由藝術品、美食、足球到狂歡夜蒲,巴塞隆拿應有盡有,絕對算得上係完美度假城市,以精彩活動同繽紛景點吸引遊客紛紛湧至。舊城區 (Ciutat Vella) 同哥德區 (Gothic District) 嘅地標同樣開滿親民小店,滿載格拉西亞 (Gracia) 當地社區風情;想感受較為輕鬆嘅氣氛,可以去地中海海岸線上面嘅海灘,嗰度嘅海濱酒吧同海鮮餐廳仲會為你送上嘆到爆嘅溫暖夏夜添!

    巴塞隆拿貴為加泰隆尼亞首都,當地人都為自己嘅獨特身分自豪,由區內語言、印象派建築,以至極為外向、善於交際嘅文化裡面,已經可見一斑。

    巴塞隆拿最好玩嘅活動係乜嘢?

    1

    喺蘭布拉大道展開一日行程

    喺巴塞隆拿最靚、最熱鬧嘅旅遊區漫步

    呢條街道全長 1 公里,正正係巴塞隆拿 (Barcelona) 嘅旅遊中心,由北部嘅加泰羅尼亞廣場 (Plaça Catalunya) 一直伸延到南部嘅 Drassanes 車站,貫穿成個城市嘅核心地帶;而利塞奧大劇院 (Liceu Theatre) 地標大約就喺蘭布拉大街 (Las Ramblas) 嘅下半段,雲集購物、餐飲同街頭藝人表演等各式活動。街上固然五光十色,但係都要小心扒手,因為佢哋亦係呢個城鎮嘅「特色」之一!

    當地人成日埋怨蘭布拉大街嘅餐廳定價太高;之但係,喺觀賞節日慶祝活動之前,先嚟呢度飲杯咖啡或者卡瓦酒,又的確係賞心樂事喎!蘭布拉大街「旅遊味」重唔重?絕對唔輕!咁仲應唔應該嚟觀光?仲使問?快啲嚟行番轉啦!

    地圖
    • 伴侶
    • 家庭
    • 歷史文化`
    2

    探索哥德區

    參加徒步導賞團,探索小巷迷宮美景

    講到巴塞隆拿 (Barcelona) 最風光如畫嘅街區,一定要數哥德區 (Gothic Quarter)!呢度嘅鵝卵石街狹窄悠長,佈滿中世紀建築,充滿冒險樂趣;而公共廣場嘅商舖同餐館應有盡有,就算行足一日,都一定唔會悶。

    不妨搭地鐵去 Jaume I 站參觀巴塞隆拿大教堂 (Cathedral of Barcelona),然後再向東南面嘅皇家廣場 (Plaça Reial) 進發,喺公共廣場嘅妙趣 Café 同酒吧 hea 一陣!一心「血拚」嘅你,仲可以經 Calle Avinyo 直達哥德區 (Gothic Quarter),行勻一系列男女時尚服飾店。

    地圖
    • 伴侶
    • 歷史文化`
    3

    必遊景點:聖家堂

    喺市內最高嘅塔頂俯瞰巴塞隆拿

    呢座新藝術風格傑作係巴塞隆拿 (Barcelona) 最經典嘅地標,由極具影響力嘅藝術家高第 (Antoni Gaudi) 設計,始建於 1882 年,至今仍然未完工。雖然聖家堂 (Sagrada Familia) 日日都人頭湧湧,但係無損遊客細賞堂內堂外驚艷細節嘅雅興—當中,每個設計元素都具有宗教象徵意義,透過導賞團介紹,你就會清楚感受到箇中深義。

    先搭地鐵去聖家堂站,行幾個鐘之後再喺阿溫古達高第 (Avinguda Gaudi) 附近搵間 Café 坐吓,一邊飽覽教堂靚景,一邊嘆杯咖啡,絕對係賞心樂事!高第嘅影響力依然籠罩住呢座城市,喺聖家堂嘅高聳尖頂之下,就更加顯而易見。

