新加坡實惠旅遊指南雲集咗眾多當地同旅遊達人嘅意見,等你唔洗荷包出血都可以盡情暢遊呢個國家。新加坡嘅消費可以話係豐檢由人,視乎你去咩地方、玩咩活動而定。如果你夠精打細算,喺新加坡吃喝、購物以及遊覽所需嘅費用,其實都會比好多其他亞洲城市平。

    除咗飲食同購物,我哋嘅新加坡旅遊慳錢小貼士都為你羅列咗最超值嘅住宿地點同最佳景點,唔少景點更可以免費參觀!新加坡絕非「有錢人限定」嘅旅遊目嘅地,不如先繼續睇睇呢份指南,探索箇中原因!

    1

    住宿

    預算有限嘅背包客嚟到新加坡,住宿選擇確實唔多,所以通常會選擇宿舍形式嘅客房。話雖如此,都唔代表你要委屈自己!

    過去幾年,名牌豪華膠囊旅館喺新加坡紛紛湧現。小印度 (Little India) 亦有大量嘅平價優質住宿,係窮遊背包客嘅福音!舒適乾淨嘅宿舍床位價錢介乎 SGD20 至 SGD60,私人客房單人床位就約 SGD60 起,廉價雙人房約 SGD100 起。

    2

    美食

    喺新加坡旅行想慳錢,餐飲選擇就好簡單,餐餐都去熟食中心解決就得!正如新加坡旅遊局局長楊漢忠所講:「SGD3 已經可以食得好豐富,或者你亦可以用 SGD300 幫襯世界頂級嘅餐廳。」就算喺新加坡預算有限,亦唔洗餐餐食湯麵同雞飯嘅。新加坡一啲數一數二嘅熟食中心都有供應各種環球菜式,窮遊一樣可以大飽口福!

    其中,位於中央商務區 (CBD) 嘅老巴剎美食廣場 (Lau Pa Sat) 食品種類包羅萬有,由傳統新加坡菜到泰式、中式、越式、韓式甚至西式美食都有,大部分菜式價錢大約 SGD3-10。至於其他平價選擇,包括牛車水 (Chinatown) 著名嘅麥士威熟食中心 (Maxwell Hawker Centre)、較現代化嘅牛車水美食街 (Chinatown Food Street),同埋小印度 (Little India) 嘅竹腳中心 (Tekka Centre) 等都不容錯過!

    相片由 Marcin Konsek 提供 (CC BY-SA 4.0) (經修改)

    3

    暢飲美酒

    新加坡出名酒貴,但想暢飲一番其實都有辦法!首先新加坡的確有平價酒吧,例如五居酒吧 (Five Izakaya Bar) 嘅細杯啤酒全日只售 SGD5,而 Ice Cold B's @ SMU 酒吧每 pint 啤酒就只售 SGD10。

    另一個好方法係提早去克拉碼頭 (Clarke Quay) 開始夜生活。呢一區酒吧林立,人山人海,好多酒吧都提供買一送一優惠,特價時段通常係 17:00 至 19:00 左右。市內唔少地方都有全日 Happy Hour 優惠,例如費利曼圖海鮮市場 (Fremantle Seafood Market) 嘅啤酒同葡萄酒只售 SGD5;小西貢 (Little Saigon) 嘅飲品提供半價優惠;笨豬酒吧 (Bungy Bar) 每 pint 啤酒只需 SGD9;維爾維薄餅酒吧 (Verve Pizza Bar) 全單消費超過 SGD15 就可以免費獲贈一客薄餅。

    4

    景點通行證

    雖然新加坡有多姿多采嘅景點同有趣活動,但由於通常價格不菲,變相限制咗好多打算窮遊嘅旅客。新加坡摩天觀景輪 (Singapore Flyer) 同河上游輪 (River Cruises) 等熱門景點嘅費用喺 SGD20 至 SGD40 之間,要全部體驗嘅話所需旅費亦唔少。

    不過只要買大受歡迎嘅景點通行證,你就可以免費參觀多個景點 (包括上述兩個景點),仲可以喺指定餐廳同酒吧享受折扣優惠,大慳一筆旅費!

