首爾 21 大玩樂活動

景福宮 (Gyeongbokgung Palace) 由太祖於 1395 年建造，係朝鮮王朝時期建造嘅 5 座大皇宮中規模最大同最宏偉嘅一座。宮殿由超過 300 棟建築組成，入面設有國家民俗博物館 (National Folk Museum) 同埋國立古宮博物館 (National Palace Museum)，鍾意歷史嘅你絕對不容錯過。

宮內嘅慶會樓 (Gyeonghoe-ru)、香遠亭 (Hyangwonjeong)、以至勤政殿 (Geunjeongjeon) 雕塑等，眾多朝鮮王朝嘅遺跡都保存得相對完好，處處揚溢古代風情。景福宮喺10:00 至 15:30 期間提供英文、日文同中文嘅免費導賞團。

N 首爾塔 (N Seoul Tower) 係屹立於首爾市中心南山 (Namsan Mountain) 上嘅現代化建築，樓高 237 米嘅塔頂上設有觀景台，俾你飽覽首爾嘅遼闊全景。塔內設有數碼觀景台、多間紀念品店、餐廳同埋 Cafe。

一樓陽台係情侶必遊聖地，旅客會掛上鎖頭同埋示愛字條，象徵甜蜜愛情，而室外舞台就一年四季都會舉辦傳統表演同展覽。觀景台入場費為成人約 KRW10,000，兒童及長者約 KRW8,000。

樂天世界 (Lotte World) 位於首爾市中心，係全球最大型嘅室內主題公園之一。園內設有大量刺激好玩嘅機動設施，仲有戲院、溜冰場、繽紛嘅巡遊同埋激光匯演，適合不同年齡層人士暢玩。你亦可以參觀樂園裡嘅民俗博物館，細賞迷你村莊同埋超過 5,000 年歷史嘅文物。

樂天世界嘅入場費根據入場時間而有所不同，你可以憑門票免費進入樂天世界嘅民俗博物館、探險世界 (Adventure) 同魔幻島 (Magic Island)。

如果你打算喺逗留首爾期間盡情購物，咁就唔可以錯過明洞市場 (Myeongdong Market) 喇！明洞係韓國嘅主要購物區之一，有幾十間百貨公司、購物商場同街鋪。人氣商品包羅萬有，無論係本地品牌定係國際品牌嘅衣服、鞋具、飾品、珠寶同手袋，價錢都相當平，銷售韓國化妝品同護膚品嘅商店更有超過 1,000 間！

同首爾其他購物區唔同，明洞市場亦有觀光景點：標誌性地標包括明洞天主教大教堂 (Myeongdong Catholic Cathedral) 同哥德風格嘅明洞劇場 (Myeongdong Theatre)。

昌德宮 (Changdeokgung Palace) 係韓國僅存嘅 5 座皇宮中保存最完好嘅一座，位處白岳山 (Mount Baegaksan) 鷹峰 (Ungbong) 山腳處，喺 1997 年獲列為聯合國教科文組織世界文化遺產。皇宮由公眾宮殿區、鋪設完善嘅庭院、開放式走廊同埋皇室御所組成。

昌德宮嘅後苑 (Huwon) 係宮內最熱門嘅拍攝勝地之一，內有百合花池，同埋為五彩繽紛花卉環繞嘅典雅涼亭，非常優美。宮殿嘅一般入場費為成人約 KRW3,000，小童 (7 至 8 歲) 約 KRW1,500。宮內提供英文、中文同日文導賞團。

想了解韓國傳統佛教習俗嘅話，奉恩寺 (Bongeunsa Temple) 提供嘅文化活動就最適合你。寺廟四周綠樹成蔭，氣氛閒靜祥同，內有唔少珍藏文物，例如佛經木刻，同埋全韓國最高嘅彌勒菩薩雕像等。

奉恩寺另推出寺廟住宿計劃，俾旅客體驗佛僧生活。參觀期間，你更可以參加多種活動，包括導賞團 (提供英文、日文同中文選擇)、清晨靜修、蓮花燈製作同茶道等。

韓國戰爭紀念館 (War Memorial of Korea) 係為紀念韓戰 (1950 年至 1953 年) 而建造。博物館位於梨泰院 (Itaewon)，設有虛擬戰鬥體驗室同埋 6 個室內展廳，陳列歷史文物同埋戰鬥記錄。

