峇里 27 座必去寺廟
峇里最壯麗寺廟
峇里嘅古老寺廟擁有幾百年歷史，建築宏偉，散落喺高地上面、海岸旁邊，其中幾座仲成為咗峇里最具代表性嘅地標添！通常，寺廟周邊嘅環境都充滿異國情調，最啱影相打卡，又以節日期間特別精彩。峇里寺廟採用當地年曆，一年得 210 日，所以每個西曆年都會舉辦兩次節日慶祝活動。
一場嚟到峇里，梗係要揀返日，細意參觀寺廟啦！每座寺廟嘅設計都獨一無二，特別推介位於阿貢火山 (Mount Agung) 多雲山峰上面嘅百沙基母廟 (Besakih)；仲有時間嘅話，可以去埋烏布 (Ubud) 附近嘅象洞 (Goa Gajah)。日落西山，烏魯瓦圖神廟 (Uluwatu) 同海神廟 (Tanah Lot) 格外金黃奪目，景色極致迷人。遊覽當地，一定要入鄉隨俗，著返符合場合嘅衫褲。峇里大多數寺廟都可以租借紗籠同腰帶。
1. 烏魯瓦圖神廟
南峇里嘅培卡圖 (Pecatu)
推介： 歷史文化, 拍照
烏魯瓦圖神廟 (Uluwatu Temple) 係峇里明信片成日出現嘅寺廟之一，廟底嘅懸崖仲係深受滑浪客歡迎嘅異國滑浪熱點添！呢座寺廟坐落喺峇里西南部嘅懸崖上，比海浪高出大約 70 米，喺當地又有「Pura Luhur Uluwatu」嘅暱稱，同西峇里嘅海神廟 (Tanah Lot) 一樣，都係以壯麗日落作為背景。之不過，烏魯瓦圖神廟處於更高位置，會帶俾你更加廣闊、更加令人驚嘆嘅海景。
踏足寺廟各處嘅通道，你都可以近距離細賞古老建築同雕塑；寺外周圍係一片茂密森林，住咗啲灰色長尾獼猴；而附近嘅露天圓形劇場會定期喺日落嘅黃金時份演出羅摩衍那 (Ramayana) 芭蕾舞或者卡恰火舞 (kecak)，最啱攝影發燒友拍攝世間難見嘅靚相！
位置： Jalan Raya Uluwatu, Pecatu, Badung, Bali 80361, Indonesia
開放時間： 每日 09:00 到 18:00
烏魯瓦圖神廟
2. 水神廟
塔巴南嘅百渡庫 (Bedugul)
推介： 歷史文化, 拍照
水神廟 (Ulun Danu Beratan Temple) 係峇里中部風景如畫嘅高地寺廟地標，位於布拉坦湖 (Beratan Lake) 嘅西面。湖面平靜如鏡，映照住寺底嘅一大部分，營造出寺廟飄浮嘅錯覺，獨特無雙；而背後嘅山脈就成為咗寺廟朦朧夢幻嘅背景。
高地靚景引人注目，氣候清爽，令到呢座寺廟成為最受歡迎嘅觀光景點；寺內嘅大型湖畔花園開滿繁花，既可以為你營造愉快時光，又可以俾你影相「打卡」；想玩啲休閒活動既話，可以喺湖上泛舟遊覽，悠閒咁乘坐雙座位鴨式水上單車，又或者暢玩其他水上運動。
位置： Danau Beratan, Candikuning, Baturiti, Tabanan, Bali 82191, Indonesia
開放時間： 每日 08:00 至 18:00
水神廟
3. 塔曼阿尤廟
巴東 (Badung) 嘅孟威 (Mengwi)
推介： 歷史文化, 拍照
建於 17 世紀嘅塔曼阿尤寺廟 (Taman Ayun Temple) 係孟威 (Mengwi) 村莊嘅巴東 (Badung) 攝政時期主要地標，展示咗傳統峇里印度教寺廟建築嘅典範；而寺內嘅庭院同埋圍牆都保養得好好，裡面有廣闊嘅熱帶花園同埋水池，又種咗蓮花，又有養魚，生機盎然！
塔曼阿尤廟嘅外牆好大部分都點綴咗神社高塔，算得上係孟威王國同埋已故統治者 Tjokorda Sakti Blambangan 嘅古蹟遺址。喺塔曼阿尤廟嘅整體建築同埋浮雕上面，都可以搵到唔少中華文化元素，好特別架！
