新加坡濱海藝術中心 - 海灣劇院 (Theatres on the Bay) 同濱海藝術中心購物商場 (Esplanade Mall) 組成多用途綜合藝術場地,裡面除咗有音樂廳、劇院,仲有露天表演區,為市內海灣地帶送上一系列嘅精彩表演,同埋引人入勝嘅購物餐飲體驗。

    想過返個「文化之夜」?咁就一定要將濱海藝術中心加入必到行程—你可以喺呢度欣賞當地樂隊登台演出,亦可以睇到馬來西亞同泰國傳統舞蹈,而且大部分表演仲係免費添架。

    新加坡市民叫呢座藝術殿堂做「榴蓮」,全因為佢外型夠獨特—喺圓拱形屋頂上面,每個三角形玻璃窗格都鋪設咗尖頂金屬片,其實都有少少像烏蠅眼 (笑)。濱海藝術中心喺正海邊,遊人可以享受浪漫嘅景色,仲睇到哂新加坡摩天觀景輪 (Singapore Flyer)、濱海灣金沙 (Marina Bay Sands) 同海濱長廊 (Promenade) 嘅都會風光添!

    所有戶外表演免費向公眾開放,唔需要訂位,而呢一點亦都係大家夜晚鍾意去濱海藝術中心散步嘅原因之一。中心外面嘅有蓋舞台似足三塊白色嘅風帆,座位足夠坐 450 幾人,

    而當中最令人印象深刻嘅表演空間,一定非音樂廳 (Concert Hall) 莫屬,佢嘅形狀同設計都可以做到最佳音響效果,彎曲嘅木條鋪滿成幅牆,令到表演音質更加平衡悅耳,同時帶俾你彷彿置身船艙嘅感受。4 層高嘅音樂廳坐到 1,600 人,大堂擺放住一座宏偉嘅風琴,不時都有舉辦古典音樂會、流行歌舞同搖滾樂隊演出。

    另一個主要節目場地係海灣劇院 (The Theatre),設計靈感嚟自馬蹄形嘅歐洲歌劇院,紅金配色互相輝映,弧形觀眾席可以坐 1,942 人,周圍空間非常舒適;即使坐喺山頂位,表演者同觀眾之間嘅距離亦都好近。海灣劇院主打西方同亞洲嘅表演藝術,最啱一班「藝文青」!

    濱海藝術中心購物商場算得上係成座綜合建築嘅核心,夾喺兩個圓拱中間,方便遊客喺睇 Show 前後去餐廳食下嘢、去專門店買下嘢—其中嘅 POPCORNPOP 專售電影海報同埋與別不同嘅電影紀念品,好有珍藏價值架!如果你對管弦樂情有獨鍾,就一定要去 Gramercy Music,買部新嘅小提琴同樂譜,即席演奏下。

    行到餓喇,係時候去附近嘅濱海露天熟食中心 (Makansutra Gluttons Bay),喺精選熟食攤檔品嚐一下各種地道美食。濱海藝術中心交通快捷方便,只要搭地鐵到市政廳站或者濱海中心站,行 10 分鐘就到。

    濱海藝術中心兼商場 (Esplanade - Theatres on the Bay & Mall)

    地點: 038981 新加坡濱海藝術中心大道 1 號

    開放時間: 每日 08:00 至 02:00

    電話: +65 6828 8377

    Paul Smith | 旅遊常客

    開始計劃行程