而室外展覽中心就展示 13,000 件戰爭紀念品、軍事裝備同埋紀念雕像。韓國戰爭紀念館不設入場費。

宗廟 (Jongmyo Shrine) 係朝鮮王朝進行祭禮嘅儒家皇家祠堂，獲列入聯合國教科文組織世界文化遺產，內有昔日朝鮮王朝國王同埋皇后嘅神主牌，當地人每年都會喺宗廟舉辦韓國皇宮文化節 (Korean Royal Palace Culture Festival) 等傳統文化節慶。

旅客必須由導遊帶領，先可以進入宗廟嘅文化遺產區 (入場費介乎 KRW400 至 KRW1,000)，而神社本身為嚴禁進入。宗廟距離鐘路 3 街 (Jongno-sam-ga) 地鐵站只有 5 分鐘步程。

東大門市場 (Dongdaemun Market) 係韓國最大嘅批發同零售購物區之一。區內有大約 26 間購物商場、30,000 間專賣店同 50,000 間製造商。商品範圍由紡織品、衣服、鞋具、珠寶首飾，以至皮具、玩具、電子產品同辦公室用品，都一應俱全。

東大門市場嘅吃巷子 (Mukja Golmok) 美食街係專賣韓國街頭美食同小食嘅巷子，吸引大量美食達人去潮聖。購物區到深夜都一直非常熱鬧，入夜後仲會舉行慶祝活動、Fashion Show、音樂同舞蹈表演等。

北村韓屋村 (Bukchon Hanok Village) 內有幾百間韓屋 (韓國傳統民房)，經歷時間洗禮，由朝鮮王朝屹立至今。呢度獲譽為首爾最靚嘅歷史城區。村內好多建築物都已經改建成文化中心、旅館、餐廳同埋茶館。

雖然北村韓屋村本身不設入場費，但你可以俾 KRW10,000 買「北村博物館自由通行證」(Bukchon Museum Freedom Pass)，參觀村內嘅博物館，特別係嘉會博物館 (Gahoe Museum)、韓尚洙刺繡博物館 (Han Sangsu Embroidery Museum) 同埋韓國藝術博物館 (Museum of Korean Art) 都極受好奇心旺盛嘅旅客歡迎。

走入韓國民俗村 (Korean Folk Village)，旅客就可以重溫首爾喺城市化之前嘅舊日風采。呢個古色古香嘅小鎮除咗有民間藝術表演外，亦有提供文化工作坊供旅客參加，仲有俾小朋友盡情暢玩嘅現代主題公園。

韓國民俗村內嘅熱門景點包括世界民俗博物館、陶器展覽館同韓國民俗博物館。記得要去村內表演區，觀賞鋼索雜技表演、馬術表演、農民音樂會同埋舞蹈音樂會等精彩節目！

北岳山係首爾最高嘅山之一，又稱為白岳山 (Baekaksan)。山上有風景秀麗嘅小徑，帶你穿越市內嘅 15 世紀大門同埋古老堡壘城牆。登頂大約需要 2 個鐘頭，立足頂峰你就可以飽覽到城市各處、景福宮 (Gyeongbokgung Palace) 以至 N 首爾塔 (N Seoul Tower) 嘅美景。

沿途你會穿過多個歷史地標，例如首爾城牆 (Seoul Fortress Wall)、北岳亭 (Bugak Pavilion) 同埋三清公園 (Samcheong Park) 等。進入小徑前你需要向當局人員展示護照，所以出發前記得做好準備！

只要買一日通行證，你就可以喺當日隨意乘坐城市觀光巴士。觀光巴士共有 4 條路線可供選擇：全景路線 (Panorama course) 會喺 16 個地標停車，當中包括 N 首爾塔 (N Seoul Tower)、南山公園 (Namsan Park) 同漢江 (Han River)。你亦可以沿途參觀明洞 (Myeong-dong) 同弘大 (Hongdae) 區 。

想到景點觀光嘅話，不妨選擇市中心皇宮南山路線 (Downtown Palace Namsan Course)，巴士會停經首爾 5 座大皇宮同國立民俗博物館 (National Folk Museum of Korea)。對於唔熟悉市內地鐵系統嘅家庭同旅客嚟講，乘坐觀光巴士就最方便不過！

