貴為國際大都會,西班牙馬德里以文化遺產同藝術博物館而聞名,極受遊客歡迎,亦都有好多合家歡景點同活動,單係市中心 10 公里範圍之內,已經有無數刺激好玩嘅室內、室外兒童景點喇!

    大型遊樂園、動物園,以至配備兒童遊樂場嘅公共花園都應有盡有,小朋友喺馬德里一定唔會悶親;玩到餓喇,記得帶佢哋試吓蘸咗熱朱古力醬嘅西班牙油條 (churros) 喎!不妨參考吓我哋為你精選嘅馬德里家庭休閒活動,帶屋企嘅大人細路喺西班牙首都玩返夠本。

    1

    馬德里遊樂園

    佔地 20 公頃,滿載刺激樂趣

    馬德里遊樂園 (Parque de Atracciones de Madrid) 係馬德里 (Madrid) 人氣最旺嘅遊樂場之一,距離市中心以西大約 4 公里,分為「Maquinismo (機動遊戲)」、「Naturaleza (大自然)」、「Tranquilidad (放鬆休閒)」同「Nickelodeonland (小朋友專區)」4 個園區,當中亦有唔少現代化設施,例如「Abismo」過山車等等,令人印象深刻。各個區域嘅遊樂設施都好啱一家大細,實會帶嚟無限樂趣架啫!玩到攰?樂園入面仲有 9 間餐廳同 7 個檔攤,專賣雪糕同各式甜品,幫你充一充電。

    地點: Casa de Campo, s/n, 28011 Madrid, Spain

    開放時間: 7 月至 8 月:12:00 至 00:00。其他月份嘅營業時間有所不同

    地圖
    • 家庭
    • 拍照
    • 遊歷

    相片由 Jeremy Thompson 提供 (CC BY 2.0) 經修改

    2

    馬德里動物園

    遊覽西班牙數一數二嘅大型動物園,探吓大熊貓

    馬德里動物園 (Zoo Aquarium de Madrid) 佔地 20 公頃,住咗 500 幾個品種超過 6,000 隻動物,係西班牙最大型嘅動物園之一!公園距離市中心西面 6 公里,搭公共交通工具都好易嚟到,俾你睇盡海豚、馬騮、山貓等等小朋友最鍾意嘅動物。講到園內亮點,就梗係大熊貓啦!馬德里動物園乾淨整潔,佈置舒適,有 6 間食肆同小食亭任你揀,陪你一家人度過美好時光。

    地點: Casa de Campo, s/n, 28011 Madrid, Spain

    開放時間: 星期一至五 10:30 至 20:00;星期六至日 10:30 至 20:30。請留意:開放時間可能因應月份而異

    地圖
    • 家庭
    • 拍照
    3

    馬德里華納公園

    以美國電影為主題嘅公園,刺激樂趣無盡

    馬德里華納公園 (Parque Warner Madrid) 係距離馬德里市中心東南大約 23 公里嘅大型主題樂園,會帶你進入美國電影嘅非凡世界!由 DC 漫畫英雄 (例如超人同蝙蝠俠) 以至各式卡通人物 (例如史酷比同賓尼兔) 等等,園內所有遊樂設施、景點同表演都係依照鼎鼎大名嘅荷里活電影人物設計。行到餓喇,公園入面仲有超過 12 間餐廳同小食攤,俾你擦返餐。每晚 19:30,荷里活大道 (Hollywood Boulevard) 有巡遊上演,千祈咪錯過!

    地點: M-506, 28330 San Martin de la Vega, Madrid, Spain

    開放時間: 每日 11:30 開始營業。閉園時間由 18:00 至 00:00 不等

    地圖
    • 家庭
    • 拍照
    • 遊歷

    相片由 Jeremy Thompson 提供 (CC BY 2.0) 經修改

    4

    Faunia 公園

    設計完美嘅動植物公園

    Faunia 既係動物園,又係植物園,位於市中心以東 9 公里,以照顧同飼養動物嘅獨特方式而聞名。身處園內,舉凡昆蟲、哺乳類動物、鳥類、爬行動物以至魚類都可以喺相應嘅人造生態系統之中舒適生活,各適其適。另一方面,Faunia 嘅企鵝公園規模屬歐洲數一數二,都好出名架!你可以喺度仔細觀察動物,其中部分動物 (例如草原土撥鼠) 仲會喺公園各處自由走動添。園內有 6 間餐廳同小食檔,你行到攰喇,可以隨時坐低休息吓。

    地點: Av.Comunidades, 28, 28032 Madrid, Spain

    開放時間: 每日 10:30 開始營業。閉園時間由 16:00 至 00:00 不等

    地圖
    • 家庭
    • 拍照

    相片由 David Adam Kess 提供 (CC BY-SA 4.0) 經修改

    5

    盡情品嚐西班牙油條

    以經典西班牙小食招待一眾小朋友

    長方形嘅油炸麵團 (Churros) 喺西班牙極之流行,通常都會撒啲糖粉品嚐;而講到馬德里 (Madrid) 最出名嘅西班牙油條,就梗係要數 Pasadizo San Gines 嘅Chocolateria San Gines、Paseo de las Acacias 嘅 Chocolateria Valor,同埋 Calle de San Martin 嘅 Churreria Los Artesanos 1902 嘅出品,用嚟招呼小朋友最啱!去唔到上面講嗰幾間餐廳?唔緊要,皆因呢款油條人氣超高,市內每個地方都搵得到架。

