台北 17 大最好夜生活熱點

台北夜晚好去處同最好活動

    台北夜生活熱鬧繁華,市內到處入夜之後幾乎都比日頭仲有活力!當地夜生活選擇超多,迎合唔同人嘅喜好,遊客幾乎每晚都可以搵到有趣嘅觀光或娛樂活動,包括繁榮嘅夜總會,各種酒吧同酒館、文化劇院、無數嘅夜市同台灣最受歡迎嘅消遣 - 卡拉 OK (當地人叫做 KTV)。

    某程度上講,台北嘅夜生活每個地區都係唔同嘅。例如,信義區係夜店集中地;西門町就有更多傳統選擇,仲有頂級市場同劇院等;大安區擁有最型格嘅復古酒吧,而中山區就係規模最大嘅酒館區。

    1

    45 酒吧

    45 酒吧位於國立台灣師範大學附近,唔止係學生嘅熱門聚腳點,亦吸引唔少人去幫襯;酒吧嘅飲品價錢唔貴,每晚仲有 happy hour 優惠添。45 酒吧裡面雖然都幾嘈雜,不過勝在氣氛一流,最大優點係無 dress code,亦都無最低消費。

    地點: 106 台灣台北市大安區和平東路一段 45 號 2 樓

    開放時間: 每日 18:00 至 04:00

    電話: +886 (0)2 2321 2140

    • 伴侶
    • 晚間娛樂
    2

    Barcode

    台北市嘅 Barcode club,係睇靚仔靚女嘅好地方,入去玩記得扮靚啲呀!呢間 club 嘅另一個賣點,就係可以望到市內靚景喇!佢就係信義購物區 Neo 19 大樓 5 樓,由露台和室內高身玻璃窗望出去,可以見到成個信義區嘅高樓大廈,無敵靚景令人難忘。

    Barcode 風格優雅時尚,DJ 不時會播放各類音樂,由經典浩室音樂、迷幻爵士樂、鄉土爵士樂以至新浪潮音樂都有。駐店調酒師仲非常專業,曾經係倫敦受過訓練,調製一系列風味獨特嘅香檳雞尾酒;廚師就炮製各式美味小食,保證你大飽口福!

    地點: 110 台灣台北市信義區松壽路 22 號

    開放時間: 每日 21:00 至 02:30 (星期五和星期六至 03:00)

    電話: +886 (0)9 2016 8269

    • 伴侶
    • 晚間娛樂
    3

    Blue Note 藍調俱樂部

    Blue Note 藍調俱樂部係大安區師大夜市附近好受歡迎嘅聽歌熱點,逢星期五和星期六晚都會好多隊爵士樂 live band 係呢度表現,節目通常 21:30 左右開始,入場費一啲都唔貴,只係大約 NT300,仲包一杯飲品,你可以邊飲野邊聽歌。呢個場唔算好大,所以最好早啲嚟霸返個靚位,等你可以舒舒服服欣賞精彩表演。

    地點: 106 台灣台北市大安區羅斯福路三段 171 號

    開放時間: 每日 20:00 至 00:30

    電話: +886 (0)2 2362 2333

    • 伴侶
    • 晚間娛樂
    4

    Box Nightclub 夜店

    Box Nightclub 夜店外觀醒目搶眼,內部裝潢簡約平實,由於師範大學就喺附近,而且經常播放 hip-hop 同 R&B 音樂,所以吸引好多學生同外籍人士幫襯。同台北市內大多夜店一樣,只須支付入場費 (男士約 TWD600;女士約 TWD350),就可以盡情暢飲。Box Nightclub 並無信義區其他夜店嘅豪華裝潢,反而顯得平易近人,尤以場地面積較小,更會俾你一種親密感覺。