位置： Jalan Ayodya No.10, Mengwi, Badung, Bali 80351, Indonesia
開放時間： 每日 09:00 至 16:00
塔曼阿尤廟
4. 海神廟
西峇里嘅塔巴南 (Tabanan)
推介： 歷史文化, 拍照
海神廟外型壯觀，位於海濱，獨一無二，所以成日喺峇里嘅明信片同旅遊手冊亮相。寺內有座古老嘅印度教聖殿，喺海浪之中露出頂部石柱，不斷受印度洋嘅海浪撞擊，但都依然屹立！海神廟係峇里西部地區嘅旅遊亮點，寺外嘅日落靚景不容錯過；
寺廟距離庫塔 (Kuta) 北部大約 45 分鐘車程，附近有比較細嘅陸上村莊寺廟同旅客休閒設施，例如餐廳、商舖，同埋舉辦舞蹈表演嘅文化公園等等。要數參觀海神廟嘅最佳時間，就係庫寧甘日 (Kuningan) 同 5 日後嘅寺廟週年紀念日。屆時區內全部都係嚟朝聖嘅信眾，大家喜氣洋洋，氣氛熱鬧！
位置： Jalan Raya Tanah Lot, Beraban, Kediri, Tabanan, Bali 82121, Indonesia
開放時間： 每日 07:00 至 19:00
海神廟
5. 象洞
中峇里嘅烏布 (Ubud)
推介： 歷史文化
象洞 (Goa Gajah) 係具有歷史意義嘅考古建築群，非常適合短暫停留喺烏布 (Ubud) 同峇里中部地區嘅旅客。雖然寺名翻譯成「象洞」，但係呢度完全唔會搵到大象 (笑)！象洞建於 11 世紀，本來係一座修道庵，洞穴唔算好深，裡面有幾尊石像同冥想空間。
喺神秘嘅洞穴前面，你會見到一個會議廳 (Wantilan)，另外仲有一座寺廟庭院；喺 1954 年出土嘅古老泳池附近，仲有一個露天廊，放滿咗大型石頭遺蹟。你可以行入泳池，近距離欣賞拎住海龍捲花樽嘅仙女雕像，又或者探索傳說中佩塔努河 (Petanu River) 同寺廟後面嘅石頭文物。
位置： Jalan Raya Goa Gajah, Pejeng Kawan, Tampaksiring, Gianyar, Bali 80582, Indonesia
開放時間： 每日 08:00 至 16:00
象洞
6. 聖泉廟
中峇里嘅吉安雅烏布 (Gianyar)
推介： 歷史文化, 拍照
聖泉廟 (Tirta Empul) 係國家文化遺產，歷史可以追溯至公元 960 年舊峇里王國瓦爾瑪德瓦 (Warmadewa) 王朝嘅統治期間，寺名嘅意思係「聖水泉」，亦即係寺內水源嘅名稱。泉水會流入各個淨化浴池、泳池同埋魚塘，
然後流入附近嘅卡德‧帕克努薩河 (Tukad Pakerisan River)。區內各個遺址同埋考古遺物，都同當地嘅神話傳說有關；而附近山頂嘅另一個知名景點就係總統府 (Istana Tampaksiring)。呢座宮殿係喺國家第一任總統蘇加諾 (Soekarno) 嘅任期內建造，歷史悠久！
位置： Jalan Tirta, Manukaya, Tampaksiring, Gianyar, Bali 80552, Indonesia
開放時間： 每日 09:00 至 17:00
聖泉廟
7. 妙音天女神廟
烏布
推介： 歷史文化, 拍照
妙音天女神廟 (Pura Taman Saraswati) 係烏布鎮 (Ubud) 上一座壯麗嘅水上寺廟，可以由烏布市烏布大馬路 (Jalan Raya Ubud) 旁邊嘅卡姜街 (Jalan Kajeng) 進入，絕對係你喺烏布鎮悠閒漫步途中，歇腳抖抖嘅好地方，可以俾你欣賞到峇里古典寺廟建築，再影吓靚相。
寺廟嘅優美門廊裡面設有水池，池中盛開住粉紅色嘅蓮花。遊客通常都會喺 Café Lotus 享用相宜晚餐，一邊食嘢，一邊細賞蓮花同寺廟開放式舞台嘅景色。每晚 19:30，台上都有傳統舞蹈表演定時上演，精彩奪目！
