聖淘沙 (Sentosa Island) 6 大購物好去處

聖淘沙 (Sentosa Island) 購物熱點

    相比起雲集大型商場同購物區嘅新加坡市中心,聖淘沙 (Sentosa) 嘅購物場所的確比較遜色。之不過,聖淘沙依然係充滿樂趣嘅度假勝地,有聖淘沙名勝世界 (Resorts World Sentosa)、環球影城 (Universal Studios)、聖淘沙海洋館 (SEA Aquarium),加埋各個熱門海灘等精彩景點,難怪吸引一班遊客嚟觀光,行程絕對唔止「買買買」!

    如果你咁啱去聖淘沙遊覽,仲可以行下位於聖淘沙必經之路、而且佔地面積廣闊嘅怡豐城 (Vivo City);而區內仲有幾個購物點,同樣值得一遊。

    1

    怡豐城 (VivoCity)

    喺技術上嚟講,怡豐城 (VivoCity) 唔係位於聖淘沙 (Sentona),但就同呢座島嶼相連,仲係大家搭 Skytrain (連接商場、港灣站同聖淘沙) 去聖淘沙島嘅必經之路添!怡豐城係成個新加坡最大型嘅購物中心,各種各樣嘅商品都應有盡有,

    秉承「生活品味中心」嘅營銷理念,設有巨型嘅 15 銀幕戲院、天台圓形劇場、兒童遊樂場、藝術畫廊,同埋數之不盡嘅精緻餐廳同酒吧。建議你去到港灣站先,喺怡豐城買返夠本,然後再搭商場南面嘅 Skytrain,向聖淘沙島進發。

    地點: 098585 新加坡港灣道 1 號

    開放時間: 每日 10:00 至 22:00

    電話: +65 6337 6860

    • 購物
    • 品嚐美食
    2

    聖景灣 (Quayside Isle)

    現代化嘅聖景灣 (Quayside Isle) 位於聖淘沙灣 (Sentosa Cove) 岸邊,設有潮爆酒吧、餐廳同商舖,高檔餐飲選擇數之不盡,奢華酒吧可以欣賞到碼頭全景,仲有相當唔錯嘅購物熱點添!

    另一方面,聖景灣嘅景點都唔少,當中包括 Jasons The Gourmet Grocer 等食品直銷店,為你呈獻款式多樣嘅豪華進口食材;而 The Straits Wine Company 就有賣好多款白酒、紅酒同香檳,任君淺酌。聖景灣位於聖淘沙島東端嘅聖淘沙灣,每日都有免費接駁車,接載遊客往返。

    地點: 098375 新加坡聖淘沙島海洋大道 31 號

    開放時間: 每日 08:00 至 00:00

    電話: +65 6887 3502

    • 購物
    • 品嚐美食
    • 晚間娛樂
    • 豪華住宿
    3

    聖淘沙名勝世界節慶大道 (Festive Walk at Resorts World Sentosa)

    聖淘沙名勝世界 (Resorts World Sentosa) 擁有多不勝數嘅景點、餐飲食肆同酒店,又點少得購物中心?聖淘沙名勝世界節慶大道 (Festive Walk at Resorts World Sentosa) 可能係島上最全面嘅購物殿堂,各種高級時尚品牌同當地商舖都應有盡有,

    而且仲係全亞洲第一間 Chihuly Gallery (特色玻璃雕塑專門店)、以及全球第一間 Michael Graves Gallery (精美家居裝飾店) 嘅所在地添!喺寬敞嘅現代化購物商場裡面,仲有深受女仔歡迎嘅 Victoria's Secret 獨家特賣場,同埋各式餐館酒吧—無論你嘅品味同預算係點,都一定可以滿載而歸。

    地點: 098269 新加坡聖淘沙島聖淘沙大道 8 號聖淘沙名勝世界

    開放時間: 每日 10:00 至 22:00

    電話: +65 6407 8833

    • 購物
    • 品嚐美食
    4

    Rock Shop

    對於 Hard Rock Cafe Group 嚟講,聖淘沙名勝世界 (Resorts World Sentosa) 似乎有種獨一無二嘅吸引力—除咗世界知名嘅美式 Rock Cafe 分店之外,集團仲喺度開設咗五星級 Hard Rock 酒店,同埋樓下嘅「Rock Shop」。

    如你所料,Rock Shop 特賣場有售一系列經典 Rock & Roll 紀念品、一疊疊嘅品牌 T 恤,仲有好多印咗 Hard Rock 著名標誌嘅手信添!如果你想喺遊覽聖淘沙名勝世界嘅時候「Check off」Hard Rock 體驗,就要嚟呢度參觀下喇!

    地點: 新加坡聖淘沙島聖淘沙大道 8 號

    開放時間: 每日 08:30 至 22:30

    電話: +65 6884 7960

    • 購物

    相片由 ProjectManhattan 提供 (CC BY-SA 3.0) 經修改

    5

    Siloso Point

    嚟到聖淘沙 (Sentosa) 海灘,先發現唔記得帶泳衣沙灘褲,可以點做?咁就一定要去 Siloso Point 行下喇—由拖鞋、游泳短褲、比堅尼以至毛巾,呢間舖都應有盡有!喺東南亞人氣最旺嘅各大沿海景點,類似 Siloso Point 嘅舖頭開到「成行成市」,等住你幫襯;

    之不過,聖淘沙梗有佢獨特之處,而 Siloso Point 就係區內幾間海灘用品專門店之一,就算你有帶泳衣,都值得睇睇店內出售嘅海灘遊戲、兒童玩具、海洋生物教材等等。Siloso Point 位於西羅索海灘 (Siloso Beach),聖淘沙周圍每日都有免費接駁車,載你嚟到呢度。

    地點: 新加坡聖淘沙島西羅索海灘

    開放時間: 每日 10:00 至 20:00

    • 購物
    6

    海港中心 (HarbourFront Centre)

    海港中心 (HarbourFront Centre) 嘅零售店遍佈三層樓,各款時尚服飾、食物飲品、電子產品以至運動器材都應有盡有,難怪深受上班族同埋聖淘沙 (Sentosa) 遊客青睞。

    商場裡面仲有 Esprit、Aldo、ERO Lingerie、Lee Hwa Jewellery,以及全新加坡最大型嘅電子生活用品店 BIG by Safe 等等嘅品牌進駐,都好好行架!

    地點: 099253 新加坡濱海廣場 2 號

    開放時間: 星期一至六 11:00 至 19:00;星期日 11:00 至 15:00

    電話: +65 6273 7759

    • 購物
    • 品嚐美食
    Ari Gunadi | 旅遊常客

    開始計劃行程

    Maps