台北 19 大最好玩樂活動

台北必睇景點

    講到台北最好玩嘅活動,定必同「最大」、「最好」同「第一」等詞有關。講真,呢座城市喺好多方面都領先全球,景點活動種類超多,無論您想欣賞靚景、喺 SPA 水療中心享受寧靜一天、了解唔同國家或文化嘅新鮮事物,抑或睇下稀有非凡嘅動物或文物,都可搵到心水景點同活動,各適其適。

    以下列出台北最正景點,全屬最「大堆頭」、最優質嘅選擇,絕對值得成為旅遊目標清單嘅第一位,不容錯過!要去嘅地方好多,慶幸台北嘅公共交通網絡一流,您到處遊覽都無難道。最難嘅部分,可能係壓抑自己對身處景點嘅留戀,即刻動身去下一站啦!

    1

    台北 101

    由頂層盡賞美景

    台北 101 曾經擁有「世界第一高樓」嘅美譽,既係文化瑰寶,亦係建築奇蹟。大樓融合中國文化嘅傳統設計元素,望落就好似珍寶塔,位處台北市金融區嘅中心地帶,裡面設有世界級購物商場,奢華名店、時裝店同高級餐廳林立。

    台北 101 大樓之所以抵抗得到地震同颱風,部分原因都要歸功於頂層附近重 660 噸嘅鋼製擺錘—踏足 89 樓嘅觀景台,除咗飽覽台北市嘅絕色靚景之外,你亦都可以睇下呢個巨型調質阻尼器係點樣透過鐘擺活動,抵銷大樓嘅移動幅度。只要乘搭破記錄嘅加壓升降機,37 秒就嚟到觀景台架喇!

    地點: 110 台灣台北市信義區信義路五段 7 號

    開放時間: 每日 09:00 至 22:00 (購物商場營業時間不同)

    電話: +886 (0)2 8101 8800

    • 伴侶
    • 家庭
    • 拍照
    • 經濟實惠
    2

    中正紀念堂

    遊覽花園,享受寧靜

    中正紀念堂位於台北市中心佔地 25 萬平方米嘅公園裡面,係為咗紀念台灣已故前總統蔣介石而興建。蔣介石為現今嘅台灣奠定堅實根基;所以,後人就以呢座耀眼奪目嘅白色大理石配藍色玻璃頂建築,嚟向佢表達稱頌之情。

    行上 89 級樓梯 (每級代表蔣介石嘅壽歲) 嚟到入口之後,你可以參觀下層嘅圖書室同博物館,裡面嘅展覽詳細介紹呢位領導人嘅生平同台灣發展史;堂內上層就係大廳,豎立咗蔣介石嘅大型雕像,俯瞰住每日定時進行嘅三軍儀隊交接儀式,場面莊嚴。

    地點: 10048 台灣台北市中正區中正南路 21 號

    開放時間: 每日 09:00 至 18:00

    電話: +886 (0)2 2343 1100

    • 家庭
    • 歷史文化`
    • 經濟實惠
    3

    龍山寺

    台北最古老嘅寺廟

    龍山寺由中國移民於 1738 年興建,係台北同類寺廟裡面最古老嘅一間,亦係台灣最重要嘅寺廟之一。龍山寺供奉慈悲為懷嘅觀音,但係歷史對佢一啲都唔「仁慈」—第二次世界大戰期間,龍山寺一直受地震、火災甚至空襲破壞,寺內獨一無二嘅藝術品同文物慘遭摧毀。

    每次災難之後,熱心嘅台北居民都會致力重建龍山寺 (最後一次全寺重建工程喺 1924 年進行),保存寺身嘅精密設計,令佢成為台灣古典建築嘅典範。時至今日,寺內依然珍藏住好多瑰麗文物,每件都具有象徵意義,蘊藏引人入勝嘅故事。

