新加坡動物園 (Singapore Zoo) 營造出大型雨林環境,可以容納 315 個品種共 2,500 隻動物。無論你係小朋友抑或大人,嚟到新加坡動物園,都一樣會搵到令你興奮嘅事物!好多展區仲可以俾你試餵動物,又或者試玩其他互動體驗,近距離觀察異國生物嘅生活百態,

    認識世界各地大大小小嘅動物,包括蝴蝶、亞洲象,仲有色彩繽紛嘅熱帶雀鳥同北極熊。而馬騮同大型靈長類動物算得上係新加坡動物園嘅「明星」,你會見到專門介紹紅毛猩猩、長鼻猴同狒狒嘅詳盡展品。新加坡動物園屬於新加坡野生動物保護區 (Wildlife Reserves) 嘅一部分,除咗係動物園,亦有參與拯救野生動物、保育同研究嘅工作。

    不妨坐住吉普車,喺動物園嘅澳洲內陸 (Australian Outback) 展區搵下灰袋鼠、小袋鼠同褶傘蜥蜴;去到貓科區 (Cat Country),你會喺大型玻璃圍牆裡面見到美洲豹、豹同埋獅子。去到有冷氣嘅小型動物長屋 (Critters Longhouse),仲有斑點鼷鹿、蜜熊、馬來西亞箭豬同地松鼠等等嘅小型動物,周圍竄來竄去。

    亞洲大象 (Elephants of Asia) 展覽區佔地 1 公頃,有升高咗嘅木板步道,方便你觀賞享受緊泥漿浴、喺水池「浸 Bath」歎世界嘅大象;脆弱森林 (Fragile Forest) 展覽區會為你介紹 2 萬立方米區域內雨林同紅樹林生態系統嘅連通性,同埋脆弱之處,仲有各種昆蟲嗡嗡作響,鼠鹿、果蝠、鬣蜥等動物喺茂密叢林嘅植物同樹木上面棲息。

    新加坡動物園嘅靈長類動物王國 (Primate Kingdom) 住咗幾種猴類,包括烏葉猴、疣猴、絨頂檉柳猴、獅尾猴、赤猴、啡色捲尾猴同黑猴,你仲可以見到佢哋覓食同埋漫步叢林嘅姿態添!其中,嚟自婆羅洲嘅怪相長鼻猴住喺單獨展示餵養區;而紅毛猩猩同埃塞俄比亞大裂谷 (Great Rift Valley of Ethiopia) 嘅阿拉伯狒狒都有相同待遇。

    嚟到北極熊 (Polar Bear) 展覽區,遊客可以近距離睇北極熊游水;而白老虎 (White Tiger) 展覽區就有一對 Cute 爆嘅老虎兄妹 Pasha 同 Keysa 居住,佢哋成日喺大花園裡面玩架!爬行動物園 (Reptile Garden) 展區珍藏咗一系列嘅有鱗生物,有科莫多巨蜥、亞達伯拉象龜、犀牛鬣蜥同馬來長吻鱷;你仲可以順道去埋原野非洲 (Wild Africa) 展區,探下白犀牛、獵豹、斑馬、長頸鹿,同埋兇猛嘅非洲獅子。

    動物園不時上演唔同嘅節目,包括「海洋動物表演 (Splash Safari)」同「大象的工作與嬉戲 (Elephants at Work and Play)」,唔單止富有娛樂性,仲可以俾一班小動物發揮本能,加強同訓練員之間嘅聯繫。同小朋友一齊嚟玩?新加坡動物園嘅雨林兒童樂園 (Rainforest Kidzworld) 絕對會陪細路仔展開冒險之旅—小朋友可以乘搭飛狐或者水上渡輪,去 Ben&Jerry's 同肯德基食個下午茶,然後再同友善可愛嘅山羊、矮種馬、法拉貝拉迷你馬、兔仔等等享受愉快嘅相處時刻。

    新加坡動物園 (Singapore Zoo)

    地點: 729826 新加坡萬禮湖路 80 號

    開放時間: 每日 08.30 至 18:00雨林兒童樂園每日 09:00 至 18:00 開放

    電話: +65 6269 3411

    Ari Gunadi | 旅遊常客

    開始計劃行程