新加坡亞洲文明博物館 (Asian Civilisations Museum)

新加坡景點

    亞洲文明博物館 (Asian Civilisations Museum/ACM) 係新加坡最受歡迎嘅國立博物館之一。想探索有趣嘅泛亞藝術同文化嘅話,就一定唔可以錯過呢間博物館!博物館深入介紹亞洲多元文化—呢種文化嘅融合,正正就係新加坡建立多民族社會嘅重要基礎。

    新加坡亞洲文明博物館喺 1997 年成立,位於亞美尼亞街嘅舊道南學校校舍裡面,主要展示嚟自萊佛士圖書館兼博物館 (Raffles Library and Museum) 嘅展品。博物館後來擴展藏品規模,到 2003 年就喺歷經修復嘅皇后坊大廈 (Empress Place Building) 開設旗艦博物館,而呢棟大樓仲稱得上係新帕拉第 (neo-Palladian) 風格建築嘅優質典範添!2008 年,博物館嘅亞美尼亞街分館正式揭幕,主力保存土生華人文化藝術品同文物。

    亞洲文明博物館特色

    亞洲文明博物館珍藏咗過千件文物,分別喺 3 層共 11 間展廳入面展出。貴為區內唯一專門介紹亞洲文明嘅博物館,館方展出大量東南亞、南亞、中華同西亞文化精選文物,其中大部分嘅歷史仲可以追溯到 5,000 幾年前!

    東南亞展品眾多,分別喺 3 間展廳展出,按照唔同嘅主題分類,例如史前、部落歷史、地方佛教、馬來世界同爪哇歷史。5 號同 5a 號展廳展出西亞文物,為遊人展示嗰一帶豐富嘅伊斯蘭文化。6 號展廳嘅展品亦都非常精彩,有龍袍、皇室瓷器、德化白瓷同 7 世紀佛像等,帶大家窺探一下中華古文明。

    至於博物館嘅第 7 同第 8 間展廳,就擺放咗大量南亞早期文物,例如陶瓦俑、硬幣、壁掛板、印度青銅器、佛塔同石製印度教神像等等。要數當中嘅必睇推介,一定係新加坡河展廳 (Singapore River Gallery),裡面展出新加坡河口出土嘅展品,令人眼界大開!

    博物館內每個主題展廳都設有影片「導賞指南」,同埋「探索亞洲 (ExploreAsian)」互動展區。訪客要更深入了解亞洲多元複雜嘅文化,絕對冇難度。此外,博物館全年都會舉辦特別展覽、教學活動和節慶。亞洲文明博物館用「亞洲文明博物館—亞洲文化活靈活現的地方!(The Asian Civilisations Museum – Where Asian Cultures Come Alive!)」作為標語,喺各方面都當之無愧!

    遊覽須知

    亞洲文明博物館喺市政區新加坡河北岸,你可以由市政廳地鐵站輕鬆去到,而新加坡地鐵南北線同東西線都會經過呢個車站。由亞洲文明博物館擁有同經營嘅土生華人博物館 (Peranakan Museum,又稱為 ACM I) 距離皇后坊大廈嘅博物館 (ACM II) 只有 15 分鐘步程,不妨順道參觀!

    博物館裡面設有商店、餐廳同 Café。博物館逢星期五 18:00 至 21:00 免費入場。

    相片由 Wolfgang Holzem 提供 (CC BY-SA 3.0) 經修改

    新加坡亞洲文明博物館 (Asian Civilisations Museum)

    地點: 179555 新加坡皇后坊 1 號

    開放時間: 每日 10:00 至 19:00 (星期五開放至 21:00)

    電話: +65 6332 7798

    開始計劃行程