位置： Jalan Kajeng, Ubud, Gianyar, Bali 80571, Indonesia
妙音天女神廟
8. 百沙基母廟
東峇里嘅 Karangasem
推介： 伴侶, 家庭, 歷史文化, 拍照, 經濟實惠
百沙基母廟 (Besakih Temple) 經常被視為峇里嘅「母廟」，坐落於阿貢山 (Mount Agung) 西南山坡上，係一座集合不同宗族寺廟同神寺嘅宏偉建築群，每年至少有 70 個慶祝活動上演，皆因每個神社都有個別嘅週年紀念日。要行勻哂全個建築群，都可能需要成日時間！正係因為咁樣，大多數觀光團都只會遊覽最大型嘅阿貢山培拿它蘭廟 (Pura Penataran Agung) 中央建築群；
另一座寺廟 Pura Pasimpangan 位於阿貢山培拿它蘭廟東面；而喺較高嘅斜坡上面，仲有 Pura Pengubengan 廟，坐擁海拔 1,000 米嘅壯麗景致。參觀寺廟嗰陣，一定要著圍裙同腰帶，通常喺大門入口處俾「捐贈費」嘅地方，就可以領取。而停車區仲有好多小販擺檔，你可以盡情搜羅色彩繽紛嘅紡織紀念品。
位置： Besakih, Rendang, Karangasem, Bali 80863, Indonesia
開放時間： 每日 08:00 至 17:00
百沙基母廟
9. 連普揚寺
東峇里嘅 Karangasem
推介： 伴侶, 家庭, 歷史文化, 拍照, 經濟實惠
連普揚寺 (Lempuyang Temple) 係峇里最古老、最受尊崇嘅寺廟之一，同百沙基母廟 (Besakih Temple) 有得 Fight！據講，呢座寺廟比大多數印度教寺廟都更早出現喺島上，絕對係東峇里行程嘅必到站點，特別適合身壯力健、富有冒險精神嘅旅客！
主寺廟喺海拔 1,175 米上，位於同名嘅連普揚山 (Mount Lempuyang) 山頂。同樣位處山坡嘅培拿它蘭廟寺廟 (Penataran Agung) 大啲靚啲，係人氣爆燈嘅 Instagram 打卡位！如果你想去山頂嘅寺廟，就要行上 1,700 級嘅陡峭樓梯喇…不過，只要行得到上山頂，東峇里鬱鬱蔥蔥嘅地形全景就會映入眼簾，都算係最佳回報啦！
位置： Jalan Pura Telaga Mas Lempuyang, Tri Buana, Abang, Karangasem, Bali 80852, Indonesia
連普揚寺
10. 卡維山神廟
中峇里嘅烏布 (Ubud) 東北部
推介： 歷史文化, 拍照
卡維山神廟建築群 (Gunung Kawi Temple) 係峇里風格最獨特嘅考古遺址之一，寺內有一系列古代神社浮雕，刻喺岩石峭壁上面，主要景點俯瞰住神聖嘅帕克努薩河 (Pakerisan River)，而呢條河會流經一公里以北嘅聖泉廟 (Tirta Empul Temple)。
同古老浮雕一河之隔嘅對岸，寺廟庭院裡面有古印度神社，你可以沿住鋪好咗嘅行人路，經過藝術品店同埋當地嘅小食亭，行路去寺廟。雖然樓梯多達 300 級，但係有鬱鬱蔥蔥嘅稻田、同埋綠茵優美嘅山谷景色陪住你，行得攰啲都值得。全片視野猶如帶你返到過去，遠離現代，別有一番風光！
位置： Banjar Penaka, Tampaksiring, Gianyar, Bali 80552, Indonesia
卡維山神廟
11. 靈源宮廟
推介： 歷史文化
