我哋嘅馬德里休閒活動清單充分顯示呢座西班牙首都嘅歷史、藝術、美食、時尚同夜生活有幾廣泛多元!縱觀馬德里市內各處嘅博物館同美術館,全歐洲最優秀嘅西班牙同拉丁美洲藝術品比比皆是;嚟到市內多不勝數嘅露天廣場,揉合布雜藝術風格嘅建築、獨一無二嘅雕像,仲有建於 18 世紀嘅老式劇院琳瑯滿目。

    馬德里人亦都好享受熱鬧節慶,每年聖誕節、馬德里 Pride 同志遊行、除夕 (Nochevieja) 等等,市內都喜氣洋洋。馬德里嘅行人路寬闊,不時有蒼翠嘅花園俾你歇腳,行走市中心相對輕鬆。我哋嘅指南囊括馬德里最出名嘅活動、美食同名勝,目的係幫「初來甫到」嘅旅客締造一段獨特體驗!

    馬德里最好玩嘅活動係乜嘢?

    1

    喺馬約爾廣場展開一日行程

    行完廣場,係時候試吓馬德里最出名嘅魷魚三文治

    馬約爾廣場 (Plaza Mayor) 係馬德里 (Madrid) 最宏偉嘅開放式廣場之一,設有 9 個入口,佈滿 17 世紀壁畫,正中央仲擺放咗一尊國王菲利普三世 (King Philip III) 嘅銅像。呢度算得上係市內嘅人氣聚腳點,全年都有唔同嘅活動任君選擇,當中包括熱爆馬德里嘅聖誕節市集,同埋馬德里聖人 San Isidro 嘅慶祝盛典。

    行到餓餓哋?呢度仲有唔少 Café 同三文治 Bar,供應咖啡、啤酒同馬德里經典 Bocadillo de calamares (魷魚三文治),俾你擦餐勁。

    地點: Plaza Mayor, 28012 Madrid, Spain

    地圖
    • 伴侶
    • 家庭
    • 歷史文化`
    • 拍照
    2

    探索馬德里嘅藝術金三角

    喺索菲亞王后國家藝術中心博物館欣賞畢加索舉世聞名嘅作品《格爾尼卡》

    要數馬德里 (Madrid) 最好玩嘅活動,梗係唔少得參觀普拉多大道 (Paseo del Prado) 嘅藝術金三角 (Art Triangle) 啦!喺綠蔭成蔭嘅大道上,設有普拉多博物館 (Museo del Prado)、提森博內米薩博物館 (Thyssen-Bornemisza) 同索菲亞王后國家藝術中心博物館 (Reina Sofia) 呢 3 間知名博物館,展出畢加索 (Picasso)、戈雅 (Goya)、維拉斯奎茲 (Velazquez) 同埃爾格列柯博世 (El Greco Bosch) 嘅傑作。

    只需 EUR40,你就會買到 Paseo del Arte 通行證,慳錢又慳時間,仲可以用 8 折優惠價行勻 3 間博物館添!行程之間,不妨去埋天文台 (Astronomical Observatory)、海神噴泉 (Fuente de Neptuno)、大地女神噴泉 (Fuente de Cibeles) 同皇家植物園 (Royal Botanical Gardens) 等等嘅人氣地標影相。

    地點: Paseo del Prado, s/n, 28014 Madrid, Spain

    地圖
    • 家庭
    • 歷史文化`
    • 拍照
    3

    必睇景點:皇宮

    逢星期三同星期六都有衛兵換崗儀式,值得參觀

    馬德里皇宮 (Royal Palace of Madrid) 係西班牙皇室嘅正式住所。偶遇皇室成員固然係行程亮點,但其實佢哋唔多會喺度出現…呢座宏偉嘅建築喺 18 世紀由國王菲利普五世 (Philip V) 下令建造,融合咗新古典主義同巴洛克建築風格,宮內總共有 3,000 間客房,當中包括皇座大廳、軍械庫,同埋保存完好嘅皇家廚房。

    醉心藝術嘅你,仲可以喺呢度欣賞到路易斯莫拉萊斯 (Luis Morales)、戈雅 (Goya)、胡安德法蘭德斯 (Juan de Flandes)、卡拉瓦喬 (Caravaggio)、維拉斯奎茲 (Velázquez) 同費德里科馬德拉索 (Federico Madrazo) 等知名藝術家嘅曠世傑作添!

