馬貝拉 10 大最好玩嘅活動

洛斯納蘭霍斯廣場 (Plaza de los Naranjos) 置身於歷史建築同典雅嘅安達盧西亞 (Andalusia) 白色房屋之間，係馬貝拉舊城區 (Marbella Old Town) 嘅樞紐，個名源於環繞廣場中心文藝復興噴泉嘅橙樹，而場內周圍都有太陽傘同枱凳，俾遊客坐底歇吓腳，靜靜哋感受城市脈搏。喺洛斯納蘭霍斯廣場起步遊覽馬貝拉舊城區，就係 Perfect Start！

馬貝拉舊城區 (Casco Antiguo de Marbella) 嘅歷史可以追溯至 15 世紀「收復失地運動 (Christian Reconquista)」之後，區內有彎彎曲曲嘅街道蜿蜒，典型安達盧西亞 (Andalusia) 房屋嘅露台種滿鮮花，歷史悠久嘅建築同各式各樣嘅至 In 餐廳、時裝小店相映成趣，每個角落都值得你欣賞探索。馬貝拉舊城區多姿多彩，環境舒適，散發住溫暖快樂嘅氣氛，置身其中，零舍寫意。

濱海大道 (Avenida del Mar) 係佔地 5,500 平方米嘅矩形廣場，位於阿拉梅達公園 (Alameda Park) 同海灘之間，緊靠市內歷史最悠久嘅馬貝拉碼頭 (Puerto Deportivo de Marbella)，成條街都開滿商舖、酒吧，同埋設有木製涼棚露台嘅餐廳，同時亦都稱得上係「露天博物館」，事關呢度收藏咗 10 尊薩爾瓦多·達利 (Salvador Dali) 嘅雕塑。踏足街頭，不妨行入任何一間餐龐，飲杯嘢解吓渴，再去欣賞驚為天人嘅「展品」吖！

邦蒂海灘 (Bounty Beach) 係馬貝拉 (Marbella) 最 In 嘅沙灘之一，距離瑪麗娜巴哈迪雅 (La Bajadilla Marina) 東邊冇幾遠，官方名稱叫做「電纜海灘 (Playa del Cable)」，但就因為全長達 1,500 米，而且沿岸嘅「Chiringuitos (海灘餐廳)」一間接一間，因而獲得而家呢個暱稱 (「Bounty」意思係「賞金」)。海灘定期有人清潔，每日到日落之前都冇咩泳客，入夜後先會有人嚟跑步、打排球，玩盡各式水上運動；而呢度嘅海灘餐廳價格實惠，亦配備公廁同淋浴設施，難怪每晚都人流不絕，吸引遊人狂歡到夜深。

拉卡尼亞達購物中心 (La Cañada) 規模大得驚人，距離馬貝拉舊城區 (Marbella Old Town) 東北邊短短 5 分鐘車程，當地人叫佢做「拉卡尼亞達商業園 (Parque Comercial La Cañada)」。呢座購物中心佔地大約 100,000 平方米，場內有超過 300 間商舖，包括大型超市，仲有 Zara、Geox 同 Hugo Boss 等國際名店進駐。

除咗 Shopping 之外，呢度嘅餐飲同文娛選擇絕對唔少，舉凡戲院、兒童遊樂場一應俱全，就算撞正落雨，都可以嚟 Hea 足一日！

聖母化身教堂 (Church of Our Lady of the Incarnation) 建於 17 世紀，係一座純白色嘅建築，距離馬貝拉舊城區 (Marbella Old Town) 洛斯納蘭霍斯廣場 (Plaza de los Naranjos) 東南邊不過兩分鐘路程，又有「馬貝拉大教堂」之稱，堂內嘅油畫同雕像裝飾、再加上前門嘅洛可可風格雕刻，都令人眼前一亮。

教堂所在嘅廣場設有陰涼座位區，俾遊客休息；遊覽舊城區行到攰攰哋，不妨喺教堂靚景襯托之下，嚟呢度歇一歇腳吖！

海濱長廊 (Paseo Maritimo) 又名「馬貝拉海濱長廊」，係一條海邊行人路，由馬貝拉碼頭 (Puerto Deportivo de Marbella) 一直延伸到巴努斯港 (Puerto Banús)，全長大約 7 公里，沿路排滿密密麻麻嘅時裝店、小食店同餐廳，而且價錢豐儉由人，啱哂悠閒散步。另一方面，大道嘅部分路段種咗棕櫚樹，正好幫遊客遮陰。唔講唔知—呢區嘅繁華程度屬市內數一數二，夏季不時聚集咗街頭音樂人同藝人，表演娛賓。

如果你想行晒成條海濱長廊，恐怕要預留兩個鐘頭先得喇！之不過，沿住海岸直行，你會途經馬貝拉燈塔 (Marbella Lighthouse) 等景點，仲可以離遠望到普恩特羅馬諾酒店 (Hotel Puente Romano of Gibraltar) 同非洲海岸添。

巴努斯港碼頭 (Puerto Banús Marina) 位於海濱長廊 (Paseo Maritimo) 對岸，距離舊城區 (Old Town) 西邊 7 公里，兩側都開滿高檔酒吧同夜店，其中嘅 Pangea 同 Sinatra’s 相當出名，不時有明星光臨；而喺 Aqwa Mist 同 Kube 等充滿時尚氣派嘅 Club 入面，你點可以唔盡情狂舞？

除咗呢啲 Party 好去處，巴努斯港碼頭仲有一啲平價酒吧同夜店，唔單止夠型夠 In，仲有悠久歷史添，例子包括 O'Grady's Irish Pub 同 Joy’s Live Pub。

西班牙 Tapas 小食雖則只係前菜，但就可以俾你按照個人口味自由配搭，任揀酥炸魷魚圈 (Calamares)、炸肉丸配薯蓉 (Croquetas) 等，仲可以開枝紅酒或者啤酒，邊食邊飲；之不過，講到最地道嘅西班牙風味，梗係首推由水果酒同紅酒調配而成嘅桑格利亞汽酒 (Sangria) 啦！

如果你想試吓馬貝拉舊城區 (Marbella Old Town) 嘅特色 Tapas 同桑格利亞汽酒，Calle Peral 嘅 Arco Tapas Bar、Calle San Lázaro 嘅 Bar El Estrecho，仲有 Calle San Lázaro 嘅 Taberna Tierraranda 餐廳都非常值得一試。

西班牙海鮮飯 (Paella) 源於華倫西亞 (Valencia) 地區，係西班牙嘅美食代表作之一，食材大致包括大米、番紅花、肉、海鮮同蔬菜，而全國各地嘅餐廳會根據地道特色調整食譜。嚟到馬貝拉 (Marbella)，冇試過西班牙海鮮飯，簡直係白行一趟啦！

馬貝拉舊城區 (Marbella Old Town) 大街小巷嘅餐廳都有供應好味嘅西班牙海鮮飯，當中最令食客心動嘅，包括位於 Calle Tetuán 嘅 Tempora Restaurante、Calle Remedios 嘅 Restaurante El Cortijo，同埋 Calle Virgen de los Dolores 嘅 El Patio De Mariscal。