聖淘沙 (Sentosa Island) 8 大最佳夜生活體驗

聖淘沙島夜晚最佳去處

    聖淘沙 (Sentosa) 大部分夜蒲活動都以島上最大特色—海灘為中心!雖然聖淘沙島上全部海灘都係人造嘅,但係海外入口嘅白沙同熱帶棕櫚樹正正為新加坡市中心塑造出至 fit 度假勝地。沿住海岸線一帶,海灘酒吧、夜場同休憩區隨處可見,絕佳位置為你送上如詩如畫嘅海岸美景。

    中午過後,酒吧紛紛開門做生意;入夜之後,精彩 Party 同音樂節拍完美帶動海灘嘅高漲氣氛!鍾意夜蒲?咁你就唔可以錯過西羅索海灘 (Siloso Beach) 同丹戎海灘 (Tanjong Beaches) 每月一度嘅大型 Party 喇。除咗豪華嘅海灘酒吧之外,聖淘沙亦不乏細路仔啱玩嘅活動,當中包括光影水幕表演,超級好睇!

    1

    丹戎海灘俱樂部 (Tanjong Beach Club)

    有別於聖淘沙 (Sentosa) 其他經唔起時間考驗嘅海灘酒吧,丹戎海灘俱樂部 (Tanjong Beach Club) 至今仍然係島上歷史最悠久、人氣最旺嘅聚會場所之一!呢間多合一娛樂殿堂集酒吧、餐廳同夜店於一身,擁有完美海灘酒吧所需嘅一切,包括豪華海景、客人專用嘅頂級泳池,同埋精美小食同飲品,又以雞尾酒更加不容錯過。

    講到丹戎海灘俱樂部另一項吸引之處,點可以唔提熱鬧非凡嘅沙灘 Party?每個月,酒吧都會舉辦唔同活動,例如 Smack My Beach UpFull Steam Ahead,邀請當地最出色嘅天才 DJ 聚首一堂,成大班人一齊飲酒跳舞,暢泳狂歡,High 爆全場!玩到半夜,可以點樣由聖淘沙返酒店?講真…除咗搭的士之外,都冇乜其他方法;而且,半夜的士需求量高,仲可能「一車難求」添!

    地點: 新加坡聖淘沙島丹戎海灘大道 20 號

    開放時間: 星期二至五 11:00 至 23:00;星期六至日 10:00 至 00:00 (逢星期一休息)

    電話: +65 6270 1355

    • 品嚐美食
    • 晚間娛樂
    2

    Wings of Time

    《Wings of Time》嘅前身係《Songs of the Sea》,全場精彩燈光表演長達 30 分鐘,以最先進嘅特效、眼花繚亂嘅電腦圖像,同埋悅耳迷人嘅音樂打造而成。

    繼往開來,《Wings of Time》將巨型噴泉嘅泉水噴上夜空之中,再以激光同 LED 燈營造頂級燈光效果,既可以令小朋友大開眼界,亦都係浪漫嘅約會勝地,仲可以俾你練習攝影技巧 (要拍低完美畫面,絕對唔易),為聖淘沙 (Sentosa) 全日行程畫上圓滿句號。

    地點: 099538 新加坡聖淘沙島灘景路 10 號

    開放時間: 每日 19:40 及 20:40

    電話: +65 6377 9688

    • 伴侶
    • 家庭
    • 晚間娛樂
    3

    聖淘沙 Hard Rock Cafe

    全球大部分 Hard Rock Cafe 嘅入口都設於街道兩邊,唯獨是呢間 Hard Rock Cafe 係例外—佢嘅入口位於聖淘沙 (Sentosa) 小島名勝世界度假村 (Resorts World) 嘅會議中心 (The Forum) 購物商場裡面,同樣充滿住廣為人知嘅經典美國搖滾魅力,而且每晚都有現場表演,牆上更加掛滿大量復古紀念品。

    呢度嘅菜單同其他 Hard Rock Cafe 大致相同,另外仲有亞洲菜式,任君選擇。事實上,你都唔使專程過來參觀嘅…如果你真係想去新加坡嘅 Hard Rock 朝聖,烏節路嘅分店仲好啲。不過,如果你想喺名勝世界睇完 Live Show、又或者「血拚」之後想飲杯嘢,呢度絕對係唔錯嘅好去處。

    地點: 098138 新加坡聖淘沙大道 26 號會議中心 #01-209 至 214

    開放時間: 每日 11:00 至 01:00

    電話: +65 6795 7454

    • 品嚐美食
    • 晚間娛樂

    相片由 ProjectManhattan 提供 (CC BY-SA 3.0) 經修改

    4

    新加坡 W 酒店嘅 WOOBAR

    呢間時尚酒吧隱身喺聖淘沙灣 (Sentosa Cove;聖淘沙島東南部) 富麗堂皇嘅 W 酒店裡面,就算淨係為咗嚟「朝聖」一下,都已經值得你專誠造訪!Woo Bar 面向海灘,可以眺望海景,用型格嘅紫藍白色做主題,現場有 DJ 為你送上悠揚音樂,而店家出品嘅雞尾酒更加係冠絕全島,你又點可以錯過?

