慶州 14 大最好玩嘅活動

月池 (Wolji Pond) 係東宮 (Donggung Palace) 嘅一部分，而東宮就係新羅時代嘅建築群，建於公元 674 年文武王統治期間。呢個人工池塘周圍環繞住造景花園，同埋當年用於宴會同皇室活動嘅重建亭閣。

你可以參觀展覽大廳，細賞由月池周邊區域出土嘅 700 幾件矚目文物，當中包括陶器同青銅佛像，仲有源自新羅時期嘅珠寶同配飾添！參觀東宮同月池嘅門票票價如下：成人大約係 KRW2,000，青少年 (13-18 歲) KRW1,200，兒童 (7-12 歲) KRW600。

佛國寺 (Bulguksa Temple) 位於慶州東南大約 15 公里嘅吐含山山坡上面，獲列入聯合國教科文組織世界文化遺產，亦都有「佛土之廟」嘅稱號，歷史可以追溯到新羅王國時期嘅 528 年。

環顧佛國寺，源遠流長嘅寶塔同地基係唯一留存嘅原有建築，而寺廟其餘部分都係重建而成；講係咁講，你都仲可以喺呢度睇勻哂多不勝數嘅歷史遺跡，當中包括石窟庵 (Seokguram Grotto)、金銅毘盧遮那佛坐像同多寶塔 (Dabotap Pagoda)。

瞻星台 (Cheomseongdae Observatory) 係亞洲最古老嘅天文觀測台之一，歷史可以追溯到 7 世紀善德女王統治期間！呢座 9.17 米高嘅天文觀測台當年主要用嚟預測天氣，台上嘅方形柱座由 362 塊石頭堆疊而成，代表農曆年嘅 362 天。

對於天文學發燒友嚟講，瞻星台絕對係必到景點；夜幕低垂，人造燈飾映照瞻星台，份外璀璨。

慶州歷史遺址區完美體現出新羅王國古都嘅文化同歷史—呢個聯合國教科文組織世界文化遺產分為 5 個專區，任你探索宮殿遺跡、亭閣，以及蒼翠山丘上面嘅堡壘。

其中，南山 (Namsan) 有超過 40 件佛教文物和寶塔；月城 (Wolseong) 坐擁新月形的半月城堡 (Banwolseong Fortress)、月池 (Wolji Pond) 和東宮 (Donggung Palace)；皇龍寺 (Hwangnyongsa) 則是昔日皇龍寺和芬皇寺石塔 (Bunhwangsa Stone) 的舊址。

慶州國家公園裡面有好多個文化保護區，歷史可以追溯到新羅王朝！呢片公園位於慶州市附近，被譽為「韓國唯一歷史國家公園」，

總面積達 137 平方公里，係新羅王朝嘅重要古蹟。不妨喺園內沿步行徑前往南山 (Namsan)—踏足唔同嘅小徑，你將會喺登峰之前經過望月寺 (Mangwolsa Temple) 同三陵古墓 (Samneung Royal Tomb)。

鮑石亭遺址 (Poseokjeongji Pavilion) 位於慶尚北道一條小溪旁邊嘅岩石上，曾經係新羅王朝嘅皇室別墅。時至今日，別墅已經唔存在，但就仍然保留住一條貝殼形嘅石造水道。

相傳，呢座亭用咗 63 種唔同嘅岩石建造而成，係新羅國王帶住貴族同官員嚟遊玩作樂嘅地方。鮑石亭遺址嘅入場費如下：成人大約係 KRW1,000，青少年 (13-18 歲) KRW600，兒童 (7–12 歲) KRW400。

石窟庵 (Seokguram Grotto) 係吐含山上嘅一座石廟，獲聯合國教科文組織列為世界文化遺產，歷史可以追溯到 751 年景德王統治年間。喺圓形嘅石室裡面，擺放咗一尊 3.5 米高嘅本尊菩薩像—佢面露笑容，坐喺刻有蓮花嘅寶座上。

石窟庵同位於山坡上嘅佛國寺 (Bulguska Temple) 同時建造，寺廟所在之處可以欣賞到日出靚景，風光不殊，令人嘆為觀止。石窟庵嘅入場費如下：成人大約 KRW5,000，青少年 (13-18 歲) KRW3,500，兒童 (7-12 歲) KRW2,500。

普門湖旅遊區 (Bomun Lake Resort；又名「普門觀光園區」) 將會帶你體驗韓國豐富文化，玩盡一系列精彩活動！普門湖旅遊區位於慶州市中心以東大約 10 公里，擁有高爾夫球度假村、購物中心、美術館同民俗村，全部都採用韓國傳統建築風格建造。

區內嘅戶外劇院俯瞰住普門湖，全年有戲劇表演、傳統舞蹈同音樂會無間斷上演—4 月至 1 月，你仲可以喺普門湖旅遊區嘅劇院免費欣賞國樂 (gugak；傳統韓國音樂) 添！

如果你想了解唔同嘅文化傳統，就一定要體驗寺廟生活！你可以選擇適合外國遊客嘅寺廟住宿計劃，試下早課儀規、冥想課程、社區工作、茶道同武術訓練等等，而呢啲活動喺慶州大多數寺廟住宿計劃裡面都有涵蓋。

早喺新羅時期，骨窟寺 (Golgulsa Temple) 已經係皇室衛隊「花郎 (Hwarang)」成員聚集受訓嘅地方，亦係禪武道 (Seonmudo) 嘅中心—禪武道係早期訓練僧侶嘅方法之一，透過冥想嚟達到自我實現境界。

身處慶州，人人都可以享受踩單車嘅樂趣，市中心度度都有單車出租，而呢個亦都係遍覽市內風光嘅實惠途徑。不過，記住一定要著舒適嘅服裝，帶備充足食水，先好出發啊！

慶州嘅單車觀光團多不勝數，大多由慶州市中心起步，帶你遊覽石冰庫 (Seokbinggo)、慶州國家博物館 (Gyeongju National Museum)、瞻星台 (Cheongseongdae Observatory) 同芬皇寺 (Bunhwangsa Temple) 等必到景點。

南山 (Namsan Mountain) 坐擁好多條風景秀麗嘅遠足小徑，可以通往慶州嘅歷史遺跡，難怪吸引戶外運動「發燒友」湧至！南山大約 500 米高，喺新羅時期曾經被視為神聖之境，山邊各個角落都綴有數以百計嘅佛像、寺廟同寶塔，不妨預先 Plan 定行程，盡享一段充實之旅。

為安全起見，遠足人士應該喺朝早出發，仲要帶備充足嘅水同小食。一般嚟講，遊覽南山大約需要 5 個鐘，視乎你停步嘅次數而定。