克拉碼頭 (Clarke Quay) 同河畔最好嘅夜生活好去處

到咗夜晚，克拉碼頭 (Clarke Quay) 同河畔嘅頂級酒吧、餐廳同夜店開始活力無限，璀璨迷人！一日嘅工作完咗之後，克拉碼頭就即刻成為大家嘅好玩焦點，碼頭上面嘅優質酒吧同露天餐廳喺中央商業區附近，提供各種美酒佳餚，等遊客可以喺戶外享受一下。

呢度有好多色彩繽紛嘅大道，無論係一星期邊個夜晚嚟，呢度都係盡情狂歡嘅好地方，要玩足一晚到天光，真係絕對唔成問題！美食、飲品同派對係呢區嘅特色；而克拉碼頭同河畔嘅大部分夜店距離克拉碼頭地鐵站都只係行幾步，交通好方便。

1
Attica 夜店
推介：
晚間娛樂
你鍾意好，唔鍾意都好，反正 Attica 就係全新加坡最受歡迎嘅夜店，可以稱得上係市內「夜蒲界」嘅縮影！身處克拉碼頭 (Clarke Quay) 嘅海濱，你輕輕鬆鬆就可以嚟到 Attica，而唔少時尚達人都會聚集喺呢度，隨住大熱歌曲起舞；市內嘅年輕專業人士仲會一啲都唔吝惜咁，喺呢度大花錢，盡情咁玩！

店裡面裝潢新穎，而且間中仲會邀請好似 Paul Oakenfold 呢類國際名人嚟演出，絕對係一大「吸客」賣點！另外，店裡面亦好寬敞，劃分咗四個唔同區域—如果你唔鍾意主廳嘅派對流行音樂，旁邊就係具加有地下色彩嘅 hip-hop、浩室音樂同電子音樂專區，一定合你心水！
位置： 新加坡克拉碼頭里 #02-05 峇峇利路 3A 號
開放時間： 星期二到四 22:30 到 03:30；星期五到六 22:30 到 04:30
電話： +65 6333 9973
地圖
相片由 celebrityabc 提供 (CC BY-SA 2.0) (經修改)
2
Zouk 夜店
推介：
晚間娛樂
超鍾意舞蹈音樂？咁你就要到新加坡第一間超級夜店 Zouk 一遊！呢個「夜場」一直獨佔鰲頭，唔少出色嘅當地 DJ，甚到連 David Guetta、The Chemical Brothers 同 Tiesto 等國際 DJ 都曾經喺呢度登台演出。

店裡面客群多姿多彩，而大部分人都唔太在乎伏特加呢類靚酒嘅價錢，反而更留意夜晚有嘜嘢 DJ 陣容，為佢哋「炒熱」氣氛。呢度由各個相互連接嘅夜店同專區組成，統稱為「Zouk」，而「夜蒲客」可以輕鬆穿梭唔同區域。呢間由倉庫改建而成嘅大型夜店喺克拉碼頭 (Clarke Quay) 河流上游嘅若錦街，交通好方便。
位置： 179022 新加坡里峇峇利路 3C 號 The Cannery
開放時間： 星期三到五 22:00 到 03:00；星期四 22:00 到 02:00；星期六 10:00 到 04:00 (星期日到二休息)
電話： +65 6738 2988
地圖
相片由 Jorge Láscar 提供 (CC BY 2.0) (經修改)
延伸閱讀
- 新加坡市政區最好玩活動
  新加坡
  新加坡市政區最好玩活動
- 濱海灣花園 (Gardens by the Bay)
  新加坡
  濱海灣花園 (Gardens by the Bay)
- 新加坡地鐵指南
  新加坡
  新加坡地鐵指南
3
Harry's 駁船碼頭店
推介：
品嚐美食
晚間娛樂
Harry's 駁船碼頭店以現場爵士樂表演出晒名，係所屬餐廳兼酒吧集團嘅第一間旗艦店，而呢個集團喺新加坡各地亦開咗幾間門市。

除咗盡情享受爵士音樂，你仲可以品嚐各種生啤，又可以觀賞欖球賽到一級方程式賽車等體育賽事直播。身處駁船碼頭店，不妨參加逢星期三夜晚舉辦嘅「智力競賽之夜」，試試可唔可以贏到一桶免費啤酒！
位置： 049818 新加坡駁船碼頭 28 號
開放時間： 星期日到四 11:30 到 00:00；星期五到六 11:30 到 01:00
電話： +65 6538 3029
地圖
4
Canvas 夜店
推介：
晚間娛樂
新加坡 Canvas 夜店嚴格奉行「超重低音」主義，同克拉碼頭 (Clarke Quay) 附近播放流行曲同 EDM 風格音樂嘅夜店好唔同！