    地點: 106 台灣台北市大安區羅斯福路二段 67 號 B1 樓

    開放時間: 星期四至六 21:30 至深夜

    電話: +886 (0)2 3365 3041

    • 伴侶
    • 晚間娛樂
    5

    銅猴子酒吧

    銅猴子酒吧走美式體育酒吧風格,唔單止好受住係台北嘅鬼佬歡迎,仲吸引到好多潮人嚟呢度 chill 下熱鬧下。店內配備多部大型平面電視,播放全球各地嘅盛大體育賽事,同時設有足球枱同鏢靶,飲品價格又平,所以廣受歡迎。銅猴子酒吧仲會舉辦相當有趣嘅「智力競賽之夜」,駐場嘅 DJ 仲會經常炒熱個場,而友善親切嘅老闆更係「人氣爆燈」,難怪店面成日人頭湧湧。

    地點: 10491 台灣台北市中山區復興北路 166 號

    開放時間: 星期一至五 11:00 至深夜;星期六至日 09:00 至深夜

    電話: +886 (0)2 2547 5050

    • 伴侶
    • 晚間娛樂

    相片由 riNux 提供 (CC BY-SA 2.0) 經修改

    6

    Carnegie's 酒吧餐廳

    Carnegie's 是一間酒吧兼餐廳,素為外籍人士的最愛,亦晉身市內最受遊客歡迎的景點之一。呢間店嘅品牌源自香港,屬於英式酒吧,供應典型酒吧食品同印度咖哩;

    但係飲品 Menu 先至係真正精彩嘅部分,主打酒品超過 300 款!餐廳內周圍都係酷炫裝飾,播放住流行音樂,洋溢好客氛圍,而顧客更不時喺酒吧「大曬」熱舞技巧,為 Carnegie’s 更添名副其實嘅傳奇格調。

    地點: 106 台灣台北市大安區安和路二段 100 號

    開放時間: 星期一至五 11:30 至深夜;星期六至日 10:30 至深夜

    電話: +886 (0)2 2325 4433

    • 伴侶
    • 品嚐美食
    • 晚間娛樂

    相片由 slayer 提供 (CC BY 2.0) 經修改

    7

    M Taipei

    M Taipei 係台北嘅頂級拉丁音樂夜店,特別受外國人同海外學生歡迎,除咗熱播莎莎、爵士樂同加勒比音樂外,仲會播放出電音、流行曲同 hip hop 音樂。

    呢間位於信義區嘅夜店入場費都算平,只係需要約 TWD300,價格包括任飲優惠;而店內仲不時舉辦「特別派對之夜」,只要帶備合適嘅身分證明文件,又或穿著得宜,即可獲享額外折扣優惠、免費飲品同特別獎品。呢間夜店充滿樂趣同活力,雖然好夜先開始營業,但係店外成日大排長龍,顧客年齡層極廣。

    地點: 110 台灣台北市信義區信義路四段 456 號 3 樓

    開放時間: 星期五至六 23:00 至 05:30

    電話: +886 (0)9 3625 2044

    • 伴侶
    • 晚間娛樂
    8

    MQ Marquee

    MQ Marquee 酒吧每一處都散發維多利亞時代嘅優雅風格,而且有供應頂級西餐,係台北眾多社會名流同知名人士嘅首選夜店。喺寬敞嘅酒廊入面,設有一個長形吧檯;即使你淨係叫最普通嘅飲品,調酒師都會悉心調製,而且個別調酒師仲參加過帝亞吉歐 (Diageo) 世界級調酒比賽,名列前茅添!

    飲品 Menu 有唔少主打選擇,優質酒品琳瑯滿目。店內氣氛典雅,又唔會「作狀」,全部都要歸功於駐場 DJ 才華洋溢!

    地點: 110 台灣台北市信義區信義路五段 16-1 號 1 樓

    開放時間: 每日 20:00 至 02:00

    電話: +886 (0)2 2729 5409

    • 伴侶
    • 晚間娛樂
    9

    My Place

    My Place 創立於 1975 年,係全台灣第一間酒吧,歷史最悠久,以傳統英式風格設計,到而家都依然保持住濃厚氣氛,難怪成為華國大飯店後街最受歡迎嘅 Gathering 場地之一!

