馬來西亞樂高樂園 (Legoland Malaysia) 係馬來西亞柔佛州新山市 (Johor Bahru) 嘅合家歡一日遊好去處,距離新加坡市中心只係一個鐘車程左右,有超過 70 種刺激機動遊戲設施、滑水梯同現場表演,分佈喺 7 個唔同區域裡面,對於各個年齡層嘅細路 (以至大人) 都好有吸引力!

    而馬來西亞樂高樂園度假酒店 (Legoland Malaysia Resort) 就係充滿活力嘅主題酒店,同主題公園相連,店內餐飲選擇豐富美味,仲有室外泳池同兒童遊樂場添!如果你由新加坡去樂高樂園,記住要帶埋護照。

    馬來西亞樂高樂園會為一家大細送上多姿多彩嘅好玩活動—冒險之地 (Land of Adventure) 嘅機動遊戲設施多不勝數,而馬來西亞樂高樂園嘅旗艦區就係迷你樂園 (Miniland),用左超過 3,000 萬塊樂高積木做出好多個亞洲地標,打造 1:20 嘅互動世界,非常適合同你嘅摯愛影相「呃 Like」。

    BB 仔可以喺得寶樂園 (Duplo Playtown) 盡情咁玩,探索兒童城市;大啲啲嘅細路就可以去樂高科技城 (Lego Technic) 享受極速樂趣。公園裡面仲有過山車同工作坊,俾一班小小工程師建造自己嘅樂高機器人,揮灑靈感同創造力;

    你屋企有個「絕地小武士 (Jedi)」?樂園裡面嘅《星球大戰 (Star Wars)》專區特别重現多個極具代表性嘅星戰角色,上演一幕又一幕史詩式戰鬥場面,睇見都熱血沸騰!

    馬來西亞樂高樂園有好多快餐選擇,專賣飲品同零食嘅小食亭都唔少,雖然啲食物算唔上係名貴菜式,但就好啱細路仔口味,仲可以幫你補充體力,玩足全日都得。其中,King's Grill 幾唔錯,採用中世紀英格蘭特色小酒館設計,相當有特色;如果你同成大班人一齊嚟,不妨去美食廣場歎進各國佳餚。一場嚟到,又點可以錯過樂園裡面嘅大型紀念品店?裡面有賣五花八門嘅樂高產品,最啱帶返屋企,打造你自己嘅樂高樂園!

    馬來西亞樂高樂園 (Legoland Malaysia Theme Park)

    地點: 79100 馬來西亞柔佛州努沙再也樂高樂園大道 7 號 (7, Jln Legoland, 79100 Nusajaya, Johor, Malaysia)

    開放時間: 每日 10:00 到 18:00

    電話: +60 (0)7597 8888

    Penny Wong | 旅遊常客

    開始計劃行程