烏節路 (Orchard Road) 10 大最佳夜生活體驗

烏節路夜間好去處

    烏節路 (Orchard Road) 幾乎係所有新加坡遊客必到之地,但係區內大部分嘅精彩夜生活景點竟然鮮為人知!如果你入住附近嘅酒店,入夜之後肯定唔會悶親,可以跟隨音樂節拍載歌載舞,去酒吧飲杯雞尾酒,又或者周圍 Hea 下鬆一鬆。

    翡翠山路 (Emerald Hill) 係烏節路區內「靚爆鏡」嘅小巷之一,繁華嘅購物大道充斥住各式酒吧。而酒店自家開設嘅酒吧喺烏節路上都有一定吸引力,另外仲有五星級水平嘅豪華「潮 Pub」林立街頭。我哋嘅指南會帶你玩盡烏節路嘅夜蒲場所—你想飲番杯醇厚嘅雞尾酒解悶,定係比全身嘅跳舞細胞盡情爆發?我哋將會一次過滿足哂你兩個願望!

    1

    翡翠山 (Emerald Hill) 酒吧

    翡翠山 (Emerald Hill) 係暫時逃離烏節路各大購物中心嘅好地方,位於烏節中央城 (Orchard Central) 後面,係市內最具吸引力嘅街道之一,街上大多數樓房喺 1900 至 1920 年間落成,封存住舊日時空,值得你到此一遊!

    而最佳遊覽時間就係夜晚,暢飲幾杯寫意不過,區內好多間人氣夜店都會營業至深夜。其中,翡翠山 5 號 (No. 5 Emerald Hill Bar) 酒吧就以翡翠山命名,店內雞尾酒份量非常充足,更將 20:00 至 01:00 劃為「Martini Happy Hour」,超極吸引!無論你想搵款式多樣嘅樽裝啤酒同生啤,定係想一試地道小食做宵夜,嚟呢度都一定唔會錯!

    地點: 229289 新加坡翡翠山路 5 號

    開放時間: 星期一至四 12:00 至 02:00;星期五至六 12:00 至 03:00;星期日 14:00 至 02:00

    電話: +65 6732 0818

    • 晚間娛樂
    2

    Harry's @ 安哥烈園店

    Harry's @ 安哥烈園店地理位置優越,位於烏節路 (Orchard Road) 上,就喺偉樂坊 (Wheelock Place)、邵氏樓 (Shaw Centre) 同埋新開嘅愛雍 (ION) 購物中心等眾多商場附近,絕對係你「血拚」途中飲返杯「充電」嘅好去處!

    Harry's Singapore 喺新加坡嘅主要購物同餐飲區都設有多間分店,而安哥烈園店就喺烏節路中心地區嘅遠東購物中心裡面—呢個購物商場歷史悠久,除咗時尚品牌名店之外,仲有一系列餐飲場所,等你隨時休息用餐。

    地點: 238882 新加坡烏節路 545 號遠東購物中心 #01-01/02

    開放時間: 星期日至四 11:30 至 01:00;星期五至六 11:30 至 02:00

    電話: +65 6838 0461

    • 品嚐美食
    • 晚間娛樂
    3

    新加坡 Alley Bar

    Alley Bar 太受大眾歡迎,已經唔再係「隱世秘店」;不過,由於呢間酒吧位於烏節路 (Orchard Road) 附近嘅巷仔入面,所以都仲有少少神秘感嘅。而且,酒吧外觀與眾不同,以極高樓底配搭 L 形吧檯,絕對稱得上「別樹一格」!店內有售各種超值飲品,啤酒、葡萄酒同埋特飲都好抵,梗有一款啱你口味。

    Alley Bar 座位充足,愈夜愈熱鬧—到咗差唔多收舖果陣,店內音樂已經如雷貫耳,Party 氣氛無與倫比,啱哂鍾意勁歌熱舞嘅賓客!如果你想靜靜哋飲酒傾偈,場內亦有唔少安靜嘅角落,可以選擇。