    地點: 10853 台灣台北市萬華區廣州街 211 號

    開放時間: 每日 06:00 至 22:00

    電話: +886 (0)2 2302 5162

    • 家庭
    • 歷史文化`
    • 拍照
    4

    貓空纜車

    遊逛市外,好玩方便

    貓空纜車系統全長 4.3 公里,連接台北動物園同台北南郊小鎮貓空之間,沿途穿過絢麗青翠嘅山脈,終點站嘅前一站係指南宮,

    搭哂全程大約需時 17 至 37 分鐘,視乎系統當日嘅運行速度而定。隨住纜車登山,你可以輕鬆遊覽台北南部嘅傳統茶室同茶園,沿路細賞城市景觀同周圍嘅鄉村靚景。

    地點: 116 台灣台北市文山區新光路二段 8 號

    開放時間: 星期二至四 09:00 至 21:00;星期五 09:00 至 22:00;星期六 08:30 至 22:00;星期日 08:30 至 21:00 (逢星期一休息,每月第一個星期一及公眾假期除外)

    電話: +886 (0)2 2181 2345

    • 伴侶
    • 家庭
    • 拍照

    相片由 Cheng-en Cheng 提供 (CC BY-SA 2.0) 經修改

    5

    北投溫泉

    水療天堂

    北投溫泉位於全球雲集最多 SPA 水療勝地嘅其中一個區域之中,北投公園周圍嘅建築幾乎都係各式各樣嘅溫泉酒店,充分善用流經山谷、富含礦物質嘅地熱水。呢一區嘅硫磺溫泉水通常喺 37℃ 至 40℃ 之間,帶弱酸性,據聞具有治療功效;而位於較上游嘅地獄谷 (或地熱谷) 水溫更高達 100°C!

    北投公園本身設有北投溫泉博物館,館外綠地純潔不玷,好比荒郊,風光不殊。

    地點: 112 台灣台北市北投區中山路 2 號

    開放時間: 星期二至日 09:00 至 17:00

    電話: +886 (0)2 2893 9981

    • 伴侶
    • 家庭
    • 豪華住宿
    6

    國立故宮博物院

    世界上最受歡迎嘅博物館之一

    國立故宮博物院珍藏咗超過 69.6 萬件中國古代帝皇時期文物同藝術品,同類館藏數量冠絕全球,同時亦係世上最受推崇嘅博物館之一!如果你想了解中國源遠流長嘅精彩歷史,呢個博物館正係盡覽全局嘅不二之處。

    館內部分文物已有超過 1,000 年歷史;而館身華而不俗嘅建築於 1965 年落成,相對上比較「後生」,博物館喺之後幾十年間經過多次擴展,先至可以容納常設展覽。順帶一提:建議你著舒適嘅鞋到訪,喺館內慢慢遊走。

    地點: 111 台灣台北市士林區至善路二段 221 號

    開放時間: 星期日至四 08:30 至 18:30;星期五至六 08:30 至 21:00

    電話: +886 (0)2 2881 2021

    • 家庭
    • 歷史文化`
    • 拍照
    7

    象山

    愉快散步,欣賞美景

    喺「四獸山」之中,象山喺最出名嘅一座山,又因為坐擁台北金融中心嘅美景而深受歡迎。毋庸置疑,台北 101 地標雄據全市天際線,而象山正係最多人觀賞同拍攝呢座摩天華廈嘅地方。

    山頂高 183 米,沿住南港親山步道向前行,就可以直達—呢條步道係全台北最易走嘅行山徑,所以亦最受歡迎;步道標示清晰,修葺良好,雖然有無盡石級令人望而生畏,但係其實路程一般只需 20 至 40 分鐘,連登山新手都可輕鬆登頂!

    • 家庭
    • 經濟實惠
    • 遊歷
    8

    國父紀念館

    台灣國父一生功業

    孫中山先生一般被稱為「台灣國父」,而國父紀念館就係專為頌揚佢嘅畢生貢獻而建。佔地 29,464 平方米嘅國父紀念館位於精心裝飾嘅中山公園內,擺設咗關於孫中山生平、以至中華民國誕生歷史嘅展品。孫中山喺 1912 年出任中華民國第一任總統;而國父紀念館如今就成為台北嘅重要文化中心,呢個紀念館其中一大特色就係儀隊交接儀式。

    地點: 110 台灣台北市信義區仁愛路四段 505 號

    開放時間: 每日 09:00 至 18:00

    電話: +886 (0)2 2758 8008

    • 家庭
    • 歷史文化`
    9

    國民革命忠烈祠

    觀賞儀隊交接儀式

    國民革命忠烈祠建喺翠綠山坡上,俯瞰基隆河,供奉住中華民國嘅戰爭死難者,祠內有接近 39 萬個靈位,撫慰喺辛亥革命、第二次世界大戰、中國內戰同其他戰事中喪命嘅生靈。