    酒吧嘅裝飾秉承 W 品牌大膽潮爆嘅設計理念,以鮮豔色彩互相襯托,配搭懸掛式鳥籠等等充滿創意嘅座位安排,情侶們可以喺鳥籠入面歎杯雞尾酒,寫意又浪漫;而你仲可以選擇戶外位置,感受徐徐海風,或者喺日落西山之際,沿住酒店巨型泳池邊燈火通明嘅小徑散步,優哉悠哉!

    地點: 98374 新加坡聖淘沙灣海洋大道 21 號聖淘沙灣 W 酒店

    開放時間: 星期日至四 11:30 至 00:00;星期五至六 11:30 至 01:00

    電話: +65 6808 7258

    • 晚間娛樂
    • 豪華住宿
    5

    Privé Keppel

    Privé Waterfront Bar 坐落於新加坡唯一一座私人島嶼—吉寶島 (Keppel Island) 上面,集各種唔同嘅餐飲概念於一身,由 Waterfront Bar、Bakery Café,以及主打現代紐約風格嘅餐廳組成,

    最獨特之處在於令人難以抗拒嘅壯觀景色、美味嘅「拼盤」美食、清爽嘅飲品,同埋出色嘅音樂。講起 Privé Waterfront Bar,又點可以錯過由專業調酒師團隊創作嘅特色雞尾酒呢?靚景當前,配合特調美酒,啱哂 Party 狂歡一晚,又或者假日晏晝小酌一杯!

    地點: 098382 新加坡吉寶灣 Vista 2 號

    開放時間: 星期一至五 09:00 至 00:00;星期六至日 08:00 至 00:00

    電話: +65 6776 0777

    • 品嚐美食
    • 晚間娛樂
    • 豪華住宿
    6

    新加坡 Coastes

    位於聖淘沙 (Sentosa) 嘅 Coastes 坐擁純白觀景台同埋壯麗海景,以白色沙灘加上棕櫚樹作為背景,同泰國以至峇里島任何一片海灘比較,都唔會失色。不妨攤喺躺椅上面 Hea 一陣 (只要喺酒吧用餐或者飲酒,就可以免費使用躺椅),品嚐一下各式美食同飲品!

    Coastes 係漢堡、Pizza、意粉同海鮮嘅專家,菜式唔會畫蛇添足,只會專心為你帶嚟最難忘嘅滋味。如果你想搵一間由 09:00 開始全日營業嘅酒吧,一朝起身就喺海灘食早餐,Coastes 絕對係你唯一嘅選擇!Coastes 就喺聖淘沙島最受歡迎嘅西羅索海灘 (Siloso Beach) 上面,夾喺 Sand Bar 同 Bikini Bar 中間。

    地點: 新加坡聖淘沙島西羅索海灘

    開放時間: 星期日至四 09:00 至 23:00;星期五至六 09:00 至 01:00

    電話: +65 6631 8938

    • 品嚐美食
    • 晚間娛樂
    7

    聖淘沙鶴舞 (Crane Dance)

    聖淘沙 (Sentosa) 嘅《鶴舞 (Crane Dance)》堪稱合家歡視聽盛會,風格類似香港嘅《幻彩詠香江》。每星期嘅任何一晚,只要喺 20:00 嚟到聖淘沙名勝世界 (Resorts World Sentosa),即刻可以睇到兩隻優雅「戀人」隨音樂翩翩起舞,互訴愛意,點亮漆黑夜空。

    成場表演滿載突破性視聽效果、水光特效同 LED 燈效,而且費用全免,一晚又一晚為觀眾留低深刻印象。聖淘沙島同新加坡主島相距唔遠;不過,如果你唔想專誠到對岸,仲可以選擇喺主島上嘅怡豐城 (Vivo City) 欣賞呢場水舞表演。

    地點: 098269 新加坡聖淘沙關口 8 號

    開放時間: 每日 20:00 至 20:15

    • 伴侶
    • 家庭
    • 晚間娛樂
    8

    Bikini Bar

    Bikini Bar 吧如其名,充分滿足大家嘅期待—呢間酒吧位於西羅索海灘 (Siloso Beach) 上面,日日夜夜都有唔少著住泳裝嘅靚女,喺度享受美酒佳餚,「養眼」景色不容錯過!與其去搵聖淘沙 (Sentosa) 島上主打「邁阿密」風格嘅海灘酒吧,不如嚟 Bikini Bar 坐下,一邊玩海灘遊戲,一邊聽住節拍強勁嘅音樂,一邊暢飲價格相宜嘅飲品啦!

    Bikini Bar 同時亦被譽為新加坡首創、只此一家嘅「免登 (Bintang)」酒吧,有賣兩款極受歡迎嘅印尼啤酒,價格低至 SGD16,你又點可以唔試下?酒吧每個月仲會搞一場 Party,為著比堅尼嚟幫襯嘅女士提供只售 SGD8 嘅特價 Margarita!

    地點: 新加坡聖淘沙島西羅索海灘大道 50 號 #01-01

    開放時間: 星期一至四 14:00 至 23:00;星期五 14:00 至 01:00;星期六 11:00 至 01:00;星期日 11:00 至 23:00

    電話: +65 6631 8938

    • 晚間娛樂
    • 經濟實惠
    Penny Wong | 旅遊常客

    開始計劃行程

    Maps