地中海最正嘅海灘,統統雲集於西班牙嘅太陽海岸 (Costa del Sol)—正因為咁,要精選馬貝拉頭幾位超卓海灘,絕對唔係 Easy job 啊!安達魯西亞地區 (Andalusia) 充滿豪華氣息,而馬貝拉特別貴氣,區內嘅遊艇碼頭泊滿奢華遊艇,豪華場所比比皆是,

    生活風格極盡豪氣,眾所周知;而當地好多海灘都反映出呢個地區特色,同時又各具獨特魅力,既有至潮至 In 嘅休憩勝地、Chiringuito (小型海濱餐廳) 林立嘅海灘,亦有綿延起伏嘅沙丘,同埋最尊尚高檔嘅海濱俱樂部。以下就係我哋心目中最正嘅馬貝拉海灘喇,埋嚟睇埋嚟揀 (笑~)!

    1

    阿拉卡特海灘

    海灘酒吧,花多眼亂

    阿拉卡特海灘 (Playa del Alicate) 位於馬貝拉 (Marbella) 東邊,面積唔算好大,但係絕對人氣高企!呢片海灘闊度只有大概 25 米,全長 850 米,岸邊嘅海灘酒吧堪稱安達盧西亞 (Andalusian) 海岸最多最齊;

    灘上沙質金黃粗糙,勝在踩落去軟綿綿,舒服到極,同太陽海岸 (Costa del Sol) 其他海灘如出一轍。之不過,由沙灘入海嘅路線陡峭,要小心啲行喎!阿拉卡特海灘配備太陽椅同太陽傘,俾遊客租用,仲有廁所、花灑沖身設施同埋水上運動器材租借處,貼心方便。

    地點: Urb.Los Monteros, 29603 Marbella, Málaga, Spain

    地圖
    • 拍照
    • 晚間娛樂
    • 經濟實惠
    • 遊歷

    相片由 Tyk 提供 (CC BY-SA 4.0) 經修改

    2

    邦蒂海灘

    至 Young 至 In 嘅聚腳點

    邦蒂海灘 (Bounty Beach) 又名賞金海灘 (Playa del Cable),跟住灘上一間出名酒吧而命名,不時吸引後生遊客過嚟,打吓排球、租吓腳踏船同獨木舟等等設施,玩返餐飽。每年夏天,海灘逢星期日仲會大搞 Party,熱鬧到爆!

    邦蒂海灘全長 1,300 米,闊 70 米,沙質柔軟細滑,仲有太陽椅俾遊客租用,廁所同花灑設施亦一應俱全。講到呢度嘅另一優點,梗係徒步抵達馬貝拉 (Marbella) 市中心嘅優越地理位置啦!

    地點: Camino Pescadores, Las Chapas, 29603 Marbella, Málaga, Spain

    • 拍照
    • 晚間娛樂
    • 經濟實惠
    3

    納格勒斯海灘

    「野生捕獲」明星

    納格勒斯海灘 (Playa Nagüeles) 位於馬貝拉 (Marbella)「黃金地帶 (Golden Mile)」,開滿全市最尊貴奢華嘅餐廳、海灘會所同酒店,絕對係「野生捕獲」明星名人嘅好地方!正因為咁,呢片海灘不時都好熱鬧,但都值得你嚟行番轉,租張太陽椅,曬吓日光浴嘅。

    一場嚟到,又點可以唔去試吓開正喺海灘度嘅 Trocadero Playa?呢間餐廳喺市內算係數一數二架!納格勒斯海灘每日都會有人清潔,你想像得到嘅設施一應俱全,既有救生員當值,亦有被浪潮緩緩沖入海嘅幼沙,啱哂一家大細嚟玩返日。

    地點: Urb.Marbella Country Club, 29602 Marbella, Málaga, Spain

    • 家庭
    • 拍照
    • 品嚐美食
    • 經濟實惠
    • 豪華住宿

    相片由 TimOve 提供 (CC BY 2.0) 經修改

    4

    巴努斯港海灘

    距離碼頭只得一步之遙

    巴努斯港海灘 (Playa de Puerto Banus) 又名「Playa de Levante」,位於馬貝拉 (Marbella) 西方嘅巴努斯港 (Puerto Banus) 度假勝地內,喺正度假區鼎鼎大名嘅碼頭隔籬,全長 1 公里,水深 50 米,沙質金黃幼細,所屬海岸受巨型防波堤保護,風浪不驚。呢片海域水淺浪靜,

    設施可以媲美人流密集嘅中央海灘,而且仲有季節性救生員當值,另設兒童遊樂場同夏季手工藝品市集,難怪吸引一家大細嚟玩啦!

    地點: Urb.Coral Beach, 29602 Marbella, Málaga, Spain

    • 家庭
    • 拍照
    • 經濟實惠

    相片由 Sachin 提供 (CC BY 2.0) 經修改

    5

    卡波皮諾海灘

    一應俱全嘅海灘

    卡波皮諾海灘 (Cabopino Beach) 坐擁優美嘅海岸線,喺正馬貝拉 (Marbella) 沿海一帶,一側鄰近卡波皮諾 (Cabopino) 港口,停泊咗好多豪華遊艇;另一側緊接阿爾托拉 (Artola) 沙丘,至啱鍾意「天體浸浴」嘅遊客。

    海灘全長 1,500 米,岸上嘅酒吧同「chiringuitos (海灘酒吧)」數之不盡,你隨時都可以飲番杯,或者食啲嘢醫肚。而且,呢度嘅泊車位充足,就算唔搭巴士,來往馬貝拉都唔使擔心。一場嚟到,租用各式各樣嘅水上運動器材玩返餐,又或者出發參加觀豚之旅,都係唔錯嘅選擇吖!