63 大廈 (63 SQUARE) 樓高 264 米，係首爾最高嘅摩天大樓之一，位於最高層嘅 63 美術館 (63 Art Gallery) 值得一去！美術館設有瞭望台，可以俯瞰首爾市中心、漢江 (Han River)、北岳山 (Bugaksan)、南山 (Namsan) 同埋冠岳山 (Gwanaksan) 嘅群山美景。

肚餓嘅話，不妨到 63 大廈嘅頂層，嗰層開設咗幾間高檔餐廳同優閒餐廳，供應歐洲、日本、中國同韓國等各地菜式。

仁寺洞 (Insa-dong) 係個活力四射嘅地區，沿巷有幾十間古董店、傳統茶館同書店。區內亦有大約 100 間畫廊，吸引好多對韓國傳統美術感興趣嘅人慕名而至。

當中熱門景點包括展示民間藝術嘅學古齋美術館 (Hakgojae Gallery)，仲有陳列全國各地新晉藝術家作品嘅 Gana Art Gallery 藝術中心。每逢週末，仁寺洞嘅主要大街都會劃作行人專用區。喺你遊覽仁寺洞期間，記得欣賞一下古典音樂會同藝術展覽，同埋盡情享受韓國街頭美食。

南山公園 (Namsan Park) 位於首爾市中心南山 (Mount Namsan)，係個休閒好去處。喺園內，你可以選擇乘搭纜車，或者沿住石階往上行前往八角形嘅八角亭 (Palgakjeong Pavilion)，細賞城市美景。

公園內仲有好多其他觀光景點，包括安重根義士紀念館 (An Jung-geun Memorial Hall)、南山圖書館 (Namsan Library) 同埋 N 首爾塔 (N Seoul Tower)。喺清晨前嚟南山公園嘅話，就可以不時見到當地人沿住小路慢跑或喺空地上面耍太極，俾你充分感受當地生活風情。

奧林匹克公園同主競技場 (Olympic Park and Stadium) 係個休閒中心，熱愛運動嘅旅客去首爾時就不容錯過！呢個場館係為咗舉辦 1988 年首爾奧運會而建造，而家一年四季都會用嚟舉行體育比賽、音樂會同埋大型活動。

唔止咁，館內仲有奧林匹克博物館 (Olympic Museum)、夢村土城 (Mongchon Fortress) 同埋世界同平門 (World Peace Gate) 等景點。奧林匹克公園內有鋪設完善嘅小徑，引領遊客前往雕塑公園，細賞入面裡約 200 個裝置藝術品。館內嘅網球場、健身室、劍擊場同埋室內奧林匹克泳池都對外開放。

韓國國立中央博物館 (National Museum of Korea) 收藏咗超過 15,000 件佛教雕塑、金屬製品同陶瓷製品，場內亦設有美術館，展出嚟自印尼、中亞、日本同埋中國嘅畫作。

一樓展出史前時代至朝鮮王朝嘅文物遺跡，而二樓就陳列出書法、繪畫同埋木製工藝品。一家同遊嘅話，不妨順便去埋龍山家庭公園 (Yongsan Family Park)。公園內有草地、池塘同埋自然教育中心，仲有好多白鴿野雞等各種鳥類。

南怡島 (Nami Island) 係位於春川 (Chuncheon) 嘅半月形島嶼，坐擁自然地標同埋娛樂活動場地，適合不同年齡層嘅旅客遊覽。要去南怡島，你可以先揸大約 2 個鐘頭車，然後轉搭渡輪，5 分鐘就可以抵達。渡輪每 30 分鐘一班，尾班船於 21:00 開出。

南怡島上嘅設施包羅萬有，包括設有旋轉木馬嘅主題公園、射擊場、溜冰場、度假別墅同埋單棟平房等。此外，你仲可以見到喺島上自由漫遊嘅野生動物，包括鹿、兔仔、火雞、鼴鼠同埋黑啄木鳥等等。

想體驗首爾最熱門嘅夜生活，不妨到「練歌房」(noraebang，即卡拉 OK)通宵唱盡首首「飲歌」！「練歌房」喺市內幾乎隨處可見，通常配備大電視、多支咪高峰、手鼓，同埋大量英語、日語、韓語同埋華語流行音樂任君選擇！平均每個鐘頭收費為 KRW2,000 至 KRW20,000 之間，啤酒、汽水同埋小食費用另計。