聖淘沙島 (Sentosa Island) 13 大最好玩活動

新加坡聖淘沙島最出名嘅係啲嘜嘢?

    聖淘沙島 (Sentosa Island) 嘅所有出色景點都有一個共同點,就係超級好玩同得意!只要行過新加坡主島上嘅一座小橋,就可以行入呢座人造島,探索島上各種娛樂體驗,其中大部分仲好適合一家大細一齊玩。

    聖淘沙島以大型度假村而出晒名,裡面嘅精彩景點同活動真係數唔晒,仲有國內最絢麗嘅海灘等你嚟玩。各大特色景點嘅位置都好方便就腳,只要坐島上嘅免費巴士同免費單軌列車,就可以好輕鬆咁去到目的地。

    1

    環球影城 (Universal Studios)

    環球影城 (Universal Studios) 雲集刺激機動遊戲、現場表演同荷里活猛片,每年吸引數以百萬遊客湧至,亦都係耗資 USD45 億興建嘅聖淘沙名勝世界 (Resorts World Sentosa) 發展項目一部分。呢個大型主題樂園對於小朋友固然極具魅力,仲有適合大人細路嘅景點名勝,

    園內分成好多個專區,包括荷里活 (Hollywood)、紐約 (New York)、古埃及 (Ancient Egypt) 同馬達加斯加 (Madagascar),帶你「環遊世界」,穿梭於電影領域之中。你係機動遊戲迷,熱愛巨型過山車同現場電影場景?咁就啱喇—聖淘沙環球影城絕對係你喺新加坡嘅必到之處!

    地點: 098269 新加坡聖淘沙島聖淘沙大道 8 號

    開放時間: 星期日至四 10:00 至 19:00;星期五至六 10:00 至 22:00

    電話: +65 6577 8888

    地圖
    • 家庭
    2

    聖淘沙 (Sentosa) 海灘

    新加坡以規模龐大嘅人工開發項目而聞名,短短幾十年內迅速由小型叢林島嶼變成繁華大都會,而市內嘅海灘亦都唔例外—今日喺聖淘沙 (Sentosa) 海岸所見嘅純白沙灘,其實都係新加坡人巧手創造出嚟嘅如畫美景,雖然屬於人工傑作,但係海灘上面嘅軟沙就百分百「純天然」,由鄰國馬來西亞入口。

    聖淘沙島擁有 3.2 公里長嘅白沙海岸線,遊客可以喺呢度暢玩好多種活動,包括漫遊一間又一間嘅海灘酒吧、喺淺海嘅溫暖水域嬉戲,又或者喺棕櫚樹下面搵個安靜嘅據點,輕輕鬆鬆咁睇本書,享受休閒嘅下晝。要數當中嘅最佳景點,絕非丹戎 (Tanjong)、巴拉望 (Palawan) 同西羅索海灘 (Siloso Beach) 莫屬!

    地點: 新加坡聖陶沙島 (Sentosa Island)

    • 伴侶
    • 家庭
    3

    新加坡水上探險樂園 (Adventure Cove Waterpark Singapore)

    位於聖淘沙名勝世界 (Resorts World Sentosa) 嘅新加坡水上探險樂園 (Adventure Cove Waterpark Singapore) 擁有好多妙趣遊樂設施同滑梯,絕對滿足到尋求刺激嘅旅客;園內仲有一系列嘅其他水上活動,適合唔係咁鍾意喺超大隧道裡面猛衝、坐喺水泡上面隨住巨型漏斗四圍旋轉嘅遊客。

    呢個水上樂園除咗提供 7 個令你腎上腺素攀升嘅水上遊樂設施外,仲有唔少獨特景點,好似鰩魚灣 (Ray Bay) 同彩虹礁游 (Rainbow Reef);而你更加可以喺後者裡面近距離親身接觸超過 20,000 條魚!新加坡嘅好玩遊樂園數之不盡,但係種種因素都令新加坡水上探險樂園鶴立雞群。

    地點: 新加坡聖淘沙島聖淘沙大道 8 號

    開放時間: 每日 10:00 至 18:00

    電話: +65 6577 6000

    地圖
    • 家庭
    • 遊歷

    相片由 Haopee G 提供 (CC BY-SA 2.0) 經修改

    4

    聖淘沙空中吊椅 (Skyline Luge Sentosa)

    聖淘沙空中吊椅 (Skyline Luge Sentosa) 既係旅遊名勝,亦可以作為交通工具,接載你定點往返,飽覽新加坡美景之餘,仲體驗到腎上腺素急升嘅快感添!空中吊椅採用全開放式設計,好似纜車咁依山而建,車程由新加坡大陸一直延伸到聖淘沙島。