店裡面嘅牆上有黃黑色嘅品牌標誌，鮮艷大膽，令人一眼就睇得出。每個星期，本地同國際出名嘅 DJ 都會嚟呢度表演，音樂類型包括咗車庫搖滾樂、高科技舞曲、漸進音樂、極簡鐵克諾、重鼓同低音音樂等等，應有盡有。
位置： 新加坡河濱步道 #B1-01/06 沙球朥路上段 20 號
開放時間： 星期二 17:00 到 00:00；星期三到五 17:00 到 03:00；星期六 20:00 到 04:00 (逢星期日到一休息)
電話： +65 8125 0166
地圖
相片由 celebrityabc 提供 (CC BY-SA 2.0) (經修改)
5
Harry's 河濱坊店
推介：
品嚐美食
晚間娛樂
逢星期三到四，Harry's 河濱坊店嘅樂隊由 19:30 就會開始現場表演。一場嚟到，記住要試試呢間酒吧兼連鎖餐廳嘅人氣小食，包括牛柳粒、特色爵士漢堡等，食嘢果時飲番杯佐以啤酒同雞尾酒就最爽！
位置： 058282 新加坡 #01-04 馬真路 30 號
開放時間： 星期日到二 11:00 到 00:00；星期三到四 11:00 到 01:00；星期五到六 11:00 到 00:00
電話： +65 6438 8852
地圖
6
G-Max 反轉笨豬跳
推介：
遊歷
晚間娛樂
如果你唔畏高，就一定要挑戰 G-Max 反轉笨豬跳！除咗安坐酒吧或餐廳，靜靜咁欣賞海岸如詩如畫嘅靚景外，G-Max 反轉笨豬跳正係你嚟到克拉碼頭 (Clarke Quay) 嘅另一好玩選擇。佢係新加坡史上第一個笨豬跳場地，一定令你腎上腺急升，以最刺激嘅方式睇盡呢個城市嘅靚景—

一眾勇士 (又或喺附近酒吧飲咗幾杯壯膽嘅玩家) 將會以每小時 200 公里嘅速度，衝向高到 60 米嘅天空！G-Max 每日 17:00 就會開放，但日落西山、華燈初上嘅時候景色最靚，所以璀璨夜景先吸引仲多人嚟「試膽」。
位置： 179024 新加坡克拉碼頭里峇峇利路 3 號
開放時間： 每日 17:00 到半夜
電話： +65 6338 1766
地圖
相片由 Schristia 提供 (CC BY-SA 2.0) (經修改)
7
The Quayside 酒吧
推介：
晚間娛樂
如果你想喺新加坡嘅河畔熱門地區感受露天食嘢同飲番杯嘅體驗，喺羅伯遜碼頭嘅 The Quayside 就係最佳選擇！

The Quayside 酒吧設計既現代化，又獨樹一格，一次過集齊住宿、餐廳同飲酒場所，同時同新加坡洲際酒店 (Intercontinental Singapore Hotel) 相連，畀到你喺新加坡市中心盡情享受一流服務。
位置： 238252 新加坡羅伯遜碼頭 60 號
地圖
8
瘋象酒吧 (The Crazy Elephant)
推介：
晚間娛樂
喺克拉碼頭 (Clark Quay) 嘅瘋象酒吧 (The Crazy Elephant) 正正係「精緻品味」嘅代名詞，而且每晚仲有出色嘅現場搖滾音樂上演，為你營造休閒舒適嘅氛圍。瘋象酒吧坐落喺克拉碼頭河畔嘅全新「精品小店」同「小酒館」酒吧旁邊，以塗鴉牆同長髮「Rocker Band 友」脫穎而出，專向藍調同經典搖滾樂隊致敬，可以畀你一直狂歡到半夜。

店內飲品價錢亦相當合理，一杯啤酒大約 SGD10 左右，算係呢區最實惠嘅飲酒好去處。點解唔喺音樂表演開始前 (22:00 左右) 嚟到，霸番個靚位，隨住節拍熱舞成晚？
位置： 179024 新加坡 #01-03/04 里峇峇利路 3E 號
開放時間： 星期一 17:00 到 01:00；星期二到四 17:00 到 02:00；星期五到日 17:00 到 03:00
電話： +65 6337 7859
地圖
9
Shuffle Bistro Bar 酒吧
推介：
晚間娛樂
無論你想同一大班朋友傾下偈，定係兩個人談談心，呢間寬敞嘅酒吧兼餐廳都會係唔錯嘅選擇，環境既清靜，價格又相當合理。Shuffle Bistro Bar 酒吧有 150 個座位，即使喺克拉碼頭 (Clarke Quay) 嘅繁忙時段，仍然有好多空間，可以畀大家享用美酒佳餚。