    5

    日間免費活動

    新加坡嘅景點同活動琳瑯滿目,更重要嘅係當中唔少都係免費,令窮遊新加坡更加簡單!你可以前往濱海灣花園 (Gardens by the Bay) 飽覽巨型人造樹嘅瑰麗景觀,然後喺花園附近嘅濱海堤壩 (Marina Barrage) 睇人放風箏,欣賞風箏喺迷人嘅天際線上飛翔嘅美景。你亦可以選擇遊覽免費嘅公園同自然徑,例如福康寧公園 (Fort Canning Park)、新加坡植物園 (Singapore Botanical Gardens) 同埋麥里芝蓄水池嘅樹頂步道 (MacRitchie Reservoir) 嘅樹頂吊橋 (Treetop Walk) 同南部山脊 (Southern Ridges)。

    小印度 (Little India)、牛車水 (Chinatown) 或阿拉伯區 (Arab Quarter) 等民族聚居地,亦唔洗花費一分一毫,而新加坡最著名嘅景點魚尾獅 (The Merlion) 亦可以免費參觀!

    6

    夜間免費活動

    新加坡有好多奢華酒吧同雞尾酒廊,足以令你一晚之內洗哂假期預算!唔想咁大手筆嘅話,不妨試吓呢啲夜間活動:

    - 參觀蘇丹清真寺 (Sultan Mosque)。呢間清真寺喺同類型建築中係最大、最宏偉嘅一座,夜晚亮燈之後更加迷人!
    - 體驗 3 場燈光演出,包括濱海灣花園 (Gardens By The Bay)、濱海灣金沙 (Marina Bay Sands) 同聖淘沙島 (Sentosa) 嘅演出
    - 到濱海藝術中心 (Esplanade Theatre) 欣賞眾多免費節目同表演
    - 喺聖淘沙島嘅海灘上觀賞日落
    - 享受星期三女士之夜 (當晚新加坡大多數 Club 都會為女士提供免費入場同飲品優惠)

    7

    購物

    新加坡嘅最平價購物勝地一定非武吉士街 MRT 地鐵站附近嘅武吉士街市集 (Bugis Street Market) 莫屬!市集營業時間為 11:00 至 22:00,專賣平價手信、服裝、飾品同食品。

    新加坡其他經濟實惠嘅購物好去處仲有小印度 (Little India) 24 小時營業嘅慕斯達發中心 (Mustafa Centre),同埋位於烏節路 (Orchard Road)、歷史悠久嘅幸運中心 (Lucky Plaza)。兩個地方嘅貨品都琳瑯滿目,應有盡有!

    相片由 Dion Hinchcliffe 提供 (CC BY-SA 2.0) (經修改)

    8

    派對

    如果女士打算窮遊新加坡就千祈唔好錯過星期三喇!因為新加坡市內大多數酒吧同 Club 逢星期三都可以俾女士免費入場同享用免費飲品。

    至於男士或者其他日子去酒吧嘅女士,亦不妨到泵房酒吧 (Pump Rooms)、瘋象酒吧 (Crazy Elephant)、中國一酒吧 (China One) 或者自由古巴酒吧 (Cuba Libre) 盡情暢飲!呢幾間酒吧全部位於克拉碼頭 (Clarke Quay),有現場音樂表演,大部分晚上更不設最低消費!

    9

    出入境

    好多預算有限嘅旅客都想由附近嘅東南亞國家進入或者離開新加坡,所以不斷尋找巴士、火車甚至船等廉價替代交通工具。經陸路長途跋涉前往新加坡固然可行,但其實只要提前預訂廉航機票,短途機票價格可能同陸路交通費差唔多平!不過如果你時間充裕,又想遊歷周邊國家,確實可以由選擇曼谷出發,搭巴士同火車一路經馬來西亞前往新加坡。

    10

    當地交通

    由樟宜機場 (Changi Airport) 落機一刻即刻買張 MRT 地鐵專用嘅易通卡 (EZ Link) 就可以展開慳錢之旅!只要俾 SGD12 (SGD5 為可退款按金,SGD7 為可用儲值額),就足夠喺市內搭幾程車,而且每次餘額用完後都可以輕鬆增值。新加坡嘅 MRT 地鐵網絡覆蓋範圍好廣,方便易搭,每程只需 SGD1 左右,可謂超值交通之選!

    雖然如此,搭的士亦係唔錯嘅選擇,特別係晚上盡興過後更加合適。新加坡的士出奇地平,市中心大多數短途車程都只需 SGD10 左右。

    相片由 Simon_sees 提供 (CC BY 2.0) (經修改)

    Ari Gunadi | 旅遊常客

    開始計劃行程

    旅遊提示

    新加坡政府有規定可接待休閒旅客的酒店。

    查看詳情
    返回頁首

    Maps