    身處總站建築裡面,遊客仲可以大展「駕駛技術」,駕乘冇附設引擎嘅三輪車,由英比奧山頂附近嘅陡峭山坡瀡落去,直達西羅素海灘 (Siloso Beach)。兩項活動均可讓你俯瞰鄰近海灘以至新加坡天際線的景致。閱讀更多…

    地點: 099003 新加坡西羅索海灘 45 號

    開放時間: 每日 10:00 至 21:30

    電話: +65 6274 0472

    地圖
    • 家庭
    • 拍照
    • 遊歷
    5

    鶴舞 (Crane Dance)

    新加坡嘅《鶴舞 (Crane Dance)》堪稱合家歡視聽盛會,風格類似香港嘅《幻彩詠香江》。每星期嘅任何一晚,只要喺 20:00 嚟到聖淘沙名勝世界 (Resorts World Sentosa),即刻可以睇到兩隻優雅「戀人」隨音樂翩翩起舞,互訴愛意,點亮漆黑夜空。

    成場表演滿載突破性視聽效果、水光特效同 LED 燈效,而且費用全免,一晚又一晚為觀眾留低深刻印象。聖淘沙島同新加坡主島相隔唔遠;不過,如果你唔想專誠去對岸,都可以選擇喺主島上面嘅怡豐城 (Vivo City) 觀賞呢場水舞表演嘅!

    地點: 098269 新加坡聖淘沙關口 8 號

    開放時間: 每日 20:00 至 20:15

    電話: +65 6577 8888

    地圖
    • 伴侶
    • 家庭
    • 晚間娛樂
    6

    新加坡蝴蝶與昆蟲王國 (Singapore Butterfly & Insect Kingdom)

    你以為聖淘沙島 (Sentosa) 由人工構建,島上就一定冇自然景觀?新加坡蝴蝶與昆蟲王國 (Singapore Butterfly & Insect Kingdom) 就要證明「此言差矣」—呢一片樂園珍藏咗嚟自世界各地超過 3,000 個唔同品種嘅昆蟲,園址坐落喺鬱鬱蔥蔥嘅熱帶環境裡面,植被豐富,鮮花盛開,仲有瀑布帶嚟絲絲涼意,充分營造出原始而真實嘅棲息環境。

    與此同時,新加坡蝴蝶與昆蟲王國唔單止住咗啲蝴蝶同詭異爬蟲,仲有絢麗繽紛嘅叢林鸚鵡安居,另外設有爬行動物專區,俾遊客一覽各種各類嘅蜥蜴同蛇。

    地點: 099702 新加坡英比奧路 51 號

    開放時間: 每日 09:30 至 19:00

    電話: +65 6275 0013

    地圖
    • 伴侶
    • 家庭
    • 拍照

    相片由 Maksym Kozlenko 提供 (CC BY-SA 4.0) 經修改

    7

    聖淘沙自然探索中心 (Sentosa Nature Discovery)

    參觀聖淘沙自然探索中心 (Sentosa Nature Discovery),正正係聖淘沙島 (Sentosa Island) 上面另一項適合「大自然發燒友」同一家大細嘅活動!呢處景點寓教育於娛樂,遊客要睇哂一系列嘅有趣畫廊同互動展覽,先至可以行入叢林,目的係俾你掌握一啲相關技能同資訊,然後就可以自己去搵野生動物啦!

    森林小徑會帶你走過 8 種唔同類型嘅棲息地,而你可以睇勻哂各式各樣嘅植物、樹木同野生動物,當中包括鳥類同昆蟲—如果你夠好彩,仲會遇到難得一見嘅爬行動物添!聖淘沙自然探索中心喺正島上另一個親子景點—蝴蝶公園與昆蟲王國 (Butterfly Park & Insect Kingdom) 旁邊。重要資訊:聖淘沙自然探索中心免費入場!

    地點: 099702 新加坡英比奧路 51 號

    開放時間: 每日 09:00 至 17:00

    地圖
    • 家庭
    • 拍照
    • 經濟實惠

    相片由 Maksym Kozlenko 提供 (CC BY-SA 4.0) 經修改

    8

    聖淘沙高爾夫球俱樂部 (Sentosa Golf Club)

    聖淘沙高爾夫球俱樂部 (Sentosa Golf Club) 擁有唔止一個、而係兩個 18 洞高爾夫球場,難怪吸引業餘以至職業高爾夫球手湧至!雖然新加坡島上度度都有高爾夫球俱樂部,但係佢哋無論喺球場質素定係聲譽地位方面,都難以媲美聖淘沙島 (Sentosa Island) 嘅呢個高爾夫球俱樂部!