靈源宮 (Ling Gwan Kiong) 係峇里北部嘅古老中國寺廟，歷史可以追溯至 1873 年嘅清朝年間。行入寺內，一定要除鞋同保持冷靜，因為奉獻者會嚟到呢度，喺華麗嘅祭壇前面點亮香火祈禱。靈源宮距離羅威那海灘 (Lovina Beach) 以東 15 分鐘車程，有一個迷你花園，裡面飾有色彩繽紛嘅壁畫。
位置： Jalan Erlangga No.65, Bugis, Buleleng, Bali 81114, Indonesia
靈源宮廟
12. 佩提天蓋特廟
推介： 伴侶, 家庭, 歷史文化, 拍照, 經濟實惠
佩提天蓋特廟 (Pura Petitenget) 係水明漾市中心嘅文化地標，已經有幾百年歷史，本地方言叫佢做 Pura Petitenget。呢間寺廟絕對係必遊景點，最熱鬧嘅時候就係每隔 210 日慶祝一次嘅建廟週年紀念。事實上，同海灘平排嗰條大街嘅街名，正正同神廟一模一樣！而佩提天蓋特海灘距離神廟只有幾步之遙，係睇日落嘅最佳景點，好多遊客同本地人都會坐喺海灘，觀賞日落晚霞靚景，非常寫意架！
位置： Jalan Petitenget, Kerobokan, North Kuta, Badung, Bali, Indonesia
佩提天蓋特廟
13. 烏布根隆利巴廟
推介： 伴侶, 家庭, 歷史文化, 拍照, 經濟實惠
根隆利巴廟 (Pura Gunung Lebah Temple) 係烏布 (Ubud) 市中心地標之一，位於烏布主街嘅西端，寺名喺古老峇里方言嘅字面意思係「山谷寺廟」，歷史可以追溯到 8 世紀，同巴杜爾神廟 (Batur Temple) 有密切嘅靈性關係。無他，皆因根隆利巴廟正正係供奉巴杜爾女神！成個寺廟群裡面有 3 個庭院，另加好多個休息亭，俾信眾坐下抖下，非常貼心；而甘美朗館 (gamelan pavilion) 仲會公演傳統舞蹈添！
位置： Jalan Raya Ubud No.23, Sayan, Ubud, Gianyar, Bali 80571, Indonesia
烏布根隆利巴廟
14. 帕德馬薩廟
推介： 歷史文化, 拍照
帕德馬薩廟 (Batukaru Temple) 又稱為神聖巴度考神廟 (Pura Luhur Batukaru)，係峇里嘅主要寺廟之一，位於全島第二高嘅帕德馬薩山 (Mount Batukaru) 山腳，周圍環繞住涼爽嘅天然森林，係你留步了解塔巴南 (Tabanan) 攝政時期嘅好地方。帕德馬薩廟嘅主庭院有一個淡水泉，會用嚟做祈禱同儀式嘅聖水泉源。
位置： Jalan Penatahan-Wongayagede, Wongaya Gede, Penebel, Tabanan, Bali 85125, Indonesia
帕德馬薩廟
15. 巴圖安神廟
推介： 歷史文化, 拍照
巴圖安神廟 (Batuan Temple) 係巴圖安村 (Batuan) 當地嘅印度教寺廟，位於烏布 (Ubud) 市中心以南大約 10 公里嘅地方，建於 11 世紀，面向大型交誼廳，而奉獻者會喺嗰度祈禱，並且獻上祭品。要數神廟最引人入勝之處，保存完好嘅砂岩圖案，同埋傳統峇里寺廟建築風格絕對榜上有名；你仲可以喺寺廟嘅內院見到多層式茅草屋頂神龕添！
位置： Jalan Raya Batuan, Batuan, Sukawati, Gianyar, Bali 80582, Indonesia
巴圖安神廟
16. 邦利嘅肯罕廟
推介： 伴侶, 歷史文化, 拍照, 經濟實惠
肯罕廟 (Kehen Temple) 係邦利 (Bangli) 攝政時期嘅古老印度教寺廟建築群，風格獨特，梯級以神話動物嘅砂岩雕刻裝飾，而峇里民間傳說人物嘅雕像就擺喺中央前庭。寺廟牆壁仲有用華麗嘅中國瓷盤點綴，象徵住當地峇里王國同中國嘅歷史關係。
