新竹 12 大最好玩嘅活動

城隍廟亦稱為「新竹城隍廟」，吸引嚟自台灣各地嘅遊客參觀，亦係市內最具活力嘅地方之一。寺廟前方嘅市集攤檔有售各式台灣街頭小食，令你流曬口水，又以美味可口嘅新竹肉丸係必試之選，一定可以刺激你嘅味蕾！喺寺廟嘅廣闊庭院入面，不時會上演台灣傳統「歌仔戲」—唔想錯過嘅話，記得早啲嚟。

港南濱海風景區同人工運河曾經係當地人嘅專屬泳灘，惟市政府睇中呢片運河區嘅旅遊潛力，因而著手發展。如今，運河區內設施眾多，當中包括陰涼野餐地點、美麗橋樑同埋蜿蜒單車徑等等。夜幕低垂，河岸更係風光如畫。

青草湖好受情侶歡迎—事實上，其人氣指數之高，令唔少人都喺湖邊向身邊愛侶求婚！

湖中央嘅小島特別迷人，你可以經由裝飾華麗嘅映月橋登島，並遊逛島上簡約秀美嘅花園。湖西尚有小庭院—有意求婚嘅話，記得把握日落時分嘅浪漫氛圍！

高峰植物園獲譽為「新竹市綠色圖書館」，早喺 1930 年代開幕之初，已有「赤土崎林業試驗場」之稱。今時今日，植物園內有多達 300 種各式各樣嘅植物，涵蓋幼嫰樹苗、以至樹齡長達 50 年以上嘅老樹，可以令你深入了解台灣金合歡樹、桉樹、錫蘭橄欖樹等等嘅眾多樹種。

新竹科學園區堪稱新竹市嘅現代化核心，崇尚高科技，周圍都有人工湖同埋寬敞嘅公園；園區設有燒烤爐，可以俾你盡情野餐，惟事先必須徵得新竹科學園區當局嘅許可。

新竹市立動物園規模或者唔係該區最大，但經營狀況卻至為理想，「熟手」工作人員會悉心照顧園內 250 名「居民」。其中，靈猴園區係最具人氣嘅景點之一，當中嘅黑猩猩極受大人細路喜愛！

如果要了解新竹嘅文化，就要一遊新竹市文化局影像博物館，透過經典電影認識呢座歷史名城。博物館坐落喺本身同樣歷史悠久嘅華麗建築物之中；而該建築物建於 1933 年，係台灣首間配備空調嘅劇院。日佔時期結束之後，政府翻新咗建築物，令建築物成為新竹市現今嘅流行文化樞紐，有各種節目定期上演。

嚟到國立交通大學內嘅竹湖，你可以一邊放鬆身心，一邊欣賞美景。垂柳同埋竹樹遍佈湖邊；而湖畔嘅涼亭正係最好嘅拍照「打卡」熱點！

新竹市護城河親水公園圍住新竹市最古老嘅護城河而興建，園內到處都係花卉樹蔭，俾你暫時逃離猛烈嘅陽光同埋都市嘅喧囂；護城河兩旁開滿咖啡館，河上仲設有兩個小型舞台，不時舉辦文化表演同迷你音樂會。

雖然金城湖起初稱為「魔鬼湖」，但係同魔鬼冇咩太大關係；相反，湖邊嘅青翠山丘彷如仙境，賞心悅目。除此之外，你亦可以喺湖區觀賞到各式各樣嘅野鳥同候鳥。小貼士：9 月到 5 月係最佳觀鳥時節，所以請務必帶備雙筒望遠鏡，並準備好野餐美食！

飛鳳山位於新竹市東南面，係一個風景名勝區，因為當地人認為其外型酷似從天而降嘅鳳凰，所以以此命名。

沿住遠足徑登頂嘅難度唔算高，亦唔似預期般費力，路上有多張木椅同平緩山坡俾遊客休息，山頂亦有小食同飲品出售。據說，當天氣晴朗時，你可以由山頂望到大名鼎鼎嘅台北 101 大樓！

十八尖山附近有一條寬闊嘅林蔭大道，非常適合喺涼爽嘅早晨散步。除此之外，你亦可以喺開始健行登山之前，先到公園遊覽一下。十八尖山脈上最高嘅山峰達 131.79 米，如果唔盡早出發，可能無法準時徒步登頂；

而另一座山峰名叫「十八尖」，山上擺放著佛教慈悲女神觀音大士嘅 33 尊石像，每尊大約 1 米高，分散在山中各地，要將之全部找齊，亦屬相當大的挑戰！