紐約充滿活力,景點數之不盡,絕對係世界上數一數二嘅浪漫城市,觀光同玩樂活動多到你唔信。雖則紐約嘅浪漫氣氛好大程度取決於季節,但係就算天氣不似預期,我哋都會為你同另一半送上萬無一失嘅約會小貼士,

    當中有唔少景點都曾經喺名曲或者大銀幕上出現,你哋一路挽手漫步,好容易就觸景生情,聯想起相關情節架喇!一於睇下紐約曼哈頓 (Manhattan) 同周邊地區嘅最出色情侶活動啦。

    1

    探索切爾西市場

    切爾西市場 (Chelsea Market) 充滿隱世驚奇寶藏,無論你去過幾多次都好,依然會覺得新奇。呢個場位處都會觀光勝地,喺正哈德遜河 (Hudson River) 附近嘅廢棄餅乾工廠入面,係紐約經典嘅「打卡」好地方。如果你想揀返啲別樹一幟嘅手信,呢度賣嘅古董古玩比時代廣場 (Times Square) 買到嘅仲更加獨特!

    去市場途中,記得留返個肚喎,因為場內美食攤販供應嘅地道小食多不勝數,實會叫你流哂口水。身處呢個購物﹑餐飲同觀光殿堂,行足一個下晝都唔會悶;每逢週末,呢度仲有現場音樂表演添!

    位置: 75 9th Ave, New York, NY 10011, USA

    開放時間: 星期一至六 07:00 至 02:00;星期日 08:00 至 22:00

    電話: +1 212-652-2110

    地圖

    相片由 MusikAnimal 提供 (CC BY-SA 4.0) 經修改

    2

    沿住空中鐵路公園漫步

    空中鐵路公園 (High Line) 係一條高架行人路,貫穿曼哈頓 (Manhattan) 好多個熱鬧街區,曾經係西側線 (West Side Line) 嘅火車軌道,但喺 2009 年已經改劃為其他用途,既成為紐約「中產階級化」嘅知名例子,亦都係綠樹環繞嘅散步好去處,可以俾你一眼睇盡周圍嘅紐約都會風光。空中鐵路公園南端以華盛頓街 (Washington Street) 為起點,一路延伸至北端嘅第 34 街 (34th Street) 同第 12 大道 (12th Avenue),全長 2.33 公里;

    而切爾西市場 (Chelsea Market) 大約喺半路位置,啱哂歇腳!公園沿線有 11 個唔同嘅上落點,其中 5 個都適合輪椅使用。

    開放時間: 冬季每日 07:00 至 19:00 (夏季開放時間延長)

    地圖
    3

    參觀洛克菲勒中心

    係時候同成班遊客一齊到訪紐約最出名、最人聲沸騰嘅地標—洛克菲勒中心 (Rockefeller Center) 喇!呢棟裝飾藝術風格傑作除咗包含購物中心同幾間高檔餐廳,就連 NBC Studios 都喺裡面,亦即係《週六夜現場 (Saturday Night Live)》場景同無線電城音樂廳 (Radio City Music Hall) 嘅所在地,最受歡迎嘅地方莫過於 260 米高嘅石頭之巔 (Top of the Rock) 觀景台,可以俯瞰曼克頓中城 (Midtown Manhattan) 嘅壯麗景色。洛克斐勒中心係就係冇帝國大廈 (Empire State Building) 咁高,但鍾意嚟呢度睇靚景嘅旅客仲多;

    而場外嘅溜冰場極具人氣,每逢佳節都會擺咗棵巨型聖誕樹,掛上唔同吊飾,吸引大批遊客嚟到,普天同慶。

    位置: 45 Rockefeller Plaza, New York, NY 10111, USA

    地圖

    相片由 Pierre Journel 提供 (CC BY 2.0) 經修改

    4

    蘇豪區 Shopping 之旅

    蘇豪區 (SoHo) 係曼克頓 (Manhattan) 嘅時尚之都,英文簡稱 SoHo,全名其實係「South of Houston Street (休斯頓街以南)」,區內雲集世界各地嘅中高檔時尚品牌,選擇豐富,夠你盡情 Shopping 啦!想搵啲至平至抵嘅實用牌子,不妨去位於太子街 (Prince Street) 地鐵站正南邊嘅百老匯 (Broadway) 行返轉;而西邊嘅格林街 (Greene Street) 就有 Chanel、Paul Smith 同埋 Louis Vuitton 等高檔時裝店進駐,星光熠熠。

    除咗知名品牌之外,你都可以喺度發掘吓各間小店嘅,佢哋售賣嘅貨色由二手書、新奇文具,以至時裝珠寶都一應俱全。蘇豪區連接住小意大利 (Little Italy),行到肚餓喇,係時候去附近嘅布魯姆街 (Broome Street),任揀一間 Pizza 店,食件 Pizza 叉叉電!

