首爾 10 大最佳當地餐廳

土俗村 (Tosokchon) 因為招牌菜人參雞湯 (samgyetang) 出晒名，而呢款靚湯係夏天最受歡迎嘅韓國菜之一。呢間餐廳距離景福宮站 10 分鐘路程，亦係韓國已故總統盧武鉉最鍾意嘅食店，難怪成為首爾地標。

土俗村嘅人參雞湯全部都用慢火熬製好多個鐘，帶有甜味同堅果香氣；湯裡面有一隻雞齡唔超過 49 日嘅春雞，裡面塞滿栗子、大蒜、乾棗、人參、糯米同銀杏果仁，口味正爆。除咗呢道招牌菜，土俗村仲有烤雞 (tongdak)、海鮮蔥餅 (hae-mool pajeon) 同紅燒香辣安康魚 (agu-jjim) 等菜式，任君選擇。

自從 1960 年以嚟，高麗參雞湯 (Goryeo Samgyetang) 地道餐廳一直供應優質人參雞湯 (samgyetang)，佢距離市政廳地鐵站 10 號出口只有約唔多 2 分鐘路程，非常方便。身處店裡面，您仲可以品嚐到好多傳統韓式料理，例如高麗烤雞 (goryeo tongdak) 同鮑魚米粥 (jeonbok-juk) 等等。

人參雞湯用全雞配搭棗、大蒜、糯米同各種韓國藥材燉煮而成，既美味滋養，又有助煥發活力。高麗參雞湯餐廳只會用喺錦山生長嘅人參、同埋嚟自當地農場嘅 7 週齡靚雞入菜，品質上乘。

明洞河東館 (Hadongkwan Myeongdong) 係首爾最受歡迎嘅午餐熱點，主打牛尾湯 (gomtang) 同煮牛肉片 (suyuk)。河東館創喺 1930 年代，從清溪川附近一條安靜嘅小巷，搬到繁華熱鬧嘅明洞區。

只要比大約 KRW10,000，您就可以大大啖食韓式牛肉片同優質泡菜 (kimchi)，而湯水同泡菜汁仲可以免費添飲添食。明洞河東館用晒 D 食材果時就會休店—所以如果想喺逗留首爾期間享用牛尾湯，記得要早 D 嚟啦！

自從 1946 年以嚟，首爾人經常蜂擁到又來屋 (Woo Lae Oak)，品嚐平壤風格美味冷麵 (naengmyeon)。呢道傳統韓式料理採用蕎麥、馬鈴薯或蕃薯粉製作成手工幼麵，放入加咗青瓜絲、韓國梨片、烚雞蛋同冷煮牛肉片嘅冰冷濃湯裡面，口味清爽。

又來屋仲供應各種美味佳餚，例如辣燉肉 (yukgaejang)、韓式烤肉片 (bulgogi) 同韓式烤排骨 (galbi)；佢坐落喺舟橋洞一條安靜嘅小巷，遊客坐地鐵去乙支路 4 街站 (地鐵 2 號線或 5 號線)，喺 4 號出口出，就可以到果度。

清進屋 (Cheongjinok) 創喺 1937 年，係一間家族經營餐廳，主打解酲湯 (haejangguk)—呢款窩心嘅牛肉湯將牛血同大量蘿蔔、大白菜乾、牛肉內臟、豆芽同大醬 (doenjang) 一齊燉製而成，又叫「宿醉燉菜」，價錢大約 KRW7,000，配搭米飯同泡菜 (kimchi) 享用，特別暖心滋味。

清進屋另外亦供應煮牛肉片 (suyuk)、各款韓式蔥餅 (pajeon)、香煎菜肉餅 (donggeurang-ttaeng) 等菜式；飲料方面就有燒酒 (soju)、啤酒、百歲酒 (baekseju；即糯米酒) 同覆盆子酒 (bokbunjaju；即黑莓酒) 等，選擇超多。

安東莊 (Andongjang) 自從 1948 年開始營業，供應價錢實惠嘅中韓美食；佢距離乙支路 3 街站 (地鐵 2 號線，10 號出口) 5 分鐘路程，招牌菜式多到數唔到，價錢從 KRW8,000 起。

其中必試美食包括辣湯麵 (juljjamppong)、炸醬麵 (jajangmyeon；即係小麥麵條配生青瓜片、黑豆醬、豬肉粒同蔬菜)，同埋糖醋肉 (tangsuyuk；即係炒豬肉條配蘋果味糖醋醬)。

如果您喺正首爾搵緊美味嘅牛肋骨 (galbi-jjim)，就一定唔可以錯過마시찜 (Masizzim) 餐廳—呢間餐廳喺江南區，感覺時尚，用咗精簡木製傢俱做裝飾、溫暖燈光同簡約裝飾，非常適合想喺現代環境享受一下傳統韓式美食嘅旅客。

店裡面其他招牌菜式包括蔬菜燉牛肋骨同蔬菜燉排骨；另外仲提供好多款配菜，例如辣麵、米湯、薯餅、炒飯同蒸蛋等。

고래불 (Goraebul) 係江南區嘅正宗韓國餐廳，專門供應生海鮮菜式，只會喺慶尚道嘅同名沿海地區採購最新鮮食材，炮製鯨魚、鮑魚、紅鯛魚、龍脷魚、生蠔、海膽、章魚、比目魚同半乾太平洋鯡魚 (gwamegi) 等生食妙品。

店內氛圍安靜舒適，仲有幾間私人廂房，專為情侶提供服務。溫馨提示：雖然呢間店嘅食物同服務都超正，但就只有韓文菜單，而且工作人員都不太識講其他語言。

노랑저고리 (Norang Jeogori) 係韓式套餐餐廳，喺傳統嘅環境裡面供應民俗風味菜式；佢喺正江南區，您可以一次過享用包括各款傳統美食嘅全餐。

套餐價錢由 KRW20,000 起，美食包括飯饌泡菜 (banchan)、蔥油煎餅、粥、炒粉絲、魚生、煮牛肉片 (suyuk)、韓式烤肉片 (bulgogi)、米飯、大醬湯 (doenjang jigae) 同鯖魚燉湯。

當地人都鍾意到釜山食堂 (Busan Sikdang) 享用套餐 (baekban)，一次過食晒米飯、湯或燉菜，同埋配菜。其他出名菜式包括冷蒸大白菜配發酵大豆、青瓜配辣椒片、醬油蟹、綠豆芽同小蘿蔔泡菜。

溫馨提示：餐點都喺即叫即製，您可能需要等大約 20 分鐘，先至可以享用美食。釜山食堂亦因為辛香惹味嘅胡椒魚湯 (pollock maeuntang) 而馳名，係當地人勁飲韓式燒酒 (soju) 之後嘅熱門解醉良方。