壯麗博物館、中世紀地標,加埋索價不菲嘅入場費,巴塞隆拿之旅可能好快就會令你用盡「盤纏」…不過都有好消息嘅:只要你預先做足「功課」,就可以一邊慳錢,一邊體驗呢個文化中心嘅醉人魅力!

    巴塞隆拿充滿獨一無二嘅節慶,大多數以傳統舞蹈、現場音樂、街頭巡遊同文化活動為特色,歡迎大家免費參加。喺古樸街區裡面漫步,你仲會欣賞到各種現代街頭藝術品,另加高第 (Antoni Gaudi) 同瓊·米羅 (Joan Miró) 建於 19 世紀嘅建築物,俾你盡情影返夠本!不妨參考我哋嘅巴塞隆拿免費必試活動指南,用最少錢玩盡市內最多角落吖?

    1

    不容錯過嘅免費博物館參觀日

    星期日 15:00 至 20:00 參觀畢加索博物館

    喺大多數日子,你至少要洗 EUR10,先可以參觀到巴塞隆拿嘅博物館;之不過,諸如畢加索博物館 (Picasso Museum)、巴塞隆拿歷史博物館 (Museum of History of Barcelona) 同加泰羅尼亞國家藝術博物館 (National Museum of Art of Catalonia) 等等嘅人氣展館喺每個月嘅第一個星期日全日、同埋隨後嘅星期日 15:00 之後,都會俾訪客免費入場,記住要早啲嚟到喎,因為到時實會大排長龍,而且休館前 30 分鐘就「截龍」,唔再開放遊客入場架喇!

    • 歷史文化`
    • 經濟實惠

    相片由 LPLT 提供 (CC BY-SA 3.0) 經修改

    2

    探索哥德區

    參加徒步導賞團,探索小巷迷宮美景

    講到巴塞隆拿 (Barcelona) 最風光如畫嘅街區,一定要數哥德區 (Gothic Quarter)!呢度嘅鵝卵石街狹窄悠長,佈滿中世紀建築,充滿冒險樂趣;而公共廣場嘅商舖同餐館應有盡有,就算行足一日,都一定唔會悶。哥德區好多建築物嘅外牆上有唔少街頭藝術,形成現代同傳統氛圍嘅強烈對比。不妨搭地鐵去 Jaume I 站參觀巴塞隆拿主教座堂 (La Catedral),然後再向東南面嘅皇家廣場 (Plaça Reial) 進發,喺公共廣場嘅妙趣 Café 同酒吧 hea 一陣吖!

    地點: Plaça Reial, 9, 08002 Barcelona, Spain

    地圖
    • 歷史文化`
    • 拍照
    • 經濟實惠
    3

    巴塞隆拿主教座堂

    細賞呢座宏偉大教堂每個角落嘅哥德式精巧設計

    巴塞隆拿主教座堂 (La Catedral) 係源自 13 世紀嘅羅馬天主教堂,為咗歌頌 13 歲就逝世嘅烈士聖歐拉利婭 (St.Eulalia) 而建,主要採用哥德式建築風格,點綴住尖頂天花板、細長彩色玻璃窗,仲有各種形狀同大細嘅雨漏;而堂外嘅新哥德式外牆就係喺 19 世紀由工業家 Manuel Girona Agrafel 加建上去嘅。主教座堂嘅迴廊係一座寧靜庭院,歷史可以追溯至 15 世紀,中央飾有鵝井噴泉,旁邊仲有 13 隻鵝喺度「遊蕩」添!

    地點: Pla de la Seu, s/n, 08002 Barcelona, Spain

    開放時間: 星期一至星期五 08:30 至 12:30 及 17:45 至 19:30;星期六至星期日 08:30 至 12:30 及 17:15 至 20:00 (開放時間會變動)

    電話: +34 933 15 15 54

    地圖
    • 歷史文化`
    • 拍照
    • 經濟實惠
    4

    由外面欣賞聖家堂

    細賞高第喺 1892 年建成嘅耶穌誕生立面牆

    聖家堂 (La Sagrada Familia) 喺 19 世紀後期由安東尼·高第 (Antoni Gaudi) 著手興建,絕對係巴塞隆拿最攝人嘅現代主義建築之一!呢座教堂雖然未起完,但都要買飛先入得去參觀架!想經濟啲,可以喺出邊盡情免費「打卡」—講真,外牆同大樓嘅獨特設計,都夠你影相影到手軟啦!自從高第喺 1926 年過身之後,唔少人都為聖家堂嘅建設做出極大貢獻,當中包括多梅內克·蘇格拉內斯·格拉斯 (Domenec Sugranes i Gras)﹑何塞普·瑪麗亞·蘇比拉赫斯 (Josep Maria Subirachs) 同馬克·伯里 (Mark Burry)。

    地點: Carrer de Mallorca, 401, 08013 Barcelona, Spain

    開放時間: 每日 09:00 至 19:00 (開放時間可能更改)

    電話: +34 932 080 414

    地圖
    • 歷史文化`
    • 拍照
    • 經濟實惠
    5

    沿住現代主義之路漫步

    同高第令人驚嘆嘅現代主義建築影靚相

    現代主義之路 (The Route of Modermisme) 係一條自助步行觀光徑,你可以喺沿途欣賞到 19 世紀至 20 世紀嘅現代主義建築,而呢啲建築傑作位於巴塞隆拿市中心,以異想天開嘅設計聞名,採用鍛鐵﹑花卉裝飾,彩色玻璃同五彩拉毛陶工藝 (蝕刻陶瓷細節) 打造,繽紛多彩。講到現代主義建築領域最「多產」嘅人物,可能非加泰羅尼亞建築師安東尼·高第 (Antoni Gaudi) 莫屬,但係呢條路徑都仲囊括咗約瑟夫·普伊格·卡達法爾 (Josep Puig i Cadafalch) 同蒙蒂納 (Lluis Domenech i Montaner) 嘅作品嘅,沿路嘅必遊景點包括奎爾公園 (Park Güell)、加泰羅尼亞音樂宮 (Palau de la Música Catalan) 同巴特婁之家 (Casa Batlló)。

