尼斯位處地中海岸濱,係蔚藍海岸 (French Riviera) 數一數二嘅人氣度假勝地,全年氣候溫暖宜人,喺當地有個綽號叫「Nissa La Bella」,尼斯語嘅意思係「美麗的尼斯 (Nice the beautiful)」。尼斯氣氛輕鬆,不失時尚,迷人景點又多,好應該成為每個去法國東南海岸旅行嘅人必遊勝地之一!

    以下列出嘅尼斯最佳景點囊括富歷史氣息嘅街區、沙灘、博物館同當地美食天堂。快啲戴返副太陽眼鏡、搽返啲太陽油,同我哋一齊睇下尼斯最出名嘅地方名勝啦!

    尼斯最好玩嘅活動係乜嘢?

    1

    喺盎格魯街展開一日行程

    沿住「英國人步道」漫遊

    • 伴侶
    • 家庭
    • 拍照
    • 豪華住宿

    盎格魯街 (Promenade des Anglais) 意思係「英國人步道」,位於地中海沿岸,由尼斯機場 (Nice Airport) 延伸至美國海濱大道 (Quai des États-Unis),長約 5 公里,吸引唔少人嚟散步、慢跑、踩單車、踩 roller、踩滑板,生氣勃勃,係靜觀行人來往嘅好地方。步道兩邊種滿棕櫚樹,亦都設有長凳,而你可以喺沿路嘅 Vélo Bleu 自助點租單車;附近嘅海灘仲有好多間酒吧同餐廳,任君選擇添!

    地點: 法國尼斯天使灣 (Bay of Angels) 沿岸、機場同美國海濱大道之間

    地圖
    2

    探索尼斯舊城區

    喺尼斯嘅歷史中心漫步

    • 歷史文化`
    • 拍照
    • 經濟實惠

    本地人叫尼斯舊城區做「Vieux Nice」,佢位於天使灣 (Bay of Angels) 東端阿伯特一世花園 (Albert the 1st Garden) 同城堡山 (Castle Hill) 之間,擁有狹窄嘅鵝卵石街、紅屋頂嘅舊式房屋,仲有一眾著名景點,例如尼斯歌劇院 (Nice Opéra) 同拉斯卡里斯宮 (Lascaris Palace) 等等,彷佛帶你返去 18 世紀。區內以古樸餐廳同熱鬧夜場而聞名;遊覽期間,一定要去 Fenocchio Glacier (地址:6 Rue de la Poissonnerie) 食城中最好味嘅雪糕,獎勵吓自己!

    地點: 法國尼斯盎格魯街 (Promenade de Anglais) 東端

    地圖
    3

    去莎萊雅廣場市集掃街

    輕鬆漫步,細味熱鬧市集嘅香氣同色彩

    • 購物
    • 拍照
    • 品嚐美食

    雖然莎萊雅廣場市集 (Cours Saleya Market) 賣蔬果多過賣花,但係當地人依然叫佢做「尼斯花卉市場 (Nice Flower Market)」。呢個市集喺莎萊雅廣場上面架設,正正位於舊城區同海灘之間,絕對係你品嚐當地新鮮食品、同檔主傾偈交流嘅好地方。要數莎萊雅廣場市集嘅必試名物,Socca 肯定名列前茅—呢款鷹嘴豆烤餅係正宗地道菜式,又以 1920 年代就喺市集擺檔嘅 Chez Thérésa 出品最值得一試。

    地點: 法國尼斯舊城區前天使灣 (Bay of Angels) 東端

    開放時間: 星期二至六 06:00 至 17:30;星期日 06:30 至 13:30 (逢星期一休息)

    地圖
    4

    去濱海自由城馬里涅雷斯海灘曬出一身古銅膚色

    喺蔚藍海岸數一數二嘅人氣海灘放鬆身心

    • 家庭
    • 拍照
    • 經濟實惠

    馬里涅雷斯海灘 (Marinières Beach 或 Plage des Marinières) 位於濱海自由城 (Villefranche-sur-Mer),距離尼斯 (Nice) 以東 15 分鐘車程,人氣極旺,尤其喺 5 月至 9 月期間最受歡迎。有別於區內好多海灘,馬里涅雷斯海灘免費開放俾公眾,雖然唔係沙質灘,但係灘上嘅石春比尼斯前面嘅卵石灘細粒好多好多,都算唔錯架喇!呢片海灘嘅另一個優點,就係附近有好多酒吧同餐廳,就算你冇帶嘢食嚟野餐,都唔會餓親。

