首爾無疑係個購物天堂,當地最佳嘅購物熱點唔只有購物商場,散落市中心各處嘅多個區域都係購物好去處。一於預留幾個鐘,盡情搜購時裝、電子產品、各種配件、珠寶首飾、皮具、美容產品、藝術工藝品同古董。

    首爾一啲熱門嘅購物區設有適合親子同遊嘅景點,例如水族館、博物館、劇院、畫廊同主題公園。你仲可以順便欣賞 Fashion Show、藝術展覽、文化慶典同音樂會。不妨參考呢份首爾最佳購物體驗清單,由購物商場、百貨公司,以至精品店同街頭市場都一網打盡!

    如果你打算喺逗留首爾期間盡情掃貨,咁就一一定唔可以錯過明洞 (Myeong-dong) 喇!明洞係韓國嘅主要購物區之一,有幾十間百貨公司、購物商場同街鋪。

    人氣商品包羅萬有,無論係本地品牌定係國際品牌嘅衣服、鞋具、飾品、珠寶同手袋,價錢都相當抵買,銷售韓國化妝品同護膚品嘅商店更加超過 1,000 間!明洞市場亦有觀光景點,標誌性地標包括明洞天主教大教堂 (Myeongdong Catholic Cathedral) 同明洞亂打劇場 (Myeongdong Nanta Theatre)。

    閱讀更多資訊

    位置: 83-9 Myeong-dong, Jung-gu, Seoul, South Korea

    開放時間: 每日 10:00 至 22:30 (營業時間因應商店而異)

    地圖
    2

    東大門市場

    東大門市場 (Dongdaemun Market) 係韓國最大嘅批發同零售購物區之一,區內有大約 26 間購物商場、30,000 間專賣店同 50,000 間製造商。商品範圍由紡織品、衣服、鞋具、珠寶首飾,以至皮具、玩具、電子產品同辦公室用品,都一應俱全。

    東大門市場嘅吃巷子 (Mukja Golmok) 美食街係專賣韓國街頭美食同小食嘅一條巷,吸引大量美食達人潮聖。購物區到深夜都一直非常熱鬧,入夜後仲會舉行慶祝活動、Fashion Show、音樂同舞蹈表演等。

    位置: Euljiro 6(yuk)-ga, Jung-gu, Seoul, South Korea

    3

    弘大

    弘大 (Hongdae) 以年輕嘅氛圍、地下文化同自由自我嘅風格而聞名,當地有好多 Cafe、畫廊、時裝店、Live bar 同 Club。附近弘益大學 (Hongik University) 嘅一眾當地年輕人同學生都係嗰度嘅常客。想選購手工服裝或名貴商品,當地亦有唔少商店任君選擇。

    弘大最吸引人嘅地方,當然係週末 13:00 至 18:00 舉行嘅「自由市場」!當地藝術家同手工匠人都會雲集呢度,展示佢哋嘅手作工藝品、飾品、畫作同二手商品,你仲可以即場欣賞舞蹈表演、文學展覽、文化活動、街頭表演同節日慶典。

    位置: Hongdae, Mapo-gu, Seoul, South Korea

    開放時間: 每日 09:00 至 00:00 (營業時間因商店而異)

    地圖

    相片由 Ken Eckert 提供 (CC BY-SA 4.0) (經修改)

    4

    明洞樂天百貨

    明洞嘅樂天百貨 (Lotte Department Store) 商品琳瑯滿目,由服裝、飾品、珠寶、美容產品、傢俱、電子產品到運動器材都應有盡有,而且更設有免稅店同埋畫廊,仲有供應各式地道同環球佳餚嘅美食廣場。

    你甚至可以安排將買到嘅戰利品直送機場,極之方便。呢間百貨仲同首爾樂天酒店 (Lotte Hotel Seoul) 直接相連,方便住客享受明洞一日遊。

    位置: 81, Namdaemun-ro, Jung-gu, Seoul, South Korea

    開放時間: 星期一至星期五 10:30 至 20:00;星期六至星期日 10:30 至 20:30

    電話: +82-2-772-3008

    地圖

    相片由 MD111 提供 (CC BY-SA 2.0) (經修改)

