濟洲 15 大最好玩嘅活動

濟州最出名嘅係啲嘜嘢?

    濟州島喺韓國南部嘅韓國海峽岸邊,島上有好多博物館、探險景點同仲未開發嘅純樸地區,每年吸引嚟自世界各地嘅大批旅客蜂擁嚟到呢度,特別係日本同其他泛亞國家/地區嘅遊客,更係數都數唔到咁多。濟州仲有國際機場,連接韓國大陸同附近其他國家,使到呢座海島同全世界各地都保持緊密聯繫。

    濟洲島有溫和嘅亞熱帶氣候,一年四季都適合到處旅遊。鍾意戶外活動嘅朋友可以喺逗留期間玩個痛快,由走到韓國最高嘅山峰、到觀賞海邊日出日落嘅壯麗景色,種種活動都應有盡有。

    1

    天地淵瀑布 (Cheonjiyeon Waterfall)

    天地淵瀑布 (Cheonjiyeon Waterfall) 係濟州最出名嘅瀑布之一,意指「天與地之間嘅聯繫」。區內有一條風景優美嘅小徑,可以直通瀑布;如果喺夜晚遊覽嘅話,你仲會見到岩石結構上面亮著燈光,璀璨耀眼。

    呢道 22 米高嘅瀑布由主瀑布區湧出水流,之後分成幾條比較細嘅小溪,河水湧入由 2 個水壩仔形成嘅人工水池裡面,水花就唔會溢出喇。

    地點: 韓國濟州島西歸浦泉旨洞

    • 伴侶
    • 家庭
    • 經濟實惠
    2

    民俗自然史博物館

    民俗自然歷史博物館分為 4 個展廳,涵蓋民俗、歷史、自然同特殊資源等主題,為你送上了解濟州舊史嘅絕佳途徑。館內展出海島上面發現嘅動植物仿製品,另外仲有展廳,作為視聽室用途。

    地點: 韓國濟州島濟州市三成路 40 號

    開放時間: 6 月至 8 月:每日 08:30 至 19:00。9 月至 5 月:每日 08:30 至 18:30

    • 家庭
    • 歷史文化`

    相片由 karendotcom127 提供 (CC BY 2.0) 經修改

    3

    濟州民俗村博物館

    濟州民俗村博物館盡展島上豐富嘅文化遺產同民俗特色,佔地超過 150,000 平方米,裡面有大約 117 間傳統房屋,陳列眾多文物,當中包括數以千計嘅民間用品,用木、鐵同竹製成。

    你可以借用語音導賞機,了解韓國歷史、文化同信仰知識。如果要行勻哂濟州民俗村博物館嘅各個專區,大約需要 4 個鐘。

    地點: 韓國濟州島西歸浦表善面民俗海岸路 631-34

    開放時間: 每日 08.30 至 18:00

    電話: +82 64-787-4501

    • 歷史文化`

    相片由 anokarina 提供 (CC BY-SA 2.0) 經修改

    4

    哦!雪綠茶博物館 (Osulloc Tea Museum)

    哦!雪綠茶博物館 (Osulloc Tea Museum) 好適合有意了解韓國茶藝傳統嘅旅客參觀。呢座展館同「哦!雪綠西廣茶園 (Seogwang Tea Planation)」對望,而後者嘅歷史可以追溯到 1979 年。館內展廳有展出朝鮮王朝嘅茶具同文物;另外仲設有工作坊,講解種茶、包裝同綠茶供應鏈嘅各個工序。

    而你亦都可以喺禮品店買手信,再喺博物館嘅瞭望台欣賞濟州郊區美景。行到餓餓哋,哦!雪綠茶博物館有供應各種小食同飲品,包括綠茶雪糕、蛋糕同茶 Latte,你一定可以大快朵頤啦!

    地點: 韓國濟州島西歸浦市安德面神話歷史路 15 號

    開放時間: 每日 09:00 至 18:00

    電話: +82 64-794-5312

    • 伴侶
    • 家庭
    5

    濟州島泰迪熊博物館

    濟州泰迪熊博物館係全球少數允許遊客買展品嘅博物館之一,館內陳列咗世界上最獨特嘅啤啤熊—揀啱心水展品?咁就要即場購買,增加個人珍藏喇!

