日光國立公園

日光嘅神社同寺院歷史

日光嘅神社同寺院歷史可追溯至 18 世紀—當時，僧侶勝道上人成功攀上男體山山頂，並喺山坡上興建一間寺廟；自此之後，男體山被視為神聖之地。喺鎌倉幕府嘅支持下，日光喺 12 世紀蓬勃發展，成為關東地區最重要嘅宗教祭祀場地。

東照宮始建於 1617 年，為日光寺廟群奠下重要歷史里程碑！按照德川幕府創始人德川家康嘅遺囑，佢嘅陵墓正正安放於東照宮。大約 19 年之後，東照宮應德川家康孫兒德川家光嘅命令，進行咗大規模嘅翻新工程，

化身成華麗藝術品，而現存東照宮嘅大部分建築物都係喺呢個時期建成。時至今日，東照宮仍然係德川家族長達 250 年、至高無上之輝煌統治歷史嘅標誌。後來，德川幕府亦出資興建咗二荒山神社同輪王寺。

19 世紀後期，明治政府採取措施，將寺廟群劃分為 3 個區域，交俾唔同宗教團體管理—東照宮同二荒山神社歸神道教管理，輪王寺就由佛教支派打點。

日光嘅神社同寺院嘅亮點及特色

日光嘅神社同埋寺院好大程度上反映咗江戶時代嘅建築風格。根據神道教嘅信仰，大自然至為神聖，亦都係世人崇敬嘅對象。為此，諸如東照宮、二荒山神社以及輪王寺等日本神社同寺院完美體現「天人合一」嘅日式傳統寺廟風格，寺外嘅漫山遍野都係源於 17 世紀嘅日本巨型杉樹，為寺廟群增添神聖魅力。

東照宮採用咗當時最先進技術所建，除咗古色古香嘅五重塔之外，寺內仲有好多出色建築物、大門同燈籠；而雙層陽明門又稱為「日暮之門」，刻上超過 500 個巧奪天工嘅雕刻，值得參觀。

「唐門」亦係另一個參觀賣點，上方雕塑描繪「竹林七賢」嘅傳說；而神月厩舍就刻有代表諺言「不見惡行、不聞惡言、不言惡語」嘅三不猴像，全長 220 米，放眼望去，你會望到典雅雕塑同晶瑩雕刻。

二荒山神社佔地超過 3,500 公頃，覆蓋日光山脈同華嚴瀑布，神社內供奉咗 3 位神明：大己貴命、味耜高彥根命同田心姬命。喺二荒山神社範圍內，有趣嘅參觀亮點數之不盡，當中包括火焰飄拂迷離嘅「妖怪燈籠」、據說泉水能治眼疾嘅「二荒靈泉」、100 幾把劍，同埋只有將軍先至可以使用嘅「神橋」。

日光山輪王寺喺 8 世紀由勝道上人興建，入面有 15 幢歷史建築物，包括供奉千手觀音、馬頭觀音同阿彌陀如來嘅主殿「三佛堂」，以及典型江戶時代建築風格嘅「大猷院」，而呢度亦係德川家光嘅陵墓所在。