嚴島神社同宮島鳥居

神社建築群由幾座建築物組成，當中包括參拜殿，本社社殿同能劇舞台，由木板路相互連接，並通過水下柱子支撐。嚴島神社建於小島之上，而大鳥居就位處瀨戶內海嘅潮間帶。小島周圍環繞住多條步道，太陽落山之後，神社同大鳥居就會亮燈，而遊客可以喺神社附近散步，感受入夜後嘅浪漫氣氛。

嚴島神社係日本三景之一，別名為宮島，日文意思係「神島」。

神社採用咗獨特嘅「寢殿造」建築風格，據說最初建於 593 年，現存嘅亭台樓閣則建於 1168 年。蔚藍大海同埋島上青翠山嶺襯托朱紅色嘅神社主建築，對比鮮明奪目，自然景觀同神社建築群嘅和諧融合，彰顯正宗嘅日式建築風格。

聯合國教科文組織決定將嚴島神社列為世界文化遺產，理由係：「呢座神社係同類宗教建築物嘅至高典範，運用傳統建築藝術同高超技術，巧妙將神社完美融入優美嘅自然環境中，創造出無與倫比、美輪美奐嘅建築藝術瑰寶。」