    地點: 238846 新加坡烏節路 180 號土生華人博物館

    開放時間: 星期日至四 17:00 至 02:00;星期五至六 17:00 至 03:00

    電話: +65 6738 8818

    • 晚間娛樂
    4

    Hard Rock Café

    新加坡嘅 Hard Rock Café 無人不識,小編都應該唔使多作介紹啦 (笑)!Hard Rock Café 於 1990 年開店,主打美國搖滾精神同埋美式佳餚拼盤,每日營業至深夜,工作人員同埋場內顧客都非常友善,一定會陪你度過美好時光!而且,店內每晚都有 Live Band 表演,當地樂手、以至親臨新加坡巡迴演唱嘅國際樂隊都會喺度唱返轉。

    就算冇樂隊登台,美式音樂依然響徹全場,Party 氣氛一啲都唔輸蝕!自問唔係「Rocker」?唔緊要!呢間酒吧安裝咗大型電視,隨時直播各大足球比賽,期間仲會提供多款啤酒同埋特飲優惠,你又點可以錯過?

    地點: 249724 新加坡卡斯加登路 50 號 HPL House

    開放時間: 每日 11:00 至 03:00

    電話: +65 6235 5232

    • 品嚐美食
    • 晚間娛樂

    相片由 Andy Mitchell 提供 (CC BY-SA 2.0) 經修改

    5

    Mezza9 嘅 Martini Bar

    如界你想搵新加坡全城 No. 1 嘅 Martini,就一定要嚟 Martini Bar!Martini Bar 位於新加坡君悅酒店 (Grand Hyatt Singapore) Mezza9 餐廳入面,酒牌上有多達 30 種飲品選擇,全部只售 SGD19 起,仲有唔少獨創款式—一場嚟到,點可以唔試?店內主打嘅特飲包括亞洲風味十足、果香濃厚又甜絲絲嘅荔枝 Martini,同埋由咖啡加可可粉混合而成嘅 Tiramisu Martini。

    除此之外,椰子、楊桃、熱情果同火龍果口味都相當唔錯,一杯入口,欲罷不能!店家嘅 Happy Hour 有半價優惠,9 杯 Martini 只需 USD9 (17:00 至 21:00),盡情豪飲都唔驚「荷包出血」啦!Martini Bar 人氣爆燈,週末更加全場爆滿—如果你想坐低飲返杯,就記得要早啲嚟喇。

    地點: 228211 新加坡史各士街 10 號君悅酒店

    開放時間: 星期一至四 17:00 至 00:00;星期五至六 17:00 至 01:00;星期日 15:00 至 00:00

    電話: +65 6738 1234

    • 晚間娛樂
    6

    Oriole Café & Bar

    位於新加坡索美塞路嘅 Oriole Café & Bar 全日營業,係休閒暢飲嘅好去處,店內嘅酒館小食價格實惠,大部分索價唔超過 SGD15,仲有各款優質咖啡同埋雞尾酒任你揀。

    嚟到 Oriole Café & Bar,你可以享受到頂級咖啡體驗,一邊放鬆身心,一邊喺露天區域俯瞰喧囂熱鬧嘅烏節路 (Orchard Road) 街景,都咪話唔寫意!不妨入嚟食個全日早餐,又或者喺烏節路盡情「血拚」,行到餓就試下材料充足嘅三文治。只要由烏節路穿過格蘭芝路步行 5 分鐘,就可以到達呢間 Café。

    地點: 238163 新加坡索美塞路 96 號泛太平洋高級服務公寓 #01-01

    開放時間: 星期日至四 08:00 至 23:00;星期五至六 08:00 至 00:00

    電話: +65 6238 8348

    • 品嚐美食
    • 晚間娛樂
    7

    Brix

    Brix 位於史各士街君悅酒店 (Grand Hyatt Hotel) 地下,吧如其名,由質樸嘅紅磚牆作為設計重點,環境舒適,空間感十足,有私人包廂同吧檯位,任君選擇。店家入場費只需 SGD10,一般 21:00 開始營業,