    5

    狎鷗亭

    狎鷗亭 (Apgujeong) 係首爾嘅富商名流買名牌嘅購物區。呢個高檔地區又稱狎鷗亭路 (Apgujeongp-ro),街道兩旁都係美容診所、百貨公司、名貴精品店同購物商場。

    呢區雲集多個國際名牌,包括 Goyard、Valentino 同 Saint Laurent,全部都位於 Galleria 購物商場。狎鷗亭羅德奧街 (Apgujeong Rodeo) 係整容手術同美容療程嘅集中地,同時亦設有唔少高檔 Cafe 同高級餐廳。

    位置: Apgujeong-dong, Gangnam-gu, Seoul, South Korea

    開放時間: 每日 10:00 至 22:30

    電話: +82-2-3445-0111

    地圖
    6

    Starfield COEX 購物商場

    Starfield COEX 購物商場內有超過 300 個品牌,由時裝同美容以至電子產品同各式娛樂都應有盡有。Starfield 圖書館 (Starfield Library) 係購物商場內嘅必到景點。13 米高嘅書架上擺放住超過 50,000 本刊物。

    小朋友可以喺 Bricklive 中心玩五顏六色嘅 Lego。每位兒童 (1 歲及以上) 嘅入場費大約 WRW10,000,每位成人約 WRW5,000。COEX 水族館 (COEX Aquarium) 位於地庫樓層,內有 650 幾種海洋野生動物。

    位置: 513, Yeongdong-daero, Gangnam-gu, Seoul, South Korea

    開放時間: 每日 10:30 至 22:00 (營業時間因商店而異)

    電話: +82-2-6002-5300

    地圖

    相片由 Hyerimwon 提供 (CC BY-SA 4.0) (經修改)

    7

    梨泰院

    梨泰院 (Itaewon) 有 100 幾間專營進口時裝名牌、皮具、手袋、鞋具、紀念品同古董嘅商店,呢度銷售嘅服裝尺碼範圍極廣,當地裁縫仲可以提供度身訂造服務。

    梨泰院嘅獨特之處在於豐富嘅美食選擇,首爾漢米爾頓酒店 (Hamilton Hotel Seoul) 後面嘅街道有好多國際餐廳、酒吧同 Club。梨泰院又有「首爾特別旅遊區」之稱,你可以喺呢度盡情品嚐環球美食,包括希臘、巴基斯坦、意大利、印度、泰國、中國、澳洲、法國同墨西哥等地嘅菜式。

    位置: 梨泰院, 首爾, 韓國

    地圖

    相片由 Rodrigo.Argenton 提供 (CC BY 3.0) (經修改)

    8

    Mecenatpolis 購物商場

    Mecenatpolis 購物商場毗鄰合井 (Hapjeong) 車站,係一個露天購物商場。呢度有活力十足嘅公共空間、層級陽台、玻璃橋、獨特嘅水景同天台花園,難怪會成為人氣攝影勝地!

    當然亦唔好錯過呢度嘅快餐連鎖店、Cafe,同埋高檔或親民風格嘅餐廳,呢啲餐廳會喺戶外環境中為你供應各式當地同環球美食。你仲可以喺露天花園參與各種活動,包括藝術展覽、文化慶典同音樂表演。

    位置: 45 Yanghwa-ro, Hapjeong-dong, Mapo-gu, Seoul, South Korea

    開放時間: 每日 10:00 至 00:00 (營業時間因商店而異)

    電話: +82-2-2269-7178

    地圖

    相片由 travel oriented 提供 (CC BY-SA 2.0) (經修改)

