由新加坡前往附近島嶼全部都可以喺一個鐘之內到達,有啲更只需要幾分鐘就可以瞬間由石屎森林走入自然叢林,盡情享受延綿多里嘅柔軟細沙!如果你想暫時逃離一下大城市嘅繁囂,但又想附近有 Starbucks 同 7-Eleven,呢啲島嶼就係最適合不過嘅度假勝地!

    無論你想去當地人放長假都鍾意去嘅觀光島嶼,抑或由新加坡搭短短 20 分鐘船前往杳無人煙嘅熱帶小島,都不妨先參考一下我哋以下嘅新加坡附近島嶼精選。

    1

    聖淘沙島

    由新加坡前往嘅所需時間:5 至 10 分鐘
    前往方法:乘坐 MRT 地鐵至港灣站 (Harbourfront station),然後由怡豐城 (VivoCity) 購物商場 3 樓轉搭聖淘沙捷運 (Sentosa Express)。
    玩樂活動: 喺環球影城 (Universal Studios) 坐過山車;到丹戎海灘俱樂部 (Tanjong Beach Club) 海灘吃喝玩樂。

    聖淘沙島 (Sentosa) 絕對唔係《魯賓遜漂流記》入面嘅荒島,大家都可以輕鬆探索!聖淘沙島同新加坡本島非常近,你甚至可以喺行人橋上徒步 (免費或 SGD1,視乎時間而定) 前往,亦可以乘坐連接 MRT 地鐵嘅聖淘沙捷運 (Sentosa Express) 前往。島上有環球影城 (Universal Studios) 同其他著名景點任君遊覽,而且非常商業化,令你感覺好似冇離開過本島一樣。不過如果想為旅程增添一點「度假 feel」,島上嘅丹戎 (Tanjong) 同西羅索 (Siloso) 一樣有迷人嘅海灘等你前往。不妨去丹戎嘅酒吧飲兩杯,又或者一家大細想玩沙灘足球同排球之類嘅活動嘅話,西羅索就最適合不過!

    地圖

    相片由 Chensiyuan 提供 (CC BY-SA 4.0) (經修改)

    2

    民丹島 (印尼)

    由新加坡前往嘅所需時間:50 分鐘
    前往方法:由新加坡丹那美拉 (Tanah Merah) 或新加坡嘅港灣 (Harbourfront) 渡輪碼頭搭乘渡輪。往返費用約為 SGD30 至 SGD50。
    玩樂活動:喺度假村 Staycation、租車環島遊,探索所有海邊民族聚居地、去沙灘放鬆享受、參觀各大小寺廟。

    呢度係距離新加坡第二近嘅印尼島嶼,亦係廖內群島 (Riau Archipelago) 嘅一部分,附近係名稱相近嘅巴淡島 (Batam Island)。由新加坡搭渡輪到民丹島 (Bintan Island) 嘅船程唔洗一個鐘頭,島上開發完善、設施齊全,以一流嘅水清沙幼海灘同多姿多采嘅水上活動而聞名。無論係一日遊定係週末假期,大家都唔好錯過著名嘅巴因榕樹寺 (Banyan Tree Temple)!你亦可以去民丹島首府丹戎檳榔 (Tanjung Pinang) 行吓,體驗雅致嘅氣氛同認識親切嘅當地人。

    地圖
    3

    聖約翰島

    由新加坡前往嘅所需時間:20 分鐘
    前往方法: 由世界貿易中心 (World Trade Centre) 或濱海南碼頭 (Marina South Pier) 搭渡輪前往 (票價約 SGD18;每日兩班渡輪;週末同公眾假期加強服務) 。
    玩樂活動:喺潟湖中暢泳、喺海灘上野餐、徒步或踩單車探索曲折嘅叢林小徑。

    聖約翰島 (St. John’s Island) 係聖淘沙島 (Sentosa) 以外人氣最高嘅新加坡外島之一,有幾個唔錯嘅泳灘,更設有更衣室、廁所、野餐地點同商店,非常方便!你亦可以喺島上租單棟小屋留宿一晚,等所有旅客回程離開之後,盡情享受寧靜嘅環境!聖約翰島所環繞嘅潟湖亦好出名,同大海之間隔住沙洲,不妨帶埋浮床同防曬嚟盡情享受一番!

    地圖

    相片由 Chensiyuan 提供 (CC BY-SA 4.0) (經修改)

    4

    拉撒路島

    由新加坡前往嘅所需時間:25 分鐘
    前往方法:由世界貿易中心 (World Trade Centre) 或濱海南碼頭 (Marina South Pier) 搭渡輪前往聖約翰島 (St. John’s Island) (票價約 SGD18;每日兩班渡輪;週末同公眾假期加強服務),然後經專門舖設嘅石屎步行徑徒步前往 (費用全免)。
    玩樂活動:盡情喺海灘放鬆享受就最好不過,活力充沛嘅好動寶寶亦不妨到海中暢泳一番!

    有人話拉撒路島 (Lazarus Island) 擁有全新加坡最純淨醉人嘅海灘,不過好多旅客都只會去發展配套完善嘅聖約翰島 (St John’s Islands),而懶得沿住大橋行多幾步去拉撒路島,非常可惜!島上景點活動雖然唔多,但有延綿且純淨嘅白沙灘,四周圍都係棕櫚樹,而海灘後面就係熱帶叢林,所以非常值得特登去行吓!

    地圖

    相片由 Jnzl's Photos 提供 (CC BY 2.0) (經修改)

    5

    烏敏島

    由新加坡前往嘅所需時間:5 分鐘
    前往方法:由樟宜坊渡輪碼頭 (Changi Point Ferry Terminal) 乘坐小船 (單程約 SGD2)。
    玩樂活動:徒步或踩單車探索濕地、喺海灘上野餐、觀鳥。

    除咗聖淘沙島 (Sentosa) 之外,新加坡本島以外最受歡迎嘅一日遊勝地,非烏敏島 (Pulau Ubin) 莫屬。呢座小島位於新加坡同馬來西亞之間,以濕地區馳名,最適合鍾意冒險嘅人玩餐飽!呢度仲有大量青蔥植物,同埋一啲非常唔錯嘅單車徑同醉人海灘,一定可以令你玩得更盡興!

    地圖

    相片由 Jirka Matousek 提供 (CC BY 2.0) (經修改)

    Paul Smith | 旅遊常客

    開始計劃行程

    返回頁首

    Maps