同另一半二人世界—「你眼中只有我，我眼中只有你」！

莫諾利索斯海灘 (Monolithos Beach) 位於聖托里尼機場 (Santorini Airport) 以東，可能係島上最多沙、最少石春嘅海岸！呢片海灘距離卡馬里 (Kamari) 短短幾分鐘車程，氣氛相對安靜，客路以一家大細為主。聖托里尼島唔少海灘都會突然出現斷層，而莫諾利索斯海灘嘅海床就由島邊慢慢斜落去，別具特色；

海灘南端有個漁船港口仔，後面就有啲酒館同酒店。如果你鍾意玩極限水上運動，莫諾利索斯海灘嘅風箏滑水都頂呱呱架！

正如紅海灘 (Red Beach) 以紅色岩石而聞名，附近嘅白海灘 (White Beach) 出名在周圍都係白色岩石。公道啲講句—呢個特點真係幾巴閉架，皆因全島的確只有呢個海灘係咁嘅顏色。白海灘嘅海灣面積極細，岩石同大粒石春數之不盡；而越接近純淨海域嘅地方，沙粒嘅顏色就越黑。話雖如此，白海灘依然算係色彩對比鮮明嘅，而且水裡面有好多魚，絕對值得一遊！想去白海灘，一係搭船，一係由紅海灘行過去，攰就攰啲，最多行到之後坐喺沙灘椅上面唞吓囉 (笑~)。

顧名思義，火山口海灘 (Caldera Beach) 對住火山口，算係聖托里尼島 (Santorini) 西面唯一值得遊覽嘅沙灘，又名巴洛斯海灘 (Balos Beach)，可以揸車經阿克羅蒂里 (Akrotiri) 以北嘅蜿蜒小路前往，但就一定要好小心，因為呢條路又斜又大沙塵。海灘嘅沙粒偏深色，都幾多碎石架；附近有幾間隱世小酒館，坐擁聖托里尼島懸崖嘅知名靚景。火山口海灘位置相對偏遠，而且交通唔多方便，所以都唔係好多人識，平時好靜，私隱度極高。

哥倫布角海灘 (Cape Columbo Beach) 位於聖托里尼島 (Santorini) 北岸，遠離繁囂嘅費拉 (Fira) 同佩里薩 (Perissa)，夠哂偏僻，難怪吸引旅客嚟曬「天體」日光浴，添上一層均勻有致嘅古銅膚色，唔驚曬到一撻撻泳衣痕。呢片海灘又名「Koloumpos Beach」或者「Koloumbo Beach」，各種叫法層出不窮，最大嘅特色就係冇乜特色，酒館、酒店以至引人注目嘅景點都冇。

而且，呢度海面實在太大浪喇，就算旅遊旺季都唔多人嚟游水。所以呢，如果你想喺百分百隱世秘境曬太陽，哥倫布角海灘一定係不二之選！