    地點: Ruta del Modernisme, Plaça de Catalunya, 17, 08002 Barcelona, Spain

    電話: +34 933 177 652

    地圖
    • 歷史文化`
    • 拍照
    • 經濟實惠

    相片由 Elisabetta Stringhi 提供 (CC BY 2.0) 經修改

    6

    瓊·米羅嘅裝置藝術

    睇吓米羅公園嘅《女人和鳥》雕塑

    如果你覺得洗 EUR10 買張米羅美術館 (Fundació Joan Miró) 嘅門票感覺好揮霍,不妨留意吓周圍吖,皆因巴塞隆拿好多街區都有呢位西班牙藝術家瓊‧米羅 (Joan Miró) 嘅裝置藝術架!舉例,米羅公園 (Parc de Joan Miró) 距離博物館西北 3 公里外,入面都搵到佢由琉璃瓦打造嘅 22 米高《女人和鳥 (Woman and Bird)》雕塑;而另一個驚世傑作就係喺蘭布拉大道 (La Rambla) 行人路上面嘅馬賽克磚。

    地點: Carrer de Tarragona, 76, 08015 Barcelona, Spain

    地圖
    • 歷史文化`
    • 拍照
    • 經濟實惠

    相片由 Börkur Sigurbjörnsson 提供 (CC BY 2.0) 經修改

    7

    Mercat Fira de Bellcaire Els Encants

    喺 500 個加泰羅尼亞手工藝品攤位尋寶

    Mercat Fira de Bellcaire Els Encants 跳蚤市場嘅歷史可以追溯到 14 世紀,喺西班牙 Flea Market 界算係最「元老級人馬」嚟架喇!今時今日,市集搬咗去 Carrer de los Castillejos 阿格巴塔 (Agbar Tower) 對面嘅現代多功能中心度,喺罩篷下面一共設置咗 500 幾個攤位,有賣二手衫﹑書﹑相機同電子產品,仲有古董傢俬同家居裝飾添!就算你唔諗住買任何嘢,都不妨喺呢度體驗吓西班牙嘅傳統風情同生活方式吖。

    地點: Carrer de los Castillejos, 158, 08013 Barcelona, Spain

    開放時間: 星期三﹑星期五至星期六,星期一 09:00 至 20:00 (星期二﹑星期四同星期日休息)

    電話: +34 932 463 030

    地圖
    • 購物
    • 歷史文化`
    • 經濟實惠

    相片由 Rwxrwxrwx 提供 (CC BY-SA 4.0) 經修改

    8

    沿住 Carretera de les Aigües 小徑遠足

    喺提比達波山頂睇盡巴塞隆拿全景

    想親親大自然?不妨沿住 Carretera de les Aigües 登山徑行上提比達波山 (Tibidabo) 山頂睇靚景吖!呢條 10 公里長嘅行山徑相對平坦易行,逢星期六日都有好多人嚟慢跑或者踩單車,仲有一家大細嚟享受天倫樂添。Carretera de les Aigües 位於巴塞隆拿市中心西北 9 公里外,搭巴士或者火車就可以輕鬆嚟到;想運動吓筋骨,喺市中心租架單車踩過嚟都仲得!

    地點: Carretera de les Aigües, Barcelona, Spain

    地圖
    • 家庭
    • 拍照
    • 經濟實惠
    • 遊歷

    相片由 pere prlpz 提供 (CC BY-SA 3.0) 經修改

    9

    諾娃艾卡維亞海灘

    喺合家歡海灘曬太陽

    諾娃艾卡維亞海灘 (Nova Icaria) 擁有乾淨嘅沙灘同海水、優美嘅海濱長廊、兒童遊樂同水上運動設施,難怪吸引無數遊客蜂擁而至啦!呢個海灘位於 La Vila Olímpica del Poblenou 附近,距離 1992 年落成嘅奧林匹克公園 (Olympic Park) 只係 10 分鐘步程,俾幾蚊歐羅就租到太陽椅—如果你想喺度曬吓日光浴,自備沙灘巾就得架喇!你亦都可以沿住諾娃艾卡維亞海濱大道 (Passeig Marítim de la Nova Icària) 漫步,欣賞醉人海景。

    地點: Nova Icaria Beach, Passeig Marítim de la Nova Icària, 08005 Barcelona, Spain

    地圖
    • 伴侶
    • 家庭
    • 拍照
    • 經濟實惠

    相片由 Cary Bass-Deschenes 提供 (CC BY-SA 2.0) 經修改

    10

    魔法噴泉

    夜晚欣賞五彩繽紛嘅燈光﹑音樂同水花表演

    魔法噴泉 (Font Magica) 位於 Plaça de Carles Buïgas 廣場,同場內其他亮燈噴泉、水池相映成趣,璀璨奪目!呢座圓形噴泉建於 1929 年,每晚都會上演結合水花﹑音樂同燈光嘅表演,吸引大批遊客觀賞,而大多數仲係帶埋小朋友嚟嘅家庭添!比起喺酒吧飲酒,呢度絕對係享受夜色嘅好方法,不過睇 Show 嗰陣記得小心扒手喎。

    地點: Plaça de Carles Buïgas, 1, 08038 Barcelona, Spain

    地圖
    • 家庭
    • 拍照
    • 晚間娛樂
    • 經濟實惠
    Penny Wong | 旅遊常客

    開始計劃行程

    Maps