要遊遍台北,其實非常簡單—市內各地嘅道路同公共交通網絡都超有效率,而且清晰簡單,仲有好多值得信賴嘅交通選擇,可以帶您直達市內每個角落。當中,又以台北捷運系統最出名,票價好平,而且快捷方便,特別受當地人同遊客鍾意。全市裡面絕大多數主要景點都有相應嘅捷運站,比您輕鬆按行程去各大名勝。

    只要使用悠遊卡,您就可以支付台北一帶嘅多種交通工具車費,簡單方便。呢款單觸式支付卡嘅儲值金額最高可以 TWD5,000,適用喺捷運、巴士同 YouBike 微笑單車系統,您搭捷運同巴士甚至都有折扣優惠!悠遊卡可以喺捷運站同便利店買到同充值。

    1

    出租汽車同電單車

    身處台北,無論包唔包司機都好,租車都相當容易,仲有各款國際同當地品牌嘅汽車可供選擇。台北市內 2 個機場都設有多間租車公司,但係收費通常都係最貴;有啲酒店亦設租車服務,或會轉介你去附近嘅租車公司租車,當中好多都位於捷運站附近,方便易達。你必須有國際駕駛執照,先至可以喺台灣租車自駕;但係我哋唔推薦旅客喺台北「自駕遊」,皆因市內交通擠塞問題嚴重,當地嘅駕駛規例同禮儀亦相當複雜。

    租用小型電單車或「綿羊仔」係比較方便嘅代步方法,花費大約係每日 TWD500。一般嚟講,我哋建議你自行購買頭盔 (價錢同樣都係大約 TWD500),原因係租車店提供嘅頭盔通常都唔啱 size,而且只能夠提供最低程度嘅保護。

    溫馨提示:台灣嘅車輛全部靠右行駛。萬一發生事故,即使你嘅車輛阻塞主要路口,都唔應該任意駛開;屆時請致電租車公司,查詢下一步指示。

    2

    台北捷運

    台北市捷運 (MRT) 系統有時又稱為台北地鐵,沿住 5 條線路共有 117 個站,覆蓋全市長達 131.1 公里嘅軌道,連接各個主要景點同重要區域。每條路線都有相對應嘅顏色同編號:

    1. 文湖 (啡色) 線:南港展覽中心 - 台北動物園
    2. 淡水 - 信義 (紅色) 線:淡水 - 象山
    3. 嵩山 - 新店 (綠色) 線:嵩山 - 新店
    4. 中和新路 (橙色) 線:4a 迴龍 -、4b 蘆洲 - 南勢角
    5. 板南 (藍色) 線:鼎浦 - 南港展覽中心

    呢個鐵路網絡以地下同高架線路組合,全部地鐵都整潔乾淨、高效安全,車站適合輪椅出入,而且車費仲好平添,單程票價從 TWD20 到 TWD60 不等,視距離而定;價格為 TWD150 嘅一日通行證可以俾乘客同日無限次乘搭捷運全線。列車由 06:00 行駛至午夜,所有公告同標誌都設有中文同英文版本。貴為市內最受歡迎嘅交通運輸工具,捷運站內同列車一日入面嘅某些時段可能非常繁忙擠擁。

    3

    巴士

    台北嘅巴士服務效率極高,方便快捷,亦係市內最平嘅交通選擇,無論行駛距離係幾多都好,各區都分別採用統一收費率。司機上方嘅電子標誌會顯示你須喺上車定係落車時支付 TWD15 車費。如果你喺搭乘期間進入另一分區,巴士標誌或會有變,而你可能上車同落車時都要俾錢。不管車程長短,車費上限均為 NTD30,可用現金或悠遊卡支付。路線同目的地資訊喺大多數車站均會以中文同英文顯示。

    4

    的士

    喺台北市內,鮮黃色的士雖然係最貴嘅公共交通選擇,但按國際標準來睇,車費仍然相當平,橫跨全市嘅旅程通常花費不到 TWD250。頭 1.25 公里起標費為 TWD70,之後每 250 米收費 TWD5;深夜或特殊節日假期嘅車費另加 TWD20,而乘客亦須支付沿途上嘅一切高速公路費用,但係只係限於市外車程。如要到市外目的地長途旅行,的士就會採用統一費率 (由政府批准嘅清單作準)。

    台北的士服務普遍備受推崇,好少出現世界各大城市常見嘅濫收車費或「兜路」行為。有時,某些司機會企圖因應市內個別目的地收取固定車費,而唔按咪錶計費。如果出現呢個,你應該落車搵過另一架的士—反正市內大把的士,而絕大多數司機都會採用最短路線,帶你前往市內目的地。可惜,大多數司機都唔識講廣東話或英語,建議你先將目的地用中文寫低,方便溝通。

    台北市亦有 Uber 等服務,但係價格一般高過黃色的士。的士司機並無硬性收取貼士—當然,你樂意俾貼士的話,都係無任歡迎!

    5

    單車

    悠遊卡用戶可以使用 YouBike 系統,喺大多數捷運站外租用單車;租車費用按時間計算,而單車可於任何一個 YouBike 站歸還。旅客可以沿住城市漫遊,單車徑大多設喺河邊,而唔喺大路上;身處繁忙街道,你亦可以喺行人路上踩單車。

    開始計劃行程

    Maps