    呢座祠屹立喺超過 33,000 平方米嘅草原中間,寧靜莊嚴,喺華美大門前面有三軍儀隊好似雕像咁駐守大門,而佢哋嘅交接儀式亦成為重要觀光節目。

    地點: 10491 台灣台北市中山區北安路 139 號

    開放時間: 每日 09:00 至 17:00

    電話: +886 (0)2 2885 4162

    • 家庭
    • 歷史文化`
    • 拍照

    相片由 Alan Wu 提供 (CC BY-SA 2.0) 經修改

    10

    臺北市立動物園

    探望大熊貓

    要數臺北市立動物園內最出名嘅住客,梗係非大熊貓「團團」和「圓圓」、同埋喺台灣出世嘅第一隻熊貓 BB「圓仔」莫屬!佔地 165 公頃嘅動物園裡仲有 12,000 多隻雀鳥,並設有極受歡迎嘅兒童動物區 (飼養家畜)、昆蟲館、兩棲爬蟲館,另外園內仲有企鵝、樹熊同夜行動物。

    此外,園入面亦有台灣本土野生動物專區,等你一探野豬、食蟹獴、雲豹、黃麂等嘅蹤影。臺北市立動物園嘅展覽富娛樂性,園內動物健康良好,因而獲享極高評價。

    地點: 11656 台灣台北市文山區新光路二段 30 號

    開放時間: 每日 09:00 至 17:00

    電話: +886 (0)2 2938 2300

    • 家庭
    • 拍照

    相片由 中豪 提供 (CC BY-SA 3.0) 經修改

    11

    圓山大飯店

    圓山大飯店位於圓山附近,早喺 1952 年開業,極盡奢華,店內亭閣同餐廳遠近馳名,幾十年來一直係台灣旅遊業嘅瑰寶。

    飯店另一出名特色,就係店內 70 米長嘅地下旋轉滑梯—2012 年,當地一位新聞記者曾經喺電視直播瀡滑梯,期間仲不斷發出招牌尖叫聲,就令呢條滑梯自此打響名堂。飯店開業嘅時候正值台灣史上嘅危險時期,而滑梯係店內兩條逃生秘道之一,以便重要賓客喺空襲時撤離,亦方便傷健貴賓四圍穿梭,唔需要佢哋行螺旋樓梯。有傳言指呢條秘道嘅出口連接總統府;事實上,終點只係去劍潭公園。密道開放俾公眾參觀,但係必須預訂觀光團名額。

    地點: 10491 台灣台北市中山區中山北路四段 1 號

    電話: +886 (0)2 2886 8888

    • 歷史文化`
    • 豪華住宿
    12

    欣賞表演藝術

    台北嘅戲劇同表演多不勝數,本地同國際節目定期上演,種類涵蓋俄羅斯芭蕾舞、百老匯音樂劇,以至傳統音樂舞蹈;

    而場地選擇亦都同樣多元化—位於台北自由廣場嘅國家兩廳院會舉辦多項精彩活動,邀請世界各地嘅藝術家登台表演;中山堂國立國父紀念館則位於台北 101 附近,方便易達。

    • 歷史文化`
    • 晚間娛樂
    • 團體

    相片由 玄史生 提供 (CC BY-SA 3.0) 經修改

    13

    漫步於「天堂之路」之上

    台北市內宗教建築林立,當中包括各種寺廟、神社、清真寺同教堂,特別係新生南路附近地區—所以,新生南路又稱為「天堂之路」。呢個屬於大安區嘅地帶可謂專為「外來」宗教而設,而大安公園嘅對面就建有華麗嘅天主教堂同伊斯蘭清真寺。

    只要喺台北市周圍行吓,唔難發現專門供奉佛教、道教同中國古代神明嘅地方,種類之多,令人目不睱給。呢區嘅特色景點包括保安宮、霞海城隍廟同孔子廟,全部都有悠久嘅歷史。

    地點: 106 台灣台北市大安區新生南路二段

    • 歷史文化`
    • 拍照
    • 遊歷

    相片由 Zairon 提供 (CC BY-SA 4.0) 經修改

    14

    貓空茶道

    貓空區位於台北南部,乘搭貓空纜車就可以輕鬆到達。呢個地區以種植茶葉而聞名,坐擁多間傳統茶館,更提供台式茶道體驗活動,絕對係一試台式茶道嘅最佳場所!

