黑森林 11 大最好玩活動

貴為黑森林入面最秀麗嘅湖泊，蒂蒂湖 (Lake Titisee) 全年都值得參觀！春夏之際，你可以喺平靜嘅湖水上暢泳揚帆，亦可以用每個鐘 EUR10 嘅相宜價格租架水上單車嚟踩，而夏季時份通常遊客較多。隆冬及至，呢個古老嘅冰川湖表面會結冰，搖身變成大家最鍾意嘅露天溜冰場！蒂蒂湖嘅主要入口喺佛萊堡 (Freiburg)，你可以由法蘭克福 (Frankfurt) 坐 ICE 火車 (Inter City Express)，2 個鐘就到。

特里貝格瀑布 (Triberg Falls) 位於黑森林 (Black Forest) 中央，沿住同名小鎮車站嘅森林小徑遠足上山，就可以嚟到。就算隆冬飄雪，古塔奇河 (Gutach) 嘅河水依然會由 7 層樓高嘅瀑布一瀉而下；只係，凍冰冰嘅觀景台到時會變得非常濕滑，行過要加倍小心。特里貝格瀑布嘅彩色燈飾會一路著燈到 22:00 左右，夜晚去遠足嘅話，仲可以欣賞到格外璀璨嘅景色添！瀑布入場費約為 EUR3。

黑森林露天博物館 (Black Forest Open Air Museum) 嘅一大特色，就係保存完好嘅 17 世紀農舍 Vogtsbauernhof，皆因嗰度有繁花盛開嘅花園，同埋放牧牛馬嘅田野。到咗下晝，館內員工仲會著住五顏六色嘅 Gutach 時期服裝，表演傳統手工藝添！而小朋友實會鍾意呢度嘅露天遊樂場，仲有擺滿傳統玩具嘅閣樓。博物館成人門票約為 EUR10，兒童可享半價優惠；Ortenau S-Bahn 火車站喺正博物館前面，交通方便。

霍亨索倫城堡 (Hohenzollern Castle) 係黑森林附近最壯觀嘅堡壘之一，坐落喺同名山丘之上，距離特里貝格瀑布 (Triberg Falls) 東北大約一個鐘車程，可以俾你無阻擋飽覽遼闊全景，順道參觀埋堡內豐富多彩嘅美術館同展覽，行程精彩。唔講唔知—呢度仲曾經係普魯士 (Prussian) 王室嘅真實住所嚟架！不妨參加皇家城堡漫步導賞團，把握遊走皇室宮殿嘅好機會。城堡入場費係每位成人 EUR12。

遊覽巴登-巴登 (Baden-Baden) 溫泉小鎮，可能係你喺「黑森林觀光團」裡面最輕鬆嘅行程！呢度係古羅馬無人不知嘅天然溫泉鄉，鎮上設有附帶高柱嘅 Trinkhalle 泵房，裡面畫滿絢麗壁畫，值得細賞。據聞：區內泉水具有治療作用，點可以唔飲返啖？一場嚟到，不妨去埋卡拉卡拉溫泉浴場 (Caracalla Therme；日間 Spa 中心，入場費由 EUR23 起) 等場地，試吓羅馬式熱水浴。充電過後，想大買特買？咁就要去綠茵如畫嘅鵝卵石舊城區、又或者獨特無雙嘅 Sophien 街 (Sophienstraße) 行吓喇！

如果你想享受家庭樂、另加驚險刺激體驗，不妨去 Europa-Park 玩番轉！呢度有幾十種遊樂設施，大多數係過山車，仲有多姿多彩嘅室內主題表演同互動式科學展覽，好玩景點設施超過 50 個，仲包括啱哂小朋友嘅露天單軌火車添！公園距弗萊堡 (Freiburg) 以北大約半個鐘車程，儘早嚟到，旅程就更加暢行無阻，唔使大排長龍。門票大約每人 EUR50 起。

呢座宏偉壯觀嘅 12 世紀哥德式地標位於弗萊堡 (Freiburg)，距離蒂蒂湖 (Titisee) 以西一個鐘車程，飾有栩栩如生嘅滴水嘴獸同高聳尖頂，映襯大教堂嘅羅馬式外牆同堂內彩色玻璃窗。教堂入場費係 EUR2；音樂會 (例如管風琴四重奏) 嘅票價就約為 EUR8。不妨喺正午之前登上 116 米高嘅鐘樓，飽覽靚景之餘，仲可以細聽塔頂 19 個古老大鐘悠揚響奏，呢種體驗都好獨特架！

黑森林樹梢步道 (Baumwipfelpfad Schwarzwald) 係一條長達 1,250 米嘅螺旋形木製坡道，不妨漫步於上，一邊欣賞森林靚景吖！沿路，你會經過山毛櫸﹑冷杉同埋雲杉嘅樹冠，可以放慢腳步，隨心行到山頂，由距離地面 20 米嘅高處飽覽無際風光。一年四季，都係遊覽呢度嘅好時機；隆冬之際，白雪皚皚嘅松樹仲為你所影嘅相增添魔力！每位成人嘅入場費為 EUR10 起；額外俾多 EUR2，就可以由中央滑梯瀡落嚟，樂趣滿分！

講到遊覽黑森林嘅至正手信，又點可以唔提精心雕刻嘅布穀鳥鐘？賣穀鳥鐘嘅舖頭幾乎遍佈大城小鎮，又以特里貝格 (Triberg) 出品最佳，人氣名店包括特里貝格瀑布 (Triberg Falls) 入口前嘅千鐘樓 (House of 1000 Clocks)，同埋對面嘅 Oli`s Schnitzstube。一個鐘仔嘅價格大約係 EUR75，20 英寸嘅精緻屋仔模型鐘就大約賣 EUR700。為防假冒，一定要睇下你買嘅鐘有冇黑森林時鐘協會 (VDS) 頒發嘅證書喎！

巴登葡萄酒之路 (Baden Wine Road) 長約 280 公里，貫穿海德堡 (Heidelberg) 同康斯坦茨 (Konstanz) 之間嘅德國巴登 (Baden) 葡萄酒種植區，會帶你穿越森林，沿住風景秀麗嘅林間小徑漫步，參觀一個又一個栽種葡萄多年嘅古老釀酒廠。巴登葡萄酒之路嘅德文名係「BadischeWeinstraße」，沿路有好多個標誌，俾你喺旅程之中稍作停留；而大多數釀酒廠都有提供品酒體驗，買之前可以試真啲先，唔會收取額外費用。講到推介之選喇喎…Spätburgunder 黑皮諾係區內最卓越嘅黑皮諾品種，每枝酒起價大約 EUR23。

卡爾夫 (Calw) 坐落喺叢林茂密嘅納戈爾德 (Nagold) 山谷裡面，距離法蘭克福 (Frankfurt) 以南大約 2 個鐘車程，亦都可以由斯圖加特 (Stuttgart) 搭火車西行，1 個鐘就到。小鎮中心林立一排又一排嘅中世紀風格半木結構房屋，啱哂自拍「打卡」！另一方面，正因為卡爾夫係德國作家兼諾貝爾獎得主赫爾曼·黑塞 (Hermann Hesse) 嘅出生地，所以納戈爾德西岸附近仲有一間博物館，歌頌佢嘅作品。鎮上嘅雄偉地標建築值得你一一探索，當中包括 11 世紀嘅 Hirsau 修道院同埋 Hirsau Schloss 城堡遺址—而且，兩者仲係免費入場架添！