雅典 9 大最好玩活動

雅典歷史悠久，充滿文化魅力，集齊「難忘歐洲城市」同「休閒之旅」所需嘅要素，市內有古老建築、古蹟名勝、熱鬧社區，各適其適。無論係陽光明媚嘅溫暖朝早，定係生氣勃勃嘅涼爽夜晚，你都唔愁冇節目，

既可以深入探索呢座城市嘅過去、沉醉於當地美食，亦可以同當地人一齊享受優悠氣氛，令每分每秒都極盡精彩！我哋整理咗 10 大休閒活動，啱哂呢個希臘首都頭一、兩日嘅行程，務求令你玩得充實。

雅典最好玩嘅活動係乜嘢？

雅典酒店

1. 喺憲法廣場展開一日行程

全城最重要嘅廣場

推介： 歷史文化, 拍照, 經濟實惠

憲法廣場 (Syntagma Square) 既係遊覽雅典嘅理想起點，亦係市內最出名﹑最熱鬧嘅名勝之一！貴為全市交通樞紐，廣場周圍都係五星級酒店，之所以成為遊客以至當地人首選嘅聚腳點，原因顯而易見。

講到廣場上最引人注目嘅焦點地標，就梗係憲法廣場噴泉 (Syntagma Fountain) 啦；而遠近馳名嘅無名戰士墓 (Tomb of the Unknown Soldier)、同埋宏偉壯觀嘅希臘議會大樓 (Hellenic Parliament) 都喺廣場上分庭伉禮。行到攰攰哋？附近街道林立數之不盡嘅商舖﹑Café 同餐館，歇腳啱哂！

位置： Syntagma Square, Athens 105 63, Greece

探索憲法廣場附近的酒店

2. 喺無名戰士墓睇衛兵換崗儀式

欣賞總統衛隊著住傳統服裝巡遊

推介： 歷史文化, 拍照, 經濟實惠

憲法廣場 (Syntagma Square) 對面就係無名英雄墓 (Tomb of the Unknown Soldier)，專為悼念殉國嘅希臘士兵而建，悲壯至極，有希臘埃夫宗 (Evzone) 總統衛隊全天候監察守護，每個鐘準點換崗一次。

要數觀賞換崗儀式嘅最佳時間，肯定係星期日 11:00—到時，全隊埃夫宗精銳部隊都會著住傳統服裝 foustanella (白色打褶蘇格蘭裙)，同軍樂隊合作完成典禮，記住早啲出發，霸定個靚位！

位置： Leoforos Vasilisis Amalias 133, Athens 105 57, Greece

探索無名烈士墓附近的酒店

3. 必睇景點：雅典衛城

最偉大嘅古希臘地標

推介： 家庭, 歷史文化, 拍照

雅典衛城 (Acropolis) 被聯合國教科文組織列為世界文化遺產，歷史可以追溯到公元前 448 年，係西方世界最重要﹑最具影響力嘅古代遺址—未嚟過呢度，你嘅希臘之行又點算圓滿？不妨探究過去，靜心參觀呢座龐大壯觀嘅城堡，順便遊訪帕台農神廟 (Parthenon)，令精彩旅程達致頂峰！

衛城距離憲法廣場 (Syntagma Square) 20 分鐘步程，你可以搭的士慳返啲腳骨力，留返到埗之後再喺附近散步。喺衛城登頂嘅路線非常陡峭，夏天仲熱到暈添，記得要帶帽﹑太陽油同足量嘅水啊！

位置： Acropolis of Athens, Athens 105 58, Greece

開放時間： 每日 08:00 至 20:00 (11 月至 3 月開放至 15:00)

探索雅典衛城附近的酒店

4. 喺雅典衛城博物館了解更多

深探往昔

推介： 家庭, 歷史文化

歷史悠久嘅雅典衛城 (Acropolis) 固然必遊，但係要真正欣賞呢個歷史遺蹟嘅宏偉奇觀，建議你去埋城堡南邊山腳下嘅雅典衛城博物館 (Acropolis Museum) 參觀！

呢個寶庫珍藏咗超過 4,250 件文物，全部都係喺雅典衛城考古遺址嘅岩石上出土，歷經時間考驗。其中，館內頂層嘅帕台農神廟 (Parthenon) 雕塑畫廊算係一大亮點，千祈咪錯過！

