馬德里 5 大最佳購物街

馬德里熱門購物區

    馬德里最出色嘅購物街都林立各種各樣嘅獨立小店同名牌商舖,貨色不拘一格。嚟得馬德里「血拚」,唔少人都最鍾意去掃名牌衫,而你仲可以用相宜價錢買到好多小玩意、珠寶做手信添!馬德里最受歡迎嘅購物街位於市中心同附近嘅薩拉曼卡區 (Salamanca District),位置便利,

    而且全年都有折扣優惠!之不過,要數最佳 Shopping 時節,就梗係一月至三月嘅冬季大減價,同埋七月至九月嘅夏季大減價啦。個別特定日子都會有其他優惠,好似 11 月最後一個星期五嘅「黑色星期五」咁,就係另一個「購物大吉日」。

    1

    格蘭大道

    位於馬德里市中心嘅高級購物街

    格蘭大街 (Calle Gran Vía) 位於市中心,全長 1.3 公里,人稱「西班牙百老匯」,同時亦都有「不眠街」嘅綽號,皆因街道兩邊遍佈劇院、戲院、餐廳同商舖,繁華璀璨,就連 H&M、Zara、Lacoste 等等世界頂級品牌都有喺度開設分店!呢條高檔購物街一向以建築特色著稱,仲有英格列斯百貨 (El Corte Inglés) 等各類大型百貨公司等你光臨。

    地點: Between Plaza de España and Calle de Alcalá, 28013 Madrid, Spain

    地圖
    • 購物

    相片由 Diriye Amey 提供 (CC BY 2.0) 經修改

    2

    普雷西亞多斯大街

    熱鬧嘅行人專用街

    普雷西亞多斯大街 (Calle de Preciados) 係一條步行街,位於格蘭大道 (Calle Gran Vía) 南面,全長 500 米,係馬德里 (Madrid) 市中心最活躍嘅購物街之一,貨色多姿多彩,有電子遊戲,又有男裝女裝;而各式小店、以至 FNAC 同英格列斯百貨 (El Corte Inglés) 等等嘅大型百貨公司同樣一應俱全。行到攰攰哋?普雷西亞多斯大街嘅前段開滿 Tapas 小食吧同餐廳,你喺喪買行程之間就可以唞返陣啦!

    地點: Between Plaza Santo Domingo and Puerta del Sol, 28013 Madrid, Spain

    地圖
    • 購物

    相片由 M.Peinado 提供 (CC BY 2.0) 經修改

    3

    塞拉諾街

    時尚免稅購物熱點

    塞拉諾街 (Calle de Serrano) 全長約 3 公里,位於市中心以北,南半段開滿人氣超旺嘅購物勝地,包括商場、手錶珠寶店、名牌店,仲有 Gucci、Louis Vuitton 等一眾國際奢侈品牌進駐,真正係購物天堂!與此同時,呢度亦都有唔少餐飲選擇,其中大部分落戶 Serrano 43 等大型購物中心裡面。呢條街啱哂你心水?遊覽馬德里 (Madrid) 期間,不妨揀喺薩拉曼卡區 (Salamanca District) 嘅住宿落腳吖!

    地點: 獨立廣場 (Plaza de la Independencia) 同阿根廷共和國廣場 (Plaza de la República Argentina) 之間;28006 Madrid, Spain

    地圖
    • 購物
    • 豪華住宿

    相片由 Luis García 提供 (CC BY-SA 3.0) 經修改

    4

    富恩卡拉爾街

    位於馬德里市中心嘅現代創新購物街

    富恩卡拉爾街 (Calle Fuencarral) 位於格蘭大道 (Calle Gran Vía) 同奎維多圓碑 (Monument to Quevedo circle) 之間,向北延伸 1,500 米,係一條以怪奇另類時尚品牌而聞名嘅現代購物街。身處街上,Diesel、Kipling 同 GI Joe 等知名品牌固然比比皆是,而呢度亦都有好多名氣唔大而才華超卓嘅時裝設計師進駐,仲有唔少紋身釘窿店、亞洲精品店同古樸 Café 餐館,充滿波希米亞風情。

    地點: 格蘭大道 (Calle Gran Vía) 同奎維多圓碑 (Monument to Quevedo circle) 之間;28004 Madrid, Spain

    地圖
    • 購物

    相片由 Luis García 提供 (CC BY-SA 3.0) 經修改

    5

    位於拉卡比拉街嘅埃爾拉斯特洛跳蚤市場

    馬德里最受歡迎嘅跳蚤市場

    埃爾拉斯特洛 (El Rastro) 係馬德里 (Madrid) 最受歡迎嘅跳蚤市場,逢星期日都會喺卡斯科羅廣場 (Plaza de Cascorro) 同附近街道架設,為你帶嚟真正馬德里體驗!身處場內,各式新舊貨品應有盡有,由潮爆衣飾、寵物、郵票以至電子產品…你諗得到嘅,喺呢度幾乎都搵得到。呢區氣氛熱鬧,周圍仲有唔少 Tapas 小食吧同酒吧,星期日食 Lunch 之前嚟行吓就最啱。溫馨提示:巿集有時比較人多擠迫,唔少扒手會「空群出動」,所以記得好好保管貴重財物,又或者將佢哋鎖喺酒店房仲安全啲。講到住宿喇喎,我哋誠意推薦你喺埃爾拉斯特洛跳蚤市場附近落腳。

    地點: 卡斯科羅廣場 (Plaza de Cascorro) 同拉卡比拉街 (Calle de la Ribera de Curtidores) 之間;28005 Madrid, Spain

    開放時間: 星期日 09:00 至 15:00

    地圖
    • 購物
    • 經濟實惠

    相片由 Alberto Salguero 提供 (CC BY-SA 3.0) 經修改

    Stephan Audiger | 旅遊常客

    開始計劃行程

    Maps