台北 9 大最好當地餐廳

阿宗麵線創於 1975 年，現已成為西門町嘅熱點、遊客嘅必到之地。呢間路邊小食檔以軟滑麵線聞名—麵線放喺酸酸甜甜嘅肉湯之中，配埋柴魚、筍絲同鹽醃豬大腸一齊享用，風味獨特！

店入面無 MENU，皆因「獨沽一味」；雖然係咁，阿宗麵線喺台北極受歡迎，令店外時時出現排隊人潮。排到頭位時，廚師會問你買細碗 (TWD50) 定係大碗 (TWD65)，同埋想要咩辣度。阿宗麵線仲有 2 間分店，分別喺士林區同大安區，但西門町店既係元祖本店，亦係最出色嘅一間。

坊間好多麵店都宣稱自家牛肉麵係市內最 TOP 嘅牛肉麵，但係林東芳牛肉麵經常都出現喺「最佳牛肉麵店」名單之上，而且仲名列前茅。呢間路邊攤唔係好起眼，廚房仲面向街道，但係就能做出令人回味嘅好滋味。

講開又講，牛肉麵係台灣料理入面最受歡迎嘅菜餚之一，台北仲會舉辦一年一度嘅「牛肉麵節」！而林東芳牛肉麵極受當地人歡迎，招牌菜係半筋半肉嘅牛肉湯麵—只需 TWD220，你就可以食到一大碗清爽牛肉配搭「煙韌」麵條，浸喺透亮清澈嘅辛辣肉湯之中，份外惹味！

台北嘅夜市係大啖平價美食嘅好地方，廣受台灣人歡迎；士林夜市面積之廣、美食款式之多冠絕台北，場內嘅有蓋美食廣場一共設有超過 500 個食攤！雖然夜市內又逼又嘈，但係各式各樣嘅當地小吃同餐點實在令人難以抗拒，當中唔少仲係價廉物美，特別推介蚵仔煎、刈包同臭豆腐，平均只需低於 TWD150 嘅價錢，就可以享用豐盛一餐。

品鱻係台北最受歡迎嘅快炒餐廳，位處街邊，陳設簡單，但供應各種美食，主打油炸食品，價格大部分都係大約 TWD100。店家專營海鮮佳餚，著名菜式包括油炸墨魚嘴、黑胡椒蚵仔豆腐、辛辣蚵仔鯊魚湯等等；

而呢度亦係台北人收工後「以啤酒會友」嘅好去處，所以成日都見到啤酒服務員匆匆忙忙咁幫手倒酒。正因品鱻人氣極旺，舖面已經延伸到兩邊，現時橫跨足足 3 個舖位！

魯肉飯係台北頂尖地道佳餚之一，而金峰炮製魯肉飯嘅出色程度，足以令呢個菜式成為店名嘅一部分！呢間街邊餐館裝修簡單，瓷磚牆上裝有風扇，狹窄店面逼滿廉價枱櫈，但佢嘅開放式廚房就可以做出公認為「全城最好味」嘅魯肉飯。一碗熱辣辣泛起油光、味道十足嘅招牌魯肉飯定價為 TWD25 至 TWD45 之間，具體價格視乎份量而定。你仲可以喺招牌魯肉飯上加啲配菜，可選魯蛋 (每個 TWD10) 同油豆腐 (每份 TWD20) 等。

如果士林夜市以數量取勝嘅話，饒河街夜市可以話係以質量取勝。饒河街全長 600 米，街上佈滿小食檔，不時有電視台攝製隊於鋪頭前拍攝烹飪節目，宣傳藥燉排骨、豬血糕、蚵仔麵線等當地流行小吃，咁嘅場面喺其他地方好少會見到。街道兩旁林立商店同餐廳，中間就有一排小食檔同座位；場內嘅小食都好平，只需 TWD100，就已經可以食到好飽。

喺台北，永康牛肉湯麵備受當地人推崇，店內食物風味簡約，但係價廉物美，只需約 TWD160，你就可以品嚐一大碗彈牙湯麵、鮮嫩牛肉配濃郁肉湯，而且仲有多種款式，任君選擇。

除此之外，餐廳仲有供應蒸排骨等多種菜式，餐牌上除咗文字外，仲附有圖片，方便食客點菜。永康牛肉麵於 1963 年開業，可謂遠近馳名，想到店內食午餐或晚餐嘅話，請做好排隊等位嘅心理準備。

藍家嘅刈包據說係全台灣最好吃之選，店家嘅餐牌簡短 (一系列剔選清單，而且只提供中文版本)，供應菜式包括肉粽、四神腸湯、肉焿麵線等，而你可以選擇豬肉的肥瘦程度，度身炮製符合心水口味的刈包。

講開又講，刈包呢種傳統台式小吃極受歡迎，食客「大手入貨」都係等閒事！價格方面，藍家刈包每個盛惠 TWD50，買 10 送 1。店家本身係陳設簡約嘅街舖，廚房有如路邊攤檔，但係能夠巧手幻化豐腴滋味。

Ice Monster 喺台北極具人氣，特別受台灣年輕人歡迎，以巨型刨冰山加上新鮮多汁芒果，為食客消暑。台北雖然有多間著名刨冰店，當中三數更獲冠上「必吃」美名，但唯獨係急速擴充嘅 Ice Monster 專營連鎖店最無可匹敵。店內有多種口味嘅刨冰可供選擇，而芒果冰就最受歡迎，視乎份量大小，一份價格由 TWD100 至 TWD200 不等。你認為當地人一般不會幫襯呢類連鎖店？咁你就大跌眼鏡啦！呢間設有 50 個座位嘅刨冰店成日都人頭湧湧，店外等位人龍不絕！