    地點: Calle de Bailén, s/n, 28071 Madrid, Spain

    開放時間: 每日 10:00 至 20:00

    地圖
    • 家庭
    • 歷史文化`
    • 拍照
    4

    喺格蘭大道盡情 Shopping

    喺格蘭大道嘅高街奢華時裝店喪買潮衫

    格蘭大道 (Gran Via) 係馬德里 (Madrid) 最 High Class 嘅購物大街之一,雲集高街、奢華以至當地設計師品牌門店,而西班牙最大型嘅百貨公司英格列斯百貨 (El Corte Inglés) 就係坐落於此,仲有 Red Valentino、Hugo Boss 同 Armani Exchange 等知名品牌進駐其中。

    雖然貴為馬德里嘅高檔購物街,但其實格蘭大道上有唔少得意景點,當中包括充滿藝術風格嘅建築同埋舊式劇院,城市景觀美不勝收。一場嚟到,記得要去參觀埋當地地標大都會大廈 (Edificio Metrópolis),欣賞吓呢座馬德里布雜藝術 (Beaux-Arts) 建築嘅瑰麗典範喇!

    地點: Calle Gran Vía, s/n 28013 Madrid, Spain

    地圖
    • 購物
    • 豪華住宿
    5

    喺聖米蓋爾市場試勻各式小食

    喺聖米蓋爾市場同當地人一齊「貼地」Shopping

    自 1916 年以嚟,聖米蓋爾市場 (Mercado San Miguel) 一直都係「為食貓」嘅必遊景點,佢鄰近馬約爾廣場 (Plaza Mayor),入面有 30 幾個攤位,專售新鮮海產、醃肉、葡萄酒、啤酒、各式糕點同朱古力,每日 10:00 至 00:00 營業 (星期五至六開檔至 01:00)。

    人在馬德里 (Madrid),又點可以唔試吓西班牙 Tapas 惹味小食?聖米蓋爾市場就有好幾間酒吧任你揀,不妨喺場內搵一間 (搵夠 5 間都得) Tapas Bar,嘆進新鮮生蠔同經典西班牙美食,例如辣味番茄醬拌馬鈴薯 (patatas bravas)大蒜蝦 (Gambas al ajillo) 等等。

    地點: Plaza de San Miguel, s/n, 28005 Madrid, Spain

    開放時間: 星期日至四 10:00 至 00:00;星期五至六 10:00 至 01:00

    電話: +34 915 424 936

    地圖
    • 家庭
    • 購物
    • 歷史文化`
    • 品嚐美食
    6

    必睇景點:熊與莓樹像

    同知名青銅雕像合照

    「熊與莓樹像 (El Oso y el Madroño)」係一尊位於馬德里 (Madrid) 市中心太陽門廣場 (Puerta del Sol) 上面嘅銅像,早在 1967 年揭幕,出自安東尼奧納瓦羅桑塔菲 (Antonio Navarro Santafé) 手筆,描繪馬德里嘅紋章,人氣超旺,亦都吸引唔少人專誠嚟影靚相。

    萬一你同旅伴喺馬德里盪失路,「熊與莓樹像」都算係市中心相當顯眼嘅景點,喺度等齊人就啱哂。

    地點: Plaza Puerta del Sol, s/n, 28013 Madrid

    地圖
    • 歷史文化`
    7

    喺埃爾拉斯特洛跳蚤市場掃平貨

    喺埃爾拉斯特洛跳蚤市場搜羅時尚古著同二手貨

    自問「知慳識儉」?馬德里 (Madrid) 嘅埃爾拉斯特洛跳蚤市場 (El Rastro Flea Market) 肯定會成為你嘅 No. 1 必遊之地!成個露天市集裡面,大約有 3,000 個攤位,想逐檔行勻都唔易…逢星期日 09:00 至 15:00,呢度總係人頭湧湧,唔少人專誠嚟搵黑膠唱片、書、鐘錶以至各式衫褲、手袋、珠寶,貨色應有盡有。

    行到攰喇?埃爾拉斯特洛跳蚤市場周圍仲有古樸風情滿瀉嘅 Café 同酒吧。掃完貨又未食 Lunch,不妨嚟呢度飲返杯苦艾開胃酒 (aperitivo),食少少 Tapas 地道小食吖!