    9

    仁寺洞

    仁寺洞 (Insa-dong) 係個活力四射嘅地區,沿巷有幾十間古董店、傳統茶館同書店。區內亦有大約 100 間畫廊,吸引好多對韓國傳統美術感興趣嘅人慕名而至。當中熱門景點包括展出民俗藝術嘅學古齋美術館 (Hakgojae Gallery),仲有陳列全國各地新晉藝術家作品嘅 Gana Art Gallery 藝術中心。

    不妨盡情選購地道商品同紀念品,將韓服 (民俗服飾)、韓紙 (傳統紙張)、藝術品、復古玩具、陶器同民間工藝品等都通通入手!每逢週末,仁寺洞嘅主要大街都會劃作行人專用區。喺你遊覽仁寺洞期間,記得欣賞一下古典音樂會同藝術展覽,同埋盡情享受韓國街頭美食。

    位置: 62, Insadong-gil, Jongno-gu, Seoul, South Korea

    地圖
    10

    高速巴士客運站地下街

    高速巴士客運站地下街 (Goto Mall) 係連接高速巴士客運站 (首爾地鐵 3、7、9 號線) 同盤浦 (Banpo) 站 (首爾地鐵 7 號線) 嘅地下購物中心。當中商店嘅目標顧客通常係 20 至 40 歲嘅女性,商品由書籍同化妝品到飾品、珠寶同手袋背嚢都包羅萬有。

    高速巴士客運站地下街仲設有餐廳同 Cafe,同埋播放最新電影嘅戲院。你仲可以參觀附近嘅景點,例如新世界百貨 (Shinsegae Department Store)、盤浦漢江公園 (Banpo Hangang Park) 同盤浦橋彩虹噴泉 (Banpo Bridge Rainbow Fountain)。

    位置: Jiha 200, Sinbanpo-ro, Seocho-gu, Seoul, South Korea

    開放時間: 每日 10:00 至 22:00

    電話: +82-2-535-8182

    地圖
    11

    Galleria 百貨公司

    Galleria 百貨公司係選購優質同名牌商品嘅好去處,位於首爾數一數二最高檔嘅購物街,即係狎鷗亭羅德奧街 (Apgujeong Rodeo Street)。

    Galleria 各式商品都應有盡有,由鞋具、手袋背嚢、飾品到大牌設計師嘅運動裝備同服裝,你統統都可以搵到。呢度嘅商品價格偏高,話唔定可以撞到首爾嘅富商名人嚟購物!

    位置: 343, Apgujeong-ro, Gangnam-gu, Seoul, South Korea

    開放時間: 每日 10:30 至 20:00

    電話: +82-2-3449-4114

    價格: Varies depending on the items selected

    地圖

    相片由 yusunkwon 提供 (CC BY-SA 2.0) (經修改)

    12

    廣藏市場

    廣藏市場 (Gwangjang Market) 係個買綢緞、絲製品、紡織品、亞麻床單、手工藝品同傳統服裝嘅好地方。呢個室內市場共有超過 5,000 間商店,銷售嘅雖然唔係名牌商品,但價廉物美。

    一樓劃為食檔同餐廳專區,等你喺購物之餘,都可以享用正宗韓式料理;二樓就有幾間裁縫店,專賣手工製作嘅韓服 (韓國民俗服裝),售價合理。

    位置: 88, Changgyeonggung-ro, Jongno-gu, Seoul, South Korea

    開放時間: 每日 08:30 至 23:00 (營業時間因應商店而異)

    地圖

    相片由 ChongDae 提供 (CC BY-SA 3.0) (經修改)

    13

    南大門市場

    南大門市場 (Namdaemun Market) 係韓國最人頭湧湧嘅市場之一。呢個傳統市場以首爾嘅大南門 (Great South Gate) 命名,而南大門就係呢個古代城市嘅主要大門。你可以用非常平嘅價錢,選購優質嘅皮具、服裝、工藝品、進口商品、器皿、電子產品同傳統東方藥物。