    地點: Autovía del Mediterráneo, 29604 Marbella, Málaga, Spain

    • 拍照
    • 晚間娛樂
    • 經濟實惠
    • 遊歷

    相片由 Konstantin 提供 (CC BY-SA 3.0) 經修改

    6

    豐塔尼拉海灘

    位於市中心嘅海灘

    豐塔尼拉海灘 (Playa de la Fontanilla) 係馬貝拉 (Marbella) 最熱鬧嘅市區海灘之一,行路就可以直達市中心,因而被譽為「市中心最佳海灘」,吸引當地人同遊客湧至,仲成為咗大家心目中嘅理想度假勝地添!

    除咗地理位置優越,豐塔尼拉海灘嘅設施就梗係百分百完善啦,廁所、花灑一應俱全,有太陽椅俾遊客租用,玩樂活動數之不盡,亦都有救生員當值。玩到日落西山,係時候向海濱大道 (Paseo Marítimo) 進發,行勻街道兩邊嘅餐廳、酒吧同商舖!

    地點: Paseo Marítimo, 29602 Marbella, Málaga, Spain

    • 購物
    • 拍照
    • 品嚐美食
    • 晚間娛樂
    • 經濟實惠

    相片由 Cabeza2000 提供 (CC BY-SA 4.0) 經修改

    7

    赫莫薩海灘

    麻雀雖小,五臟俱全

    赫莫薩海灘 (Playa Hermosa) 唔算好大,都依然值得推薦,皆因佢同科斯塔貝拉海灘 (Costabella Beach) 相連,但就安全好多,風平浪靜,相對淺水,係一家大細嘅人氣選擇。海灘上面亦有好多酒吧、餐廳同「chiringuitos (海灘酒吧)」,就算你玩到肚仔扁哂,都唔驚餓親,盡情 Hea 足一日都仲得!

    赫莫薩海灘超級乾淨,廟所設施齊全,附近仲有得租借腳踏船同其他水上運動器材,叫得「Hermosa (美麗)」,絕對名副其實。

    地點: Calle Playa Hermosa, 29604 Marbella, Málaga, Spain

    地圖
    • 家庭
    • 拍照
    • 品嚐美食
    • 經濟實惠

    相片由 Estrategy 提供 (CC BY-SA 3.0) 經修改

    8

    阿爾托拉海灘

    同大自然融為一體

    阿爾托拉海灘 (Playa de Artola) 同卡波皮諾海灘 (Cabopino Beach) 相連,背靠沙丘,坐擁豐富嘅自然風光。而海灘所屬嘅阿爾托拉沙丘 (Dunas de Artola) 劃為保護區,亦令佢成為我哋嘅推薦名單上唯一冇商舖、餐廳同酒店嘅名勝,帶俾你同大自然融為一體嘅感受,遊客仲可以試吓「天體」浸浴添!

    阿爾托拉海灘一直以環境乾淨、設備齊全見稱,獲得「藍旗 (Blue Flag)」認證。如果你想為「海灘之行」加添歷史元素,不妨順便去埋小型停車場隔籬歷史悠久嘅盜賊塔 (Torre Ladrones) 看台參觀吖!呢座塔源自羅馬時期,而家已經列為文化景點 (Site of Cultural Interest) 之一。

    地點: Urb.Cabopino, 29604 Marbella, Málaga, Spain

    地圖
    • 歷史文化`
    • 拍照
    • 經濟實惠

    相片由 Olaf Tausch 提供 (CC BY 3.0) 經修改

    9

    維博拉海灘

    Nikki Beach Marbella 尊貴體驗

    維博拉海灘 (Playa de la Vibora;意思係「毒蛇海灘」) 景色怡人,相對寧靜,幼細沙面鋪咗鵝卵石,仲有棕櫚樹輕輕搖曳。之但係,講到呢條 850 米長海岸線最出名嘅地方,又點可以唔提極尚尊貴嘅 Nikki Beach Marbella 海灘會所?嗰度嘅會員個個非富則貴,名氣響噹噹。

    你都想融入「名人圈」?咁就要嘆個豐盛午餐,喺池邊飲返杯香檳,又或者洗幾百歐羅租張白色軟墊太陽椅,攤喺度 Hea 到盡喇!想慶祝特別日子又好,想單純無拘無束咁度個假都好,維博拉海灘同樣啱哂你。

    地點: Carretera de Cádiz, km 192, 29604 Marbella, Málaga, Spain

    • 拍照
    • 品嚐美食
    • 晚間娛樂
    • 經濟實惠
    • 豪華住宿
    10

    薩拉戈薩皇家海灘

    遠離煩囂

    毫無疑問,薩拉戈薩皇家海灘 (Playa Real de Zaragoza) 嘅面積同質素都係區內數一數二,點可以唔去行番轉?呢個海灘位處馬貝拉 (Marbella) 稍為偏遠嘅地區,沙質柔滑,幅員廣闊,

    全長大約 1,700 米,闊 30 米,隱世秘境多籬籬,附近仲有唔少食肆添!而海灘本身有齊遊客所需設施,包括花灑同廁所等等,夏天亦都有救生員當值。喺度租張太陽椅同太陽傘,只需大概 EUR5,比起隔籬嘅 Nikki Beach Marbella 平一大截!

    地點: Urb.Real de Zaragoza, 29604 Marbella, Málaga, Spain

    地圖
    • 伴侶
    • 拍照
    • 品嚐美食
    • 經濟實惠
    Sadie Geoghegan-Dann | 特約撰稿人

    開始計劃行程

    Maps