伊維薩島 10 大最好玩活動

伊維薩島最出名嘅係乜嘢?

    伊維薩島係西班牙南部海岸附近嘅巴利阿里島嶼,島上休閒活動精彩多樣,吸引名人、hippies 同熱情嘅 Backpackers 湧至。成個夏季,Party 活動源源不絕,全球至 Top DJ 空降島上,譜寫出享樂主義者嘅夢想一幕!

    嚟到舞池嘅另一邊,呢座火山島上面仲有古老城鎮、絢麗海灘同一流餐廳,呈現另一種面貌。要百分百享受伊維薩島嘅寶藏,固然所費不菲;之但係,如果你想狂歡一番,咁呢度就肯定係全世界最好玩嘅地方之一!

    伊維薩島最好玩嘅活動係乜嘢?

    1

    喺伊維薩鎮遊艇碼頭展開一日行程

    一邊欣賞港口美景,一邊嘆咖啡

    伊維薩鎮 (Ibiza Town) 嘅碼頭泊咗幾百艘遊艇,喺地中海 (Mediterranean Sea) 水面漂浮;附近仲有各式餐館、精品店、時尚酒吧同酒店,旅遊設施完善。向 Carrer Andenes 進發途中,你會見到一排排酒吧同餐館,而佢哋正正係享受咖啡同西班牙陽光嘅最好去處!

    伊維薩氣氛悠閒,難怪吸引有錢人同名人紛紛喺度聚腳。

    地點: 伊維薩鎮港口嘅 Carrer Andenes

    地圖
    • 伴侶
    • 家庭
    • 豪華住宿
    2

    探索城牆環繞嘅舊城區

    步行穿過達特維拉嘅巷仔

    達特維拉舊城區 (Dalt Vila) 係一座歷史悠久嘅砂岩堡壘,以前用嚟抵禦海盜同其他入侵者。穿過古老大門行入市內,過程令人回味,亦係呢度成為伊維薩 (Ibiza) 必遊景點嘅原因。小鎮本身依然保留住舊日風情,

    除咗到處都有得意購物區,另外亦有唔少舊酒窖,不妨點杯清涼飲品,細味各種小食。好動嘅你仲可以登上山頂,欣賞伊維薩鎮碼頭同新區嘅靚景添!

    地點: Dalt Vila, Ibiza Town

    地圖
    • 伴侶
    • 家庭
    • 歷史文化`
    3

    參觀埃斯卡納嘅 Hippy 市集

    買勻特色潮物,試吓指甲花紋身

    蓬塔阿拉比嬉皮市場 (Punta Arabi Hippy Market) 歷年發展迅速,而家已經成為伊維薩 (Ibiza) 最有聲有色嘅市集之一,夏季逢星期三營業,為你帶嚟多姿多彩嘅型格潮物、獨一無二嘅珠寶首飾、惹味可口嘅攤檔小食,現場仲有音樂表演,吸引大批遊人駐足欣賞。咪睇呢個市集稀奇古怪,其實相當貼心,裡面設有兒童專區,最啱一家大細嚟行街!而市場四周種滿巨型松樹,有助降溫。

    嬉皮市場位於伊維薩東岸,距離伊維薩鎮 (Ibiza Town) 大約 20 公里,只要喺埃斯卡納鎮 (Es Canar) 揀一間酒店落腳,就可以行路直達市場。如果你咁啱星期三嚟唔到呢度遊覽,伊維薩都仲有好多比較小型嘅市場—其中,附近每逢夏季星期六營業嘅拉斯達利亞斯市場 (Las Dalias market) 都唔錯架!

    地點: Avinguda Punta Arabí, s/n, 07840 Santa Eulalia del Río, Islas Baleares, Spain

    開放時間: 4 月至 9 月:星期三 10:00 至 19:00

    電話: +34 971 33 06 50

    地圖
    • 伴侶
    • 家庭
    • 經濟實惠

    相片由 yashima 提供 (CC BY-SA 2.0) 經修改

    4

    喺薩利納斯海灘 hea 足一日

    同世界各地嘅遊客一齊感受陽光魅力

    薩利納斯海灘 (Salinas Beach) 係一片長形沙質海岸帶,因為演奏巴利阿里曲調嘅時尚「Chiringuitos (海灘酒吧)」而聲名大噪。貴為伊維薩島 (Ibiza) 人氣最旺嘅海灘之一,呢度喺夏季高峰期會變得人山人海,不妨著住最 Sexy 嘅沙灘裝,同人群一齊享受美妙夏日吖!薩利納斯海灘充滿大都會色彩,好多唔同國籍嘅遊客都會喺呢度休閒度日;

    海灘附近有唔少高級餐廳;而最南端就係深受「天體客」歡迎嘅區域。薩利納斯海灘位於伊維薩島南端,鄰近機場。

    • 伴侶
    • 家庭
    • 豪華住宿
    5

    喺 Tropicana 海灘俱樂部嘆滋味海鮮飯

    喺 Cala Jondal 海灘用餐

    海鮮飯係西班牙嘅特色飯點之一,以鮮魚、魷魚、蝦配搭各種貝類慢煮而成,將海產嘅鮮香融入米飯之中,成就出極致豐富嘅滋味。

    身處島上,幾乎度度都搵到西班牙海鮮飯!坐喺遮陽傘下面,一邊腳踏細沙,一邊吹住清涼海風,品嚐呢道西班牙經典菜式,絕對係一大享受。其中,Cala Jondal 海灘嘅 Tropicana 海灘俱樂部係島上數一數二嘅高質海鮮餐廳,室內室外都設有座位,值得推介!