    日頭當地人會嚟買雜貨同家居用品,不過到咗每晚 23:00 到 04:00,南大門就會搖身一變,成為熱鬧嘅夜市。

    位置: 21, Namdaemunsijang 4-gil, Jung-gu, Seoul, South Korea

    開放時間: 每日 10:00 至 04:00

    地圖

    相片由 Adrián Pérez 提供 (CC BY-SA 2.0) (經修改)

    14

    首爾傳統跳蚤市場

    首爾傳統跳蚤市場 (Seoul Folk Flea Market) 喺黃鶴橋 (Hwanghakgyo Bridge) 同新設洞 (Sinseol-dong) 站一帶,攤檔共有 900 幾個,吸引一眾古董收藏家去尋寶。無論係裝飾寶石、玩具、手動打字機定係地道瓷器,呢度幾乎都一應俱全,睇你好唔好彩搵到心頭好!如果你對二手商品同平價貨有興趣,咁就絕對唔可以錯過首爾傳統跳蚤市場喇!

    位置: 21, Cheonho-daero 4-gil, Dongdaemun-gu, Seoul, South Korea

    開放時間: 每日 10:00 至 19:00 (每月第 2 和第 4 個星期二休息)

    電話: +82-2-2232-3367

    地圖

    相片由 Republic of Korea 提供 (CC BY-SA 2.0) (經修改)

    15

    通仁商店

    通仁商店 (Tong-In Store) 係專賣傳統工藝品、服裝同書籍嘅購物商場。呢座商場位於仁寺洞街 (Insa-dong Street),坐擁韓國一啲最優質嘅工藝品同古董店。你仲可以買到正宗嘅韓國服裝,而且價格通常都比市內大多數服飾店平。呢度亦有售賣古董工藝品、民俗繪畫同珍貴書籍,但你只可以以拍賣嘅形式競投。

    位置: 32, Insadong-gil, Jongno-gu, Seoul, South Korea

    開放時間: 每日 10:00 至 19:00

    地圖
    16

    龍山電子市場

    龍山電子市場 (Yongsan Electronics Market) 係擁有約 3,000 間電子產品商店嘅批發商場,呢度有各種各樣嘅電子產品,包括辦公設備、數碼相機、電腦、電子遊戲同 DVD 等。你可以喺某啲商店試吓自己嘅講價技巧,嘗試以最抵價錢買入心頭好,呢度嘅價格比首爾嘅大多數零售店平約 15% 至 30%。

    位置: 15-2 Hangangno 2(i)-ga, Yongsan-gu, Seoul, South Korea

    開放時間: 星期一至五 10:00 至 19:30;星期六至日 10:00 至 20:00 (營業時間因商店而異)

    電話: +82-2-707-4700

    地圖
    17

    D-Cube City 購物商場

    D-Cube City 購物商場係同名綜合大樓嘅一部分,同新道林 (Sindorim) 站相連,可直達首爾地鐵 (1 號線同 2 號線),去首爾嘅衛星城市安山 (Ansan)、水原 (Suwon)、仁川 (Incheon) 同埋富川 (Bucheon)。

    D-Cube City 嘅「韓國市場街」係仿照韓屋 (韓國傳統民房) 設計嘅美食廣場,內設幾十個攤檔,以親民價格供應韓國料理。除咗購物之外,你仲可以喺 D-Cube 劇院同 Space Sindorim 劇院欣賞戲劇、音樂劇同展覽,小朋友更可以喺 Pororo 主題公園玩盡各種有趣嘅遊樂設施同遊戲!

    位置: 662 Gyeongin-ro, Sindorim-dong, Guro-gu, Seoul, South Korea

    開放時間: 星期一至星期五 11:00 至 21:30;星期六至星期日 11:00 至 22:00

    地圖
    Penny Wong | 旅遊常客

    開始計劃行程

    新型冠狀病毒肺炎 (COVID-19) 旅遊提示

    指南中推薦的景點和體驗可能會受到影響,出發前請先查閱當地指引。

    返回頁首

    Maps