    5

    康尼島探古尋味之旅

    如果紐約嘅大街小巷有啲逼狹,布鲁克林 (Brooklyn) 呢個古樸嘅沿海地區就可能更加啱你!康尼島 (Coney Island) 全長超過 3 公里,島上有唔少經典遊樂設施,包括椰子擊球遊戲,仲有大量糖果小食等你試,懷舊氣息滿到瀉。想享受二人世界?康尼島有搞笑滑稽嘅馬戲節目上演,為你營造歡樂氣氛。

    一場嚟到,點可以唔去月神公園 (Luna Park) 玩番轉?呢個主題樂園配置咗超過 50 款機動遊戲,仲有大量遊樂設施添,其中嘅人氣之選包括旋轉木馬、康尼飛天海盜船 (Coney Clipper) 同埋康尼島旋風過山車 (Coney Island Cyclone) 等,經典當時興。玩到餓餓哋,唔試吓 Feltman 嘅熱狗就走寶喇—佢地嘅熱狗堪稱全紐約 No.1!

    地圖
    6

    自由女神像日落船河

    除咗喺黃昏時分坐船去哈德遜郡 (Hudson),你仲可以選擇體驗其他令人嘆為觀止嘅旅程,一路睇盡知名景點,包括巴特里公園 (Battery Park)、埃利斯島 (Ellis Island),同埋屹立不倒嘅自由女神像 (Lady Liberty) 等等。

    大多數船河路線會由切爾西碼頭 (Chelsea Piers) 出發,有各式各樣嘅船艇俾遊客選搭。想嚟番轉浪漫旅程?不妨考慮坐帆船仔,沿途舒舒服服、悠悠閒閒咁欣賞紐約嘅明媚風光吖!

    位置: Chelsea Piers, New York, NY 10011, USA

    地圖
    7

    百老匯盛大匯演

    百老匯 (Broadway) 就好似現場表演劇院咁,區內有成 40 幾間極具規模嘅影院,而貫穿曼克頓 (Manhattan) 主要行車道嘅兩邊都有好多細細間嘅影院,由傳統劇場到最新盛會舞台,統統一應俱全。

    如果你想平平哋睇返場戲,可以選擇杜菲廣場 (Duffy Square) 嘅 TKTS 平飛售票處,獲享高達半價戲飛優惠;不過,呢度淨係得同日播放嘅電影戲飛買,而且可以選擇嘅戲目有限。

    地圖
    8

    從天台酒吧欣賞全世界最美妙嘅天際線

    • 伴侶
    • 拍照
    • 晚間娛樂
    • 豪華住宿
    • 團體

    紐約都會嘅天際線堪稱全球一絕,有好多觀景點向遊客開放,不過我哋首推天台酒吧,俾你一邊摸摸酒杯底,一邊陶醉喺紐約嘅聲色世界之中。

    紐約市內遍佈優質天台酒吧,小編就最鍾意 230 Fifth,嗰度唔止設計風格特別,而且景觀一流!230 Fifth 天台酒吧位於第五大道 (Fifth Avenue),冬天仲會設置起晶瑩剔透嘅「冰屋」,旅客唔使抵受天寒地凍,都欣賞到帝國大廈 (Empire State Building) 披上雪衣嘅靚景。

    位置: 230 Fifth Ave, New York, NY 10001, USA

    開放時間: 星期一至五 14:00 至 02:00;星期六至日 10:00 至 04:00

    電話: +1 212-246-1000

    9

    下東城街區酒吧成巷成市

    曼克頓下東城 (Lower East Side) 開滿新奇又型格嘅酒吧,雖然唔算多名人幫襯,但就吸引好多大學畢業生聚腳,時尚色彩有增無減,每間酒吧都主打唔同主題,豐富有趣,但就啱情侶兩兩成行多啲囉,皆因間間舖頭都迫到爆,成大班人出嚟未必咁易搵位。

    其中,Flower Shop 餐廳地下嗰層係 70 年代主題酒吧,仲會搵到你阿公阿婆屋企先有嘅壁爐同舊款傢俬添!其他值得一去嘅酒吧,包括以時尚雞尾酒盛會做賣點嘅 Attaboy,同埋 Sell 流行現場音樂表演嘅 Rockwood Music Hall

    地圖
    10

    NoMad 精緻餐飲

    • 伴侶
    • 晚間娛樂
    • 豪華住宿

    NoMad 係英文「North of Madison Square Park」嘅簡稱,有「麥迪遜廣場公園以北」嘅意思,位於切爾西 (Chelsea) 以西同熨斗區 (Flatiron District) 以南之間嘅曼克頓中城區 (Midtown Manhattan),雲集真正一流嘅餐廳,由美式高級美食至韓式燒烤一應俱全,任君選擇。

    如果你想喺特別紀念日擦返餐勁,可以試吓米芝蓮星級餐廳 Eleven Madison Avenue,喺精緻嘅環境裡面,大嘆無可挑剔嘅時令美食。而 NoMad 都仲有其他約會餐廳推薦嘅,當中包括主打海鮮分子料理同紅酒款式齊全嘅 The John Dory Oyster Bar,同埋供應歐美各式佳餚嘅 The Nomad Hotel 旗艦餐廳

    地圖
    Paul Smith | 旅遊常客

    開始計劃行程

    透過 Hotels.com 預訂的好處

    旅遊提示

    新型肺炎提示:旅遊限制急速變化,目的地或設行前檢測及到埗檢疫等安排。

    請查閱行程的相關規定。
    返回頁首

    Maps