    • 家庭
    • 品嚐美食

    相片由 vxla 提供 (CC BY 2.0) 經修改

    6

    麗池公園

    喺馬德里市中心度過美好一日

    麗池公園 (Buen Retiro Park) 佔地 1.4 平方公里,位於馬德里 (Madrid) 市中心附近,除咗打理得宜嘅花園、優美嘅雕像同清爽嘅池塘之外,園內仲有適合唔同年齡細路仔嘅景點同埋活動選擇;而運動區、兒童遊樂場、木偶表演、划船遊覽,又或者喺麗池大池塘 (Estanque Grande del Retiro) 餵鴨,都好好玩架!一家大細漫遊公園,實會有啱心水嘅活動比你揀。

    地點: Plaza de la Independencia, 7, 28001 Madrid, Spain

    開放時間: 夏季每日 06:00 至 00:00;冬季 06:00 至 22:00

    地圖
    • 家庭
    • 拍照
    • 經濟實惠
    • 遊歷
    7

    卡洛斯塞恩斯高卡車中心

    刺激賽車

    身處歐洲最出色嘅高卡車賽道之一,仲唔為刺激比賽做好準備?呢座綜合大樓入面設有室內同室外路線,每條賽道嘅長度同樣係 450 米,而室內賽道仲專業至極,具有實時計時系統添!每節比賽 10 分鐘,完成後可以睇返所有表現統計數據。卡洛斯塞恩斯高卡車中心 (Carlos Sainz Go-Kart Center) 距離馬德里 (Madrid) 市中心以西大約 2 公里,場內設有酒吧同餐廳。皆因呢度人氣爆哂燈,想玩記住提前預約啊!

    地點: Calle Sepulveda, 3, 28011 Madrid, Spain

    開放時間: 星期一至四 18:00 至 23:00;星期五 18:00 至 00:00;星期六 10:00 至 00:00;星期日 10:00 至 23:00

    電話: +34 90 217 0190

    地圖
    • 家庭
    • 拍照
    • 遊歷
    8

    馬德里河

    戶外活動數之不盡,啱哂小朋友

    馬德里河 (Madrid Rio) 其實係一個巨型戶外公園,沿著馬德里 (Madrid) 市中心以南嘅曼薩納雷斯河 (Manzanares River) 延伸長達 2 公里,園內設有滑板公園、足球場同各式運動場,係你帶小朋友同陽光玩遊戲嘅理想場地,當中嘅刺激活動包括高空飛索、巨型滑梯、吊橋同木製攀架等。遊樂場內,大部分設備都係用可持續物料製成嘅;而樂園附近亦都有好多間酒吧同餐廳,玩幾耐都唔驚餓親啦!

    地點: Puente de Toledo, S/N, 28019 Madrid, Spain

    開放時間: 24 小時

    地圖
    • 家庭
    • 遊歷

    相片由 Σπάρτακος 提供 (CC BY-SA 3.0) 經修改

    9

    喺 Lobo Feliz 大買特買

    「人如其行」

    想氹小朋友開心嘅話,就一定要去位於馬德里 (Madrid) 市中心以北嘅原創教育玩具店 Lobo Feliz (意思係「快樂狼」) 喇!呢間舖頭賣嘅木製玩具得意好玩,有助激發創造力同想像力,完全唔使插電或者用電池,都可以正常運作,又禁 (粵音:襟) 玩又刺激思維,最啱陪伴你嘅小朋友快樂成長。

    地點: Calle de San Mateo, 28, 28004 Madrid, Spain

    開放時間: 星期一至六 10:30 至 20:30

    地圖
    • 家庭
    • 購物
    10

    國立自然科學博物館

    探索地球同生物歷史

    國立自然科學博物館 (National Museum of Natural Sciences) 好玩又富教育意義,啱哂小朋友!館內有超過 600 萬件展品,帶你了解地球同生物歷史,各式各樣嘅動物毛公仔、硬幣、文物、礦物同植物琳瑯滿目,記住咪錯過大地獺同梁龍嘅化石標本喎!國立自然科學博物館位於市中心北部,位置方便,好易去到。

    地點: Calle Jose Gutierrez Abascal, 2, 28006 Madrid, Spain

    開放時間: 星期二至五 10:00 至 17:00;星期六至日 10:00 至 20:00 (逢星期一休館)

    地圖
    • 家庭
    • 拍照

    相片由 Luis García 提供 (CC BY-SA 3.0) 經修改

    Stephan Audiger | 旅遊常客

    開始計劃行程

    Maps