    泰迪熊博物館以遊客同外國收藏家為主要客路,喺呢方面表現都唔錯,成日吸引到注重博物館嶄新概念嘅旅客慕名而來。濟州泰迪熊博物館嘅入場費大約係每位成人 KRW10,000,每位兒童 KRW8,000。

    地點: 韓國濟州島西歸浦西烘洞 2889 號

    開放時間: 6 月至 8 月:每日 09:00 至 22:00。9 月至 5 月:每日 09:00 至 19:00

    電話: +82 64-738-7600

    • 伴侶
    • 家庭
    6

    萬丈窟 (Manjanggul Lava-Tube Cave)

    萬丈窟 (Manjanggul Lava-Tube Cave) 係聯合國教科文組織世界文化遺產,全長 7 公里,當中只有 1 公里向公眾開放。呢啲地道由區內歷年火山活動衍生出嚟,裡面某啲部分嘅高度更加係達到 23 米!

    萬丈窟係數一數二嘅人氣地標,你可以由舊西歸浦巴士總站搭巴士過嚟,車程大約需要 2 個鐘;落車之後再行多 30 分鐘,就會嚟到萬丈窟。

    地點: 韓國濟州島濟州市萬丈窟街 182 號

    開放時間: 每日 09:00 至 18:00 (每月第一個星期三休息)

    電話: +82-64-710-7905

    • 伴侶
    • 歷史文化`

    相片由 Laurie Nevay 提供 (CC BY-SA 2.0) 經修改

    7

    如美地植物園 (Yeomiji Botanical Garden)

    如美地植物園 (Yeomiji Botanical Garden) 位於中文度假村裡面,由一棟室內場館同埋好多個展廳組成,展示不同類型嘅植物,由仙人掌、熱帶水果、睡蓮到各種花卉等等,一共珍藏咗大約 2,000 種珍稀植物同 1,700 種繁花樹木。呢個花園佔地 1,100 平方米,一向被譽為全亞洲環境最優美、修整最完善嘅室內花園之一。

    地點: 韓國濟州島西歸浦西烘洞中文觀光路 93 號

    開放時間: 每日 09:00 至 18:00

    電話: +82 64-738-3828

    • 伴侶
    • 家庭
    • 拍照

    相片由 A____ R__ 提供 (CC BY-SA 2.0) 經修改

    8

    潛水艇之旅

    濟州係位於朝鮮半島西南角落嘅火山島,而潛水艇之旅就係帶你盡覽小島多元水底世界嘅最佳方式之一,旅程通常喺大約 30 米深嘅水底進行,橫越 2.8 公里嘅距離。海底充滿五顏六色嘅珊瑚,仲有各種各類嘅魚,同埋迷人嘅水底雕塑,賞心悅目。

    • 伴侶
    • 家庭
    • 團體

    相片由 Walter Lim 提供 (CC BY 2.0) 經修改

    9

    性愛樂園 (Love Land)

    性愛樂園 (Love Land) 係濟州美術館附近奇特而火辣嘅景點,以戶外主題公園形式經營,創於 2004 年,裡面有大約 140 尊由首爾大學建築系學生創作嘅露骨色情雕塑。如果你帶埋小朋友嚟,場內設有兒童遊樂場,可以分散細路哥嘅注意力,俾你好好遊覽一番。

    唔清楚性愛樂園雕塑背後嘅概念?咁只要記住一個重點就得:千祈唔好同阿爸阿媽一齊嚟!性愛樂園係同親密朋友度過愉快時光嘅好地方,而你哋仲可以喺度影到相當搞笑嘅相添。部分雕塑令人目瞪口呆,自問個性 Open 嘅你,一定會喺樂園裡面玩得盡興!