    店內環境舒適,好啱你同一班朋友把酒暢飲;先喺呢度飲返杯,再行去其他酒吧,亦都非常方便。呢間酒吧嘅生啤索價中等,絕對係一大賣點!除咗供應色香味俱全嘅酒吧小食同啤酒之外,店內仲設有波枱,同埋 100 吋等離子電視,而且店員好 nice 架,一定可以為你打造出三五知己歡聚嘅好地方。

    地點: 10491 台灣台北市中山區雙城街 32 巷 3-1 號

    開放時間: 每日 19:00 至 03:00

    電話: +886-2 2591-4269

    • 伴侶
    • 晚間娛樂
    10

    OMNI

    OMNI 嘅前身係大受歡迎嘅夜店 Luxy,而家換咗時尚外觀,望落真係有啲似《電子世界爭霸戰 (Tron)》呢套戲嘅場景,而且店內到處都係外國表演 Dancer 同埋型格客群,熱門當代音樂響徹耳際。OMNI 由著名嘅 LOOP 製作公司經營,因此可以邀請到人氣 DJ 坐陣,成日舉辦大型派對。

    地點: 106 台灣台北市大安區忠孝東路四段 201 號 5 樓

    開放時間: 星期三、五至六 22:30 至 04:30

    電話: +886 (0)9 8380 3388

    • 伴侶
    • 晚間娛樂
    11

    On Tap

    On Tap 宣稱自己係「台北唯一正宗酒吧」,唔單止完美重現英式酒吧風格,就連店外商標都似足倫敦地鐵站嘅標誌!呢度既係觀賞 (甚至參加!) 現場體育賽事嘅熱門場所,亦都係飛鏢聯盟同埋幾隊業餘足球隊嘅主場,

    店內氣氛熱鬧友善,而且「店如其名」,有歐洲生啤供應,配搭一流酒吧小食同波枱設備,再加上定期舉辦 Party,難怪成為當地外籍社區最受歡迎嘅景點之一。

    地點: 106 台灣台北市大安區忠孝東路四段 216 巷 11 弄 21 號

    開放時間: 星期一至五 17:00 至深夜;星期六至日 14:00 至深夜

    電話: +886 (0)2 2741 5365

    • 伴侶
    • 晚間娛樂
    12

    Ounce

    Ounce 係台北第一間隱蔽式酒吧,店內重現 1920 年代美國嘅禁酒氛圍,店外望落都幾似 Expresso Bar 架!之不過,經過「暗門」嚟到另一邊,一系列精心製作嘅朱古力雞尾酒就即刻映入眼簾。

    酒吧採用大量深色木材裝修,營造出舒適而神秘嘅感覺;而調酒師絕對係本店明星,巧手善用好多種獨一無二嘅原材料,以嫻熟嘅技巧調製出特別飲品,仲好擅長帶動親切好玩嘅氣氛,令人印象深刻。

    地點: 106 台灣台北市大安區信義路四段 309 號

    開放時間: 每日 18:00 至深夜

    電話: +886 (0)2 2703 7761

    • 伴侶
    • 晚間娛樂
    13

    Revolver

    Revolver 係深得樂迷歡心嘅台北地下音樂表演場地,設備完善,不時有頂級樂隊同 DJ 表演,洋溢自由奔放嘅 Rock 'n' Roll 氣氛。Revolver 佔地 3 層,雖然 2 樓嘅現場音樂表演場地特別受歡迎,但係其餘兩層亦都可以滿足唔同客人嘅需求。譬如,位於 3 樓嘅酒廊酒吧同地下嘅街頭酒吧,都好啱你同朋友把酒言歡;而且店內啤酒出名平,每杯只需要 NT$115,梗係不容錯過啦!手工啤酒同歐洲進口啤酒就大約索價 NT$180。