    台式茶道繁複而精密,過程涉及多個茶壺嘅運用、多次倒茶動作,務求令熱水同新鮮茶葉完美混合;用呢個方式泡出嚟嘅茶非常可口,適合同一眾親朋好友同享,一邊飲茶,一邊欣賞壯麗山景。區內有多間茶館可供選擇,而邀月茶坊就係我哋首推之選。

    地點: 116 台灣台北市文山區指南路三段 40 巷 6 號

    電話: +886 (0)2 2939 2025

    • 品嚐美食
    15

    乘坐美麗華摩天輪

    美麗華摩天輪坐落於美麗華百樂園嘅屋頂,外表璀璨迷人,高 70 米,係台北市最高嘅摩天輪。由於摩天輪位於商場屋頂,所以當車廂到達最高點時,實際離地高達 100 米!喺呢個時候,本市北部、以至基隆河對岸嘅台北松山機場,都可以盡收眼底。摩天輪總共有 48 個車廂,每個車廂可搭載 6 名乘客,旋轉一圈大約需時 17 分鐘。

    地點: 10491 台灣台北市中山區敬業三路 20 號

    開放時間: 每日 11:00 至 23:00 (星期五和星期六至 00:00)

    電話: +886 (0)2 2175 3456

    • 家庭
    • 拍照

    相片由 Foxy Who 提供 (CC BY-SA 3.0) 經修改

    16

    全天候營業嘅卡拉 OK

    台灣人熱愛唱卡拉 OK(當地稱之為 KTV),你當然唔可以錯過!台北有幾間主要嘅 KTV 連鎖店,最大嘅一間叫「錢櫃」—身處店內,你可以不分晝夜、隨時隨地熱唱中外名曲。只須花 TWD400 (週末收費較高),就可以包私人房 3 個鐘,更係任食自助餐。店內設施一流,而且打理完善,一定可以俾你盡「唱」心中情!

    • 伴侶
    • 家庭
    • 晚間娛樂
    • 團體
    17

    河畔踩單車

    台北設有幾條單車徑,當中又以台北松山機場附近河邊嘅單車徑最舒適。旅客可以透過悠遊卡公共交通系統,或喺指定單車區附近嘅官方出租店租用單車。

    單車徑唔單止俾你充分欣賞到台北嘅美景,而且更屬無車地帶,適合一家大細安全遊玩。台北有超過 100 公里嘅河邊單車徑任君選擇,絕對令你樂而忘返!

    • 伴侶
    • 家庭
    • 遊歷
    • 團體
    18

    公園耍太極

    台北市唔少人都喜歡喺公園入面耍太極,一邊運動,一邊練武,當中又以二二八和平公園最受晨運客推崇。清早身處園內,你不時會見到一大班當地居民慢條斯理咁耍太極,而佢哋都歡好迎你加入晨運行列;當中仲有一啲太極班可以報名參加,由導師指導你完成各種招式。

    另一方面,只要喺二二八和平公園、又或者喺市內其他公園中四圍睇吓,唔難發現有人大跳社交舞!台北公園有時會人頭湧湧,清晨時分特別熱鬧。

    地點: 100 台灣台北市中正區襄陽路二二八和平公園

    • 家庭
    • 團體

    相片由 Scott Dexter 提供 (CC BY-SA 2.0) 經修改

    19

    密宗腳底按摩

    密宗腳底按摩係一種全方位療法,原理係:腳底唔同部分都會同身體嘅另一部位相連;例如,刺激大腳趾可以醫治頭部疾病,按摩腳踭就可以治療痔瘡。

    呢種古老嘅中式療法喺台北好受歡迎,市內有多間腳底按摩店可供選擇,當中以 6 星集按摩會館為首選。就算你唔相信全方位療法,按摩療程都可以令疲憊嘅雙腳恢復生氣同活力,值得一試!

    • 單人旅客
    Ben Reeves | 旅遊常客

    開始計劃行程

    Maps