新加坡藝術科學博物館 (ArtScience Museum Singapore)

藝術科學博物館就好似隔嚟嘅地標一樣，已經極速成為新加坡天際線嘅標誌，建築設計充分考慮到周圍環境：每間展廳盡頭都有窗口，引入自然光線；展館底部嘅倒影池會收集雨水，然後送去洗手間循環再用。

博物館四圍仲有一座大型荷花池，賞心悅目！到咗夜晚，呢座建築會向上空射出燈光，好似連接天與地一樣，特別迷人。藝術科學博物館最多可以容納 21 個展廳空間，視乎展覽內容而變換。館內就好似一塊空白嘅畫布咁，因應展品而佈置；

常設展覽根據個別主題或者構思劃分，分別喺唔同嘅展廳展出。訪客可以沿住懸浮梯級進入「好奇心 (Curiosity)」展廳，沿途仔細睇睇牆上潦草書寫嘅問題，探討藝術同科學之間嘅關係。入到展廳，有資料講解興建藝術科學博物館時考慮到嘅構思同設計，當中涵蓋工程同美學方面嘅元素。

再上一層，你會嚟到「靈感 (Inspiration)」展廳；呢間多媒體展室集中介紹 6 件塑造現今世界面貌嘅物品，值得一睇，當中梗係唔少得達文西 (Leonardo da Vinci) 嘅飛行裝置—呢部裝置既係藝術，亦展現出前衛嘅科學概念。「表達 (Expression)」展廳位於成座建築嘅最高處，用影片方式介紹科學同藝術方面嘅偉大成就，涵括建築、飛行、機械人同地圖等範疇。

另外，藝術科學博物館仲有幾個巡迴展覽，曾經展出鐵達尼號嘅文物、《哈利波特》電影場景嘅道具，同埋向梵高 (Vincent Van Gogh)、達利同安迪華荷 (Andy Warhol) 致敬嘅藝術展品。新加坡藝術科學博物館嘅常設展覽多姿多采又有趣，絕對可以為一家大細帶嚟一段難忘嘅「發現之旅」！