    地點: Carrer de Mallorca, 401, 08013 Barcelona, Spain

    地圖
    • 伴侶
    • 家庭
    • 歷史文化`
    • 拍照
    4

    喺巴塞羅內塔海灘 Hea 返吓

    喺地中海暢泳

    如果你想欣賞地中海 (Mediterranean) 嘅海岸線,巴塞羅內塔海灘 (Barceloneta Beach) 可能係附近最方便、最受歡迎嘅海灘之一,由蘭布拉大街 (Las Ramblas) 行大約 20 分鐘就會到達,搭地鐵到巴塞羅內塔站 (Barceloneta) 行過嚟又得。

    呢個沙灘寬闊無際,全日都咁熱鬧,你可以租張躺椅曬吓太陽,又或者搵間 Chiringuitos (小型海濱餐廳) Hea 吓,享受午後陽光。海灘上仲有小販賣飲品、小食同沙灘裝備,難免會有少少嘈雜…如果你想搵個僻靜啲嘅好去處,不妨考慮遠少少嘅新伊卡利亞島海灘 (Nova Icaria Beach) 吖!

    地圖
    • 伴侶
    • 家庭
    • 拍照
    5

    去博蓋利亞市場掃街遊巿集

    巴塞隆拿最出名嘅市集

    呢個熱鬧非凡嘅食品巿場位於巴塞隆拿 (Barcelona) 嘅蘭布拉大街 (Las Ramblas) 上面,規模同受歡迎程度都冠絕全市!你可以喺度買到各種花多眼亂嘅新鮮生果同乾貨,仲有梗係唔少得場內主打嘅西班牙 Tapas 小食啦—趁肚仔餓餓哋,最啱大擦魷魚、大蒜蝦、芝士、醃肉等地道美食,再飲返杯卡夫桑格利亞汽酒 (cava sangria),就最幫助消化 (笑~)。

    朝早,博蓋利亞市場 (Mercat de la Boqueria) 嘅人群會比較少,氛圍更加地道,實屬遊覽好時機!溫馨提示:呢度除咗係旅遊勝地,都係當地人日日買餸嘅街市嚟架。

    地點: 西班牙巴塞隆拿 08001 蘭布拉大道 91 號

    開放時間: 星期一至六 08:00 至 20:30 (逢星期日休息)

    地圖
    • 伴侶
    • 家庭
    • 品嚐美食
    6

    探索高第嘅作品

    喺奇幻嘅桂爾公園漫步

    桂爾公園 (Park Güell) 原意係設計成城市花園,展示高第 (Antoni Gaudi) 極具象徵意義嘅超現實藝術品。呢個公園坐落喺山頂之上,可以將巴塞隆拿 (Barcelona) 嘅全景盡收眼底,園內洋溢高第嘅招牌 Style,當中包括色彩斑爛嘅馬賽克、寬闊嘅露台設計等等。每逢夏日,公園都生機盎然,唔少音樂家仲會喺陰涼嘅地方即慶表演添!嚟到冬季,呢度相對沉靜,但就依然散發住同城市繁忙街道截然不同嘅寫意感覺。

    一場嚟到,不妨去埋公園入面嘅高第故居博物館 (Gaudi House Museum) 參觀,了解吓呢位前瞻創作達人嘅生平吖!公園免費入場,部分景點酌量收費。

    地點: Gràcia, 08024 Barcelona, Spain

    開放時間: 每日 08:30 至 17:30 (夏季開放至 20:30)

    地圖
    • 伴侶
    • 家庭
    • 歷史文化`
    • 拍照
    7

    必遊景點:巴塞隆拿城市歷史博物館

    喺巴塞隆拿城市歷史博物館了解加泰羅尼亞歷史

    加泰羅尼亞 (Catalonia) 地區歷史悠久,係西班牙嘅自治區;而巴塞隆拿城市歷史博物館 (Barcelona City History Museum) 就會帶你「時光倒流」幾千年,認識羅馬人喺呢度建立嘅「Barcino」小鎮。講到博物館嘅焦點展品,又點可以唔提歐洲迄今發現最大規模羅馬定居地嘅出土文物?身處館內,你亦可以細賞古羅馬時期嘅古代墓室同陶瓷製品。

    博物館位於國王廣場 (Plaçadel Rei),而後者仲可能係市內保存得最完好嘅中世紀廣場添!如果你打算參觀埋其他博物館,不妨買張巴塞隆拿多日通行證,咁就可以免費參觀 20 幾間博物館喇。