    地點: Calle de la Ribera de Curtidores, 28005 Madrid, Spain

    開放時間: 星期日 09:00 至 15:00

    電話: +34 915 298 210

    地圖
    • 伴侶
    • 家庭
    • 購物
    8

    喺麗池公園唞一唞

    漫步麗池公園嘅 Paseo de la Argentina

    麗池公園 (El Retiro Park) 位於獨立廣場 (Plaza de la Independencia),寬敞舒適,園內最受歡迎嘅景點一定要數雕像步道 (Statue Walk),佢沿路有 18 世紀西班牙皇室成員嘅雕像「列陣」,架勢十足!身處呢個位於馬德里 (Madrid) 嘅優美公園入面,你可以野餐、撐船、踩單車,又或者細賞園內嘅歷史古蹟。

    其中,阿方索十二世 (Alfonso XII) 嘅紀念碑旁邊有個人工湖,只要俾幾歐元,你就可以租船遊湖架喇!講到公園另一個必遊名勝,又點可以唔提水晶宮 (Palacio de Cristal)?呢座涼亭貌似溫室,建於 1887 年,歷史悠久。

    地點: Plaza de la Independencia, 7, 28001 Madrid, Spain

    地圖
    • 家庭
    9

    西班牙油條盛宴

    喺 Chocolatería San Ginés 大嘆即製油條同咖啡

    嚟到馬德里 (Madrid),未試過西班牙油條 (Churros),簡直就係罪過一宗!呢種小食外脆內軟,趁熱加埋香濃朱古力醬一齊食,滋味到極。馬德里市內幾乎間間 Café 都有賣西班牙油條,有啲舖頭仲會加埋 Dulce de leche (類似焦糖嘅醬汁)、朱古力或者忌廉,更添風味。

    其中,Chocolatería San Ginés 嘅油條同熱朱古力名震全市,佢位於太陽門廣場 (Puerta del Sol) 同德佩拉廣場 (Plaza de Ópera) 之間嘅巷仔入面,自 1894 年以嚟一直沿用相同食譜;而店家嘅朱古力醬係即點即製嘅,仲可以俾你加埋利口酒,創造獨特口味添!

    地點: Pasadizo de San Gines, 5, 28013 Madrid, Spain

    開放時間: 24 小時營業

    電話: +34 913 656 546

    地圖
    • 品嚐美食
    10

    融入丘埃卡嘅夜生活

    喺「同性戀友善」社區盡享歡樂 Party 氣氛

    丘埃卡 (Chueca) 位於馬德里 (Madrid),氣氛歡快,亦都係市內同性戀社區嘅所在地,周圍開咗唔少熱鬧酒吧、小酒館同夜店,仲會各種奇特變裝節目徹夜上演添!

    如果撞正 6 至 7 月嚟馬德里旅行,就千祈咪錯過一年一度嘅同性戀驕傲節 (Gay Pride Festival) 喇—到時,市內各個人氣區域都可以欣賞到盛裝巡遊同現場音樂表演,當中又以丘埃卡至為精彩,一年四季嚟玩都啱。

    地點: Plaza de Chueca, 33, 28004 Madrid

    地圖
    • 晚間娛樂
    11

    以佛朗明哥舞表演為一日劃上完美句號

    搵間佛朗明哥小酒館,欣賞西班牙最出名嘅舞蹈

    佛朗明哥舞 (Flamenco) 充滿活力,表演嗰陣會唱歌拍手,配合結他同響板一齊演奏。身處馬德里 (Madrid),佛朗明哥舞非常普及,市內大小劇院每星期幾乎日日都有盛大節目上演;

    佛朗明哥小酒館 (Tablaos) 嘅環境就比較悠閒舒適,你既可以欣賞才華橫溢嘅舞者表演,又可以大嘆美食。其中,Corral de la Morería 喺馬德里歷史最悠久,同時亦係人氣極旺嘅佛朗明哥舞殿堂,俾你一路睇 Show,一路試勻各式地道佳餚。

    地點: Corral de la Morería, Calle de la Morería 17, Madrid, Spain

    開放時間: 每日 18:30 至 01:30

    電話: +34 913 61 137

    • 伴侶
    • 家庭
    • 晚間娛樂
    Penny Wong | 旅遊常客

    開始計劃行程

    Maps