    地點: 法國尼斯以東 3 公里嘅濱海自由城

    地圖
    5

    大擦尼斯沙律、Socca 同 Pan Bagnat 三文治

    品嚐尼斯當地特色菜

    • 品嚐美食

    尼斯 (Nice) 係風光秀麗嘅海濱城市,街頭美食好味又多元化,全程「掃街」夠哂過癮!舉凡清新又飽肚嘅尼斯沙律 (Niçoise Salad)、Pan Bagnat 三文治 (即係將尼斯沙律夾入三文治裡面)、Socca (鷹嘴豆烤餅)、Pissaladière (橄欖、洋蔥配醃鯷魚批)…尼斯一定可以喺旅程中滿足你嘅味蕾。食完呢啲地中海美食之後,想解吓渴嘅話,梗係要飲地道淡色桃紅酒啦!

    地點: 上述菜式喺尼斯各個地方一律有售,又以餐廳嘅尼斯沙律最正宗;而 Pan Bagnat 三文治、Socca 烤餅同 Pissaladière 洋蔥批就可以喺麵包店食到。不過,講到食 Socca 最出名嘅地方,絕非莎萊雅廣場市集 (Cours Saleya Market) 嘅 Chez Thérésa 莫屬!

    6

    去勃朗峰公園遠足

    欣賞蔚藍海岸嘅壯麗景色

    • 伴侶
    • 家庭
    • 拍照
    • 遊歷

    勃朗峰公園 (Mont Boron Park) 有 11 公里長嘅遠足徑、全長 1.5 公里嘅運動圈、野餐區、滾球球場…一句講哂,你想玩咩都有,一定樂而忘返!另外,勃朗峰公園嘅焦點特色仲有 16 世紀嘅阿爾班山堡 (Fort du Mont Alban),西面望到尼斯港 (Port of Nice) 嘅壯麗景色,東面飽覽濱海自由城 (Villefranche-sur-Mer) 同聖讓卡普菲拉半島 (Saint-Jean-Cap-Ferrat)。由尼斯舊城區 (Nice Old Town) 出發遠足,大約 45 分鐘就會嚟到,而搭巴士仲可以直達公園添!

    地點: 法國尼斯港同濱海自由城之間

    地圖

    相片由 Pierre Bona 提供 (CC BY-SA 3.0) 經修改

    7

    喺 Oliviera 餐廳享用午餐

    喺歡樂嘅氣氛下試勻當地特色菜

    • 伴侶
    • 購物
    • 品嚐美食

    位於尼斯舊城區 (Nice Old Town) 北部嘅 Oliviera 餐廳相當有人氣,你可以喺度品嚐當地正宗美食同特產;與此同時,呢間餐廳亦都係精品店,有賣區內出品嘅優質橄欖油。店家每一道菜都會配搭一種特定嘅油嚟炮製:例如,Aubergine Oliviera 茄子料理會用牛肝菌油煮;地中海他他牛肉 (Tartare Méditerranée) 就會採用 AOP 上普羅旺斯油,如此類推。Oliviera 餐廳備受推祟,而且門面唔大,所以都係訂定枱先夠穩陣!

    地點: 尼斯舊城區北部柯萊特街 (Rue du Collet)

    開放時間: 周二和周三12:00至14:00,周四至周六12:00至14:00和19:00至20:00,在周日和周一关闭

    電話: +33 (0)4 93 13 06 45

    地圖
    8

    馬克夏卡爾博物館令你大開眼界

    探索夏卡爾以聖經為題材嘅作品

    • 歷史文化`

    馬克夏卡爾博物館 (Marc Chagall Museum) 收藏咗俄羅斯出生藝術家馬克夏卡爾 (Marc Chagall) 嘅作品,館藏屬全球數一數二;以一間博物館嚟講,呢個場地都算異常熱鬧架喇!館外花園設有古樸嘅酒吧/餐廳,亦有舉辦現場古典音樂會嘅大廳同埋戲院,放映關於呢位多面向藝術家生平嘅電影。馬克夏卡爾博物館位於尼斯 (Nice) 市中心嘅梅納德博士大街 (Dr.Ménard Avenue)。

    地點: 位於法國尼斯火車站東北 1 公里嘅梅納德博士大街上

    開放時間: 5 月至 10 月:星期三至一 10:00 至 18:00。11 月至 4 月:星期三至一 10:00 至 17:00 (逢星期二休館)