    地點: Cala Jondal, s/n, 07830 Sant Josep de sa Talaia, Balearic Islands, Spain

    開放時間: 每日 10:00 至 23:00

    電話: +34 971 18 75 20

    地圖
    • 伴侶
    • 家庭
    • 品嚐美食
    • 豪華住宿
    6

    搭船去埃斯韋德拉

    喺宗教地標周圍嘅汪洋暢泳

    埃斯韋德拉 (Es Vedra) 係位於伊維薩島 (Ibiza) 西南海岸嘅神奇岩石,以異常強大嘅磁場遠近馳名,而唔少人都覺得呢種係靈異能量。埃斯維德拉當地嘅神話傳說層出不窮,又有人話呢度係海仙女同女神嘅故鄉。除咗神話之外,埃斯維德拉風光不殊,仲可以俾你飽覽伊維薩島 (Ibiza) 嘅火山景觀添!不妨 Book 定歷時 3 個鐘嘅遊船體驗,由伊維薩島或者聖安東尼奧 (San Antonio) 出發,觀賞埃斯韋德拉嘅靚景,沿途睇埋海岸風光,再喺地中海嘅深藍色海水裡面暢泳。

    開放時間: 觀光團時間表各有不同,以 10:00 至 14:00 嘅時段最受歡迎

    地圖
    • 伴侶
    • 家庭

    相片由 MrPepanos 提供 (CC BY 3.0) 經修改

    7

    喺波拉波拉海灘俱樂部全日狂歡

    向伊維薩島最精彩嘅日間 Party 勝地進發

    幾十年嚟,波拉波拉島 (Bora Bora) 一直都係伊維薩島 (Ibiza) 日間 Party 場地嘅亮點,場內有唔少陰涼地方,俾你盡情跳舞飲酒。想靜靜唞返陣?不妨搵張躺椅 hea 吓,或者跳入海中暢遊。要數伊維薩島最長、最受歡迎嘅海灘,普拉亞登博薩海灘 (Playa Den Bosa) 一定榜上有名,你仲可以喺度玩勻划艇、帆船以至各種水上運動添!

    地點: Playa d'en Bossa, s/n, 07817 Sant Josep de Talaia, Islas Baleares, Spain

    開放時間: +34 (0)971 30 37 86

    地圖
    • 伴侶
    • 豪華住宿
    8

    喺 Café Del Mar 欣賞日落

    日落西山,同人群齊聲歡呼

    Café Del Mar 係位於伊維薩島 (Ibiza) 北部海岸嘅原創日落酒吧,自 1980 年開店以嚟,一直都係其他店家嘅模仿對象,但就仍然穩守「最佳 Tapas 同飲品店」嘅強勁地位。沿住岩石海岸睇日落,絕對稱得上係伊維薩島最經典嘅旅遊體驗,於是吸引成千上萬嘅遊客聚集喺呢度,傾聽風浪聲,晝夜狂歡。住宿方面,聖安東尼奧 (San Antonio) 嘅平價酒店數之不盡,任君選擇!

    地點: Calle Vara de Rey, 27, 07820 Sant Antoni de Portmany, Islas Baleares, Spain

    開放時間: 每日 16:00 至 00:00

    地圖
    • 伴侶
    • 家庭
    • 豪華住宿
    9

    品嚐卡瓦桑格利亞汽酒

    水果酒配上氣泡,造就出清爽嘅西班牙飲品

    卡瓦桑格利亞汽酒 (Cava sangria) 係一款果味清爽嘅飲品,最啱同朋友 Share!要喺海灘度過一個休閒下晝,呢杯酒絕對不可或缺,喺島上任何一間海灘酒吧都買得到。如果你想同朋友飲返幾杯,喺伊維薩島 (Ibiza) 索價不菲嘅芸芸飲品之中,卡瓦桑格利亞汽酒算係比較實惠。只要飲法正確,加入果酒裡面嘅卡瓦氣泡酒就會喺你條脷上面舞動,唔試吓點得?

    • 品嚐美食

    相片由 Divya Thakur 提供 (CC BY-SA 2.0) 經修改

    10

    喺 Pacha 盡情狂歡,度過完美一夜

    國際知名 DJ 不時登台嘅夜店

    Pacha 以農舍起家,到咗 1970 年代先轉型為夜店,裡面劃分為 5 個區域,依然保留住農屋嘅感覺。主舞池成日都有成千上萬嘅夜蒲客隨歌起舞,非常熱鬧;Funky Room 同屋頂露台等區域細啲,喺度欣賞舊城區風景就最啱。

    Pacha 每晚都有唔同主題,當中最出名嘅梗係要數 David Guetta 嘅《F*** Me I'm Famous》之夜,同埋每月舉行嘅 Flower Power 啦!想徹夜狂歡嘅話,不妨考慮喺 Pacha 用餐,咁就可以入埋 VIP 區喇—記得提前訂枱,先可以專享呢項禮遇架!

    地點: Avenida 8 De Agosto, Ibiza Town, 07800 Ibiza, Spain

    開放時間: 22:00 至 06:00

    電話: +34 (0)971 31 36 12

    地圖
    • 伴侶
    • 晚間娛樂
    • 豪華住宿

    相片由 Danny Wade 提供 (CC BY-SA 3.0) 經修改

    Paul Smith | 旅遊常客

    開始計劃行程

    Maps