    地點: 100 台灣台北市中正區羅斯福路一段 1-2 號

    開放時間: 每日 18:30 至深夜

    電話: +886 (0)2 3393 1678

    • 伴侶
    • 晚間娛樂
    14

    士林夜市

    或者,你覺得「夜蒲」同「行夜市」大纜都扯唔埋…之不過,台北嘅夜市的確好受當地人同遊客歡迎,其中又以士林夜市特別多姿多彩,梗係要加入你嘅夜間行程裡面啦!士林夜市附近嘅陽明戲院同慈誠宮同樣值得一遊;周圍嘅街道仲有好多間戲院、卡拉 OK 吧同遊戲中心林立,熱鬧非常!置身夜市,街頭美食種類多不勝數,魅力迫人;飲飽食醉之後,如果你仲有氣有力,歡迎喺場內選購平價手信!

    地點: 111 台灣台北市士林區吉河路 101 號

    開放時間: 星期一至五 16:00 至 00:00;星期六至日 15:00 至 01:00

    • 伴侶
    • 家庭
    • 購物
    • 品嚐美食
    • 晚間娛樂

    相片由 Doug Donaldson 提供 (CC BY 2.0) 經修改

    15

    臺北戲棚

    臺北戲棚展現咗台灣廣博出色嘅文化,節目融合原住民歌舞、當地技藝、民俗、傳統戲曲、武術表演等等,令觀眾目不暇給,而且內容極具教育意義,好啱一家大細觀賞。

    呢個頂級劇院以一絲不苟嘅京劇環節而聞名—每場表演嘅後半部分通常以京劇為主,而前半部分就側重於台灣原住民文化,全套表演節目表每 3 個月轉一次,保持耳目一新,吸引觀眾再三重遊。

    地點: 104 台灣台北市中山區中山北路二段 113 號

    開放時間: 星期一、三及五 20:00 至 21:00;星期六 20:00 至 21:30

    電話: +886 (0)2 2568 2677

    • 伴侶
    • 晚間娛樂

    相片由 David Monniaux 提供 (CC BY-SA 3.0) 經修改

    16

    Woobar

    Woobar 位於台北 W 飯店嘅頂層,算係全市唯一一間屋頂泳池酒吧,仲會定期舉辦 Pool Party,難怪成為極具人氣嘅聚會場所!酒吧裝修呈現時尚型格、色彩繽紛嘅情調,店內供應柑橘伏特加等等好多款果味特飲,

    而且菜式亦都相當獨特,其中嘅雲呢拿伏特加配優質朱古力忌廉唔試唔得!行到去池邊位置,你即刻可以喺繁囂市中心入面,享受悠閒嘅熱帶氣氛。

    地點: 110 台灣台北市信義區忠孝東路五段 10 號台北 W 飯店

    開放時間: 每日 11:00 至深夜

    電話: +886 (0)2 7703 8887

    • 伴侶
    • 晚間娛樂
    17

    Ziga Zaga

    Ziga Zaga 係台北君悅酒店嘅其中一間餐廳,深受精英人士歡迎;每晚 22:00 DJ 登場之後,全場仲即刻 High 起上嚟添!之不過,呢度唔止係後生仔專區,就連年過 40 嘅賓客都可以自得其樂。呢間舖頭消費都算幾高,吸引個別階層嘅顧客,除咗出售好多款經典雞尾酒,亦都有供應出色嘅意式佳餚,一定會俾你大快朵頤!

    地點: 110 台灣台北市信義區松壽路 2 號台北君悅酒店 2 樓

    開放時間: 星期二至日 11:30 至 14:00 及 18:00 至 00:00 (逢星期一休息)

    電話: +886 (0)2 2720 1200

    • 伴侶
    • 品嚐美食
    • 晚間娛樂
    Ben Reeves | 旅遊常客

    開始計劃行程

    Maps