    電話: +33 (0)4 93 53 87 20

    地圖

    相片由 Derbrauni 提供 (CC BY-SA 4.0) 經修改

    9

    喺城堡山公園欣賞靚景

    定格尼斯同天使灣嘅景色

    • 伴侶
    • 家庭
    • 拍照

    城堡山 (Castle Hill) 位於舊城區 (Old Town) 以東,係尼斯 (Nice) 嘅制高點,你可以徒步登頂,亦都可以搭 Lift 或者 Little Tourist Train 遊客小火車去到。上到山頂之後,你會見到尼斯城堡嘅遺跡、大型人工瀑布、古老公墓,仲有一間酒吧/餐廳添!城堡山飽覽尼斯絕美全景,西望天使灣 (Bay of Angels),向東就睇到港口靚景,公園環境怡人,啱哂散步;帶埋小朋友嚟呢度嘅專屬遊樂場玩,肯定特別開心。

    地點: 法國尼斯舊城區同天使灣東端港口之間

    開放時間: 10 月至 3 月:每日 08:30 至 18:004 月至 9 月:每日 08:30 至 20:00

    地圖
    10

    去金梅德新大道 Shopping

    喺尼斯市中心由朝 Shop 到黑,直落晚飯

    • 家庭
    • 購物
    • 品嚐美食
    • 豪華住宿

    金梅德新大道 (Jean Médecin Avenue) 位於舊城區 (Old Town) 以北嘅馬塞納廣場 (Place Massena) 同尼斯 (Nice) 火車站之間,係尼斯市中心最熱鬧嘅購物街,長近 900 米,設有寬闊嘅行人路同各種類型嘅購物場所,由小型精品店、大型購物中心、百貨公司到大型超市都應有盡有,精選品牌包括 H&M、Marks & Spencer 同 Zara 等等。行到餓喇?你仲可以喺度搵到好多餐飲選擇添!溫馨提示:過馬路嗰陣,記得小心睇車,唔好掛住望櫥窗喎。

    地點: 法國尼斯市中心 (舊城區以北)

    地圖
    11

    喺鳳凰公園漫步

    參觀尼斯植物園同動物園

    • 家庭
    • 歷史文化`
    • 拍照

    鳳凰公園 (Parc Phoenix) 係佔地 7 公頃嘅植物園兼動物園,而尼斯亞洲藝術博物館 (Nice Asian Arts Museum) 都喺呢度;園內仲有一間附設室外露台嘅 Snack Coté Jardin 酒吧/餐廳,行到餓都唔驚!鳳凰公園擁有歐洲最大型嘅溫室之一,營造出 6 種唔同嘅熱帶氣候,總共帶你穿越 20 幾個主題花園,俾你探吓袋鼠以至眼鏡凱門鱷等等眾多奇特動物。另一方面,公園設有大型兒童遊樂區,簡直係細路天堂,而且全園入場費只需 EUR5,抵到爛啦!

    地點: 法國尼斯天使灣 (Bay of Angels) 西端、尼斯機場對面

    開放時間: 每日 09:30 至 18:00 (4 月至 10 月 19:30 閉園)

    電話: +33 (0)4 92 29 77 00

    地圖

    相片由 Daniel70mi Falciola 提供 (CC BY 2.0) 經修改

    12

    最後一站去尼斯舊城區,臨瞓前飲返杯

    遊遍尼斯舊城區嘅熱鬧酒吧

    • 品嚐美食
    • 晚間娛樂

    尼斯舊城區 (Nice Old Town) 坐擁各種熱鬧酒吧,俾你食完晚飯玩返餐。如果你想聽現場 Jazz、Soul 同 Reggae,就要去羅塞蒂街 (Rue Rosseti) 嘅 Shapko Bar 喇;想飲特色啤酒,仲要間 Pub 洋溢法式氣氛嘅話,可以試吓 Rue de la Prefecture 大道嘅 Les Distilleries Idéales;你鍾情美式餐廳?Rue de la Prefecture 大道都仲有間 Wayne’s Bar。尼斯舊城區嘅「深夜暢飲場地」有排數,選擇多到你揀唔到,最好試完一間又一間,咁就搵到最啱你口味嘅地方啦!

    Stephan Audiger | 旅遊常客

    開始計劃行程

    Maps