新加坡最佳島嶼

新加坡值得一遊嘅離島

    新加坡嘅主要島嶼同旅遊勝地聖淘沙島 (Sentosa Island) 相連,周邊有國際主題公園、豪華酒店林立。除此之外,新加坡附近仲有其他離島都值得遊覽,而呢啲島嶼保留咗比較多嘅傳統特色,人口亦相對少啲,

    你唔止可以游水、享受日光浴,仲可以喺寧靜嘅自然環境中露營。大部分島嶼位置唔遠,由新加坡南部同東部嘅碼頭乘搭短程渡輪就可以到達。

    1

    烏敏島 (Pulau Ubin)

    烏敏島 (Pulau Ubin) 長滿紅樹林,係深受歡迎嘅週末度假好去處,島上景色怡人,好玩活動包羅萬有。你可以租架單車,遊歷下起伏不平嘅山邊石路,又或者去游下水;到咗夜晚,你仲可以試下戶外紮營體驗添!

    另一方面,島上有傳統漁村、養蝦場、養魚場、中國古廟、石灰石礦場等等,景點多到數唔哂,而且海鮮餐廳質素一流,滿足到你觀光嚐鮮嘅願望。烏敏島經歷 40 年發展,依然保留住自然風貌,亦都係唔少動植物嘅棲息地。

    島上另有一間 Outward Bound 歷奇學校,開辦求生課程,啱哂冒險精神爆燈嘅你!遊客可以由樟宜角渡輪碼頭出發,坐住充滿異國情調嘅遊輪,前往烏敏島。

    地點: 新加坡東北群島

    地圖
    • 拍照
    • 遊歷
    2

    龜嶼島 (Kusu Island)

    據說,呢度以前有隻巨龜,為咗拯救遇到海難嘅水手,化身為一塊巨石,亦都即係今日嘅龜嶼島 (Kusu Island)。時至今日,島上仍然保留住各種宗教儀式—每逢農曆九月,渡輪碼頭附近嘅大伯公宮就會聚集一班道教徒,進行一年一度嘅拜祭典禮;

    馬來人鍾意去山頂上嘅馬來拿督公廟 (Kramat Kusu),參拜 Syed Abdul Rahman、佢媽媽 Nenek Ghalib 同妹妹 Puteri Fatimah,尤其係「求子心切」嘅夫婦,更加會專誠嚟呢度用白布綁住附近嘅樹,以表心意。

    如果你冇信奉道教,又無意求子,不妨搵返個海灘,Hea 下放鬆下!龜嶼島嘅海灘除咗可以游水,仲有提供更衣室、洗手間同野餐區,設施貼心。小島入場費 (包括渡輪船飛) 方面,成人約為 SGD9,小童就收 SGD6。

    世界貿易中心 (World Trade Centre) 逢星期一至六每日都有兩班渡輪出發去龜嶼島,星期日及公眾假期就加開到 6 班;渡輪亦會喺聖約翰島 (St John's Island) 停站。

    地點: 南部群島,新加坡

    地圖
    • 家庭
    • 拍照

    相片由 Jacklee. 提供 (CC BY-SA 3.0) 經修改

    3

    聖約翰島 (St. John’s Island)

    聖約翰島 (St. John’s Island) 上面有好多個超正嘅海灘,最適合游水,同時亦提供更衣室、洗手間同野餐區,係週末度假同露營嘅熱門勝地。如果你想擴闊文化視野,不妨租住充滿殖民風情嘅別墅小屋,詳情可以向世界貿易中心 (World Trade Centre) 嘅票務櫃檯查詢。

    世界貿易中心逢星期一至六每日都有兩班渡輪出發去龜嶼島,星期日及公眾假期就加開到 6 班;渡輪亦會喺龜嶼島 (Kusu Island) 停站。小島入場費 (包括渡輪船飛) 方面,成人約為 SGD15,12 歲以下小童就收 SGD12。

    電話: +65 6534 9339

    地圖
    • 家庭
    • 拍照

    相片由 Jacklee 提供 (CC BY-SA 4.0) 經修改

    4

    姊妹島

    睇見島名,你應該都估到—姊妹島由一大一細嘅兩個島嶼組成,「姐姐」島面積約 3.9 公頃,「妹妹」島就佔地約 1.7 公頃。呢兩座小島不但係游水好去處,更加係浮潛同潛水天堂!

    另外,你仲可以喺島上野餐,又或者瞓喺草地同沙灘上,感受海島舒適環境。姊妹島冇固定渡輪班次接載遊客。如果你想出發遊覽呢兩座島嶼,就要喺渣甸碼頭 (Jardine Steps) 或紅燈碼頭 (Clifford Pier) 租水上的士 (收費約為每小時 SGD50)。

    地點: 姐妹群島,新加坡

    電話: +65 6275 0398

    地圖
    • 拍照

    相片由 Thaejas 提供 (CC BY 3.0) 經修改

    Paul Smith | 旅遊常客

    開始計劃行程

    Maps