    到咗 23:00 就有 Live Band 表演,吸引唔少人聚集,最啱鍾意熱舞狂歡嘅「夜蒲客」,同埋想品嚐極品威士忌、葡萄酒嘅「愛酒客」。

    地點: 228211 新加坡史各士街 10 號君悅酒店

    開放時間: 星期日至三 21:00 至 03:00;星期四至六 21:00 至 04:00

    電話: +65 6738 1234

    • 晚間娛樂
    8

    KPO Cafe Bar

    KPO 位於基里尼 (Killiney)、檳城 (Penang) 同埋烏節路 (Orchard Road) 嘅交匯處,因而得名。店家嘅設計、所在地點、建築風格等等都反映咗品牌嘅生活哲學,亦因為舖面裝潢充滿現代風格,而成為城中地標—呢度身兼郵局同埋 24 小時 Café 酒吧嘅角色,無論早餐定係夜聚,都適合不過!

    逢星期六,KPC 會營業至 02:00,由 20:00 開始駐場嘅 DJ 就會施展混身解數,帶嚟最經典嘅現代舞曲,令 Party 氣氛衝上頂峰!酒吧閒日特設 Happy Hour,而星期三仲會為一眾女士送上特別優惠,歡迎向店員查詢最新著數。

    地點: 239518 新加坡基里尼路 1 號基里尼路郵政局

    開放時間: 星期一至四 15:00 至 01:00;星期五 15:00 至 02:00;星期六 18:00 至 02:00

    電話: +65 8339 5368

    • 晚間娛樂
    9

    Horse's Mouth

    Horse's Mouth 位於福臨購物中心地下 (Forum Shopping Mall),經過 01-41 號舖嘅 Uma Uma Ramen 就會嚟到。呢間酒吧開喺購物中心入面,驟眼睇可能有啲奇怪;但係只要穿過窗簾、落埋樓梯,你就會發現另一片世外桃源—店內燈光昏暗,氣氛十足,設計靈感源自日式酒吧,裝潢充滿時尚現代感,用彩色陳列配搭深色木材,打造出獨特風格。

    喺款式眾多嘅飲品之中,由深明「烈酒之道」嘅調酒師特製嘅招牌雞尾酒非試不可。想要簡簡單單、又辛辣強勁嘅選擇?不妨試下清酒或者威士忌。酒吧特飲款款都令人印象深刻,品質絕對有保證!Horse's Mouth 雖然望落似間小酒吧,但係只要早啲過嚟,你就可以試到店家精心炮製嘅優質拉麵,最啱飲酒之前用嚟打打底,之後豪飲都唔驚!

    地點: 238884 新加坡烏節路 583 號福臨購物中心 #B1-39

    開放時間: 星期一至四 18:00 至 00:00;星期五至六 18:00 至 01:00

    電話: +65 8188 0900

    • 品嚐美食
    • 晚間娛樂
    10

    Bedrock Bar & Grill

    Bedrock Bar & Grill 係一間現代燒烤餐廳兼威士忌吧,位於泛太平洋高級服務公寓 (Pan Pacific Serviced Suites) 裡面,設計出自屢獲殊榮嘅紐約設計公司 AvroKO 手筆,揉合各種有機元素,例如未上油嘅木材、粗糙嘅花崗岩,同埋特製毛絨皮革座位,打造出溫馨親切嘅氛圍,

    既可以作為商務會議或者 Party 場地,而 6 人、12 人或者 20 人團體仲可以預訂私人廂房食飯,私密度十足!

    地點: 238163 新加坡索美塞路 96 號烏節泛太平洋高級服務公寓 #01-05

    開放時間: 星期一至日 12:00 至 15:00;18:00 至 23:00

    電話: +65 6238 0054

    • 晚間娛樂
    Ben Reeves | 旅遊常客

    開始計劃行程

    Maps