    就算你遊歷新加坡途中冇帶球具,都唔使擔心—因為,聖淘沙高爾夫球俱樂部會提供你要用嘅所有設施同用品,有高球車、球童同高爾夫球桿可以租用。此外,俱樂部仲設有更衣室、練習場、店舖、幾間酒吧同餐廳,以及會議場地,齊集你所需嘅一切,方便貼心。

    地點: 099892 新加坡武吉瑪尼斯路 27 號

    電話: +65 6275 0090

    地圖
    • 豪華住宿
    • 遊歷
    9

    新加坡萬象館 (Images of Singapore)

    新加坡萬象館 (Images of Singapore) 坐落於聖淘沙島嘅英比奧山頂景區,係一座不容錯過嘅歷史博物館,裡面設有各種視聽展覽,將新加坡嘅歷史同文化盡現眼前,其中又以當地人民嘅生活為焦點。

    呢座展館採用舊式倉庫展覽模式,展品涵蓋馬來西亞人統治時期、英國人管治時期、以至新加坡第一任總理李光耀執政年間嘅後殖民時代風情。

    地點: 099700 新加坡聖淘沙島英比奧山頂聖淘沙英比奧路 40 號

    開放時間: 星期一至五 11:00 至 18:00;星期六至日 11:00 至 19:30

    電話: +65 6715 4000

    地圖
    • 歷史文化`
    • 拍照
    10

    巴拉望海灘 (Palawan Beach)

    巴拉望海灘 (Palawan Beach) 喺新加坡名氣爆燈,又以海灘上面連接海島嘅加勒比風格吊橋最受歡迎,可以俾遊客行路或者游水前往島上,任君選擇!

    巴拉望海灘位於聖淘沙南端嘅核心地帶,擁有水清沙幼嘅白沙灘、棕櫚樹、同埋幾間熱鬧嘅海灘酒吧,你就算由晏晝暢玩至深夜,都依然可以保持神清氣爽!嚟到聖淘沙之後,你可以揀行路或者乘搭穿梭巴士,直達島上海灘。

    地點: 099981 新加坡聖淘沙島巴拉望海灘

    地圖
    • 伴侶
    • 家庭
    • 經濟實惠

    相片由 Tdxiang 提供 (CC BY-SA 3.0) 經修改

    11

    新加坡 SEA 海洋館

    聖淘沙島 (Sentosa Island) 上面嘅 SEA 海洋館係新加坡最優越嘅全天候親子景點之一,規模屬全球數一數二,有超過 100,000 隻水棲動物任你參觀!館內嘅海洋生物嚟自全球各大汪洋,而展館水族箱經過特別設計,盡量為水生動物營造自然棲息環境。

    與此同時,新加坡 SEA 海洋館亦嘗試教育訪客一啲應有觀念,希望大家明白:人類每個細微動作,都會對世界構成潛在重大影響。館內魚缸設有互動式展板,幫你深入了解面前嘅景象。眼見住喺館中嘅動物都獲得最佳照顧同保護,我哋自然參觀得更加放心、開心啦!

    地點: 098269 新加坡聖淘沙島聖淘沙大道 8 號

    開放時間: 每日 10:00 至 19:00

    電話: +65 6577 8888

    地圖
    • 家庭
    • 拍照
    12

    西羅索海灘 (Siloso Beach)

    西羅索海灘 (Siloso Beach) 位於聖淘沙嘅西南海岸,係週末合家歡野餐勝地,仲可以俾你打排球、踢沙灘足球同埋撐獨木舟,玩盡沙灘運動添!

    呢片海灘嘅多元特色冠絕全國;海灘旁邊設有好多間酒吧、餐廳、商舖同酒店,喺 2012 年底更加曾經耗資 SGD330 萬重新整修,耳目一新。

    地點: 099538 新加坡聖淘沙英奧比大道 51 號

    地圖
    • 伴侶
    • 家庭
    • 拍照
    13

    丹戎海灘 (Tanjong Beach)

    新月形嘅丹戎海灘 (Tanjong Beach) 位於聖淘沙南部海岸較為偏遠嘅位置,不失為新加坡最休閒嘅一日遊隱世景點,坐擁溫暖嘅淺水區、幼白嘅沙灘同埋熱帶棕櫚樹等等嘅一流海灘元素,話唔定會令你忘記佢係由人工鋪建嘅事實!

    丹戎海灘嘅 Party 相當受歡迎,喺極具人氣嘅丹戎海灘夜店 (Tanjong Beach Club) 舉行,每個月通常狂歡兩晚;到了日間,這間酒吧的氣氛會變得較為輕鬆,並附設泳池和太陽椅,供應各種飲品,讓你閒休一番。

    地點: 098942 新加坡聖淘沙島丹戎海灘大道 120 號

    地圖
    • 伴侶
    • 家庭
    • 經濟實惠

    相片由 Tdxiang 提供 (CC BY-SA 3.0) 經修改

    Stephan Audiger | 旅遊常客

    開始計劃行程

    Maps