克拉碼頭 (Clarke Quay) 最好玩活動

新加坡河喺克拉碼頭 (Clarke Quay) 嘅中心地帶，流過發展蓬勃嘅夜生活區中央，唔單只為遊客營造風景如畫嘅景點，亦係「飲飲食食」嘅好地方。行上觀光船，你可以喺河嘅上下游泛舟，睇盡沿途各大得意景點，當中包括克拉碼頭同駁船碼頭 (Boat Quay)，最後就到濱海灣 (Marina Bay)。

呢條蜿蜒嘅河流流過克萊蒙梭橋 (Clemenceau Bridge) 同安德森橋 (Anderson Bridge) 等好有歷史意義嘅橋，同埋魚尾獅 (Merlion) 同濱海藝術中心 (Esplanade) 等重點地標，最後流入新加坡海峽。

亞洲文明博物館 (Asian Civilisations Museum) 係一座好靚嘅英國殖民風格建築，距離克拉碼頭、萊佛士坊同市政廳地鐵站皆只係幾步路，雲集咗新加坡最高級嘅一啲收藏品同展覽，為你呈現當地悠久多元嘅古今面貌。

無論你對歷史有無興趣，都不妨抽番 2 到 3 個鐘，探索一下館內眾多展廊同展覽，一定會好陶醉架！亞洲文明博物館佔地超過 14,000 平方米，嚟自亞洲各地嘅文物展品多到 1,300 件，將透過鉅細無遺嘅歷史文獻，帶你漫遊新加坡歷史長河，發掘呢個城邦古往今來嘅多元殖民歷史文化。

史丹福萊佛士爵士 (Sir Stamford Raffles) 被公認為新加坡開埠鼻祖，而成個城邦有兩尊爵士雕像—黑色青銅像聳立喺維多利亞劇院 (Victoria Theatre) 前面；

佢純白色嘅聚合大理石「複製品」就放咗喺北駁船碼頭 (North Boat Quay)，標誌住佢喺 1819 年第一次登島嘅地點。呢兩個地區都深受當地人歡迎，尤其係好涼爽嘅夜晚，就特別好行。

福康寧公園 (Fort Canning Park) 位處新加坡中部嘅細小綠丘上面。從地鐵站步行 1 分鐘，你即會被金碧輝煌的現代化辦公室和龐大購物中心所包圍；接下來呈現眼前的，卻是另一番景象—

綠樹林蔭、無垠草地映入眼簾，恰為慢跑客、狗主，以至想稍息一番的遊人塑造出休憩場所，忘卻都會忙碌。福康寧公園位於克拉碼頭嘅酒吧餐廳區後面，可以由克拉碼頭同市政廳地鐵站輕鬆直達。

萊佛士坊 (Raffles Place) 同埋佢嘅周邊地帶正正位於萊佛士坊地鐵站入口出面，今時今日林立咗大華廣場 (UOB Plaza) 同大華大廈 (UOB Building) 等摩天大樓，算得上係新加坡嘅商業同金融核心，又有「中央商務區」之稱。

其中，大華廣場一期 (UOB Plaza One) 28 樓嘅觀景室有向公眾開放，俾你欣賞新加坡河、市政區、殖民建築以至駁船碼頭嘅壯觀景色，同時細探新加坡昔日作為繁華殖民地嘅點點痕跡。

難得度假，參觀中央消防局 (Central Fire Station) 都好似有啲奇怪…不過，只要再望多眼新加坡呢間歷史最悠久嘅消防局，你就會發現佢引人入勝之處，單係館外嘅傳統紅白色外牆已經夠哂矚目，特色設計令到佢係當地一眾現代化商場同辦公大樓之中脫穎而出。

行入局內，民防歷史博物廊同樣有趣精彩，可以免費遊覽，帶你了解新加坡呢處重要地標嘅得意歷史。同小朋友一齊嚟？館內亦都有唔少好玩活動—細路哥可以拎住消防裝備，坐喺消防車入面，甚至戴埋消防員嘅頭盔「扮下 Cool」！由克拉碼頭或市政廳地鐵站出發，行一陣就會直達新加坡中央消防局。

駁船碼頭係橋北路同安德森橋 (Anderson Bridge) 之間嘅水域，距離克拉碼頭站只有幾步之遙。無論你沿住河邊悠閒漫步，定係安坐周圍餐館，細賞壯麗景色，呢度都係區內焦點地標，

又以喺克拉碼頭站渡河嘅橋北路段為重點推介—由嗰度向南望，東邊就係新加坡高樓聳立嘅中央商業區，而宏偉嘅濱海灣沙灘 (Marina Bay) 喺你嘅正前方，每日 20:00 同 21:30 都會舉行璀璨耀目嘅激光表演。之後，你可以喺水邊巷仔物色任何一間色彩繽紛嘅酒吧同餐館，抖返一陣。

鳳山寺係擁有百年歷史嘅中式廟宇—如果你咁啱身處克拉碼頭 (Clarke Quay) 地區，又鍾意文化體驗多過「夜蒲」Shopping，呢度就會係你嘅理想好去處！鳳山寺位於穆罕默德蘇丹路，由一系列建築物、庭院同雕像組成，為佛教徒營造寧靜嘅敬拜場地，亦都為人數日增嘅過路遊客提供有趣嘅攝影景點。

事實上，呢座寺廟喺國內同國際都廣獲認可，1978 年被指定為「新加坡國家古蹟」，2010 年仲獲得聯合國教科文組織亞太文化遺產保護獎嘅「優秀獎」添！克拉碼頭地鐵站距離呢座佛寺最近，行 10 分鐘就到。

藝術館放映室 (The Arts House) 係設有 75 座位嘅出色戲院，距離克拉碼頭橋北路只有幾步之隔，建築設計流露華麗嘅殖民地風格，而且每日都會放映本地同國際獨立電影，仲會定期舉辦藝術展覽，為你介紹新加坡最有前途嘅新晉藝術家添！

除此之外，戲院裡面有一間叫做「Earshot」嘅 Cafe 兼書店，你可以喺度睇下當地優秀小說，再歎返杯 Cappuccino。無論係文學定係視覺創作領域，呢度每個落角都係為咗促進當地人才發展而設，好有意義！

G-Max 反轉笨豬跳本身已經係克拉碼頭 (Clarke Quay) 嘅地標，碩大宏偉，夜晚著燈之後格外璀璨，亦都係旅客追求刺激嘅不二之選，可以令你腎上腺素急升！

14:00 打後，一班「挑戰者」開始蜂擁而至 (夜晚排隊嘅人龍會短啲)，喺每小時 200 公里嘅速度之下，飛越 60 英尺天際。

嚟到新加坡密室逃脫中心 (Lockdown Singapore)，有真實版逃脫遊戲上演—玩家會被「安置」喺上咗鎖嘅房裡面，要合作搵出逃生路線。每間房都有新嘅謎題，有啲非常簡單、有啲相對複雜—如果你真係苦無頭緒，可以隨時向熱心嘅工作人員攞下線索。萬一真係走唔甩，場內仲有緊急逃生門，俾患有幽閉恐懼症、又或者冇辦法喺限時內逃脫嘅玩家離開。

密室逃脫遊戲適合一家大細，亦係喺新加坡落雨嗰陣打發時間嘅好玩意。新加坡密室逃脫中心位於克拉碼頭 (Clarke Quay) 嘅「The Central」購物中心入面，遊戲費用大約係每人每小時 SGD20。