店內嘅菜式美味可口，雞翼、薄餅同漢堡等小食應有盡有，而所有食物嘅價錢都只係大約 SGD10-15。店裡面後方有一個小舞台，歡迎當地樂隊表演各種中國經典歌曲同流行曲。同克拉碼頭嘅其他舖頭唔同，呢度唔係以搖滾樂為賣點，但就可以為你營造更輕鬆嘅氣氛。
位置： 新加坡克拉碼頭 #02-03 里峇峇利路 3D 號
開放時間： 星期一到二 18:00 到 00:00；星期三到四 18:00 到 01:00；星期五到六 18:00 到 03:00 (逢星期日休息)
電話： +65 6338 9438
地圖
10
The Chupitos Bar 酒吧
推介：
晚間娛樂
就算你只係識得最基本嘅西班牙語，都會明白 The Chupitos Bar 酒吧正正係一杯接一杯暢飲「shots」嘅好地方！唔好睇小呢啲烈酒份量小小，但都係超新穎獨特，各有主題或噱頭，而且通常都涉及火或有趣道具，

當中包括咗充滿輕快異國風情嘅「荔枝馬丁尼 (lychee martini)」、味道有啲噁心嘅「牛扒液 (liquid steak)」，同埋超級危險嘅「毒氣室 (gas chamber)、「苦艾三部曲 (absinth trilogy」同「酷刑 (torture bong)」等等。呢間酒吧繽紛好玩，可以令你喺朋友心目中留下好深印象，但可能唔係成晚狂歡嘅最好地點—因為，所有「shots」嘅價錢都係 SGD12 起，如果豪飲到天光，只怕你嘅銀包同肚仔都會嘔凸！
位置： 179021 新加坡 #01-05 克拉碼頭里峇峇利路 3B 號
開放時間： 星期日到二及星期四 17:30 到 01:30；星期三及星期五到六 18:30 到 03:30
電話： +65 6333 4513
地圖
11
自由古巴咖啡廳兼酒吧
推介：
晚間娛樂
新加坡人同國內外籍居民通常都斷定「自由古巴」只係咁多遊客酒吧之一，無嘜特色；但係，講到現場音樂同店內氣氛，呢間熱鬧嘅酒吧隨時喺我哋記錄中得分最高！呢度固然無太多當地人光臨，但每晚依然熱舞唔停 (除咗星期日)，環境舒適；駐店樂隊優秀出色，會演奏古巴歌曲，仲會翻唱一啲特別得意嘅拉丁流行曲。

店內舞池會喺 22:00 左右開放，而呢間店嘅招牌 Mojito 雞尾酒雖然每杯價錢 SGD24，但就係我哋強烈推介嘅必試之選！不妨把握每晚 18:00 到 21:00 嘅飲品折扣優惠，了解一下店內推廣項目，痛快暢飲！
位置： 179021 新加坡 #01-13 里峇峇利路克拉碼頭
開放時間： 每日 17:00 到 04:00
電話： +65 6338 8982
地圖
12
新加坡小西貢 (Little Saigon Singapore) 酒吧
推介：
晚間娛樂
小西貢 (Little Saigon) 餐廳兼酒吧喺新加坡出晒名嘅夜生活中心克拉碼頭 (Clarke Quay) 度，一直都大受歡迎，店內有好多款越式經典菜 (越南牛河、檸檬牛肉、春捲同烤鴨)，美食應有盡有，日頭食嘢嘅氣氛輕鬆，夜晚就變到活力四射，駐場樂隊仲會為大家演奏「Top 40」最強金曲！

小西貢嘅裝飾名符其實，充滿咗越南第二大城市嘅風情—環顧呢間店，燈籠掛喺天花板上，配搭殖民地風格木質裝飾同多姿多彩嘅顏色，令成個空間更加靚。呢間餐廳兼酒吧喺正克拉碼頭嘅活動核心 (E 街嘅泡泡形屋頂下面)；如果你喺 20:00 之前嚟到，仲可用低至半價嘅歡樂時光優惠嘆下各種啤酒、雞尾酒同特色調酒。
位置： 179024 新加坡克拉碼頭 01-02-E 里峇峇利路 3 號
開放時間： 星期一到四 16:00 到 01:00；星期五 16:00 到 02:00；星期六 12:00 到 02:00；星期日 12:00 到 01:00
電話： +65 6337 5585
地圖