    地點: 韓國濟州島濟州市千百路 2894-72

    開放時間: 每日 09:00 至 00:00

    電話: +82-64-712-6988

    • 伴侶
    • 拍照

    相片由 Damara Avila 提供 (CC BY-SA 2.0) 經修改

    10

    涉地可支 (Seopjikoji)

    涉地可支 (Seopjikoji) 係韓國最出名嘅海角之一,主要係因為呢度同附近一帶曾經做過韓國幾部電視劇嘅場景,包括《隔世琴緣》、《真愛賭注》同《一千零一夜》。

    遊覽涉地可支嘅最佳時節係 4 月,到時油菜花盛開,滿目燦爛;而山頂 4 米高嘅位置仲屹立住挾才燈塔消防站,係欣賞海景嘅好地方。

    地點: 韓國濟州島西歸浦市涉地可支路 107 號

    • 伴侶
    • 家庭
    • 拍照
    11

    日出峰

    城山日出峰 (Seongsan Ilchulbong) 係徒步旅行同觀賞日出嘅熱門景點;不過,山頂大部分時間都罩住濃霧,「旭日東升」嘅靚景未必日日都見到。雖然係咁,但係登山過程依然相當好玩,成條登山徑上面有近 600 級樓梯,挑戰你嘅體力—記得帶埋大量食水、保暖衣物同小食,先至可以盡情享受登山過程架!

    地點: 韓國濟州島西歸浦市城山邑

    • 伴侶
    • 家庭
    • 拍照
    12

    娛樂場

    濟州島嘅娛樂場全天候營業,吸引旅客親臨碰碰運氣,喺旅途上贏返啲 Cash!島上最熱門嘅娛樂場酒店包括濟州樂天酒店、濟州海濱華美達廣場酒店同濟州太陽酒店暨娛樂場。

    由於韓國政府禁止當地人賭博,所以賭枱同老虎機旁邊都只會出現外國旅客嘅身影。

    13

    公牛飛鏢酒吧 (Bull's Dart)

    公牛飛鏢酒吧 (Darts Bar Bull’s) 係濟州人「掟飛鏢、飲返杯」嘅好地方—呢間地窖酒吧位於慶州市政廳對面,東主每個月都會舉辦全女班飛鏢比賽,都算係著重性別平等。

    一輪飛鏢起價大約 KRW500,雞尾酒售價就由 KRW7,000 起;如果你鍾意飲啤酒,公牛飛鏢酒吧仲有供應喜力啤酒同健力士啤酒,任得你揀!

    地點: 韓國濟州島濟州市二徒二洞 1773-6

    開放時間: 每日 19:00 至 04:00

    電話: +82-64-759-5559

    14

    正月大滿月野火慶典 (Jeongwol Daeboreum)

    正月大滿月野火慶典 (Jeongwol Daeboreum) 係島上迄今最具代表性嘅活動之一,喺 95 號公路進行,象徵豐收—慶典儀式重現當地農民為咗驅除害蟲而焚燒雜草嘅舉動,通常喺大滿月 (韓國當地節日) 嗰陣上演,

    確切日期據本地曆法而有啲分別,一般介乎 2 月初至 3 月之間。慶典期間,你可以投入民間遊戲、市集、舞蹈同音樂會之中;另外仲有火炬燃點儀式同煙花表演,千祈咪錯過!

    地點: 韓國濟州島濟州市涯月邑鳳城里山 59-8

    • 伴侶
    • 家庭
    15

    濟州迷你樂園 (Jeju Mini Land)

    濟州迷你樂園展示世界各地地標建築嘅微型複製品,你可以喺呢度搵到嚟自 50 個國家/地區超過 115 座名勝同聯合國教科文組織世界文化遺產,當中最出名嘅包括比薩斜塔、泰姬陵同艾菲爾鐵塔。

    呢個合家歡景點仲開辦咗 30 分鐘嘅工作坊,教遊客製作 T 恤、手袋同手巾仔等等。濟州迷你樂園嘅入場費大約如下:每位成人 KRW9,000;每位青少年 KRW7,000;每位兒童 (3 歲以上) KRW5,000。

    地點: 韓國濟州島濟州市朝天邑榧子林路 606 號

    開放時間: 冬季:每日 09:00 至 18:00。夏季:每日 08:30 至 19:00。春季:每日 08.30 至 18:00

    電話: +82-64-782-7720

    • 伴侶
    • 家庭
    • 拍照
    Penny Wong | 旅遊常客

    開始計劃行程

    Maps