    地點: Plaça del Rei, s/n, 08002 Barcelona, Spain

    開放時間: 每日 10:00 至 19:00

    電話: +34 932 56 21 00

    地圖
    • 伴侶
    • 家庭
    • 歷史文化`
    8

    喺地道酒窖用餐

    喺格拉西亞大道嘅酒窖同當地人一齊吃喝玩樂

    酒窖 (Bodega) 係巴塞隆拿 (Barcelona) 日常生活嘅重要一環,會賣桶裝葡萄酒同各種小食,相當貼地。前幾年,遊覽酒窖都可能「娘娘哋」,但近年又再「老土當時興」。

    大多數酒窖嘅規模都唔大,不妨隨意搵個窄窄哋嘅位,點杯葡萄酒,試埋當日黑板上面寫嘅 Tapas 推介小食—時日精選會係燜牛仔肉定係沙甸魚多士?冇所謂啦,反正款款都咁好味!巴塞隆拿周圍都有酒窖,但就以格拉西亞大道 (Gràcia) 住宅區周圍嘅小店最地道,而 Bar Bodega Quimet 都幾唔錯架,店內葡萄酒選擇多樣,特別出色。

    地點: Carrer de Vic, 23, 08006 Barcelona, Spain

    開放時間: 每日 10:00 至 00:00 (逢週末 16:30 至 18:30 休息)

    電話: +34 932 18 41 89

    地圖
    • 伴侶

    相片由 Kent Wang 提供 (CC BY-SA 2.0) 經修改

    9

    喺魯營球場睇巴塞隆拿足球會踢波

    為全球頂級球星吶喊助威

    巴塞隆拿足球會 (FC Barcelona) 既係傳奇球隊,亦都係呢座城市嘅靈魂,以「唔止係一間球會」作為座右銘,喺當地又有「紅藍軍團 (Blaugrana)」嘅稱號,皆因魯營球場 (Camp Nou Stadium) 喺 20 世紀中期法西斯獨裁者 General Franco 嚴厲統治期間扮演重要角色—當年,加泰羅尼亞語係違法語言嚟架 (Catalan),而呢個足球場就係當地人可以講加泰話嘅少數地方之一。

    時至今日,巴塞隊發展成全球寥寥可數嘅「超級球隊」之一,擁有配得上身分地位嘅體育館主場,每次比賽都吸引大約 10 萬個狂熱球迷嚟捧場,氣氛非常熱烈!高級區域嘅座位票價 EUR50 起;每逢重要比賽上演,特別係同勁敵皇家馬德里對戰嗰場,票格就會急劇上漲。如果你唔打算睇波,俾 EUR25 已經可以參觀球場同獎杯室架喇!

    地點: C. d'Aristides Maillol, 12, 08028 Barcelona, Spain

    電話: +34 902 18 99 00

    地圖
    • 家庭
    10

    由皇家廣場嘅夜店為一日行程畫上句號

    嚟公眾廣場嘅夜店盡情狂歡

    巴塞隆拿 (Barcelona) 係擅長 Party 嘅城市,大多數型格酒吧同熱舞夜店都集中喺哥德區 (Gothic Quarter) 嘅皇家廣場 (Plaça Reial)。由午夜開始,呢個公眾廣場越嚟越熱鬧,

    人氣熱點包括 Rei de Copes,可以俾你一邊睇靚景,一邊飲靚酒,再玩遍廣場附近嘅其他夜場。如果想睇現場音樂表演,不妨去 Jamboree 坐吓—呢間 Jazz Bar 02:00 點會化身 Hip Hop Club,氣氛熾熱到巔峰!鍾情佛朗明哥舞嘅話,點可以唔去 Los Tarantos 朝聖?只要乘搭地鐵去到利塞奧 (Liceu) 站,再向南沿住蘭布拉大街 (Las Ramblas) 直行,就會嚟到皇家廣場。

    地點: Plaça Reial, Gothic Quarter, 08002 Barcelona, Spain

    地圖
    • 晚間娛樂
    Paul Smith | 旅遊常客

    開始計劃行程

    Maps