位置： Jalan Sriwijaya No.8, Cempaga, Bangli, Bali 80613, Indonesia
開放時間： 每日 09:00 至 17:00
邦利嘅肯罕廟
17. 庫塔嘅維哈拉德哈瑪那亞廟
推介： 伴侶, 歷史文化, 拍照, 經濟實惠
維哈拉德哈瑪那亞廟 (Vihara Dharmayana) 係庫塔 (Kuta) 最古老嘅佛教寺廟之一，建於 1876 年，主建築保養完善，呈現錯綜複雜嘅遠東風情，色彩鮮豔。寺內庭院幽麗平靜，瀰漫住嚟自祭壇嘅香火煙霧。維哈拉德哈瑪那亞廟隱身喺一條巷仔裡面，距離庫塔主要沿海地帶以東大約 1 公里。
位置： Jalan Blambangan No.12, Kuta, Badung, Bali 80361, Indonesia
開放時間： 每日 09:00 至 20:00
電話： +62 (0)361 762 362
庫塔嘅維哈拉德哈瑪那亞廟
18. 培拿它蘭薩希廟
推介： 歷史文化, 拍照
培拿它蘭薩希廟 (Pura Penataran Sasih) 又叫做「月亮神廟」，因為寺內收藏咗古代青銅定音鼓「培京之月 (Moon of Pejeng)」，「培京之月」大約 2 米長，歷史可以追溯至公元前 300 年，係東南亞最大嘅青銅定音鼓。而培拿它蘭薩希廟係印度教寺廟，源於 1266 年，仲曾經係培京皇朝嘅國家寺廟嚟架！廟內嘅主庭院正中央放咗一尊象頭神 (Ganesh) 石雕坐像，入口前面有一個現代計時碼表，同埋幾尊印度教雕塑。培拿它蘭薩希廟位於烏布 (Ubud) 以東大約 6.5 公里。
位置： Jalan Raya Tampaksiring, Pejeng, Tampaksiring, Gianyar, Bali 80571, Indonesia
培拿它蘭薩希廟
19. 莎海安提加廟
推介： 伴侶, 家庭, 歷史文化, 拍照, 經濟實惠
莎海安提加廟 (Samuan Tiga Temple) 係烏達亞那‧瓦爾瑪德瓦 (Udayana Warmadewa) 皇朝嘅皇家寺廟，被視為天神、神靈同聖人會面嘅重要場所。每年四月左右，適逢名為 Purnama Kadasa 嘅第十個滿月，呢度會舉辦峇里著名嘅印度教儀式 Siat Sampian，場面非常熱鬧。
位置： Jalan Raya Bedulu, Blahbatuh, Gianyar, Bali 80581, Indonesia
莎海安提加廟
20. 布蘭瓊神廟
推介： 歷史文化
布蘭瓊神廟 (Pura Blanjong Temple) 係峇里最古老嘅文物之一，歷史可以追溯到公元 914 年，主體建築係一塊梵文銘文石柱，相傳係勝利紀念碑，應該屬於國王 Sri Kesari Warmadewa。貴為峇里瓦爾瑪德瓦 (Warmadewa) 王朝嘅第一位國君，據聞佢成立咗峇里第一個正式政府，功績顯赫！布蘭瓊神廟仲展示咗印度神祗象頭神 (Ganesh) 嘅砂岩雕像，同埋各種動物形象，屬於國家文化遺產，全年歡迎遊客參觀。
位置： Jalan Danau Poso, Pura Blanjong No.80227, Sanur Kauh, Denpasar Selatan, Kota Denpasar, Bali 80228, Indonesia
布蘭瓊神廟
21. 貝吉廟
推介： 伴侶, 家庭, 歷史文化, 拍照, 經濟實惠
