巴塞隆拿嘅 Instagram 打卡勝地

巴塞隆拿最多人影相打卡嘅景點

    巴塞隆拿係極受歡迎嘅旅遊勝地,要精選最啱 Instagram 打卡嘅熱點,相當棘手…雖然係咁,我哋都去蕪存菁,揀咗 14 個不容錯過嘅影相勝地。如果你想喺巴塞隆拿捕捉令人讚嘆嘅靚相、影張難忘 Selfie,就要 Mark 低喇!

    以下唔少景點係你一早聽過嘅都會地標,同場加映你聞所未聞嘅偏遠秘境,絕對出乎你意料。不如跟住我哋,虛擬遊覽巴塞隆拿人氣最旺嘅影相熱點啦!

    1

    聖家堂

    高第嘅建築傑作全部都係打卡勝地,而聖家堂 (Sagrada Familia) 無論內外都一樣「上鏡」,踏足高第廣場 (Plaza de Gaudí) 就可以影哂教堂全貌;如果你想對住聖家堂耐啲,仲可以選擇住喺最近聖家堂嘅酒店添!

    • 拍照
    2

    奎爾公園

    奎爾公園 (Park Güell) 係出自高第手筆嘅另一件傑出藝術品,亦都係遊客瘋狂打卡嘅難忘景點,當中又以園內嘅 Dragon Stairway﹑Sala Hipòstila 屋頂同 Mirador Virolai (又名 Mirador Joan Sales) 最具人氣,可以俾你一眼睇哂巴塞隆拿嘅壯麗景色。

    • 拍照
    3

    巴塞隆拿大教堂

    想影到呢座哥德式華麗大教堂嘅全貌,就梗係要去教堂前面嘅廣場霸個靚位啦!另一方面,Carrer del Dr. Joaquim Pou 都好唔錯,佢係一條鋪設完好嘅窄街,由嗰度影過去巴塞隆拿大教堂 (Barcelona Cathedral),夠哂你發揮創意。

    • 拍照
    4

    加泰隆尼亞音樂廳

    加泰隆尼亞音樂廳 (Palau de la Musica Catalana) 綴有金色拱廊﹑彩色窗同豐富裝飾品,係令人迷醉嘅攝影勝地。呢座建築物嘅外牆非常之靚,但係出面嘅街道比較狹窄,要搵個好角度影張靚相,都有啲難度。

    • 拍照
    5

    魯營球場

    魯營球場 (Camp Nou) 本身唔算「上鏡」;之不過,難得有機會睇班霸「巴塞」主場出戰,眼見身邊成千上萬球迷為主隊吶喊助威,你一定會想影低呢個熱血時刻!適逢比賽季節,魯營球場附近嘅酒店好快 Full Booking,記住要提早訂房喎。

    • 拍照
    6

    卡梅爾堡

    卡梅爾堡 (Bunkers del Carmel) 係西班牙內戰期間建造嘅城堡,位於巴塞隆拿北部嘅山頂,絕對係城內最「居高臨下」嘅觀景點,可以俾你影哂巴塞隆拿 360 度「零死角」靚景!

    • 拍照
    7

    巴塞羅內塔海灘

    巴塞羅內塔海灘 (Playa de la Barceloneta) 位於輪渡碼頭以北,絢麗迷人,有大把機會俾你打卡啦~唔少旅客都會影埋海灘後面嘅巴塞隆拿 W 酒店 (Hotel W Barcelona),咁樣構圖至潮至 Chic!

    • 拍照
    8

    蒙特惠奇山魔法噴泉

    蒙特惠奇山魔法噴泉 (Magic Fountain of Montjuic) 係巴塞隆拿最搶眼嘅景點之一,源於 20 世紀初,有彩色燈光﹑水景效果加音樂,氣氛夢幻到暈!想喺度打卡,就要趕喺啱啱日落之後嚟到,用漸變深藍色嘅夜空做靚相 Background 喇。

    • 拍照
    9

    巴特羅之家

    巴特羅之家 (Casa Battlò) 係高第另一個引人入勝嘅作品,一場嚟到巴塞隆拿,梗係唔可以錯過!呢座 7 層高嘅房屋採用非傳統立面設計,輕輕鬆鬆就晉身全巴塞隆拿最多人打卡嘅地標之列。不妨揀喺格拉西亞大道 (Passeig de Gracia) 沿路嘅酒店落腳,行幾步就可以遊遍巴特羅之家同其他主要景點架喇!

    • 拍照
    10

    博蓋利亞市場

    博蓋利亞市場 (La Boqueria) 位於哥德區 (Gothic Quarter) 西側,係 19 世紀中期落成嘅有蓋市集,場內充滿五彩繽紛嘅生果蔬菜,而且人流極旺,仲有數之不盡嘅 Tapas 小食吧,你行幾步路實會忍唔住停低食嘢,順道影返輯靚相打卡!

    • 品嚐美食
    11

    城堡公園

    想喺人煙稠密嘅巴塞隆拿都市唞唞氣?城堡公園 (Ciutadella Park) 就係你嘅必遊勝地!身處園內,不妨去東北角落頭嘅紀念碑瀑布 (Cascada Monumental) 打卡,再行埋公園西北面 300 米外嘅凱旋門 (Arc de Triomf),都幾得意架!

    • 拍照
    12

    主教街

    主教街 (Carrer del Bisbe) 係巴塞隆拿哥德區 (Gothic Quarter) 嘅地標巷仔,闊度得 4 米,似足夾喺老式高樓建築之間嘅走廊,又以行人路上方 5 米嘅哥德式橋樑最出名,可以帶你橫過呢條窄巷。溫馨提示:清晨或者深夜嚟到打卡,就可以避開遊客人潮喇!

    • 拍照
    13

    蘭布拉大道嘅街頭表演

    蘭布拉大道 (Las Ramblas) 唔單止係巴塞隆拿最受歡迎嘅餐飲同購物大道,同時亦都係好多小丑﹑真人雕像﹑雜技演員﹑舞者同默劇演員嘅舞台,佢哋每日都喺呢度表演,吸引唔少觀眾,而你仲可以喺度影到驚喜百出嘅靚相添!

    • 拍照
    14

    喺地道酒窖食西班牙小食、飲靚酒

    想大擦 Tapas 小食、暢飲葡萄美酒,咁又要去酒窖 (Bodega) 喇!呢啲典型嘅西班牙酒吧/商舖通常都有復古裝修,打卡一流—由豐富多彩嘅西班牙 Tapas 小食到店家懷舊裝飾,你實影到唔少靚相啦。

    • 拍照
    Stephan Audiger | 旅遊常客

    開始計劃行程

    Maps