位置： Acropolis Museum, Dionysiou Areopagitou 15, Athens 117 42, Greece

開放時間： 4 至 10 月：星期一 08:00 至 16:00，星期二至日 08:00 至 20:00 (星期五開放至 22:00)。11 月至 3 月：星期一至四 09:00 至 17:00，星期五至日 09:00 至 20:00 (星期五開放至 22:00)

探索衛城博物館附近的酒店

5. 探索蒙塔斯提拉奇

熱鬧繁華嘅跳蚤市場區

推介： 伴侶, 家庭, 購物, 拍照, 經濟實惠

蒙塔斯提拉奇 (Montastiraki) 位於雅典舊城區，係一個熙熙攘攘嘅跳蚤市場區，附近商舖﹑麵包店同傳統小酒館林立，任你探索，最啱隨心漫步其中，感受城市氛圍。

呢區以蒙塔斯提拉奇廣場 (Montastiraki Square) 為中心；一場嚟到，可以順道參觀埋建於公元 132 年嘅哈德良圖書館 (Hadrian’s Library) 添！另一方面，蒙塔斯提拉奇開咗好多頂樓花園同酒吧，眺望雅典衛城 (Acropolis) 嘅壯麗景色。

探索摩納斯夫提拉基酒店

6. 必睇景點：雅典中央市場

售賣本地產品嘅繁華市集

推介： 購物, 經濟實惠

雅典中央市場 (Athens Central Market) 遠近馳名，以「色」、「香」、「味」引人入勝，主打肉類﹑鮮魚，仲有各式新鮮地道農產品，貨色齊全。除咗星期日之外，呢度日日營業，充滿生氣，繽紛熱鬧，充分體現希臘文化，

雖然唔似得你所認知嘅典型遊客市集，冇賣俗氣手信，但係勝在本身已經極具魅力，會透過好多種方式，帶你感受地道風情。不妨喺場內穿梭探索，停低食吓嘢，又同店主講吓價吖！

位置： Athens Central Market, Athinas, Athens 105 51, Greece

開放時間： 星期一至六 07:00 到 18:00 (逢星期日休息)

探索雅典中央市場附近的酒店

7. 欣賞呂卡維多斯山景色

飽覽雅典靚景嘅 No. 1 觀景點

推介： 伴侶, 家庭, 拍照, 經濟實惠

呂卡維多斯山 (Mount Lycabettus) 係樹木繁茂嘅白堊紀山，高高聳立，同市中心嘅建築擺埋一齊，難免顯得有啲格格不入。呢座山高達 277 米，係雅典 7 座山丘裡面最高嘅一座，值得一遊，而你仲可以喺山頂將城市全景盡收眼底添！

自問體能唔錯，可以徒步攻頂；想慳返啲腳骨力嘅話，都有纜車俾你搭嘅。立足山頂，19 世紀聖喬治教堂 (Chapel of St. George)﹑露天劇院，甚至海鮮餐廳旋即映入眼簾。唔使問都知—呢度嘅焦點梗係無敵靚景啦！不妨晏少少上嚟，天氣涼啲，仲可以睇埋日落添。

探索利卡貝托斯山附近的酒店

8. 喺普拉卡享用一流嘅「掟碟」晚餐

食完傳統晚餐，仲可以試吓掟碟

推介： 美食, 非一般行程

你以為希臘人嘅「掟碟」儀式只會喺電影出現？非也…今時今日，普拉卡山坡 (Plaka) 附近風光明媚嘅區域都仲保留住呢個傳統，

一場嚟到，又點可以唔試吓？Tavern Kalokerinos 之類嘅餐廳有舉辦正宗「希臘之夜」，俾你試勻傳統美食；而本地 Dancers 就會著住鄉土服裝表演。夜幕低垂，隨著舞台上杯碟橫飛，一番高潮又再掀起！

探索布拉卡酒店

9. 喺加濟嘅 Rebetiko 表演場地結束一日行程

體驗「希臘藍調」之音

推介： 晚間娛樂

嚟到至潮至 In 嘅加濟 (Gazi) 街區，你可以一邊聽 Rebetiko 音樂，一邊暢飲 Mythos 啤酒。呢區嘅街道兩邊林立餐廳﹑酒吧同 Café，每個角落都有現場音樂響起；

其中，Rebetiko 係都市民俗音樂，喺 20 世紀興起，一路都係希臘最流行嘅傳統音樂流派，用好幾種弦樂器演奏，一般以布祖基 (bouzouki) 為主調，而佢即係曼陀林同吉他 Crossover 嘅樂器。

探索加濟酒店

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。