貝吉廟 (Pura Beji Temple) 係位於峇里北部 Sangsit 村嘅寺廟建築群，宏偉而壯觀，歷史可以追溯到 15 世紀，當時 Majapahit 正喺爪哇 (Java) 擴充國土。成座寺廟嘅雕刻靈感嚟自寓言同傳說交織嘅印度史詩，主角包括蛇同惡魔。同參觀峇里任何一座寺廟一樣，入去貝吉廟嗰陣，要喺腰間綁腰帶同戴沙龍架！
位置： Jalan Raya Sangsit, Sangsit, Sawan, Buleleng, Bali 81171, Indonesia
貝吉廟
22. Meduwe 卡朗寺
推介： 伴侶, 家庭, 歷史文化, 拍照, 經濟實惠
Meduwe 卡朗寺 (Meduwe Karang Temple) 係峇里北部 Kubutambahan 區嘅優美地標，距離羅威那海灘 (Lovina Beach) 大約 15 公里，同首府新加拉惹 (Singaraja) 相隔半個鐘車程。
寺內坐擁峇里嘅古典石廟建築，不過最奇特之處都係佢嘅牆壁浮雕，上面描繪一個有型有格嘅男人，騎住帶有花輪嘅單車。
位置： Jalan Raya Air Sanih, Kubutambahan, Buleleng, Bali 81171, Indonesia
Meduwe 卡朗寺
23. Sakenan 廟
推介： 歷史文化
Sakenan 廟又稱為 Pura Sakenan，係峇里南部地區嘅重要寺廟，位於登巴薩 (Denpasar) 以南 10 公里嘅色藍甘島 (Serangan) 西北岸，建於 10 世紀，喺為期 210 日嘅「神明奉獻典禮 (Piodalan Ceremony) 期間最熱鬧。屆時嚟自登巴薩南部村莊寺廟嘅信徒會前往色藍甘島上嘅幾座寺廟，其中一座就係 Sakenan 寺。
位置： Jalan Banjar Pemalukan, Peguyangan, Denpasar Utara, Kota Denpasar, Bali 80115, Indonesia
Sakenan 廟
24. 珀尼達島努沙嘅果阿吉里公主寺
果阿吉里公主寺 (Goa Giri Putri) 係位於珀尼達島 (Penida) 東北部 Suana 嘅大型洞穴寺廟，入口位處狹窄嘅岩壁口，有神殿同祭司祈禱所看守，你要彎低腰，先至可以迫入去，行過洞穴。入到寺內，寬敞嘅寺廟庭院即刻映入眼簾；喺洞穴角落嘅主神殿前面，地板部分覆蓋住白色大理石，望落都幾華麗架！
位置： Suana, Nusapenida, Klungkung, Bali 80771, Indonesia
珀尼達島努沙嘅果阿吉里公主寺
25. 塔巴南嘅 Vihara Dharma Giri 寺
推介： 伴侶, 家庭, 歷史文化, 拍照, 經濟實惠
Vihara Dharma Giri 係峇里嘅佛教寺廟，位於島上西部塔巴南 (Tabanan) 嘅布布安 (Pupuan) 村，廟內最大賣點係一尊巨型純白臥佛像。呢間佛寺係布布安村嘅必遊景點，附近有大片廣闊稻田。由峇里南部揸車去北部地區觀光，沿途就可以欣賞到呢一帶綠油油嘅稻田靚景。
寺廟環境清幽寧靜，氣氛輕鬆舒坦，入咗嚟一陣間，已經有種莫名嘅療癒感覺。你仲可以喺寺廟周圍散下步，享受呢段難得嘅觀光體驗。Vihara Dharma Giri 共有 3 層，每層都各具特色。
位置： Jalan Raya Pupuan No.1, Pupuan, Tabanan, Bali 82163, Indonesia
開放時間： 每日 07:00 至 17:00
電話： +62 (0)362 71029
塔巴南嘅 Vihara Dharma Giri 寺
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。
